Kwidika

10 Kuhiñahu, Yehova wamulejeli Mosi nindi: “Iñilaku mudi Fwaru muloña ami neteji muchima windi ninyichima yawambuñindi kuchinchika+ kulonda nimwekeshi iyi yinjikijilu yami hamesu indi,+ 2 nawa kulonda wakaleji anyaneyi awamayala niejikulweyi chinnababeshi chikupu aEjipitu niyinjikijilu yinnakoñi mukachi kawu;+ chalala mwakeluka nenu yami Yehova.”

3 Dichi aMosi naAroni eñilili mudi Fwaru nakumuleja nawu: “Yehova Nzambi yawaHeberu nahoshi nindi, ‘Wukutwalekahu kukaana kuñovwahila kushika mpinjinyi?+ Yiiteji antu jami ayeña kulonda ankalakeli. 4 Muloña neyi wukutwalekahu kukaana kuyiteja antu jami kuya, kumadiki nakaleta tuboola muñinza. 5 Nawa twakataanda hamaseki hejima chakwila himwakatwesha kumona hesekiku. Twakada yuma yimwashalili nayu yabulili kukisika nanvula yamalola nawa twakada ninyitondu yenu yejima yinakumena mumaha enu.+ 6 Twakenzala mumatala eyi, mumatala awambuñeyi ejima nimumatala awaEjipitu ejima chakwila atata jenu nawankakulula jenu kanda amoneñahu dehi chuma chamuchidiwu kufuma hatachikili kushakamawu mudinu ituña kushika nikulelu.’”+ Hohenohu Mosi wabalumukili nakufuma kudi Fwaru.

7 Kuhiñahu, ambuña aFwaru amwihwili nawu: “Indi iwu iyala wukutwalekahu kutukabisha* kushika mpinjinyi? Yiiteji awa antu ayeña kulonda amukalakeli Yehova Nzambi yawu. Komana eyi wuneluki wanyi neyi Ejipitu anamukisi tahindi?” 8 Dichi aMosi naAroni ayifuntishili kudi Fwaru nawa yena wayilili nindi: “Yenuña mwakamukalakeli Yehova Nzambi yenu. Hanu dinu anyi akuya?” 9 Mosi waakwili nindi: “Tukuya nawantu jetu, dikwila nawu atwansi, akulumpi, anyanetu awamayala, anyanetu awambanda, anyikoku etu niañombi jetu,+ muloña tukwikala nachawija chaYehova.”+ 10 Yena wayilili nindi: “Neyi nukuyiteja enu nianyanenu kuya, dikwila nawu Yehova wudi nanenu!+ Chinamwekani hatooka nawu munakufwila kwila chuma chatama. 11 Inehi! Chiña hohu antu jenu awamayala diwu atela kuya nakumukalakela Yehova muloña ichi dichuma chimwalomba.” Hamuloña wachumichi, ayitemwini kumesu aFwaru.

12 Dichi Yehova wamulejeli Mosi nindi: “Ololaku chikasa cheyi hetuña daEjipitu kulonda tuboola twinzi mwituña daEjipitu nakuda yuma yejima yamenaña mwituña, yuma yejima yabulili kukisañanawu nanvula yamalola.” 13 Hohenohu Mosi wolweleli mbwechi yindi hetuña daEjipitu nawa Yehova wakojejeli mpepela yakumusela kukunkila mwituña mwaana wejima niwufuku wejima. Chikwelili ntetemena, mpepela yakumusela yaleteli tuboola. 14 Nawa tuboola twataandili mwituña daEjipitu dejima nawa twawilili mwiluña daEjipitu dejima.+ Twadiña twafwana chikupu;+ kanda kwikaleñahu dehi tuboola twatuvulu ñana nawa hikwakekalahu cheñi twatuvulu ñanaku. 15 Twataandili hewulu deseki dejima nawa ituña deyilili bwi-i natuboola; twadiili yuma yejima yamenaña ninyikaabu yanyitondu yabulili kujilumunawu nanvula yamalola; kwosi mafu ashalili kunyitondu hela yuma yamenaña mwisaña muEjipitu mwejima.

16 Dichi Fwaru watambikili aMosi naAroni swayi-swayi nakuyileja nindi: “Namuvulumuni Yehova Nzambi yenu ninenu. 17 Mwani ñanakenenuku nshidi jami aka hohu kakukumishaku nawa lembenu kudi Yehova Nzambi yenu kulonda yafumishi ichi chipupu chafwana hadi ami.” 18 Dichi wafumini* kudi Fwaru nawa walembeli kudi Yehova.+ 19 Kuhiñahu, Yehova wabalumwini yina mpepela nakwikala mpepela yakumujika yasweja ñovu nankashi nawa yasendeli tuboola nakutunatila muKaluñalwiji Kachinana. Kwosi kaboola hela kamu kashalili mwituña dejima daEjipituku. 20 Hela chochu, Yehova wetejeli muchima waFwaru kuchinchika+ nawa yena wayitejeli wanyi aIsarela kuya.

21 Kuhiñahu, Yehova wamulejeli Mosi nindi: “Ololaku chikasa cheyi mumawulu kulonda mwituña daEjipitu mwiikali mwidima, mwidima wasweja chikupu.” 22 Hohenohu Mosi wolweleli chikasa chindi mumawulu, dichi kwekalili mwidima wasweja chikupu mwituña daEjipitu dejima hadi mafuku asatu.+ 23 Hikwadiña muntu wamweneña mukwawuku, nawa hakachi kawu hosi wanyamukili mwiluña mwadiñayi hadi mafuku asatuku; ilaña kwashakamineñawu aIsarela ejima kwadiña chejeji.+ 24 Kuhiñahu, Fwaru watambikili Mosi nakumuleja nindi: “Yenuña mwakamukalakeli Yehova.+ Ilaña mukushiya hohu anyikoku enu niañombi jenu. Nianyanenu muyi hamu nawu.” 25 Ilaña Mosi wahosheli nindi: “Yoweneyi wukutwinka* ninyilambu yayimuna ninyilambu yakushita kulonda twakayilambuli kudi Yehova Nzambi yetu.+ 26 Niyimuna yetu tukuya nayu hamu. Kwosi chimuna* hela chimu chitukushiya, muloña yimuna yimu twakayizatishaña hakudifukula kudi Yehova Nzambi yetu nawa tuneluki wanyi yuma yitwakalambulaña hakudifukula kudi Yehova sampu tunashiki kwenoku.” 27 Dichi Yehova wetejeli muchima waFwaru kuchinchika nawa yena wayitejeli wanyi kuya.+ 28 Fwaru wamulejeli nindi: “Fumaku kumesu ami! Bayi wakacheseka kwinza cheñi kudi amiku, muloña hefuku diwakenza kudi ami, wakafwa.” 29 Hohenohu Mosi wahosheli nindi: “Neyi chiwunahoshi, hinamba kacheseka kwinza cheñi kudi eyiku.”