Ansompeshi
3 Iyi diyi nyuza yetejeliyi Yehova kushala kulonda yeseki aIsarela ejima abulili kuzuñahu njita nawaKenani+ 2 (chadiña mwenimu kulonda makiñu awaIsarela alondelelihu abulili kuzuñahu njita, akazuñi njita): 3 anyanta atanu awaFilisitinu,+ aKenani ejima, aSidoni+ niaHivi+ ashakamineña kuMpidi yaLebanoni+ kufuma kuMpidi yaBayali Herimoni ndo-o nikuLebo Hamati.*+ 4 Awa anyanta adiña akweseka nachu aIsarela kulonda yeluki neyi chakwila aIsarela akwovwahila nshimbi jaYehova jayinkeliyi ankakulula jawu kuhitila mudi Mosi.+ 5 Dichi aIsarela ashakamini hakachi kawaKenani,+ aHiti, aAmori, aPerizi, aHivi niaYebusi. 6 Asumbwileña anyanawu awambanda, nawa anyanawu awambanda ayisumbwishileña kudi anyanawu awamayala, nawa atachikili kukalakela anzambi jawu.+
7 Dichi aIsarela elileña yuma yatama kumesu aYehova nawa amuvulameneni Yehova Nzambi yawu nakukalakela aBayali+ niyishimi yajila.*+ 8 Hohenohu, Yehova wayizuwilili aIsarela nawa wayilandishili kuchikasa chaKushana Rishatayimi mwanta wakuMesopotamiya.* AIsarela amukalakeleli Kushana Rishatayimi hadi yaaka 8. 9 AIsarela amwaabilili Yehova nawu ayikwashi,+ dichi Yehova wayitondeleli Otiniyeli+ mwanyika Kalebu kulonda ekali chamwinu wakuyipulwisha aIsarela.+ 10 Spiritu yaYehova yenjili hadi yena+ nawa wekalili nsompeshi yawaIsarela. Chayiliyi nakuzuña njita, Yehova wamwinkeli Kushana Rishatayimi mwanta wakuMesopotamiya* muchikasa chindi chakwila wamwimikili Kushana Rishatayimi mushindu. 11 Hanyima yachumichi, hadi yaaka 40, mwituña himwekalilihu cheñi njitaku.* Kufumahu, Otiniyeli mwana kaKenazi wafwili.
12 Kuhiñahu, aIsarela atachikili cheñi kwila yuma yatama kumesu aYehova.+ Dichi Yehova wamwitejeli Egiloni mwanta wakuMowabi+ kuyimika aIsarela mushindu, muloña elili yuma yatama kumesu aYehova. 13 Kubombelahu, wayileteleli aAmoni+ niaAmaleki+ kulonda azuñi nawu. Ayilukukili aIsarela nawa atambwili musumba wanyitondu yanyikoma.+ 14 AIsarela amukalakeleleli Egiloni mwanta wakuMowabi yaaka 18.+ 15 Kufumahu, aIsarela amwaabilili Yehova nawu ayikwashi,+ dichi Yehova wayitondeleli chamwinu,+ Ehudi+ mwana kaGera, mwini Benjamini+ wazatishileña chikasa chachimunswa.+ Haniyi mpinji, aIsarela atemesheleña mulambu kudi Egiloni mwanta wakuMowabi kuhitila mudi yena. 16 Dichi, Ehudi wadichililili mpoku yakabali yawumwemu kuyedi, yaleheli kyubiti* yimu, nawa wayikasilili mwishina dachakuvwala chindi hekata dindi dachidiilu. 17 Kuhiñahu, walambwili mulambu kudi Egiloni mwanta wakuMowabi. Dichi Egiloni wadiña iyala wasweja kutoha nankashi.
18 Ehudi chamanishiliyi kulambula mulambu, wayilejeli antu aleteli mulambu nindi ayeña. 19 Ilaña chashikiliyi kwadiña ankishi akubaza* kuGiligali,+ yena wafuntili nakuhosha nindi: “Eyi mwanta, nidi nansañu yakujinda yinnakukeña kukuleja nkaweyi.” Dichi mwanta wahosheli nindi: “Mwenenu nzo-o!” Hohenohu anhembi jindi ejima amushiyili. 20 Dichi Ehudi wenjili kudi mwanta iku nashakami mukapeka kindi kahewulu mutuuta. Kufumahu, Ehudi wahosheli nindi: “Nidi nansañu yinafumi kudi Nzambi yinnakukeña kukuleja.” Dichi wanyamukili hetanda dindi.* 21 Kuhiñahu, Ehudi waholeli mpoku yakabali nachikasa chindi chachimunswa hekata dindi dachidiilu nakumupwika mwanta mwivumu. 22 Chipusu cheñililili kumu nampoku mwivumu nawa manji abutili mpoku yejima, muloña mpoku yakabali hayiholeli mwivumu damwantaku, nawa tuji twedikili. 23 Ehudi wedikilili kuwiñililu,* nawa wenzeleli yiisu yakapeka kahewulu nikuyikiya. 24 Chayiliyi, ambuña amwanta afuntili nawa amweni yiisu yakapeka kahewulu yakukiya. Dichi ahosheli nawu: “Hadaha nakudikwasha* mukapeka kahewulu mutuuta.” 25 Chahembeleliwu hadi mpinji yayilehi hohamu mwanta washikwili chiisu wanyi, dichi atachikili kwakama. Chanoneliwu nsapi* nakwenzununa ochu chiisu, amweni mwanta wawu wudi heseki* nawa nafwi!
26 Ehudi watemukili halabajalileñawu, nawa wahitilili kwadiña ankishi akubaza*+ nakushika mukuwunda kuSeyira. 27 Chashikiliyi, wavumishili mpuña+ mwiluña damapidi daEfuremu;+ nawa aIsarela akunkumukili kufuma kwiluña damapidi iku yena natwaminiku hambidi yawu. 28 Kuhiñahu, wayilejeli nindi: “Nlondelenu, muloña Yehova nahani ayilumbu jenu aMowabi mumakasa enu.” Dichi amulondeleli nawa atambwili nyaaba yaYodani kulonda azuñi nawaMowabi, nawa hiyetejeli muntu hela wumu kuzambukaku. 29 Hanoyu mpinji, atapili aMowabi+ 10,000, amayala ejima akola nawa ayilobu; kwosi iyala hela wumu watemukiliku.+ 30 Dichi hanodu ifuku, Mowabi amwimikili mushindu kudi aIsarela; nawa hadi yaaka 80,+ mwituña himwekalilihu cheñi njitaku.*
31 Kufuma hadi Ehudi, hahiñili Shamigari+ mwana kaAnati, wajahili aFilisitinu amayala+ 600 namutondu wasoñoloka wakubiña nachu añombi;+ niyena wamwinini aIsarela.