Kwidika

36 Bezaleli wukuzatila hamu naOholiyabi niiyala wejima welukisha nyidimu* owu anenkiwu maana nikashinshi kudi Yehova kulonda yeluki chakukalakala nyidimu yejima yamudimu wajila kwesekeja nachinahoshiyi Yehova.”+

2 Kuhiñahu, Mosi watambikili Bezaleli niOholiyabi kushilahu niiyala wejima welukisha nyidimu enkeliwu maana kudi Yehova mumuchima windi+ nimuntu wejima wadihanini mumuchima windi kulonda adihani kuzata mudimu.+ 3 Kufumahu, asendeli yawaana yejima kudi Mosi+ yaleteliwu aIsarela yakuzatisha kumudimu wajila. Hela chochu, awa antu atwalekelihu kumuletela nyilambu yakudikeñela, hantetemena-hantetemena.

4 Dichi chatachikiliwu kukalakala mudimu wajila, antu ejima elukisha nyidimu enjileña wumu-wumu. 5 Nawa amulejeleña Mosi nawu: “Antu anakuleta yuma yayivulu nankashi kubadika yinakukeñeka kumudimu wunashimuniyi Yehova nindi awuzati.” 6 Dichi Mosi walejeli antu nindi abidiki muchilombu chejima nawu: “Enu amayala niambanda, bayi muleta cheñi yuma yikwawu yayawaana yajilaku.” Hohenohu antu ayilekesheli kuleta cheñi yuma yidi yejima. 7 Yuma yaleteliwu yashikilili kumanisha nachu mudimu wejima, nawa yabadikili nimuchipimu.

8 Dichi antu ejima elukisha nyidimu+ atuñili tabanaka+ namahina 10 ehina dawanda wakushinta chiwahi, dawanda wabulu, wawusombu niwuchinana nge-e. Hanowu mahina yena* wachimininihu akerubi.+ 9 Ihina dejima dakwitenti dadiña mukuleha makyubiti* 28 nawa muwihi makyubiti awana. Mahina ejima akwitenti adiña esekana. 10 Kuhiñahu, mahina atanu akwitenti wayinuñili hamu nawa mahina amakwawu atanu akwitenti niwena wayinuñili hamu. 11 Kufumahu, kunsa yehina dimu dakwitenti washiliku maswa awanda wabulu kwakuyinuñila. Dicheliliyi nikunsa yikwawu yehina dakwitenti dakunsa heluña hayinuñililiyi hamu. 12 Washiliku maswa 50 kwihina dimu dakwitenti nawa kunsa yehina dikwawu dakwitenti nikwena washiliku maswa 50 heluña hayinuñililiyi hamu kulonda awa maswa aditalashani dimu nadikwawu. 13 Nkumininaku, wachilili nkobu 50 jawuru, wanuñili mahina akwitenti hamu kuzatisha iji nkobu nawa tabanaka yekalili yimu.

14 Kuhiñahu, watuñili mahina akwitenti amavuji ampembi akubuta hatabanaka. Watuñili mahina 11 akwitenti.+ 15 Ihina dejima dakwitenti dadiña mukuleha makyubiti 30 nawa muwihi makyubiti awana. Mahina ejima 11 akwitenti adiña esekana. 16 Kufumahu, wanuñili hamu mahina atanu akwitenti nawa mahina amakwawu 6 akwitenti niwena wayinuñili hamu. 17 Kuhiñahu, washiliku maswa 50 kunsa yehina dakwitenti dakunsa hadinuñililiwu, nawa kunsa yehina dikwawu nikwena washiliku maswa 50 hadinuñililiwu nadikwawu. 18 Nawa wachilili nkobu 50 jawuneñu jakunuña nachu hamu itenti kulonda diikali chuma chimu.

19 Watuñili chakujika hetenti chakutuña nayitembi yanyikoku yayizamba yakuloomba wulombu wuchinana nichakujikahu chakutuña nayitembi yamayobu.*+

20 Kuhiñahu, wasoñeli mafuremu amutondu wamuzenzi+ akutabanaka nawa wayimikili.+ 21 Furemu-hifuremu yadiña makyubiti 10 mukuleha kwiwulu nawa muwihi kyubiti yimu nachikunku. 22 Furemu-hifuremu yadiña nanyishiki yiyedi yanuñililiwu hamu. Ichi dichatuñiliyi mafuremu ejima akutabanaka. 23 Dichi kukabadi kakukabeta kakuchidiilu katabanaka, wasoñeleliku mafuremu 20 atalishili kukabeta kakuchidiilu. 24 Kuhiñahu, watuñili mayanda asiliva 40 akusha kwishina damafuremu 20, kwishina dafuremu yimu kwadiña mayanda ayedi mwakusha nyishiki yayu yiyedi nawa kwishina damafuremu amakwawu alondelelihu washiliku mayanda ayedi-ayedi mwakusha nyishiki yayu yiyedi.+ 25 Kukabadi kakwawu katabanaka, kukabeta kakuchimunswa, wasoñeleliku mafuremu 20, 26 nawa adiña namayanda asiliva 40, kwishina dafuremu yimu washiliku mayanda ayedi nawa kwishina damafuremu amakwawu washiliku mayanda ayedi-ayedi.

27 Kunyima yatabanaka kumujika, wasoñeleliku mafuremu 6.+ 28 Wasoñeli mafuremu ayedi ekalili yishimi yamumawombu atabanaka, mumawombu akunyima ayedi. 29 Yishimi wayibombeli hamu kufuma kwishina nakushika kwiwulu, ndo-o nikukazeya katachi. Ichi dicheliliyi nayishimi yejima yiyedi yamumawombu. 30 Dichi ekalili mafuremu 8 hamu namayanda awu asiliva 16, kwishina damafuremu ejima kwadiña mayanda ayedi-ayedi.

31 Kuhiñahu wapulili nkañalu jamutondu wamuzenzi, jitanu jadiña jakumafuremu akukabadi kamu katabanaka,+ 32 nawa nkañalu jitanu jadiña jakumafuremu akukabadi kakwawu katabanaka, nawa jikwawu jitanu jadiña jakumafuremu akutabanaka kunyima kumujika. 33 Kuhiñahu, wapulili nkañalu yahakachi oyu yahitili hakachi kamafuremu kufuma kunsa yimu nakushika kunsa yikwawu. 34 Mafuremu wayilambwijili wuru nawa wachilili tuzeya twawu twawuru twakukwatisha nachu nkañalu, nawa nkañalu wayilambwijili wuru.+

35 Kuhiñahu watuñili ihina dakujika nachu+ nawanda wabulu, wawusombu, wuchinana nge-e ninehina dawanda wakushinta chiwahi. Wachimininihu akerubi+ hanodu ihina.+ 36 Kufumahu, wasoñeli yishimi yiwana yamutondu wamuzenzi yakukudikaku odu ihina nawa wayilambwijili wuru hamu nankobu jawuru. Nawa iyi yishimi wayituñilili mayanda awana asiliva. 37 Kuhiñahu, kuwiñililu wakwitenti watuñililiku ihina dakwaambula nachu,* wadituñili nawanda wabulu, wawusombu, wuchinana nge-e ninehina dawanda wakushinta chiwahi, wakupikula,+ 38 niyishimi yadu yitanu ninkobu jayu. Hewulu dayishimi nikutunuñilu* twayu walambwijilihu wuru, ilaña mayanda ayu atanu adiña awuneñu.