Kushindulula Watachi
29 Kuhiñahu, Mwanta Davidi walejeli chipompelu chejima nindi: “Mwanami Solomoni anatondiwu kudi Nzambi,+ wuchidi kansi nawa heluka yuma yayivuluku,*+ nawa mudimu weneni, muloña hitembeli* yamuntuku, ilaña hitembeli yaYehova Nzambi.+ 2 Nawa ami nazati nañovu jami jejima kuloñesha yuma yakuzatisha kwitala daNzambi yami, naloñeshi wuru yakutuñamu yuma yawuru, siliva yakutuñamu yuma yasiliva, wuneñu wakutuñamu yuma yawuneñu, yikuñu yakutuñamu yuma yayikuñu,+ nyitondu+ yakutuñamu yuma yanyitondu, malola aonikisi, malola akulamika nandaaka, malola anyanya awulombu washiyashana akuwahisha nachu, malola ashiyashana alema wuseya nimalola aalabasita amavulu nankashi. 3 Kubombelahu, hamuloña wakukeña itala daNzambi yami,+ kudi niiheta dami dambukaku+ dawuru nisiliva dinnakuhana kwitala daNzambi yami, kubombela hayuma yejima yinnaloñeshi yakuzatisha kwitala dajila, 4 kushilahu nintalenta* 3,000 jawuru kufuma kuOfiri+ nintalenta 7,000 jasiliva yakweñununa, jakulambwija kumbañu jamatala, 5 wuru yakutuñamu yuma yawuru nisiliva yakutuñamu yuma yasiliva niyanyidimu yejima yikazatañawu akawukalawenu. Dichi anyi akudihana kuleta chawaana dalelu chakumwinka Yehova?”+
6 Dichi ayilolu anyitaña yawu, ayilolu anyichidi yaIsarela, antwamina jamakombakaji niajinkulakaji+ niakulumpi janyidimu yamwanta+ adihanini. 7 Nawa ahanini yuma yakuzatisha kumudimu wetala daNzambi walala: ntalenta 5,000 jawuru, madariki* 10,000, ntalenta 10,000 jasiliva, ntalenta 18,000 jawuneñu nintalenta 100,000 jayikuñu. 8 Muntu wejima wadiña namalola alema wuseya wayihanini kuchisweku chayuma yalema chamwitala daYehova, chadiña nakuhembawu kudi Yehiyeli+ mukaGeshoni.+ 9 Antu azañaleli hakuhana iyi nyilambu, muloña alambwili nyilambu mukudikeñela kudi Yehova namuchima wejima,+ nawa mwanta Davidi niyena wazañaleli nankashi.
10 Kufumahu, Davidi wamushimekeli Yehova hamesu achipompelu chejima. Davidi wahosheli nindi: “Eyi Yehova Nzambi yatata yetu Isarela, wushimekewi haya nyaaka nanyaaka.* 11 Eyi Yehova, kutoha+ niñovu+ nilubanji nikuwaha niwukeleñi* jeyi,+ muloña yuma yejima yekala mumawulu nihanu hamaseki jeyi.+ Eyi Yehova, wanta wekala weyi.+ Yeyi wunakudituumbakesha kubadika ejima. 12 Maheta nikulema jafuma kudi eyi,+ nawa wayuulaña yuma yejima,+ muchikasa cheyi mudi wuswa+ niñovu+ nawa chikasa cheyi chikweti wuswa wakutuumbakesha muntu+ nikukolesha ejima.+ 13 Ichi dinu, eyi Nzambi yetu, tunakusakilili nawa tunahameki ijina deyi dasweja kuwaha.
