Kwidika
14 Dichi Yehova wamulejeli Mosi nindi: 2 “Lejaku aIsarela neyi abalumuki kulonda ateekeli kuPihahiroti, hakachi kaMigidoli nakaluñalwiji, kwatalañana naBayali Zefoni.+ Muteekeli kwakwihi nakaluñalwiji kwatalañana naBayali Zefoni. 3 Kuhiñahu, Fwaru wukuhosha kutalisha hadi aIsarela nindi, ‘Anakululuta mwituña. Anakañanyi kuwana njila yakufuminamu mwisaña.’ 4 Nukwiteja muchima waFwaru kuchinchika+ nawa wukuyikumpisha, nukudilemesha ami aweni kuhitila mukumwimika Fwaru mushindu ninjita yindi;+ nawa aEjipitu akwiluka chikupu nawu yami Yehova.”+ Ichi dicheliliwu.
5 Nkumininaku, amulejeli mwanta wakuEjipitu nawu antu anatemuki. Hohenohu Fwaru niambuñindi ahimpili yitoñojoka yawu hadi awa antu+ nawa ahosheli nawu: “Tweliladi chumichi nakuumbaku aIsarela anduñu atukalakelaña?” 6 Dichi waloñesheli makalu indi anjita nawa wayili hamu nawantu jindi.+ 7 Wasendeli makalu 600 atondeliyi nimakalu amakwawu ejima amuEjipitu nawa hekalu niikalu hadiña amashidika. 8 Dichi Yehova wetejeli muchima waFwaru mwanta wakuEjipitu kuchinchika nawa wayikupishili aIsarela, iku aIsarela anakwidika nakuya chakadi kwakama.*+ 9 Ayikumpishili+ kudi aEjipitu nawa tuwalu twejima twaFwaru twakokeleña makalu niamashidika indi endeleleña hatuwalu niamashidika indi akakwenda hamaseki, aswinineña kwakwihi nawena hateekeleliwu kwakwihi nakaluñalwiji kuPihahiroti kwatalañana naBayali Zefoni.
10 Fwaru chaswininiyi kwakwihi, aIsarela afumbwili mesu awu nawa amweni anakuyikumpisha kudi aEjipitu. AIsarela atiyili woma chikupu nakutachika kumudilila Yehova.+ 11 Amwilili Mosi nawu: “Wunatuleti munu mwisaña+ kulonda tufwilimu muloña wakwila muEjipitu mwosi maluña akujiikahu tahindi? Wunatwililidi chuma chamuchidiwu nakutufumisha muEjipitu? 12 Komana ichi hidichuma chitwakulejeli muEjipitu netu, ‘Tuleki kwetu kulonda tuyikalakeli aEjipituku’ tahindi? Muloña chachiwahi etu kuyikalakela aEjipitu kubadika kufwila mwisaña.”+ 13 Kuhiñahu, Mosi wayilejeli antu nindi: “Bayi mutiya womaku.+ Imanenu akola mbe-e kulonda mumoni wamwinu waYehova wukuyimwekeshelayi dalelu.+ Muloña aEjipitu imunakumona dalelu, mwakayimonahu cheñi wanyi.+ 14 Yehova yomweni wukuyizuñilaku,+ nawa enu mukukumina dakumwena nzo-o.”
15 Dichi Yehova wamulejeli Mosi nindi: “Muloñadi chiwunatwalekelihu nakundilila? Lejaku aIsarela atwalekihu nalwendu lwawu. 16 Hakwila eyi, nyamunaku mbwechi yeyi wolweli chikasa cheyi hakaluñalwiji wukaambuli, kulonda aIsarela ahiti hakachi kakaluñalwiji heseki dooma. 17 Ilaña ami, nukwiteja nyichima yawaEjipitu kuchinchika kulonda eñili nakuyipupilila; dichi nukudilemesha ami aweni kuhitila mukumushinda Fwaru niamashidika indi ejima, makalu indi anjita niamashidika indi endelaña hatuwalu.+ 18 Nawa aEjipitu akwiluka chikupu nawu yami Yehova neyi nidilemesha ami aweni kuhitila mukumushinda Fwaru, makalu indi anjita niamashidika indi endelaña hatuwalu.”+
19 Kuhiñahu, kañelu kaNzambi walala+ owu watwaminineñaku hambidi yezaza dawaIsarela, wafuminiku nakuya kunyima yawu nawa chishimi cheevu chadiña kumbidi yawu chayili nakwimana kunyima yawu.+ 20 Dichi ichi chishimi cheevu chemeni hakachi kezaza dawaEjipitu nezaza dawaIsarela.+ Kukabadi kamu, chadiña ivu damwidima. Kukabadi kakwawu, chatoñekeleña chejeji nawufuku.+ Dichi izaza dimu daswinini wanyi kwakwihi nezaza dikwawu wufuku wejima.
21 Kuhiñahu, Mosi wolweleli chikasa chidi hakaluñalwiji;+ nawa Yehova wafuntishili kaluñalwiji hanyima nampepela yañovu yakumusela wufuku wejima, nakukojeja heseki dakaluñalwiji kuuma+ nawa menji adaambwili.+ 22 Dichi aIsarela ahitili hakachi kakaluñalwiji heseki dooma,+ iku menji anatuñi mbañu kukabadi kachikasa chawu chachidiilu nikukabadi kachikasa chawu chachimunswa.+ 23 Ayikumpishili kudi aEjipitu nawa tuwalu twejima twaFwaru, makalu indi anjita niamashidika indi endeleleña hatuwalu atachikili kuyikumpisha hakachi kakaluñalwiji.+ 24 Hachilu chakumacha,* Yehova washinshikili hezaza dawaEjipitu iku wudi muchishimi chakesi nicheevu+ nawa waluwañesheli izaza dawaEjipitu. 25 Watwalekelihu kuzokola tufumbu kumakalu awu chakwila akabakeneña hakuyendesha nawa aEjipitu ahosheleña nawu: “Tuyitemukenu aIsarela, muloña Yehova nakuyilwilaku kudi aEjipitu.”+
26 Kufumahu, Yehova wamulejeli Mosi nindi: “Ololaku chikasa cheyi hakaluñalwiji kulonda menji afunti nakuyibuta aEjipitu, makalu awu anjita niamashidika awu endelaña hatuwalu.” 27 Hohenohu Mosi wolweleli chikasa chindi hakaluñalwiji nawa chikwayileña nakucha, kaluñalwiji kafuntili neyi chikadiña hakusambila. AEjipitu chatemukileñawu kufuma hakaluñalwiji, Yehova wayilukumwinini aEjipitu mukaluñalwiji.+ 28 Menji afuntileña abutili makalu anjita, amashidika endeleleña hatuwalu niamashidika ejima aFwaru ayili nakuyikumpisha hakaluñalwiji.+ Hosi niwumu hakachi kawu wapulukiliku.+
29 Ilaña aIsarela endeli heseki dooma hakachi kakaluñalwiji+ nawa menji atuñili mbañu kukabadi kachikasa chawu chachidiilu nichachimunswa.+ 30 Dichi Yehova wayipulwishili aIsarela kudi aEjipitu+ hanodu ifuku nawa aIsarela ayimweni aEjipitu anafwi kuchikumu chakaluñalwiji. 31 AIsarela amweni cheñi ñovu* yasweja yamwekesheliyi Yehova hadi aEjipitu nawa antu atachikili kumutiya Yehova woma nikumukuhwelela Yehova nikambuñindi Mosi.+