Kushindulula Watachi
5 Awa diwu anyana kaRubeni+ awamayala, wedi waIsarela. Diyi wadiña wedi, ilaña hamuloña wakutamisha* kadidi katata yindi,+ wuswa windi wakwikala wedi awuhanini kudi anyana awamayala avweliwu kudi Yosefu+ mwana kaIsarela. Dichi hamajina achisaka chawu, Rubeni hiyamusonekeli neyi wediku. 2 Hela chakwila Yuda+ wadiña wabadika amanakwindi nawa mudi yena dimwafumini muntu wakekala nlomboli,+ ilaña Yosefu diyi watambwili wuswa wakwikala wedi. 3 Anyana awamayala avweliwu kudi Rubeni wedi waIsarela, adiña Hanoki, Palu, Hezironi niKarimi.+ 4 Anyana kaYoweli awamayala adiña Shemaya, Shemaya wavweli Gogi, Gogi wavweli Shimeyi, 5 Shimeyi wavweli Mika, Mika wavweli Reyaya, Reyaya wavweli Bayali, 6 nawa Bayali wavweli Beyera asendeliwu kudi Tiligati Pilineseri Mwanta+ wakuAsiriya nakumutwala muwunkoli; diyi wadiña nlomboli wawaRubeni. 7 Amanakwindi asonekeliwu kwesekeja nayisaka yawu nikwesekeja nandonda yachisaka chawu, adiña ñana, akulumpi adiña Yeyeli, Zekariya 8 niBela mwana kaAzazi mwana kaShema, Shema mwana kaYoweli. Antu amwitala daBela ashakamineña muAroweri+ nikuNebo ndo-o nikuBayali Meyoni.+ 9 Ashakamini nawa nikumusela kushika nikwatachikila isaña daKaloña Yufurati,+ muloña yimuna yawu yavulili nankashi mwituña daGiliyadi.+ 10 Mumafuku aSawulu, azuñili njita nawaHagiri, emikiliwu mushindu hamesu awu. Dichi atachikili kushakama mumatenti awu mwahitili iluña daGiliyadi dejima.
11 Dichi akachisaka chaGadi ashakamineña kwakwihi nawena mwituña daBashani kushika nikuSaleka.+ 12 Yoweli diyi wadiña mukulumpi, halondela Shafami nawa Yenayi niShafati adiña anlomboli muBashani. 13 Nawa amanakwawu akumutaña wawu adiña Mikayeli, Meshulami, Sheba, Yorayi, Yakani, Ziya niEberi, ejima hamu adiña 7. 14 Awa adiña anyana awamayala avweliwu kudi Abihayili mwana kaHura, Hura mwana kaYarowa, Yarowa mwana kaGiliyadi, Giliyadi mwana kaMikayeli, Mikayeli mwana kaYeshishaya, Yeshishaya mwana kaYado, Yado mwana kaBuzi. 15 Ahi mwana kaAbidiyeli, Abidiyeli mwana kaGuni diyi wadiña mukulumpi wachisaka chawantu amwitala dawu. 16 Ashakamineña muGiliyadi,+ muBashani+ nimumatawuni* anyeñumukiliku, nimumaluña ejima amunyenvu amuSharoni ndo-o nikuyakumininiwu. 17 Ejima wawu ayisonekeli kwesekeja nandonda yachisaka chawu mumafuku aMwanta Yotamu+ waYuda nimumafuku aMwanta Yerobowami*+ waIsarela.
18 ARubeni, aGadi nichibalu chamuchidi waManasi adiña nawakakuzuña njita añovu 44,760 munjita yawu, owu asendeli jinkebu, mpoku jatubali nawa adimanyekeli mata anyikunji* nawa ayidizishili chakuzuña njita. 19 Azuñili njita nawaHagiri,+ aYeturi, aNafishi+ niaNodabi. 20 Nawa ayikwashiliku kuzuña nawu, chakwila aHagiri niantu ejima adiñawu nawu ayihanini mumakasa awu, muloña wena alombeli kudi Nzambi nawu ayikwashi munjita, nawa yena watiyili kulemba kwawu muloña amukuhweleleli.+ 21 Asendeli yimuna yawu, dikwila nawu angameli 50,000, anyikoku 250,000 niayimbuulu 2,000 kushilahu niantu* 100,000. 22 Antu amavulu ayijahili, muloña iyi njita ayizuñili kudi Nzambi walala.+ Nawa ashakamineña mwiluña dawu sampu nichashikili mpinji yakuya muwunkoli.+
23 Amuchisaka chamuchidi wachibalu waManasi+ ashakamineña mwituña kufuma kuBashani kushika kuBayali Herimoni nikuDeniri ndo-o nikuMpidi yaHerimoni.+ Adiña amavulu chikupu. 24 Awa diwu adiña anlomboli janyitaña yawu: Eferi, Ishi, Eliyeli, Aziriyeli, Yeremiya, Hodaviya niYadiyeli. Adiña akakuzuña njita añovu, amayala ayili mpuhu nawa anlomboli janyitaña yawu. 25 Ilaña hiyadiña ashinshika kudi Nzambi yawankakulula jawuku, nawa elileña wuvumbi nawanzambi amunodu ituña,+ ajilumwiniwu kudi Nzambi hamesu awu. 26 Dichi Nzambi yaIsarela wasañumwini spiritu yaMwanta Puli wakuAsiriya+ (dikwila nawu, Mwanta Tiligati Pilineseri+ wakuAsiriya) chakwila watwalili muwunkoli aRubeni, aGadi nichibalu chamuchidi waManasi nakuyileta kuHala, kuHabori, kuHara nikukaloña Gozani,+ kuyachidiwu nikulelu.