Kwidika
31 Yehova watwalekelihu kumuleja Mosi nindi: 2 “Tiyaña, natondi* Bezaleli+ mwana kaUri, Uri mwana kaHuri wakumuchidi waYuda.+ 3 Nukumwinzesha naspiritu yaNzambi kuhitila mukumwinka maana, kashinshi nikwiluka yuma yejima yakundama kumudimu wawukalawenu, 4 kulonda akalakaleña nyidimu yakuleñaleña, yakuzata nawuru, siliva niwuneñu, 5 yakuketula malola nikuyitanjika chiwahi+ nikusoña yuma yashiyashana kuzatisha nyitondu.+ 6 Kubombelahu, natondi Oholiyabi+ mwana kaAhisamaki wakumuchidi waDani kulonda amukwasheñaku, nawa inakusha maana munyichima yawantu ejima elukisha nyidimu* kulonda atuñi yuma yejima yinnakuleji:+ 7 itenti dakubulakena,+ chimbañu chaWunsahu+ nichifwiku chachu, yuma yejima yamwitenti,+ 8 mesa+ niyipwepu yayu, chakutentekahu manoñu chawuru yakadi majilu niyipwepu yachu,+ kameña kainsensi,+ 9 kameña kanyilambu yakushita+ niyipwepu yaku, beseni* nihakuyitenteka,+ 10 yakuvwala yakupikula yayiwahi nankashi, yakuvwala yajila yakapristu Aroni, yakuvwala yawanyanindi awamayala yakukalakelamu mudimu wawupristu,+ 11 manji akuwayisha nachu niinsensi yevumba dadiwahi yamwiluña dajila.+ Akakalakala yuma yejima yinnakuleji.”
12 Yehova wamulejeli cheñi Mosi nindi: 13 “Hoshaku nawaIsarela nawa wuyileji neyi, ‘Sweje-e dinu, muhembeña masabata ami,+ muloña hichinjikijilu chami nanenu mumakiñu enu ejima kulonda mwakeluki nenu ami Yehova, yami inakuyijilika enu. 14 Muhembeña Sabata muloña hichuma chajila kudi enu.+ Muntu wudi wejima wukuyijilola atela kumujaha. Neyi muntu azata mudimu wudi wejima hasabata, muntu yenowu akamujahi nakumufumisha hadi antu jindi.*+ 15 Mwakazataña nyidimu hadi mafuku 6, ilaña ifuku damu 7 hisabata yakunooka chikupu.+ Hichuma chajila kudi ami Yehova. Muntu wakazataña mudimu hefuku daSabata, atela kumujaha. 16 AIsarela atela kuhemba Sabata; atela kwanuka Sabata mumakiñu awu ejima. Hichitiyañenu chahaya nyaaka. 17 Hichinjikijilu chahaya nyaaka hakachi kanami nawantu jaIsarela,+ muloña ami Yehova natuñili mawulu niiseki mumafuku 6 nawa hefuku damu 7 nanookeli nakutiya kuwaha.’”+
18 Dichi, chamanishiliyi tuhu kuhosha nindi haMpidi yaSinayi, wamwinkeli Mosi malola ayedi awubasa hanasonekiwu Wunsahu,+ malola awubasa hakusoneka namunu waNzambi.+