Kwidika
40 Kuhiñahu, Yehova wamulejeli Mosi nindi: 2 “Hefuku datachi dakakweji katachi, wakatuñi tabanaka, dikwila nawu itenti dakubulakena.+ 3 Wakashimu chimbañu chaWunsahu+ nawa kuChimbañu wakajikiku ihina dakujika nachu.+ 4 Wakaletelimu mesa+ nikuloñesha yuma yakutentekahu. Wakaleti nichakutentekahu manoñu+ nawa wakabutuli manoñu achu.+ 5 Kufumahu, wakashi kameña kawuru kakwochelahu insensi+ kumbidi yachimbañu chaWunsahu nawa kuwiñililu wakutabanaka wakashiku ihina dakwaambula nachu.*+
6 “Wakashi kameña kakulambwilahu mulambu wakushita+ kumbidi yakuwiñililu wakutabanaka, dikwila nawu itenti dakubulakena, 7 wakashi beseni* hakachi haneli iku itenti dakubulakena iku kameña nawa wakasheñamu menji.+ 8 Kufumahu, wakeli lubanza+ nakulunyeñumwishaku kwi-i ndo-o nawa kuwiñililu wakulubanza wakashiku ihina dakwaambula nachu.*+ 9 Kuhiñahu, wakanoni manji akuwayisha nachu.+ Wakawayishi tabanaka niyuma yejima yidimu+ nawa wakayijiliki hamu nayipwepu yayu yejima kulonda yakekali chuma chajila. 10 Wakawayishi kameña kakulambwilahu mulambu wakushita hamu nayipwepu yaku yejima nawa wakajiliki kameña kulonda kakekali kameña kajila chikupu.+ 11 Wakawayishi beseni* nihakuyitenteka nawa wakayijiliki.
12 “Kuhiñahu, wakaleti Aroni nianyanindi awamayala kwakwihi nawiñililu wakwitenti dakubulakena nawa wakayiweleshi namenji.+ 13 Wakamuvwiki Aroni yakuvwala yajila+ nawa wakamuwayishi+ nikumujilika kulonda akankalakeleña mudimu wawupristu. 14 Kuhiñahu, wakaleti anyanindi awamayala kwakwihi nawa wakayivwiki nyinkukumba.+ 15 Wakayiwayishi neyi chiwakawayisha tata yawu+ kulonda akankalakeleña mudimu wawupristu. Chineli anawayishewi, mudimu wawupristu wakatwalekahu kwikala wawu haya nyaaka mumakiñu awu ejima.”+
16 Mosi welili mwejima neyi chamulejeliwu kudi Yehova.+ Welili mwomwenomu.
17 Mukakweji katachi, muchaaka chamuchiyedi, hefuku datachi dakakweji, tabanaka ayituñili.+ 18 Mosi chatuñileñayi tabanaka, washili mayanda ayu+ kwishina, wemikili mafuremu,+ washiliku nkañalu yayu+ nawa washiliku niyishimi yayu. 19 Watandumwinini itenti+ hatabanaka nawa washilihu chakujikahu+ chetenti neyi chamulejeliwu kudi Yehova.
20 Kuhiñahu, wanoneli malola awubasa hasonekeliwu Wunsahu+ nakuyisha muChimbañu,+ washili nyalachi+ kuChimbañu nawa wabutili chijiku+ haChimbañu.+ 21 Waleteli Chimbañu mutabanaka nawa washili ihina dakujika nachu+ dakwaambula nachu* kulonda dijiki kuchimbañu chaWunsahu+ neyi chamulejeliwu Mosi kudi Yehova.
22 Kuhiñahu, washili mesa+ mwitenti dakubulakena kukabadi kakukabeta kakuchimunswa katabanaka hanji yehina dakujika nachu, 23 nawa watentekeli mankendi+ mumusululu hamesa kumesu aYehova neyi chamulejeliwu Mosi kudi Yehova.
24 Washili chakutentekahu manoñu+ mwitenti dakubulakena kumbidi yamesa, kukabeta katabanaka kakuchidiilu. 25 Wakwatishili manoñu+ kumesu aYehova neyi chamulejeliwu Mosi kudi Yehova.
26 Kuhiñahu, washili kameña kawuru+ mwitenti dakubulakena kumbidi yehina dakujika nachu, 27 kulonda insensi yevumba dadiwahi+ yikakumukileñahu wishi+ neyi chamulejeliwu Mosi kudi Yehova.
28 Kufumahu, kuwiñililu wakutabanaka washiliku ihina dakwaambula nachu.*+
29 Washili kameña kakulambwilahu mulambu wakushita+ kuwiñililu wakutabanaka, dikwila nawu itenti dakubulakena kulonda yalambwileñahu mulambu wakushita+ nimulambu wambutu neyi chamulejeliwu Mosi kudi Yehova.
30 Kuhiñahu, washili beseni* hakachi haneli iku itenti dakubulakena iku kameña nawa washileñamu menji akuwela.+ 31 Mosi, Aroni nianyanindi awamayala aweleleleñamu kumakasa nikunyendu. 32 Mpinji yejima elileña neyi hiyakuya mwitenti dakubulakena hela hiyakuswina kwakwihi nakameña, aweleleña+ neyi chamulejeliwu Mosi kudi Yehova.
33 Nkumininaku, welili lubanza+ nakulunyeñumwisha kutabanaka kwi-i ndo-o nikameña nawa kuwiñililu wakulubanza washiliku ihina dakwaambula nachu.*+
Dichi Mosi wamanishili iwu mudimu. 34 Hohenohu ivu datachikili kubuta hetenti dakubulakena nawa kulema kwaYehova kwenzeli mutabanaka.+ 35 Mosi watwesheli wanyi kuya mwitenti dakubulakena muloña ivu datwalekelihu kwimana hetenti nawa kulema kwaYehova kwenzeli mutabanaka.+
36 Mulwendu lwawu lwejima, aIsarela elileña neyi ivu difuma hatabanaka, anyamukileña nakuya.+ 37 Ilaña neyi ivu kufumahu nehi, anyamukileña wanyi sampu niifuku didakafumahu.+ 38 Ivu daYehova demeneña hatabanaka namwaana nawa nawufuku hekalileña kesi. Amwitala daIsarela ejima amweneña yumiyi mulwendu lwawu lwejima.+