Yoshuwa

20 Kufumahu, Yehova wamulejeli Yoshuwa nindi: 2 “Yileji aIsarela neyi, ‘Ditondelenu nyisumba yakuswamamu+ yinayilejeli mudi Mosi, 3 kulonda muntu wunajahi muntu* chakadi kwiluka hela chamaposu akatemukileñamu. Nawa yakekala nyisumba yenu yakuswamamu kuchiina mukakutenda mashi.+ 4 Watela kutemukila mumusumba wumu haniyi nyisumba+ nakwimana kuwiñililu wakuchiisu chamusumba+ nikushimuna muloña windi kudi akulumpi jamusumba. Kuhiñahu, akumutambwila mumusumba nakumwinka iluña nawa yena wukushakamaña hamu nawu. 5 Neyi amukumpisha kudi mukakutenda mashi, owu wunajahañani bayi amuhana muchikasa chindiku, muloña wajaha mukwawu chamaposu* nawa hadiña wamuhelaku.+ 6 Watela kushakama munowu musumba sampu izaza dawantu dinamuhakwili muloña+ nawa watela kushakama mwenomu sampu kapristu muneni+ wunakukalakala munoyu mpinji nafwi. Kufumahu dinu, owu muntu wajahañeni nateli kufunta kumusumba kwatemukiliyi nakwiñila mumusumba windi nimwitala dindi.’”+

7 Dichi ajilikili* musumba waKedeshi+ muÑaliliya mwiluña damapidi daNafitali, niShekemi+ mwiluña damapidi daEfuremu niKiriyati Ariba,+ yowu Hebironi, mwiluña damapidi daYuda. 8 Mwiluña daYodani kumusela waYeriku, atondeli Bezeri+ mwisaña kwiluña dazanduka desekana kumuchidi waRubeni, niRamoti+ muGiliyadi kumuchidi waGadi niGolani+ muBashani kumuchidi waManasi.+

9 Iyi diyadiña nyisumba yatondeleliwu aIsarela ejima niañiinza ashakamineña hakachi kawu, kulonda muntu wejima wunajahi muntu* chakadi kwiluka atemukilimu+ kulonda abuli kumujaha kudi mukakutenda mashi henohu izaza dawantu kanda dimuhakwili muloña.+