14 “Ochu ami yaminyi niantu jami hiyanyi mwaka tutweshi kulambula iyi nyilambu yejima mukudikeñela? Muloña yuma yejima yafuma kudi eyi nawa tunakwinki yuma yafumaña kuchikasa cheyi. 15 Muloña etu tudi añiinza kumesu eyi nawa enyi, neyi chidiwu ankakulula jetu ejima.+ Muloña mafuku akuhanda kwetu hamaseki adi neyi mwevulu,+ hitukweti kuchiñejaku. 16 Eyi Yehova Nzambi yetu, awa maheta ejima itunaloñeshi kulonda tutuñili nachu ijina deyi dajila itala, afuma kuchikasa cheyi nawa ejima eyi. 17 Eyi Nzambi yami, neluka chikupu nami watalatalaña mumuchima+ nawa watiyaña kuwaha muntu wamwekeshaña kashinshi.*+ Muloña wakwoloka* kwamuchima wami, nalambuli yuma yejimiyi mukudikeñela nawa nazañalali chikupu hakumona antu jeyi anapompi hanu chinakulambulawu nyilambu kudi eyi mukudikeñela. 18 Eyi Yehova, Nzambi yaAbarahama, Isaka niIsarela, ankakulula jetu, yikwashi awa antu jeyi atwalekihu kwikala namuchima wakudihana nikukukalakela namuchima wejima.+ 19 Nawa mwinki mwanami Solomoni muchima wakudihana chikupu+ kulonda ahembeña kuleja kweyi,+ yanukishu yeyi ninshimbi jeyi nikwila yuma yejimiyi nikutuña tembeli* yinnaloñesheli iyi yuma.”+
20 Kufumahu, Davidi walejeli chipompelu chejima nindi: “Ichi dinu muhamekenu Yehova Nzambi yenu.” Dichi chipompelu chejima chamuhamekeli Yehova Nzambi yawankakulula jawu nawa abandamini nakudifukula kudi Yehova nikudi mwanta. 21 Nawa atwalekelihu kumulambula Yehova nyilambu nikulambula nyilambu yakushita+ kudi Yehova hefuku dalondelelihu, anyana kañombi ayizamba 1,000, anyikoku ayizamba 1,000, anyana kanyikoku ayizamba 1,000 ninyilambu yawu yavinyu;+ alambwili nyilambu yayivulu nankashi yawaIsarela ejima.+ 22 Atwalekelihu kuda nikunwa kumesu aYehova hanidi ifuku nakuzañalala chikupu,+ nawa Solomoni mwana kaDavidi amwilishili kamuchiyedi kwikala mwanta nawa amuwayishili kumesu aYehova nakwikala nlomboli,+ Zadoki niyena amwilishili kwikala kapristu.+ 23 Nawa Solomoni washakamini hetanda daYehova+ nakwikala mwanta nakumusinsa tata yindi Davidi, nawa yuma yamuwahilileña niaIsarela ejima amwovwahilileña. 24 Ayilolu ejima,+ akakuzuña njita añovu+ nianyana kaMwanta Davidi+ awamayala ejima amwovwahilileña mwanta Solomoni. 25 Nawa Yehova wamwilishili Solomoni kwikala nañovu chikupu kumesu awaIsarela ejima nawa wamwinkeli wukeleñi wawanta wakwila kwosi mwanta waIsarela wekalilihu nawu kunyimaku.+
26 Dichi Davidi mwana kaYesi wayuulili aIsarela ejima, 27 nawa yaaka* yayuuliliyi aIsarela yadiña 40. MuHebironi wayuulili yaaka 7+ nawa muYerusalema wayuulili yaaka 33.+ 28 Nawa wafwili nawushinakaji wawuwahi,+ wadiluñishili wumi yaaka* yayivulu, namaheta nikulema; nawa mwanindi Solomoni wamuswanini nakwikala mwanta.+ 29 Kutalisha hansañu yahosha hadi Mwanta Davidi, kufuma hiyatachikilili nakushika hiyakuminini, ayisoneka hamu namazu aSamweli mukakumona jakumbidi, niakaprofwetu Natani+ niaGadi+ mukakumona yimwenu. 30 Iyi nsañu yahosha nihachiyuulu chindi chejima, ñovu jindi niyuma yamumwekeneni niyamwekeneni aIsarela nimawanta ejima amunyeñumukili.