Yeremiya
40 Izu denjili kudi Yeremiya kufuma kudi Yehova hanyima yelili Nebuzaradani+ mukulumpi wawatulama namuumbiku dehi kuRama.+ Wamutwalili kwenoku iku makasa indi anayikasi namaleñi, nawa wadiña hakachi kawankoli ejima amuYerusalema niamuYuda, atwaliliwu kuBabiloni. 2 Kufumahu, mukulumpi wawatulama wamusendeli Yeremiya nakumwila nindi: “Yehova Nzambi yeyi washimwineñahu dehi iyi yihuñu yinashikeni idi iluña, 3 nawa Yehova nayileti kwesekeja nachahosheliyi, muloña enu antu mwamuvulumwini Yehova nawa himwovwahilili izu dindiku. Dichinaleteshi yumiyi yiyimwekeni.+ 4 Ichi dinu dalelu inakukukasununa maleñi adiña kumakasa eyi. Neyi wunamoni neyi chidi chiwahi kuya nanami kuBabiloni, tuyi, nawa nukukwakamenaña. Ilaña neyi wunakukeña wanyi kuya nanami kuBabiloni, shalaku. Talaña! Wakasunuka mudinu ituña dejima. Yaku kwejima kuwunakeñi.”+
5 Henohu Yeremiya kanda yafuukulihu kufunta, Nebuzaradani wahosheli nindi: “Funtaku kudi Gedaliya+ mwana kaAhikami, Ahikami+ mwana kaShafani,+ anatondiwu kudi mwanta waBabiloni kutala nyisumba yamuYuda, nawa wushakami nindi hamu nawantu; hela yaku kwejima kuwunakeñi.”
Kuhiñahu, mukulumpi wawatulama wamwinkeli yakuda niyawaana nawa wamuumbiliku nindi ayeña. 6 Dichi Yeremiya wayili kudi Gedaliya mwana kaAhikami kuMizipa+ nawa washakamini nindi hamu nawantu ashalili mwituña.
7 Chimwahitili mpinji, akulumpi ejima awamashidika adiña mumasaña nawantu jawu atiyili nawu mwanta waBabiloni natondi Gedaliya mwana kaAhikami kulonda ataleña ituña nawa nawu namutondi ataleña niamayala, ambanda nianyana kawatuzweñi amwituña abulili kutwalawu kuBabiloni.+ 8 Dichi enjili kudi Gedaliya kuMizipa.+ Akulumpi wenawa adiña Ishimayeli+ mwana kaNetaniya, Yohanani+ niYonatani anyana kaKareya, Seraya mwana kaTahumeti, anyana kaEfayi wakuNetofa niYezaniya+ mwana kamwini Mayakati hamu nawantu jawu awamayala. 9 Gedaliya mwana kaAhikami, Ahikami mwana kaShafani wasanyikili kudi wena nikudi antu jawu awamayala nindi: “Bayi mutiya woma kukalakela aKalideyaku. Shakamenu mwituña nawa mukalakelenu mwanta wakuBabiloni nawa yuma yikuyiwahilaña.+ 10 Hakwila ami, nukushakama muMizipa kulonda niyimeneñaku kudi* aKalideya akwinzaña kudi etu. Ilaña mwatela kupompesha vinyu, nyikaabu yamunooña, nimanji nakuyisha muyipwepu yenu yakuhembelamu nawa mushakami munyisumba yimunatambuli.”+
11 Nawa aYudeya ejima adiña muMowabi, muAmoni nimuEdomi, kubombelahu niadiña mumaluña amakwawu ejima, niwena atiyili nawu mwanta waBabiloni neteji ashalahu kushakama muYuda nawa nawu natondi Gedaliya mwana kaAhikami, Ahikami mwana kaShafani kulonda ayitaleña. 12 Dichi aYudeya ejima atachikili kufunta kufuma kumaluña ejima kwayipalañesheleliwu, enjili mwituña daYuda kudi Gedaliya kuMizipa. Nawa apompesheli vinyu ninyikaabu yamunooña yayivulu chikupu.
13 Yohanani mwana kaKareya niakulumpi ejima awamashidika adiña mumasaña enjili kudi Gedaliya kuMizipa. 14 Amwilili nawu: “Komana eyi wuneluki wanyi neyi Bayalisi, mwanta wawaAmoni,+ natemeshi Ishimayeli mwana kaNetaniya kulonda akujahi?”*+ Ilaña Gedaliya mwana kaAhikami wayikuhweleleli wanyi.
15 Kufumahu, Yohanani mwana kaKareya wamulejeli Gedaliya kuMizipa mukuswamujoka nindi: “Inakukeña kuya nakumujaha Ishimayeli mwana kaNetaniya, nawa kwosi hela wumu wukwilukaku. Muloñadi chikukujahilayi,* nawa muloñadi antu ejima amuYuda anapompi kudi eyi chakuyipalañeshelawu niashalahu amuYuda chikunoñelawu?” 16 Ilaña Gedaliya+ mwana kaAhikami wamulejeli Yohanani mwana kaKareya nindi: “Bayi wila mwenomuku, muloña nsañu yiwunakuhosha hadi Ishimayeli yamakudi.”