Kwidika
17 Izaza dawaIsarela dejima danyamukili nakufuma mwisaña daSini,+ endeleña nakuteeka-teeka kwesekeja namwayilejeliyi Yehova,+ nawa atuñilili chilombu chawu kuRefidimi.+ Ilaña hikwadiña menji ateleleli kunwawu antuku.
2 Dichi antu atachikili kumubobwesha Mosi+ nakuhosha nawu: “Twinki menji akunwa.” Ilaña Mosi wayilili nindi: “Muloñadi chimunakumbobweshela? Muloñadi chimunatwalekelihu nakumweseka Yehova?”+ 3 Ilaña kweniku antu atiyili mpwila yamenji nankashi nawa atwalekelihu nakumutoobela Mosi+ nawu: “Muloñadi chiwunatufumishili muEjipitu nakutujaha nampwila hamu nawanyanetu awamayala niyimuna yetu?” 4 Nkumininaku, Mosi wamudililili Yehova nindi: “Nukwila ñahi nanawa antu? Keña añasi malola!”
5 Kuhiñahu Yehova wamulejeli Mosi nindi: “Yañahu dehi hambidi yawantu nawa sendaku akulumpi amu awaIsarela nimbwechi yiweteli nachu haKaloña Nile.+ Yisendi muchikasa cheyi wuyeña. 6 Tiyaña! Nukwimana kwakwihi naneyi kwenoku helola muHorebi. Weti ilola, mukwidika menji nawa antu akuyinwa.”+ Mosi welili mwomwenomu hamesu awakulumpi jawaIsarela. 7 Dichi watuumbili idi iluña nindi Masa*+ niMeriba*+ muloña wakutooba kwawaIsarela nimuloña wakwila amwesekeli Yehova+ nakuhosha nawu: “Komana Yehova wudi mukachi ketu tahindi nehi?”
8 Kuhiñahu, aAmaleki+ enjili nakuzuña nawaIsarela kuRefidimi.+ 9 Hohenohu Mosi wamulejeli Yoshuwa+ nindi: “Tutondeli amayala ayi nakuzuña nawaAmaleki. Kumadiki nakemana hewulu dakapidi nambwechi yaNzambi walala muchikasa chami.” 10 Dichi Yoshuwa welili neyi chamulejeliwu kudi Mosi+ nawa wazuñili nawaAmaleki. Ilaña Mosi, Aroni niHuri+ akandukili hewulu dakapidi.
11 Neyi Mosi yatwalekahu kunyamuna makasa indi mwiwulu, aIsarela ashindileña, ilaña neyi yaholola makasa indi, aAmaleki ashindileña. 12 Makasa aMosi chiyazeyeli, anoneli ilola nakudisha mwishina dindi nawa washakaminihu. Kuhiñahu Aroni naHuri elili wumu kukabadi kamu, mukwawu kukabadi kakwawu, akwatilili makasa indi chakwila makasa indi atwalekelihu kukola kushika nimpinji yahumini itena. 13 Dichi Yoshuwa wamushindili Amaleki niantu jindi nampoku yakabali.+
14 Yehova wamulejeli Mosi nindi: “Sonekaku chumichi mumukanda kulonda chiikali chanukishu nawa wumulejimu niYoshuwa neyi, ‘Nakamujilumuna chikupu Amaleki chakwila hiyakamwanuka cheñi mwishina damawuluku.’”+ 15 Kuhiñahu Mosi watuñili kameña nawa wakituumbili nindi Yehova Nissi,* 16 nakuhosha nindi: “Muloña chikasa chaAmaleki chinakudikaña netanda daYa,+ Yehova wakalwaña njita nindi kufuma kwikiñu dimu nakushika kwikiñu dikwawu.”+