Yeremiya
17 “Nshidi yaYuda anayisoneki nansonekeshu yachikuñu.
Anayibazili helola dawubasa damuchima wawu nansonekeshu yadayimani
Nihanseñu jatumeña twawu,
2 Iku anyanawu anakwanuka tumeña twawu niyishimi yawu yajila*+
Yidi kukabadi kamutondu wawuwahi, hatupidi twatulehi,+
3 Hamapidi adi mwisaña.
Yuma yeyi, maheta eyi ejima, nakayihana neyi yuma yakupuupa,+
Mwamweni, yinañanaña yeyi, muloña wanshidi yiwunakoñi mumaluña eyi ejima.+
4 Eyi aweni, wakajimbesha wuswana weyi wunakwinkeli.+
Nawa nakakukojeja wakazatileña ayilumbu jeyi mwituña diwabula kwiluka,+
Kukabutukaña hohu haya nyaaka.”
5 Yehova nahoshi nindi:
“Washiñewa yowu muntu* wakuhwelelaña mudi antu hohu,+
Wakinkaña manuñu muñovu jawantu,*+
Nawa wukweti muchima wadaambulaña kudi Yehova.
6 Wakekala neyi mutondu wudi nkawawu muchinkalampata.
Neyi yuma yayiwahi yinenzi wakayimona wanyi,
Ilaña wakashakamaña mumaluña ominina mwisaña,
Mwituña damuñwa mwakukañanya kushakama muntu.
8 Wukwikala neyi mutondu watumbawu kumenji,
Watwalaña nyiji yindi mukaloña.
Neyi nkanza yinenzi wakayitiya wanyi,
Ilaña mafu indi akatenkumaña mpinji yejima.+
Nawa muchaaka chachaaña hakakamañaku,
Nawa hakaleka kusoña nyikaabuku.
9 Muchima wadimbanaña chikupu kubadika chuma chejima nawa watama nankashi.*+
Hinyi wunateli kuwiluka?
10 Ami Yehova, inakusandujola muchima,+
Inakushinshika chikupu yitoñojoka yayeni yamukachi,*
Kulonda nimufweti muntu wejima kwesekeja nanjila jindi,
Kwesekeja nanyikaabu yanyidimu yindi.+
Akamushiya hakachi kachihandilu chindi,
Nawa nkumininaku, wakamwekana wusupi.”
12 Itanda dajila, datuumbakana kufuma kukutachika,
Hiiluña detu dajila.+
13 Eyi Yehova, mwakuhwelela Isarela,
Antu ejima anakukushiya akatiya nsonyi.
Ejima anakusekesha nakufuma kudi eyi* akayisoneka mulunkuñu,+
Muloña anamushiyi Yehova, kaseloki kamenji awumi.+
14 Ñuuki, eyi Yehova, nawa nukuukewa.
Ñamwini, nawa nukwamwinewa,+
Muloña eyi yeyi inashimekaña.
15 Tiyaña! Kudi anakuñila nawu:
“Izu daYehova didi kudihi?+
Dinzi mwani!”
16 Ilaña ami, hakwikala kabiña hinatemukili nakuleka kukulondela eyi,
Hela kufwila ifuku damakabiku.
Weluka chiwahi yuma yejima yinahoshi nyivumbu yami;
Yuma yejima yamwekeneni kumesu eyi!
17 Bayi wikala wakuntiyisha womaku.
Yeyi mwami mwakuswama mwifuku dayihuñu.
18 Akakunkabisha yitiyishi nsonyi,+
Ilaña ami bayi wunleka nitiyi nsonyiku.
Yitiyishi woma,
Ilaña ami bayi wunleka nitiyi womaku.
19 Yehova wanlejeli nindi: “Yaku wakemani muchiisu chawanyana kawantu mweñililaña nikwidikila anyanta amuYuda, nimuyiisu yejima yaYerusalema.+ 20 Wuyileji neyi, ‘Tiyenu izu daYehova, enu anyanta amuYuda, antu ejima amuYuda ninenu ejima mwashakamaña muYerusalema, mweñililaña muniyi yiisu. 21 Yehova nahoshi nindi: “Babalenu, bayi musenda chiteli chidi chejima hefuku daSabata hela kuchiñijila muyiisu yaYerusalemaku.+ 22 Bayi mufumisha chiteli chidi chejima kumatala enu hefuku daSabataku; nawa bayi muzata mudimu wudi wejimaku.+ Mutwalekihu kujilika ifuku daSabata, neyi chinalejeli ankakulula jenu.+ 23 Ilaña hiyatiyilili hela kuteñeleka itu dawuku, nawa akaanini chikupu* kwovwahila hela kutambwila kufumba.”’+
24 “‘Yehova nahoshi nindi, “Hela chochu, neyi mwamweni mukuñovwahila nawa mubula kwiñijila chiteli chidi chejima muyiisu yaniwu musumba hefuku daSabata, nawa mutwalekahu kujilika ifuku daSabata nakubula kuzatilahu mudimu wudi wejima,+ 25 anyanta niayilolu ashakama hetanda daDavidi+ niwena akeñilila muyiisu yaniwu musumba, iku anakwendela mumakalu nihatuwalu, wena niayilolu jawu, antu amuYuda niantu ashakamaña muYerusalema.+ Muniwu musumba akashakamañamu haya nyaaka. 26 Nawa antu akenza kufuma kunyisumba yaYuda, kumaluña amunyeñumuka Yerusalema, kwituña daBenjamini,+ kwiluña damunkulu,+ kwiluña damapidi nikuNegebi,* nakuleta nyilambu yamukuma yakushita,+ nyilambu yikwawu,+ nyilambu yambutu,+ manaña evumba dadiwahi ninyilambu yakusakilila nachu, nakuyileta mwitala daYehova.+
27 “‘“Ilaña neyi mukuñovwahila wanyi nakubula kuhemba ifuku daSabata kwikala dajila nawa neyi mukusenda yiteli nakuyiñijila muyiisu yaYerusalema hefuku daSabata, nakamwochela yiisu yindi nakesi, nawa kakwocha tuposhi twaYerusalema+ twakola nawa hiyakakijimaku.”’”+