Yoshuwa
1 Chafwiliyi Mosi kambuña aYehova, Yehova wamulejeli Yoshuwa*+ mwana kaNuni, mukakumukalakela+ Mosi nindi: 2 “Kambuñami Mosi nafwi dehi.+ Dichi nyamukaku wuzambuki Yodani, eyi ninawa antu ejima, wuyi mwituña dinnakuyinka awa antu, antu jaIsarela.+ 3 Nakayinka iluña dejima hakadata mwendu wenu, neyi chinamukanini Mosi.+ 4 Iluña denu dakatachikila mwisaña kushika kuLebanoni ndo-o nikukaloña keneni, Yufurati, dikwila nawu ituña dejima dawaHiti+ kushika nikuKaluñalwiji Keneni* kumujika.+ 5 Kwosi niwumu wakakwimakena mukuhanda kweyi kwejima.+ Nukwikalaña naneyi+ neyi chinadiña naMosi. Nakakushiya wanyi hela kukuumba chisayikila.+ 6 Ikalaku wahamuka nawa kolaku,+ muloña eyi yeyi wukuleñela awa antu aswani ituña dinasanyikili kudi ankakulula jawu nami nakayinkadu.+
7 “Eyi kuminaku dakwikala wahamuka nawa kolaku mbe-e, nawa wulondeleña chikupu Nshimbi jejima jakulejeliwu kudi kambuñami Mosi. Bayi wusenuka nakuya kuchidiilu hela kuchimunswaku,+ kulonda wileña mwamaana kwejima kuwukuyaña.+ 8 Iwu mukanda waNshimbi bayi wufuma mukanwa keyiku,+ nawa watela kuwutañaña nezu damwishina* mwaana niwufuku, kulonda wulondeleña chikupu yuma yejima yasonekawu muniwu mukanda;+ neyi wila mwenimu, yuma yakakuwahila nawa wakelaña mwamaana.+ 9 Komana ami hinnakulejiku? Ikalaku wahamuka nawa kolaku. Bayi wufwa mutentu hela kutiya womaku, muloña ami Yehova Nzambi yeyi nukwikalaña naneyi kwejima kuwukuyaña.”+
10 Dichi Yoshuwa wayilejeli anlomboli jawantu nindi: 11 “Hitañanenu muchilombu muyileji antu nenu, ‘Loñeshenu yakuda, muloña chimukuhita mafuku asatu mukuzambuka Yodani nakuheta ituña odu dinakuyinkayi Yehova Nzambi yenu kwikala iheta denu.’”+
12 Nawa Yoshuwa walejeli aRubeni, aGadi nichibalu chamuchidi waManasi nindi: 13 “Anukenu chayilejeliwu kudi Mosi kambuña aYehova+ nindi: ‘Yehova Nzambi yenu nakuyinookesha nawa nayinki idi ituña. 14 Añodi jenu, anyanenu niyimuna yenu akashakamaña mwituña dinayinkiyi Mosi munu mwishinadi* daYodani,+ ilaña enu ejima akakuzuña njita añovu+ mwatela kuzambukañahu dehi mwishinadi hambidi yawamanakwenu+ nakuzuña njita. Mwatela kuyikwasha 15 sampu Yehova nayinookeshi amanakwenu neyi chinayinookeshiyi enu, nawa neyi anatambuli dehi ituña odu Yehova Nzambi yenu dinakuyinkayi kwikala iheta dawu. Kufumahu dinu mwakafunti kwituña dayinkeliwu kushakamamu nikudiheta, ituña dayinkeliwu kudi Mosi kambuña aYehova kukabadi kakumusela waYodani.’”+
16 Wena amwakwili Yoshuwa nawu: “Twakela yuma yejima yiwunatuleji nawa twakaya kwejima kuwakatutemesha.+ 17 Neyi chitwatiyilileña mwejima mwahosheleñayi Mosi, nineyi dichitukukutiyililaña. Yehova Nzambi yeyi ekali naneyi neyi chadiñayi naMosi.+ 18 Muntu wejima wakadikaña nanshimbi jeyi nawa wakabula kwovwahila kuleja kwejima kuwakamuleja, akamujaha.+ Eyi kuminaku dakwikala wahamuka nawa kolaku.”+