Kwidika
18 Dichi kapristu Yetiro wakuMidiyani, muku waMosi weyala+ watiyili yuma yejima Nzambi yamukoñeleliyi Mosi niantu jindi aIsarela nichayifumishiliwu aIsarela muEjipitu+ kudi Yehova. 2 Yetiro muku waMosi weyala wasendeli Zipora ñoda Mosi chamufuntishiliwu kudi yena, 3 hamu nawanyanindi awamayala ayedi.+ Mwana wumu amutuumbili nawu Geshomu,*+ muloña Mosi wahosheli nindi, “Ami nekali ñiinza mwituña dambala,” 4 nawa mukwawu wamutuumbili nindi Eliyezeri,* muloña wahosheli nindi, “Nzambi yatata yami diyi nkwashi yami owu wampulwishili kumpoku yakabali yaFwaru.”+
5 Dichi, Yetiro muku waMosi weyala wenjili hamu nawanyana kaMosi awamayala niñodindi, enjili kudi Mosi mwisaña mwatuñililiyi chilombu kumpidi yaNzambi walala.+ 6 Kuhiñahu wamutemesheleli Mosi mazu nindi: “Ami Yetiro muku weyi+ inakwinza kudi eyi hamu nañodeyi nianyanindi awamayala ayedi.” 7 Hohenohu Mosi wayili nakumukinkilila muku windi weyala nawa wabandamini nakumufufwa. Wejima wawu adihwili chinakuhandawu, kufumahu eñilili mwitenti.
8 Mosi wamulumbulwilili muku windi weyala yuma yejima yakoñeliyi Yehova kudi Fwaru nikudi Ejipitu hakupulwisha aIsarela,+ kukabakana kwejima kuyahitilimu munjila+ nichayipulwishiliwu kudi Yehova. 9 Yetiro wazañaleli hakutiya yuma yejima yayiwahi yayikoñeleliwu aIsarela kudi Yehova hakuyipulwisha muEjipitu.* 10 Kuhiñahu Yetiro wahosheli nindi: “Yehova ashimekewi, owu wayipulwishili kudi Ejipitu nikudi Fwaru nawa wapulwishili antu kuchiyuulu chaEjipitu. 11 Ichi dinu neluki nami Yehova wabadika anzambi acheñi ejima+ muloña wachuma chayikoñeliyi antu adikañili nawantu jindi.” 12 Kuhiñahu, Yetiro muku waMosi weyala waleteli mulambu wakushita ninyilambu yayimuna yakuhana kudi Nzambi nawa Aroni niakulumpi jawaIsarela ejima enjili nakudiila hamu yakuda namuku waMosi weyala kumesu aNzambi walala.
13 Hefuku dalondelelihu, Mosi washakamini nakusompesha antu neyi chelileñayi diikalu nawa antu atwalekelihu kwimana kumesu aMosi kufuma ntetemena kushika nimelela. 14 Muku waMosi weyala chamweniyi yuma yejima yayikoñeleleñayi antu, wamwihwili nindi: “Yumanyi iyi yiwunakuyikoñela awa antu? Muloñadi chiwashakaminaña hanu nkaweyi nawantu ejima emanaña kumesu eyi kufuma ntetemena kushika nimelela?” 15 Mosi wamwakwili muku windi nindi: “Muloña antu anatwalekihu kwinza kudi ami nakulomba wunlomboli waNzambi. 16 Neyi kunamwekani muloña, awuletaña kudi ami nawa ami nayisompelaña antu ejima ayedi nawa nayilejaña wunsompeshi waNzambi walala ninshimbi jindi.”+
17 Mosi amulejeli kudi muku windi nindi: “Chuma chiwunakwila chachiwahi wanyi. 18 Chakadi nikujina eyi nanawa antu adi hamu naneyi mukuzeya, muloña ichi chiteli chinakutoheli nawa hiwukutwesha kuchisenda nkaweyiku. 19 Ichi dinu ntiyilili. Inakukulejaku maana nawa Nzambi wukwikala naneyi.+ Eyi wiikali ñimeni yawantu kumesu aNzambi walala+ nawa wutwaleña nyiloña kudi Nzambi walala.+ 20 Wuyilejeña chekala yishina ninshimbi+ nawa wuyilejeña njila yatela kwendawu nimudimu watela kuzatawu. 21 Dichi wutondi mukachi kawantu amayala ashikilamu,+ amutiyaña Nzambi woma, amayala akuhwelelawu ahela kuheta munjila yawupwapoki+ nawa wenawa wuyitondi ekali antwamina amakombakaji, antwamina ajinkulakaji, antwamina amakumi atanu niantwamina amakumi.+ 22 Akusompeshaña antu neyi kwikala nyiloña, nawa akuletaña kudi eyi muloña wejima wakala,+ ilaña muloña wejima wapela wena diwu akuwusompaña. Anzañanaku ichi chiteli nawena kulonda wudipelesheliku mudimu.+ 23 Neyi wila mwenimu nawa Nzambi eteja, wukuzataña chiwahi nawa muntu wejima wukuyaña kwitala dindi namuzañalu.”
24 Hohenohu Mosi wamutiyilili muku windi weyala nawa welili mwejima mwahosheliyi. 25 Mosi watondeli amayala ashikilamu mudi aIsarela ejima nawa wayitondeli kwikala anlomboli* jawantu, antwamina amakombakaji, antwamina ajinkulakaji, antwamina amakumi atanu niantwamina amakumi. 26 Dichi asompesheleña antu neyi kwikala nyiloña. Muloña wakala awutwalileña kudi Mosi,+ ilaña muloña wejima wapela wena diwu awusompeleña. 27 Hanyima yachumichi, Mosi wamushinjikijiliku muku windi weyala+ nawa muku windi wayili kwituña dawu.