Yeremiya

32 Izu denjili kudi Yeremiya kufuma kudi Yehova muchaaka chamu 10 chaMwanta Zedekiya waYuda, dikwila nawu chaaka chamu 18 chaNebukaneza.*+ 2 Haniyi mpinji amashidika amwanta waBabiloni akuchikileña Yerusalema, nawa kaprofwetu Yeremiya amukwatili nakumuhemba muLubanza lwawaNhembi+ mwitala* damwanta waYuda. 3 Muloña Mwanta Zedekiya waYuda wamukwatili nakumwila nindi,+ “Muloñadi chiwunaprofweteli ñana? wunakuhosha neyi, ‘Yehova nahoshi nindi: “Nukuhana iwu musumba muchikasa chamwanta waBabiloni, yena wukuwutambula,+ 4 nawa Mwanta Zedekiya waYuda hakayitemuka aKalideyaku, muloña mwamweni akamuhana muchikasa chamwanta waBabiloni, nawa yena wakahosha nindi kanwa-nakanwa nawa wakadimona nindi mesu namesu.”’+ 5 ‘Wakamutwala Zedekiya kuBabiloni, nawa wakatwalekahu kushakama kwenoku sampu nabalumukili kudi yena. Hela chakwila mukutwalekahu kuzuña nawaKalideya, himukushindaku,’ dichinahoshiyi Yehova.”+

6 Yeremiya wahosheli nindi: “Izu daYehova dinenzi kudi ami, nawu, 7 ‘Hanameli mwana kaShalumi mana kwatata yeyi wukwinza kudi eyi nakukwila nindi: “Landaku iha dami didi muAnatoti,+ muloña yeyi wukweti wuswa watachi wakudilandulula.”’”+

8 Hanameli mwana kamana kwatata yami wenjili kudi ami muLubanza lwawaNhembi, neyi chahosheliyi Yehova, nawa wañilili nindi: “Mwani landaku iha dami didi muAnatoti, mwituña daBenjamini, muloña yeyi wukweti wuswa wakudiswana nikudilandulula. Dilandi diikali deyi.” Hohenohu nelukili nami idi hiizu daYehova.

9 Dichi nalandili iha muAnatoti kudi Hanameli mwana kamana kwatata yami. Napimini mali+ nakumwinka, mashekeli* 7 niyikunku 10 yasiliva. 10 Kufumahu, nayisonekeli mumukanda,+ nalamikiliku chilamiku, natambikili ayinsahu+ nawa napimini mali hasikelu. 11 Nanoneli mukanda wakulanda nachu, wunalamikili chilamiku kwesekeja nanshimbi niyuma yakeñekaña, nimukanda wunabulili kulamika chilamiku, 12 nawa nahanini mukanda wakulanda nachu kudi Baruki+ mwana kaNeriya+ mwana kaMaseya hamesu aHanameli mwana kamana kwatata yami, ayinsahu asonekeli mumukanda wakulanda nachu, niaYudeya ejima ashakamini muLubanza lwawaNhembi.+

13 Dichi namulejeli Baruki hamesu awu nami: 14 “Yehova wamazaza, Nzambi yaIsarela, nahoshi nindi, ‘Sendaku iyi nyikanda, iwu mukanda wakulanda nachu wakulamika chilamiku niniwu wukwawu wakadi kulamika chilamiku, wuyishi muchipwepu chewumba, kulonda yakashakami yaaka yayivulu.’ 15 Muloña Yehova wamazaza, Nzambi yaIsarela nahoshi nindi, ‘Matala nimaha nimatempa anyivinyu akayilanda cheñi mudinu ituña.’”+

16 Hanyima yakumwinka Baruki mwana kaNeriya mukanda wakulanda nachu, nalombeli kudi Yehova nami: 17 “Mama eyi Yehova Mwanta Wabadika! Talaña! Waleñeli mawulu niiseki nañovu jeyi jabadika+ ninachikasa cheyi chakwolola. Kwosi chuma chasweja kubadika kudi eyiku, 18 eyi wamwekeshelaña makombakaji kukeña kwakashinshi, ilaña chiluwa chakoñeliwu atata jawantu wafwetelañamu anyanawu avwalikaña hanyima yawu,+ eyi Nzambi walala, wabadika nawa wañovu, eyi wukweti ijina daYehova wamazaza. 19 Yeyi wabadika mukufumba* nawa wabadika munyidimu,+ wukweti mesu ashinshikaña njila jejima jawantu,+ kulonda wufweti muntu-himuntu kwesekeja nanjila jindi nikwesekeja nayuma yelañayi.+ 20 Wunakoñi yinjikijilu niyihayamisha mwituña daEjipitu, yelukawu kushika nikulelu, dichi wunadituñili eyi aweni ijina muIsarela nimudi antu,+ neyi chichidi dalelu. 21 Nawa wayifumishili antu jeyi aIsarela mwituña daEjipitu, nayinjikijilu, nayihayamisha, nachikasa chañovu, nachikasa chakwolola ninanyidimu yakutiyisha woma.+

22 “Mukuhita kwampinji, wayinkeli idi ituña diwasanyikili kwinka ankakulula jawu,+ ituña dasweja mayeli niwuchi.+ 23 Nawa enjili nakushakamamu, ilaña hiyovwahilili izu deyi hela kulondela nshimbi jeyiku. Hiyelilihu chuma chejima chiwayilejeli neyi eliku, dichi eyi wakojejeli iku kukala kwejima kuyimwekena.+ 24 Talaña! Antu anenzi nayuma yakukuchika nachu kulonda atambuli musumba,+ nawa muloña wampoku yakabali,+ nzala yakapwelendendi nichipupu,*+ musumba wukuholokela mumakasa awaKalideya anakuwuzuñisha; yuma yiwashimwini yejima yinamwekani, neyi ichi chiwunakumona. 25 Eyi Yehova Mwanta Wabadika, ilaña eyi wunanleji neyi, ‘Dilandili eyi aweni iha namali nawa wutambiki niayinsahu,’ hela chakwila musumba akuwuhana muchikasa chawaKalideya.”

