Kwidika
35 Chimwahitili mpinji, Mosi wapompesheli izaza dawaIsarela dejima nakuyileja nindi: “Iyi diyuma yinashimuniyi Yehova nindi mwileña:+ 2 Mwakazataña nyidimu hadi mafuku 6, ilaña ifuku damu 7 dakekala dajila kudi enu, hisabata yakumunookela chikupu Yehova.+ Muntu wakazataña mudimu hanidi ifuku, atela kumujaha.+ 3 Hefuku daSabata, bayi mwakabutula kesi mumaluña enu akushakama adi ejimaku.”
4 Kuhiñahu, Mosi walejeli izaza dawaIsarela dejima nindi: “Ilu dilushimbi lunahaniyi Yehova nindi, 5 ‘Mwinkenu Yehova yawaana kufuma mukachi kenu.+ Muntu wejima wukweti muchima wakuhana+ amuleteli Yehova iyi yawaana: wuru, siliva, wuneñu, 6 wanda wabulu, wawusombu, wuchinana nge-e, ihina dadiwahi, mavuji ampembi,+ 7 yitembi yanyikoku yayizamba yakuloomba wulombu wuchinana, yitembi yamayobu,* nyitondu yanyizenzi, 8 manji amumanoñu, manji akuwayisha nachu abalisamu niinsensi yevumba dadiwahi,+ 9 malola aonikisi* nimalola amakwawu akusha mwiifwodi*+ niipakumuna dahantulu.+
10 “‘Antu ejima elukisha nyidimu*+ adi mukachi kenu enzi nakutuña yuma yejima yinashimuniyi Yehova. 11 Yuma yeniyi, hitabanaka niitenti dayu nichakubutahu chayu, nkobu jayu nimafuremu ayu, nkañalu yayu, yishimi yayu nimayanda ayu; 12 Chimbañu+ ninyalachi yachu,+ chijiku+ niihina dakujika nachu+ dakwaambula nachu; 13 mesa+ ninyalachi yayu, yipwepu yayu yejima nimankendi akutenteka kumesu aNzambi; + 14 chakutentekahu manoñu+ akutoñeka chejeji, yipwepu yachu, manoñu achu nimanji achejeji;+ 15 kameña kainsensi+ ninyalachi yaku; manji akuwayisha nachu niinsensi yevumba dadiwahi;+ ihina dakwaambula nachu* dakuwiñililu wakutabanaka; 16 kameña kakochelahu nyilambu yakushita+ nichikañu chaku chawuneñu, nyalachi yaku niyipwepu yaku yejima; beseni* nihakuyitenteka;+ 17 mahina akukudika akujika nachu mwakumina lubanza,+ yishimi yayu nimayanda ayu; ihina dakwaambula nachu* dakuwiñililu wakulubanza; 18 nimpopu jatabanaka nimpopu jalubanza ninyonji yaju;+ 19 yakuvwala yakupikula yayiwahi nankashi+ yakukalakelamu mwiluña dajila, yakuvwala yajila yakapristu Aroni+ niyakuvwala yawanyanindi awamayala yakukalakelamu mudimu wawupristu.’”
20 Dichi izaza dawaIsarela dejima dafumini kudi Mosi. 21 Kuhiñahu, antu ejima adiña namuchima wakuhana,+ amuleteleli Yehova yawaana yawu kulonda ayizatisheña kwitenti dakubulakena, kunyidimu yadu yejima nikuyakuvwala yajila. 22 Amayala niambanda ejima adiña namuchima wakuhana, aleteleña mapengeli* awuru,* tuzeya twakumatu, tuzeya niyingelingeli yamboka-mboka, kushilahu niyuma yashiyashana yawuru. Wejima wawu alambwileña nyilambu yawu yawuru kudi Yehova.+ 23 Niantu ejima adiña nawanda wabulu, wawusombu, wuchinana nge-e, ihina dadiwahi, mavuji ampembi, yitembi yanyikoku yayizamba yakuloomba wulombu wuchinana niyitembi yamayobu,* ajileteli. 24 Antu ejima ahanineña yawaana yasiliva niyawuneñu amuleteleli Yehova. Ejima adiña nanyitondu yanyizenzi yakuzatisha kumudimu wudi wejima, niwena ayileteli.
25 Ambanda ejima elukisha kushinta,+ ashintili yuma namakasa awu nawa ayileteli: wanda wabulu, wanda wawusombu, wanda wuchinana nge-e nimahina amawahi. 26 Nawa ambanda ejima elukishili nyidimu adiña namuchima wakuhana, ashintili mavuji ampembi.
27 Anlomboli jawantu niwena aleteli malola aonikisi* nimalola amakwawu akusha mwiifwodi* niipakumuna dahantulu,+ 28 manji abalisamu, manji amumanoñu, manji akuwayisha nachu+ niinsensi yevumba dadiwahi.+ 29 Amayala ejima niambanda adiña namuchima wakuhana, aleteli yuma yakuzatisha kumudimu washimwiniyi Yehova kuhitila mudi Mosi nindi awukalakali. AIsarela aleteli yumiyi kulonda yiikali mulambu wakudikeñela wakumulambula Yehova.+
30 Kuhiñahu, Mosi wayilejeli aIsarela nindi: “Tiyenu, Yehova natondi Bezaleli mwana kaUri, Uri mwana kaHuri wakumuchidi waYuda.+ 31 Yena namwinzeshi naspiritu yaNzambi kuhitila mukumwinka maana, kashinshi nikwiluka yuma yejima yakundama kumudimu wawukalawenu, 32 kulonda akalakaleña nyidimu yakuleñaleña, yakuzata nawuru, siliva niwuneñu, 33 yakuketula malola nikuyitanjika chiwahi nikusoña yuma yashiyashana kuzatisha nyitondu. 34 Nawa Nzambi nayinki aBezaleli naOholiyabi+ mwana kaAhisamaki wakumuchidi waDani, wuswa wakudizisha akwawu. 35 Nayinzeshi cheñi nawuswa+ wakukalakala nyidimu yejima yamukawukalawenu, yamukakuchima niyamukakutuña wazatishaña wanda wabulu, wawusombu, wuchinana nge-e niihina dadiwahi niyamukakupikula. Awa amayala akakalakala mudimu wudi wejima nikuloñesha mudimu wudi wejima chiwatela kwikala.