Kwidika
25 Kuhiñahu, Yehova wamulejeli Mosi nindi: 2 “Lejaku antu jaIsarela anyinki yawaana; wuntambwili yawaana+ kudi muntu wejima wunadikasi mumuchima windi kuhana. 3 Iyi diyi yawaana yiwatela kutambula kudi wena: wuru,+ siliva,+ wuneñu,+ 4 wanda wabulu, wawusombu, wuchinana nge-e, ihina dadiwahi, mavuji ampembi, 5 yitembi yanyikoku yayizamba yakuloomba wulombu wuchinana, yitembi yamayobu,* nyitondu yanyizenzi,+ 6 manji amumanoñu,+ manji akuwayisha nachu abalisamu+ niinsensi yevumba dadiwahi,+ 7 nimalola aonikisi* nimalola amakwawu akusha mwiifwodi*+ niipakumuna dahantulu.+ 8 Akantuñili iluña dajila nawa nakashakama mukachi kawu.+ 9 Hakuyituña iyi tabanaka niyuma yejima yakekalamu, mwakalondeli chikupu njila yakuyituñilamu yinnakuyileja.*+
10 “Akatuñi chimbañu* namutondu wamuzenzi, mukuleha makyubiti* ayedi nachikunku, muwihi kyubiti yimu nachikunku nawa mukuleha kwiwulu kyubiti yimu nachikunku.+ 11 Kuhiñahu, wakachilambwiji wuru yakadi majilu.+ Wakachilambwiji mukachi nihanji nawa wakanyeñumwishiku mukinkita wawuru.+ 12 Wakatuñiliku nituzeya twawuru tuwana nawa wakatwishi hewulu danyendu yiwana yachimbañu, wakeli kukabadi kamu wakashiku tuzeya tuyedi, kukabadi kakwawu tuzeya tuyedi. 13 Wakasoñi nyalachi yamutondu wamuzenzi nawa wakayilambwiji wuru.+ 14 Wakeñiji iyi nyalachi mutuzeya tudi mumbavu yaChimbañu kulonda akayizatisheña kusendelaku Chimbañu. 15 Nyalachi yakekalaña mutuzeya twaChimbañu; bayi akayifumishaku.+ 16 MuChimbañu wakashimu malola awubasa hanasonekiwu Wunsahu wunakakwinka.+
17 “Wakatuñi chijiku chawuru yakadi majilu, mukuleha makyubiti ayedi nachikunku nawa muwihi kyubiti yimu nachikunku.+ 18 Wakabazi akerubi ayedi awuru, wakayibazili kunsa jejima jiyedi jachijiku nawuru yakuchila.+ 19 Awa akerubi wakayishi kunsa jiyedi, kerubi wumu kunsa yimu yachijiku, mukwawu niyena kunsa yikwawu. 20 Akerubi akatandumuni mpuula jawu jiyedi mwiwulu nakubuta hachijiku nampuula jawu,+ nawa akaditalisha. Akerubi akatalishi chamesu hachijiku. 21 Wakashi chijiku+ haChimbañu nawa muChimbañu wakashimu malola awubasa hanasonekiwu Wunsahu wunakakwinka. 22 Nakadimwekesha ami aweni kudi eyi hewulu dachijiku nawa dihinakahoshelaña naneyi.+ Hakachi kawakerubi ayedi adi hachimbañu chaWunsahu, dihinakakulejela yuma yejima yinakakuleja nami wuyileji aIsarela.
23 “Wakatuñi nimesa+ yamutondu wamuzenzi, mukuleha makyubiti ayedi, muwihi kyubiti yimu nawa mukuleha kwiwulu kyubiti yimu nachikunku.+ 24 Wakayilambwiji wuru yakadi majilu nawa wakanyeñumwishiku mukinkita wawuru. 25 Wakatuñiliku mwowelu kwi-i ndo-o wakwesekana namuwihi wachikasa* nimukinkita wawuru wakunyeñumwisha kumwowelu. 26 Wakatuñiliku tuzeya twawuru tuwana nawa itu tuzeya wakatwishi hamawombu awana hanuñilawu nyendu yiwana. 27 Tuzeya twakekali kwakwihi namwowelu kulonda twakakwateña nyalachi hakusenda mesa. 28 Wakasoñi nyalachi yamutondu wamuzenzi nawa wakayilambwiji wuru kulonda akayizatisheña kusendelaku mesa.
29 “Wakatuñi yeña yachu, makaapu* achu ninyilondu yachu niyeña yakunama mwakahuñunwinañawu nyilambu yavinyu. Wakayituñi nawuru yakadi majilu.+ 30 Nawa wakatwalekihu kusha hamesa mankendi akutenteka kumesu ami.+
31 “Wakatuñi chakutentekahu manoñu+ nawuru yakadi majilu. Ichi chakutentekahu manoñu chakekala chakubaza nawuru yakuchila. Heshina dachu, mwendu wachu, ninyitayi yachu, makaapu,* mahumba achu ninkenu jachu, jakekala chuma chimu hohu.+ 32 Nawa nyitayi 6 yakafumi mumbavu yachakutentekahu manoñu nyitayi yisatu kukabadi kamu, nyitayi yikwawu yisatu kukabadi kakwawu. 33 Makaapu* asatu afwana nkenu yaamondi akekala kunyitayi yakukabadi kamu namahumba ninkenu yashiyashana. Nawa makaapu asatu afwana nkenu yaamondi akekala kunyitayi yakukabadi kakwawu namahumba ninkenu yashiyashana. Ichi dichakafuma nyitayi 6 kumwendu wachakutentekahu manoñu. 34 Kumwendu wachakutentekahu manoñu kwakekala makaapu* awana afwana nkenu yaamondi namahumba achu ninkenu yachu yashiyashana. 35 Ihumba dimu dakekala mwishina danyitayi yatachi yiyedi yakafuma kumwendu nawa ihumba dikwawu dakekala mwishina danyitayi yakalondelahu yiyedi, nawa ihumba dikwawu dakekala mwishina danyitayi yakalondelahu yiyedi. Nyitayi yakafuma kumwendu yakekala nyitayi 6. 36 Mahumba, nyitayi nichakutentekahu manoñu chejima, jakekala chuma chimu hohu chakubaza nawuru yakuchila nawa yakadi majilu.+ 37 Wakatuñilihu manoñu 7 nawa neyi manoñu anayibutuli, akatoñekelaña chejeji heluña didi kumbidi yachu.+ 38 Nzamba jachu nijakusendelahu kesi, jakekali jawuru yakadi majilu.+ 39 Akayituñili hamu naniyi yipwepu kuzatisha wuru yakadi majilu yakushika kuntalenta yimu.* 40 Wakatuñi yumiyi kwesekeja nanjila yakuyituñilamu yinakuleja hampidi.+