Kwidika

21 “Awa diwu mazu awunsompeshi iwatela kuyileja:+

2 “Neyi wulanda nduñu wakaHeberu,+ wakakalakala yaaka 6 neyi nduñu, ilaña muchaaka chamu 7, wakamuumbiku chakadi kumufweta chuma chidi chejima.+ 3 Neyi wenjili nkawindi, wakaya nkawindi. Neyi wasumbula, wakaya hamu nañodindi. 4 Neyi nkaaka yindi amwinka mumbanda nawa owu mumbanda amuvwalila anyana awamayala hela awambanda, mumbanda nianyanindi akekala ankaaka yanowu mumbanda, ilaña yena wakaya nkawindi.+ 5 Ilaña neyi owu nduñu akaana nakuhosha nindi, ‘Namukeña nkaaka yami, ñodami nianyanami awamayala; inakukeña kuñuumbaku wanyi,’+ 6 nkaaka yindi akamuleti kumesu aNzambi walala. Kuhiñahu akamutwali kuchiisu hela kuchipamba chakuchiisu nawa nkaaka yindi wakamulokola itu namumba,* wakekala nduñu yindi haya nyaaka.

7 “Neyi muntu alandisha mwanindi wamumbanda nakwikala nduñu, owu mwana hiyakamuumbaku neyi chiyanateli kuumbaku nduñu weyalaku. 8 Neyi nkaaka yindi namutiyi kuwaha wanyi nawa abula kumwilisha ntombu* ilaña atondahu kumulandisha kudi muntu wacheñi,* nkaaka yindi hakekala nawuswa wakumulandisha kudi añiinzaku, muloña namufukeji dehi owu nduñu. 9 Neyi amusumbwisha kudi mwanindi weyala, watela kumwinka wuswa wakwila yuma neyi mwanindi wamumbanda. 10 Neyi asumbula mumbanda mukwawu, hatela kuleka kumwinka mumbanda watachi yakuda, yakuvwala niyuma*+ yatela kumwinkayi muwuluku. 11 Neyi wukumwinkaña wanyi mumbanda iyi yuma yisatu, watela kumuumbaku owu mumbanda chakadi kumufwetesha mali adi ejima.

12 “Muntu wejima wukweta mukwawu chakwila afwa, niyena atela kumujaha.+ 13 Ilaña neyi ela mwenimu chakadi kwiluka nawa Nzambi walala nachiteji kumwekana, nakakuleja iluña kwatela kutemukilayi.+ 14 Neyi muntu amuhilila chikupu mukwawu nawa amujaha mumushikila,+ owu muntu hela chakwila wudi kukameña kami, watela kumufumishaku nakumujaha.+ 15 Muntu wejima wukweta tata yindi hela mama yindi atela kumujaha.+

16 “Neyi muntu wejima eya muntu+ nawa amulandisha hela amuwana namukwati,+ atela kumujaha.+

17 “Muntu wejima wukushiña tata yindi hela mama yindi, atela kumujaha.+

18 “Ichi dichimwatela kwila neyi antu abobola nawa wumu amweta mukwawu nelola hela nankonyi* nawa owu muntu kufwa nehi, ilaña amuleñela kuya mukadidi: 19 Neyi nakutwesha kunyamuka nikwenda hanji namukombu, owu wamweteli hiyakumubabeshaku. Watela hohu kumufweta muloña wampinji yashakamayi owu muntu chakadi kuzata mudimu windi kushika nihakolayi chikupu.

20 “Neyi muntu amweta nduñu yindi weyala hela wamumbanda namutondu nawa afwila kuchikasa chindi, yenowu muntu atela kumutenda.+ 21 Ilaña neyi muhita ifuku dimu hela ayedi owu muntu kufwa nehi, yenowu muntu atela kumutenda wanyi, muloña hinduñu alandiliyi namali indi.

22 “Neyi antu ayedi azuña nakukatisha mumbanda wudi nevumu nawa asampuluka henohu mpinji yakusampulukilahu kanda yishikili*+ ilaña kwosi wunafwiku, muntu wunakoñi chuma chamuchidiwu watela kufweta wufwetu wunamutoñweliwu kudi nfumwa anowu mumbanda; nawa watela kufweta kuhitila mudi ansompeshi.+ 23 Ilaña neyi hamwekana kufwa, dikwila nawu mwatela kuhana wumi nawumi,+ 24 disu nadisu, izewu nezewu, chikasa nachikasa, mwendu namwendu,+ 25 kwocha nakwocha, chilonda nachilonda nawa nkonyi nankonyi.

26 “Neyi muntu amweta nduñu yindi weyala hela wamumbanda hadisu nawa dikisika, wukumuumbaku owu nduñu muloña wadisu dindi dinamukisiyi.+ 27 Nawa neyi azokola izewu danduñu yindi weyala hela wamumbanda, wukumuumbaku owu nduñu muloña wezewu dindi dinamuzokoliyi.

28 “Neyi ñombi wachizamba alemeka muntu weyala hela wamumbanda nseñu nawa owu muntu afwa, owu ñombi wachizamba atela kumwasa malola nakumujaha+ nawa mbiji yindi bayi ayiidaku; ilaña mwini ñombi wachizamba akumubabesha wanyi. 29 Ilaña neyi owu ñombi wachizamba wadiña nachaaku chakulemekañana nseñu nawa mwini ñombi amusoñamishili ilaña yena kumukiña nehi nawa owu ñombi ajaha muntu weyala hela wamumbanda, yenowu ñombi wachizamba atela kumwasa malola nawa nkaaka yindi niyena atela kumujaha. 30 Neyi mwini ñombi anamutoñweli wuseya watela kufwetayi wakukuula nachu wumi windi, watela kufweta wuseya wudi wejima wunamutoñweliwu. 31 Hela chakwila nalemeki mwana weyala hela wamumbanda nseñu, mwini ñombi wachizamba atela kumukoña kwesekeja nanawa mazu awunsompeshi. 32 Neyi ñombi wachizamba alemeka nduñu weyala hela wamumbanda nseñu, mwini owu ñombi watela kumwinka nkaaka yanowu nduñu mashekeli* 30 nawa owu ñombi wachizamba atela kumwasa malola nakumujaha.

33 “Neyi muntu ajikula hebuku hela apunda ibuku ilaña kujikahu nehi nawa muholokela ñombi wachizamba hela chimbuulu, 34 mwini ibuku watela kufweta.+ Watela kufweta wuseya kudi mwini kanyama nawa owu kanyama wunafwi wukwikala windi. 35 Neyi ñombi wachizamba wamuntu wumu akatisha ñombi wachizamba wamuntu mukwawu nawa afwa, atela kulandisha owu ñombi wachizamba wamumi nakwanzañana mali anamulandishiwu nachu; nawa atela kwanzañana nikanyama wunafwi. 36 Hela neyi chakwila chelukeweli nawu owu ñombi wachizamba wadiña nachaaku chakulemekañana nseñu ilaña mwini owu ñombi wamukiñileña wanyi, watela kufweta ñombi wachizamba nañombi wachizamba nawa owu kanyama wunafwi wukwikala windi.