Kwidika
37 Kuhiñahu, Bezaleli+ watuñili Chimbañu+ namutondu wamuzenzi. Mukuleha chadiña makyubiti* ayedi nachikunku, muwihi kyubiti yimu nachikunku nawa mukuleha kwiwulu kyubiti yimu nachikunku.+ 2 Wachilambwijili wuru yakadi majilu mukachi nihanji nawa wanyeñumwishiliku mukinkita wawuru.+ 3 Kuhiñahu, watuñililiku nituzeya twawuru tuwana nakutwisha hewulu danyendu yiwana yachimbañu, kukabadi kachu kamu washiliku tuzeya tuyedi, kukabadi kakwawu washiliku tuzeya tuyedi. 4 Kufumahu, wasoñeli nyalachi yamutondu wamuzenzi nawa wayilambwijili wuru.+ 5 Kuhiñahu, weñijili oyu nyalachi mutuzeya twadiña mumbavu yaChimbañu kulonda asendeleñaku Chimbañu.+
6 Watuñili chijiku chawuru yakadi majilu.+ Mukuleha chadiña makyubiti ayedi nachikunku nawa muwihi kyubiti yimu nachikunku.+ 7 Kuhiñahu wabazilili akerubi ayedi+ awuru yakuchila kunsa jejima jiyedi jachijiku.+ 8 Kerubi wumu wamushili kunsa yimu nawa kerubi mukwawu kunsa yikwawu. Wachililili akerubi kunsa jejima jiyedi jachijiku. 9 Akerubi ayedi atandumwini mpuula jawu mwiwulu nakubuta hachijiku nampuula jawu.+ Aditalishilili nawa atalishili chamesu hachijiku.+
10 Kuhiñahu, watuñili mesa yamutondu wamuzenzi.+ Mukuleha yadiña makyubiti ayedi, muwihi kyubiti yimu nawa mukuleha kwiwulu kyubiti yimu nachikunku.+ 11 Wayilambwijili wuru yakadi majilu nawa wanyeñumwishiliku mukinkita wawuru. 12 Kufumahu, watuñililiku mwowelu kwi-i ndo-o wesekeni namuwihi wachikasa* nimukinkita wawuru wanyeñumukili kumwowelu. 13 Kubombelahu, watuñililiku nituzeya twawuru tuwana nawa otu tuzeya watushili hamawombu awana hanuñililiwu nyendu yiwana. 14 Tuzeya twadiña kwakwihi namwowelu kulonda tukwateña nyalachi yazatishileñawu kusendelaku mesa. 15 Kuhiñahu, wasoñeli nyalachi yamutondu wamuzenzi nawa wayilambwijili wuru kulonda ayizatisheña kusendelaku mesa. 16 Kufumahu, watuñili yipwepu nawuru yakadi majilu yashiliyi hamesa, dikwila nawu yeña yachu, makaapu,* yeña yachu yakunama ninyilondu yachu mwahuñunwinineñawu nyilambu yavinyu.+
17 Kuhiñahu, watuñili chakutentekahu manoñu+ nawuru yakadi majilu. Ichi chakutentekahu manoñu chadiña chakubaza nawuru yakuchila. Heshina dachu, mwendu wachu, makaapu,* mahumba achu ninkenu jachu, jadiña chuma chimu hohu.+ 18 Kumwendu wachakutentekahu manoñu kwafumini nyitayi 6, nyitayi yisatu kukabadi kamu, nyitayi yikwawu yisatu kukabadi kakwawu. 19 Makaapu* asatu afwana nkenu yaamondi adiña kunyitayi yakukabadi kamu namahumba ninkenu yashiyashana. Nawa makaapu asatu afwana nkenu yaamondi adiña kunyitayi yakukabadi kakwawu namahumba ninkenu yashiyashana. Ichi dicheliliwu nanyitayi 6 yafumini kumwendu wachakutentekahu manoñu. 20 Nawa kumwendu wachakutentekahu manoñu kwadiña makaapu* awana afwana nkenu yaamondi namahumba ninkenu yashiyashana. 21 Ihumba dimu dadiña mwishina danyitayi yatachi yiyedi yafumini kumwendu nawa ihumba dikwawu dadiña mwishina danyitayi yalondelelihu yiyedi, nawa ihumba dikwawu dadiña mwishina danyitayi yalondelelihu yiyedi. Nyitayi yafumini kumwendu wachakutentekahu manoñu yadiña nyitayi 6. 22 Mahumba, nyitayi nichakutentekahu manoñu chejima, jadiña chuma chimu hohu chakubaza nawuru yakuchila nawa yakadi majilu. 23 Kuhiñahu, watuñili manoñu achu 7,+ nzamba jachu nijakusendelahu kesi, jadiña jawuru yakadi majilu. 24 Wachituñili hamu nayipwepu yachu yejima kuzatisha wuru yakadi majilu yakushika kuntalenta yimu.*
25 Dichi watuñili kameña kainsensi+ namutondu wamuzenzi. Kadiña kesekana mumbadi jejima jiwana, mukuleha kadiña kyubiti yimu, muwihi kyubiti yimu nawa mukuleha kwiwulu makyubiti ayedi. Nseñu jaku wajituñilili kwoku.+ 26 Wakilambwijili wuru yakadi majilu, hewulu daku, mumbadi jaku mwejima nikunseñu jaku nawa wanyeñumwishiliku mukinkita wawuru. 27 Watuñililiku tuzeya tuyedi twawuru mwishina damukinkita waku kutubadi twejima tuyedi kulonda tukwateña nyalachi yakuzatisha hakusenda oku kameña. 28 Kuhiñahu, wasoñeli nyalachi yamutondu wamuzenzi nawa wayilambwijili wuru. 29 Watuñili cheñi manji ajila akuwayisha nachu+ niinsensi yakadi majilu yevumba dadiwahi,+ jakubomba chiwahi nankashi.