Yoshuwa

4 Chelili tuhu muza wejima wunazambuki dehi Yodani, Yehova wamulejeli Yoshuwa nindi: 2 “Sendaku amayala 12 kufuma hadi antu, mumuchidi-himuchidi mufumi iyala wumu,+ 3 nawa wuyileji neyi: ‘Nonenu malola 12 hakachi kaYodani heluña hemana atupristu kuka-a,+ muyisendi nawa mwakayitenteki heluña himukukaamina.’”+

4 Dichi Yoshuwa watambikili amayala 12 atondeliyi kufuma hadi aIsarela, mumuchidi-himuchidi mwafumini iyala wumu, 5 nawa Yoshuwa wayilejeli nindi: “Yenu hambidi yaChimbañu chaYehova Nzambi yenu hakachi kaYodani, nawa muntu-himuntu watela kunona ilola nakudiisha hamafwiji, kwesekeja nakuvula kwanyichidi yawaIsarela, 6 kulonda akekali chinjikijilu mukachi kenu. Neyi mukuhita kwampinji anyanenu* ayihula nawu, ‘Muloñadi chimwahembela awa malola?’+ 7 mwatela kuyakula nenu: ‘Muloña menji aYodani alekeli kuhita kumbidi yachimbañu+ chaYehova chachitiyañenu. Chichazambukili Yodani, menji aYodani alekeli kuhita. Awa malola akekala chanukishu chahaya nyaaka kudi antu jaIsarela.’”+

8 Dichi aIsarela elili kwesekeja namwayilejeliwu kudi Yoshuwa. Anoneli malola 12 kufuma hakachi kaYodani neyi chamulejeliwu Yoshuwa kudi Yehova, kulonda esekani nakuvula kwanyichidi yawaIsarela. Ayisendeli nakuya nawu kwiluña kwakaaminiwu nawa ayitentekeli kwenoku.

9 Yoshuwa niyena walumbikili malola 12 hakachi kaYodani heluña hemeni atupristu asendeli chimbañu chachitiyañenu,+ nawa owu malola achidi kwoku nikulelu.

10 Atupristu asendeli Chimbañu chachitiyañenu, atwalekelihu kwimana hakachi kaYodani sampu nichamanishiliwu antu kwila yuma yejima yamulejiliwu Yoshuwa kudi Yehova nindi aleji antu, kwesekeja namwejima mwamulejeliwu Yoshuwa kudi Mosi. Nawa antu anyakeli kuzambuka. 11 Antu chamanishiliwu kuzambuka, Chimbañu chaYehova niatupristu azambukili iku antu anakutalaku.+ 12 ARubeni, aGadi nichibalu chamuchidi waManasi azambukili nakuya hambidi yawakwawu aIsarela nakuzuña njita+ neyi chayilejeliwu kudi Mosi.+ 13 Amashidika kwakwihi na 40,000 owu adimanyekeli kulonda azuñi njita, azambukili kumesu aYehova nakuya muyana yachinkalampata yakuYeriku.

14 Hanodu ifuku, Yehova wamutuumbakesheli Yoshuwa hamesu awaIsarela ejima+ nawa amulemesheleña* chikupu mumafuku akuhanda kwindi kwejima neyi chamulemesheleñawu chikupu Mosi.+

15 Kuhiñahu, Yehova wamulejeli Yoshuwa nindi: 16 “Lejaku atupristu anakusenda chimbañu+ chaWunsahu afumi muYodani.” 17 Dichi Yoshuwa walejeli atupristu nindi: “Fumenu muYodani.” 18 Chelili atupristu asendeleña chimbañu+ chachitiyañenu chaYehova afumi hakachi kaYodani nawa madatilu awatupristu chadatiliwu heseki dooma, menji aYodani atachikili kuhita cheñi nawa enzeli nakushika nikuyikumu+ neyi chadiñawu hakusambila.

19 Hefuku damu 10 dakakweji katachi, antu afumini muYodani nakuya nakuteekela kuGiligali+ kuñinza yakumusela waYeriku.

20 Hakwila malola 12 asendeliwu muYodani, Yoshuwa wayilumbikili kuGiligali.+ 21 Kuhiñahu, walejeli aIsarela nindi: “Kumpinji yakumbidi neyi anyanenu akayihula enu atata jawu nawu, ‘Indi awa malola anakulumbululadi?’+ 22 mwatela kuyilumbulwila anyanenu nenu: ‘AIsarela azambukili Yodani heseki dooma+ 23 homishiliyi Yehova Nzambi yenu menji aYodani hamesu awu sampu nichamuzambukiliwu, neyi cheliliyi Yehova Nzambi yenu naKaluñalwiji Kachinana hakuumishiliyi hamesu etu sampu nichitwakizambukili.+ 24 Welili mwenimu kulonda antu ejima hamaseki eluki ñovu yikweti chikasa chaYehova+ nawa kulonda mpinji yejima mumutiyeña Yehova Nzambi yenu woma.’”