Kwidika

9 Dichi Yehova wamulejeli Mosi nindi: “Iñilaku mudi Fwaru wumuleji neyi, ‘Yehova Nzambi yawaHeberu nahoshi nindi: “Yiiteji antu jami ayeña kulonda ankalakeli.+ 2 Ilaña neyi wukukaana kuyiteja kuya nakutwalekahu kuyikakela, 3 tiyaña! Chikasa chaYehova+ chikukwata hayimuna yeyi yidi mwisaña. Chipupu chasweja+ chikwinza hadi atuwalu, ayimbuulu, angameli, añombi nianyikoku. 4 Nawa Yehova chalala wukwaambula yimuna yawaIsarela nayimuna yawaEjipitu nawa kwosi chimuna hela chimu chawaIsarela chikufwaku.”’”+ 5 Kubombelahu, Yehova washili mpinji nindi: “Kumadiki ami Yehova nakakoña chumichi mwituña.”

6 Dichi Yehova wakoñeli chumichi mwifuku dalondelelihu nawa yimuna yashiyashana yawaEjipitu yatachikili kufwa,+ ilaña kwosi chimuna hela chimu chawaIsarela chafwiliku. 7 Fwaru chakeñakeñeliyi iyi nsañu, welukili nindi kwosi chimuna hela chimu chawaIsarela chafwiliku. Hela chochu, muchima waFwaru watwalekelihu kuchinchika nawa hayitejeli antu kuyaku.+

8 Kuhiñahu, Yehova wayilejeli aMosi naAroni nindi: “Inzeshenu makasa enu namula wamuchibili nawa Mosi awufukumwini mumpepela kumbidi yaFwaru. 9 Iwu mula wukubalumuka lunkuñu lwapepela mwituña daEjipitu dejima nawa lukwikala mahuti asweja hadi antu nihadi anyama mwituña dejima daEjipitu.”

10 Dichi anoneli mula muchibili nakwimana kumesu aFwaru, Mosi wawufukumwinini mumpepela nawa wabalumukili mahuti asweja enjili hadi antu nihadi anyama. 11 Atutepa akañenyeña kwimana kumesu aMosi muloña wamahuti enjili hadi wena nihadi aEjipitu ejima.+ 12 Ilaña Yehova wetejeli muchima waFwaru kuchinchika nawa yena wayitiyililili wanyi neyi chamulejeliwu Mosi kudi Yehova.+

13 Kuhiñahu, Yehova wamulejeli Mosi nindi: “Wakanyamuki nantetemena nankashi nawa wakemani kumesu aFwaru nakumuleja neyi, ‘Yehova Nzambi yawaHeberu nahoshi nindi: “Yiiteji antu jami ayeña kulonda ankalakeli. 14 Muloña ichi dinu inakutemesha yipupu hadi eyi, ambuñeyi nihadi antu jeyi kulonda wiluki neyi kwosi mukwawu wudi neyi ami mwahita iseki dejimaku.+ 15 Muloña chayinu mpinji kachi nolola dehi chikasa chami nakweta eyi niantu jeyi nachipupu chasweja nawa kachi akufumishahu* dehi hamaseki. 16 Ilaña nakuleki wutwalekihu kuhanda muloña wachumichi nami: nimwekeshi ñovu jami kudi eyi nikukojeja ijina dami adiluki mwahita iseki dejima.+ 17 Wuchidi kudivwimba nawantu jami chiwunakubula kuyuumbaku tahindi? 18 Kumadiki nakanokesha nvula yamalola yeneni chikupu hayoyinu mpinji, yakwila kanda yinokeñahu dehi muEjipitu kufuma hefuku hidatachikili kwikalaku idi ituña kushika nikulelu. 19 Dichi, temeshaku antu ayi nakuleta yimuna yeyi yejima niyuma yeyi yejima yidi mwisaña kulonda ayiñiji mwitala. Muntu wejima nikanyama wejima akushintakeshelawu mwisaña nawa akubula kuletawu mwitala, wukufwa neyi nvula yamalola yimunokela.”’”

20 Ambuña aFwaru amu atiyili izu daYehova woma, ayili swayi-swayi nakuleta ambuñawu niyimuna yawu nakuyiñija mumatala, 21 ilaña wejima wabulili kusha maana kwizu daYehova, washiyili ambuñindi niyimuna yindi mwisaña.

22 Dichi Yehova wamulejeli Mosi nindi: “Ololaku chikasa cheyi mumawulu kulonda nvula yamalola yinokeli hetuña daEjipitu dejima,+ hadi antu, hadi anyama nihadi yuma yejima yamenaña mwisaña yamwituña daEjipitu.”+ 23 Dichi Mosi wolweleli chikasa chindi mumawulu nawa Yehova watemesheli kudidima, nvula yamalola nikesi* hamaseki nawa Yehova watwalekelihu kunokesha nvula yamalola hetuña daEjipitu. 24 Kwadiña nvula yamalola nawa kwadiña kesi kabidimineña munvula yamalola. Iyi nvula yatoheli chikupu, yakwila kanda yinokeñahu dehi yamuchidiwu mwituña kufuma tuhu hekalili ituña daEjipitu muza.+ 25 Iyi nvula yamalola yakisañeni yuma yejima yamwisaña mwituña daEjipitu dejima, kutachikila kudi antu nakushika kudi anyama nawa yakisañeni yuma yejima yamenaña ninyitondu yejima yamwisaña.+ 26 Mwiluña daGosheni mwadiña aIsarela, dimu hohu mwabulili kunoka nvula yamalola.+

27 Dichi Fwaru watambikili aMosi naAroni nakuyileja nindi: “Ichi dinu navulumuni. Yehova waloña, ilaña ami nawantu jami, yetu tunaluwañeshi. 28 Lembenu kudi Yehova nenu kudidima kwaNzambi ninvula yamalola jileki. Kufumahu dinu nukuyiteja muyeña nawa himukutwalekahu kushakamaku.” 29 Dichi Mosi wamulejeli nindi: “Chinukufuma tuhu mumusumba, nukwolola makasa ami kudi Yehova. Kudidima kukuleka nawa nvula yamalola yikuketuka kulonda wiluki neyi iseki dambala daYehova.+ 30 Hela chochu, neluki nami, eyi niambuñeyi himukumutiya Yehova Nzambi womaku.”

31 Dichi falakisi* nibali ayikisañeni, muloña bali yadiña yinahi dehi nawa falakisi yadiña yakenuka dehi wuluya. 32 Ilaña tidiku nisipeliti* hiyajikisañeniku, muloña jadiña mbutu jakuminineñaku kuha.* 33 Mosi wafumini mumusumba kudi Fwaru nawa wolweli makasa indi kudi Yehova, dichi kudidima ninvula yamalola yalekeli nawa nvula yalekeli kunokela hamaseki.+ 34 Fwaru chamweniyi nindi nvula, nvula yamalola nikudidima kunaleki, wavulumwini cheñi nikuchinchikisha muchima windi,+ yena niambuñindi. 35 Dichi muchima waFwaru watwalekelihu kuchinchika nawa wayitejeli wanyi aIsarela kuya neyi chahosheliyi Yehova kuhitila mudi Mosi.+