Kushindulula Watachi
20 Hakutachika kwachaaka,* hayileñawu anyanta kunjita, Yowabi+ walombweli ayileña nakuzuña njita nawa ajilumwini ituña dawaAmoni; washikili nawa wakuchikili musumba waRaba,+ ilaña haniyi mpinji Davidi washalili muYerusalema.+ Yowabi walukukili musumba waRaba nakuwujilumuna.+ 2 Kufumahu, Davidi wanoneli chibañula chadiña kumutu waMalikami nawa chalemeni ntalenta* yawuru yimu. Mukachi kanichi chibañula mwadiña malola alema wuseya nawa amuvwikilichu Davidi kumutu. Wanoneli niyuma yakupuupa yayivulu muniwu musumba.+ 3 Wasendeli niantu adiña muniwu musumba nakuyiñija mudimu+ wakuketula malola niwakuzata nayitwa yayikuñu yatwa ninayizembi. Ichi dicheliliyi Davidi nanyisumba yejima yawaAmoni. Nkumininaku, Davidi nimazanvu amashidika ejima afuntili kuYerusalema.
4 Hanyima yachumichi, njita yatachikili kuGezeri nawaFilisitinu. Hanoyu mpinji Sibekayi+ mwini Husha wamujahili Sipayi, wadiña wamuchisaka chawaRefa+ nawa ayimikili mushindu.
5 Dichi njita yatachikili cheñi nawaFilisitinu nawa Elihanani mwana kaYayiri wajahili Lahimi mana kwaGoliyati+ wakuGati, owu wadiña neyoña dadiña namulunda neyi mukambu wawakakupikula.+
6 Njita yatachikili cheñi kuGati,+ kwadiña iyala wumu wataluka chikupu,+ wadiña nanyinu 6 kuchikasa-hichikasa nawa wadiña nanyinu 6 kumwendu-himwendu, yejima hamu yadiña nyinu 24; niyena wadiña wamuchisaka chawaRefa.+ 7 Watwalekelihu kumusupisha+ Isarela. Dichi amutapili kudi Yonatani mwana kaShimeya,+ mana kwaDavidi.
8 Awa amayala ejima adiña anyana kawaRefa+ muGati,+ nawa afwili kuchikasa chaDavidi nikuchikasa chawambuñindi.