Kwidika

38 Watuñili kameña kamutondu wamuzenzi kakulambwilahu mulambu wakushita. Kesekeni mumbadi jejima jiwana, mukuleha kadiña makyubiti* atanu, muwihi makyubiti atanu nawa mukuleha kwiwulu makyubiti asatu.+ 2 Kuhiñahu, watuñilili nseñu jaku mumawombu aku awana. Nseñu jaku wajituñilili kwoku. Kufumahu wakilambwijili wuneñu.+ 3 Hanyima yayumiyi, watuñili yipwepu yakameña yejima, dikwila nawu yifwoyu, mafosholu, yeña yakunama, mafoloku* nijakusendelahu kesi. Yipwepu yaku yejima yadiña yakutuña nawuneñu. 4 Watuñili nichikañu chakameña chayikuñu yawuneñu nakuchisha mwishina damwowelu kwakwihi nahakachi kakameña. 5 Watuñili tuzeya tuwana nakutwisha hamawombu awana kwakwihi nachikañu chawuneñu kulonda tukwateña nyalachi. 6 Kuhiñahu, wasoñeli nyalachi yamutondu wamuzenzi nawa wayilambwijili wuneñu. 7 Washili nyalachi mutuzeya twadiña mumbavu jakameña kulonda akisendeleñaku. Watuñili kameña kamapulanga kadiña neyi chikasha chenzunuka hewulu niheshina.

8 Kuhiñahu, watuñili beseni* yawuneñu+ nihakuyitenteka hawuneñu. Wazatishili yibanjilu* yawambanda adiloñesheli kuzatila hawiñililu wakwitenti dakubulakena.

9 Kufumahu welili lubanza.+ Kukabadi kakuchidiilu kalubanza kutalisha kukabeta kakuchidiilu, watuñililiku mahina akujika nachu akukudika ehina dawanda wakushinta chiwahi, aleheli makyubiti 100.+ 10 Kwadiña yishimi 20 nimayanda 20 awuneñu nawa nkobu jayishimi nitunuñilu* twayu twadiña twasiliva. 11 Kukabadi kakukabeta kakuchimunswa, kwadiña mahina akujika nachu akukudika, aleheli makyubiti 100. Yishimi yawu 20 nimayanda awu 20 adiña awuneñu. Nkobu jakuyishimi nitunuñilu* twayu twadiña twasiliva. 12 Ilaña kukabadi kakukabeta kakumujika, kwadiña mahina akujika nachu akukudika, aleheli makyubiti 50. Kwadiña yishimi 10 nimayanda 10, nawa nkobu jakuyishimi nitunuñilu* twayu twadiña twasiliva. 13 Muwihi wakukabadi kakumusela, kwaselelaña itena, mwadiña makyubiti 50. 14 Kukabadi kamu kwadiña mahina akujika nachu akukudika aleheli makyubiti 15 hamu nayishimi yisatu nimayanda asatu. 15 Nawa kukabadi kakwawu kakuwiñililu wakuchiisu chakulubanza, kwadiña mahina akujika nachu akukudika aleheli makyubiti 15 hamu nayishimi yisatu nimayanda asatu. 16 Mahina ejima akukudika akujika nachu anyeñumukili mwakumina lubanza, adiña ehina dawanda wakushinta chiwahi. 17 Mayanda akwimikamu yishimi adiña awuneñu, nkobu jakuyishimi nitunuñilu* twayu jadiña jasiliva, hewulu alambwijilihu siliva nawa kwadiña tukasilu twasiliva twakukasa nachu kuyishimi yejima yalubanza.+

18 Ihina dakwaambula nachu dakuwiñililu wakulubanza dadiña dakupikula nawanda wabulu, wawusombu, wuchinana nge-e ninehina dawanda wakushinta chiwahi. Mukuleha dadiña makyubiti 20 nawa mukuleha kwiwulu makyubiti atanu neyi chaleheli kwiwulu mahina akukudika akujika nachu mwakumina lubanza.+ 19 Yishimi yadu yiwana nimayanda akuyimikamu awana jadiña jawuneñu. Nkobu jayu jadiña jasiliva nawa alambwijili siliva hewulu dayishimi nikutunuñilu* twayu. 20 Mpopu jejima jakwitenti databanaka nijanyeñumukili lubanza jadiña jawuneñu.+

21 Yuma yinalondelihu diyazatishiliwu hakutuña tabanaka, yoyu tabanaka mudi malola awubasa hanasonekiwu Wunsahu,+ yuma yayilejeliwu aLevi+ kudi Mosi nindi ayichindi kuhitila mukuyilombola kudi Itamari+ mwana kakapristu Aroni. 22 Bezaleli+ mwana kaUri, Uri mwana kaHuri wakumuchidi waYuda, wakoñeli yuma yejima yamulejeliwu Mosi kudi Yehova. 23 Wadiña hamu naOholiyabi+ mwana kaAhisamaki wakumuchidi waDani, mukawukalawenu nawa mukakuchima wanda wabulu, wawusombu, wuchinana nge-e niihina dadiwahi.

24 Wuru yejima yazatishiliwu kumudimu wejima wajila yesekeni nakuvula kwawuru yamulambu wakuzuyañesha.+ Iyi wuru yadiña ntalenta* 29 nimashekeli* 730 kwesekeja nalushekeli lwatelela lwamwiluña dajila.* 25 Nawa siliva yezaza dawantu asonekeliwu, yashikili ntalenta 100 nimashekeli 1,775 kwesekeja nalushekeli lwatelela lwamwiluña dajila.* 26 Lushekeli lwachibalu lwahaniniyi muntu-himuntu lwadiña lushekeli lwachibalu kwesekeja nalushekeli lwateleleli lwamwiluña dajila.* Amayala ejima hakachi kanowu asonekeliwu adiña nayaaka 20 nakuya hewulu,+ ashikili ku 603,550.+

27 Mali asiliva azatishiliwu kutuña nachu mayanda amwiluña dajila nimayanda akwihina dakujika nachu adiña ntalenta 100. Mayanda 100 ayituñili nantalenta 100, ntalenta yimu iyanda dimu.+ 28 Mumashekeli 1,775, watuñilimu nkobu jakuyishimi nawa walambwijili hewulu dayishimi nikujinuñila hamu.

29 Mulambu wawuneñu* wadiña ntalenta 70 nimashekeli 2,400. 30 Muyumiyi watuñilimu mayanda akuwiñililu wakwitenti dakubulakena, kameña kawuneñu nichikañu chaku chawuneñu, yipwepu yejima yakameña, 31 mayanda anyeñumukili mwakumina lubanza, mayanda akuwiñililu wakulubanza nimpopu jejima jakwitenti databanaka nimpopu jejima jakwitenti+ danyeñumukili mwakumina lubanza.