26 Hohenohu izu daYehova denjili kudi Yeremiya nawu: 27 “Yami onu, ami Yehova, Nzambi yawantu ejima.* Kudihu chuma chasweja kubadika kudi ami? 28 Dichi, Yehova nahoshi nindi, ‘Inakuhana iwu musumba kudi aKalideya nimuchikasa chaMwanta Nebukaneza* wakuBabiloni, nawa yena wukuwutambula.+ 29 Nawa aKalideya anakuzuñisha iwu musumba akwinza nakuwocha nakesi nawa akuwochela+ kumu namatala akweti yisu halambwilañawu antu nyilambu kudi Bayali nawa hahuñunwinañawu nyilambu yavinyu kudi anzambi amakwawu nakunzuwisha.’+

30 “Yehova nahoshi nindi, ‘Muloña antu amuIsarela niamuYuda anakukoña hohu yuma yatama kumesu ami, kufuma kuwansi wawu;+ antu amuIsarela anatwalekihu kunzuwisha namudimu wakumakasa awu. 31 Muloña iwu musumba, kufuma tuhu hefuku dawutuñiliwu kushika nikwifuku dalelu, wankojejaña hohu kuzuwa nikulendumuka,+ dichi atela kuwufumisha kumesu ami,+ 32 muloña wayuma yatama yejima yinakoñiwu antu amuIsarela niamuYuda nakunzuwisha, wena, anyanta jawu,+ ayilolu jawu,+ atupristu awu, atuprofwetu awu+ niantu amuYuda niashakamaña muYerusalema. 33 Atwalekelihu kunfutalela, chatela antalishili chamesu;+ hela chakwila nesekeli kuyidizisha kapampa kakavulu,* kwosi hela wumu hakachi kawu wadiña nakutiyilila kulonda atambwili kufumbaku.+ 34 Nawa adiña nakusha ankishi jawu awuzondu mwitala dikweti ijina dami, kulonda aditamishi.+ 35 Kubombelahu, atuñili yinañanaña yaBayali muChinekineki chaMwana kaHinomi,*+ kulonda ahitisheñahu anyanawu awamayala niawambanda mukesi nakumulambula Moleki,+ chuma chinabulili kuyileja+ nawa chabulili kwinzahu nikumuchima wami* chakukoña chuma chawuzondu ñana, nakumuletesha Yuda kuvulumuna.’

36 “Dichi, Yehova Nzambi yaIsarela nahoshi kutalisha haniwu musumba wumunakuhosha nenu akuwuhana muchikasa chamwanta waBabiloni nampoku yakabali, nanzala yakapwelendendi ninachipupu, nindi, 37 ‘Inakuyipompesha hamu kufuma kumatuña ejima kunayipalañesheleli nakuzuwa kwami, nakulendumuka kwami ninakuhila kwakweni,+ nawa nukuyifuntisha kudinu iluña nakuyishakamisha mukuwunda.+ 38 Nawa akwikala antu jami, ninami nukwikala Nzambi yawu.+ 39 Nawa nukuyinka muchima wumu+ ninjila yimu kulonda antiyeña woma mpinji yejima, kulonda yuma yakayiwahileña wena nianyanawu akavwalikaña hanyima yawu.+ 40 Nawa nukutiyañana nawu chitiyañenu chahaya nyaaka,+ chakwila nawu hinakalekahu kuyilila yuma yayiwahiku;+ nawa munyichima yawu nakashamu kuntiya woma, kulonda akabuli kufuma kudi ami.+ 41 Nakazañalala nakuyilila yuma yayiwahi,+ nawa nakayishimatisha chikupu mudinu ituña+ namuchima wami wejima ninawumi* wami wejima.’”

42 “Muloña Yehova nahoshi nindi, ‘Neyi chinnayileteli awa antu iku kukala kwejima kwasweja, dichinakayiletela niyuma yejima yayiwahi yinnakuyikana.+ 43 Nawa maha akayilanda cheñi mudinu ituña,+ hela chakwila munakuhosha nenu: “Dashala kwamahembi hohu chakadi antu nianyama, nawa anadihani kudi aKalideya.”’

44 “Yehova nahoshi nindi, ‘Maha akayilanda namali, nyikanda yakulanda nachu akayisoneka nawa akayenzela nakushaku chilamiku, nawa ayinsahu akayitambika mwituña daBenjamini,+ mumaluña anyeñumuka Yerusalema, munyisumba yamuYuda,+ munyisumba yamwiluña damapidi, munyisumba yamunkulu+ nimunyisumba yakukabeta kakuchidiilu, muloña nakafuntisha ankoli jawu.’”+