Yoshuwa
9 Anyanta ejima adiña kukabadi kakumujika waYodani+ chatiyiliwu chuma chamwekeni, owu adiña mwiluña damapidi, muShefela nikumukulishu wejima waKaluñalwiji Keneni*+ nikumbidi yaLebanoni, dikwila nawu anyanta awaHiti, awaAmori, awaKenani, awaPerizi, awaHivi niawaYebusi+— 2 adikwatili hamu kulonda azuñi naYoshuwa niaIsarela.+
3 Antu ashakamineña muGibeyoni+ niwena atiyili chuma chakoñeliyi Yoshuwa musumba waYeriku+ niwaAyi.+ 4 Dichi azatili mukubabala chakwila ashili yakuda mumasaaka ataboka nakuyisha hayimbuulu yawu hamu namapakumuna ayitembi avinyu ataboka alokokeli nawa alamekeliwu; 5 kunyendu yawu nikwena avwalili nkwabilu jataboka jakulameka, nawa avwalili yakuvwala yataboka. Mankendi awu ejima asendeliwu adiña oma nawa elili nkuuku.* 6 Kuhiñahu, ayili kuchilombu kudi Yoshuwa kuGiligali+ nakumuleja yena niamayala aIsarela nawu: “Tunafumi kwituña dakwakulehi. Dichi tiyañanenu chitiyañenu nanetu.” 7 Ilaña amayala aIsarela ayilejeli aHivi+ nawu: “Hadaha mwashakamaña mukamwihi nanetu. Hanu dinu tunateli kutiyañana ñahi chitiyañenu nanenu?”+ 8 Wena amwakwili Yoshuwa nawu: “Etu tudi ambuñeyi.”*
Kuhiñahu, Yoshuwa wayihwili nindi: “Yenu anyi, nawa munafumi kudihi?” 9 Wena amwakwili nawu: “Etu ambuñeyi tunafumi kwituña dakwakulehi nankashi+ muloña wejina daYehova Nzambi yeyi, muloña tunatiyi mpuhu yejina dindi niyuma yejima yeliliyi muEjipitu+ 10 niyuma yejima yayililiyi anyanta ayedi awaAmori adiña mwishinadi daYodani,* Mwanta Sihoni+ wakuHeshiboni niMwanta Ogi+ wakuBashani, owu wadiña muAshitaroti. 11 Dichi akulumpi jetu niejima ashakamaña mwituña detu atulejeli nawu, ‘Sendenu yakuda yahalwendu nawa yenu mwakadibulakani nawu. Mwakayileji nenu: “Etu tukwikala ambuñenu;+ dichi tiyañanenu chitiyañenu nanetu.”’+ 12 Awa mankendi itwasendeli akuda achidiña atata hefuku ditwanyamukili kumatala etu nakwinza kunu kumudi. Ilaña ichi, talenu anoomi dehi nawa aneli dehi ninkuuku.*+ 13 Nawa awa mapakumuna ayitembi avinyu adiña amaha hitwaloñeleñamu vinyu, ilaña ichi analokoki dehi.+ Yakuvwala yetu ninkwabilu jetu nijena jinataboki muloña wakuleha kwalwendu.”
14 Hohenohu amayala aIsarela anonelihu yakuda yimu yanowu amayala, ilaña hiyamwihwilihu Yehovaku.+ 15 Dichi Yoshuwa watiyañeni nawu chitiyañenu chakuwunda+ nawa watiyañeni nawu chitiyañenu chakubula kuyijaha, nawa ichi dichuma chasanyikiliwu anlomboli ezaza dawantu kudi wena.+
16 Chimwahitili mafuku asatu hanyima yakutiyañana nawu chitiyañenu, atiyili nawu owu amayala ashakamaña hohu mukamwihi, muchituñilu chawu. 17 Kuhiñahu, hefuku damuchisatu aIsarela anyamukili nakuya munyisumba yanowu amayala; iyi diyadiña nyisumba yawu, Gibeyoni,+ Kefira, Beyeroti niKiriyati Yeyarimi.+ 18 Ilaña aIsarela hiyayilukukili owu amayalaku, muloña anlomboli ezaza dawantu adiña asanyika dehi kudi wena mwijina daYehova+ Nzambi yaIsarela. Dichi izaza dawantu dejima datachikili kutoobela anlomboli. 19 Hohenohu anlomboli ejima alejeli izaza dawantu dejima nawu: “Chineli twasanyikili kudi wena mwijina daYehova Nzambi yaIsarela, hiyanatwiteji kuyila chuma chatamaku. 20 Ichi dichi tukwila: Tukuyijaha wanyi, kulonda Nzambi abuli kutuzuwila muloña wakusanyika kutwasanyikili kudi wena.”+ 21 Nawa anlomboli abombelelihu nawu: “Bayi tuyijahaku, ilaña akwikala akakuchaya nchawa nikutehwina* menji izaza dawantu dejima.” Ichi dichayikaniniwu kudi anlomboli.
22 Dichi Yoshuwa wayitambikili nakuyihula nindi: “Muloñadi chimwatudimbilili nakuhosha nenu, ‘Tunafumi kwakulehi nankashi,’ henohu mwashakamaña hohu mukamwihi nanetu?+ 23 Kufuma dalelu, munashiñewi,+ nawa mpinji yejima mukwikalaña anduñu akuchaya nchawa niakutehuna menji amwitala daNzambi yami.” 24 Wena amwakwili Yoshuwa nawu: “Muloña wakwila etu ambuñeyi atulejeli chakadi kuhita mumbadi nawu Yehova Nzambi yenu walejeli Mosi kambuñindi kuyinka enu ituña dejima nikujilumuna hamesu enu antu ejima ashakamañamu.+ Dichi twatiyili woma netu mwakenda kajilumuna mawumi etu,+ dichaletesheli twili mwenimu.+ 25 Dichi tudi mumakasa eyi. Twili mwejima muwunamoni neyi mwamuwahi nawa mwaloña.” 26 Nawa ichi dichuma chayililiyi, wayamwinini mumakasa awaIsarela nawa hiyayijahiliku. 27 Ilaña hadodenodu ifuku, Yoshuwa wayilishili kwikala akakuchaya nchawa niakakutehwina* menji izaza dawantu+ niakameña kaYehova kwiluña dakatondayi Nzambi,+ nawa dichiyelañawu nikulelu.+