Yoshuwa

15 Mpata yenkeliwu+ muchidi waYuda* kwesekeja nayisaka yawu yashikili kuñinza yaEdomi,+ mwisaña daZini nakushika kunsa yaNegebi kukabeta kakuchidiilu. 2 Ñinza yawu yakukabeta kakuchidiilu yatachikilili kwakumina Kaluñalwiji kaMuñwa,*+ kutachikila kuchikumu chatalañana nakabeta kakuchidiilu. 3 Nawa yashikili kukabeta kakuchidiilu kumukandu waAkirabimi+ nakuhita kuZini. Kuhiñahu, yafumini kukabeta kaKadeshi Barineya+ kakuchidiilu nakushika kuHezironi nikuAdara, nawa yanyeñumukili nakuya kuKarika. 4 Kufumahu, yahitili kuAzimoni+ nakushika kuMuhoñi* waEjipitu+ nawa iyi ñinza yakuminini kuKaluñalwiji.* Iyi diyadiña ñinza yawu yakukabeta kakuchidiilu.

5 Ñinza yawu yakumusela yadiña Kaluñalwiji kaMuñwa* kushika nikwakumina Yodani, nawa ñinza yakukabadi kakukabeta kakuchimunswa yatachikilili kuchikumu chakaluñalwiji, kwakumina Yodani.+ 6 Iyi ñinza yashikili kuBetihogila+ nakuhita kukabeta kakuchimunswa kaBetaraba,+ nawa yashikili kwilola daBohani+ mwana kaRubeni. 7 Ñinza yeniyi yashikili kuDebiri kuChinekineki chaAkori+ nawa yabalumukili nakuya kukabeta kakuchimunswa kaGiligali,+ wekalila kumbidi yamukandu waAdumimi kukabeta kakuchidiilu kamuhoñi, nawa iyi ñinza yahitili kumenji aEnshemeshi+ nakukumina kuEnirogeli.+ 8 Iyi ñinza yahitili kuChinekineki chaMwana kaHinomi+ kumukunkumuki wawaYebusi+ kukabeta kakuchidiilu, kuYerusalema,+ nawa ñinza yeniyi yakandukili hewulu dampidi yatalisha kuChinekineki chaHinomi kumujika, chekala kwakumina Chinekineki chawaRefa kukabeta kakuchimunswa. 9 Nawa ñinza ayipulili kufuma hewulu dampidi ndo-o nikukaseloki kamenji aNefitowa+ nawa yashikili kunyisumba yakuMpidi yaEferoni; iyi ñinza ayipulili kushika kuBayala, dikwila nawu Kiriyati Yeyarimi.+ 10 Ñinza yeniyi yanyeñumukili kufuma kukabeta kakumujika waBayala nakuya kuMpidi yaSeyiri nawa yahitili nakushika kumukunkumuki waMpidi yaYeyarimi kukabeta kakuchimunswa, dikwila nawu Kesaloni, nawa yakunkumukilili kuBetishemeshi+ nakuhita kuTimina.+ 11 Nawa ñinza yashikili kumukunkumuki waEkironi+ kukabeta kakuchimunswa nawa ayipulili kufuma kuShikeroni nakuhita kuMpidi yaBayala nakushika kuYabineyeli, nawa iyi ñinza yakuminini kukaluñalwiji.

12 Ñinza yakumujika yadiña Kaluñalwiji Keneni*+ nimukulishu waku. Iyi diyadiña ñinza yawanyana kaYuda kwesekeja nayisaka yawu yejima.

13 Yoshuwa wamwinkeli Kalebu+ mwana kaYefuna iseka hakachi kawanyana kaYuda kwesekeja nachamulejeliwu Yoshuwa kudi Yehova. Wamwinkeli Kiriyati Ariba (Ariba wadiña tata yaAnaki), dikwila nawu Hebironi.+ 14 Dichi Kalebu watemwinimu anyana kaAnaki+ awamayala asatu: Sheshayi, Ahimani niTalimayi,+ wowu anyana kaAnaki. 15 Kuhiñahu, wayili nakuzuña nawantu ashakamineña muDebiri.+ (Kunyima, ijina daDebiri aditeneneña nawu Kiriyati Sefweri.) 16 Kufumahu, Kalebu wahosheli nindi: “Yowu iyala wakatapa musumba waKiriyati Sefweri nakuwimika mushindu, nakamwinka mwanami wamumbanda Akisa kulonda akekali ñodindi.” 17 Nawa Otiniyeli+ mwana kaKenazi+ mana kwaKalebu, diyi wawimikili mushindu. Dichi wamwinkeli mwanindi wamumbanda Akisa+ ekali ñodindi. 18 Akisa chayileñayi kwitala danfumwindi, wamulejeli nfumwindi nindi alombi mpata kudi tata yindi. Kuhiñahu, Akisa wasulukili hachimbuulu chindi.* Kalebu wamwihwili nindi: “Wunakukeñadi?”+ 19 Yena wamwakwili nindi: “Mwani nkiswili, muloña wunanyinki chibalu champata yakukabeta kakuchidiilu;* nyinki niGuloti Mayimi.”* Dichi wamwinkeli Guloti yakuMukandu niGuloti yakuChikulu.

20 Iwu diwuswana wamuchidi waYuda kwesekeja nayisaka yawu.

21 Nyisumba yadiña kwakuminini muchidi waYuda kukabadi kañinza yaEdomi+ kukabeta kakuchidiilu yadiña: Kabezeyeli, Ederi, Yaguri, 22 Kina, Dimona, Adada, 23 Kedeshi, Hazori, Itinani, 24 Zifi, Telemi, Beyaloti, 25 Hazorihadata niKeriyoti Hezironi, dikwila nawu Hazori, 26 Amami, Shema, Molada,+ 27 Hazarigada, Heshimoni, Betipeleti,+ 28 Hazari Shuwali, Beyerisheba,+ Biziyotiya, 29 Bayala, Iyimu, Ezemi, 30 Elitoladi, Kesili, Horima,+ 31 Zikilagi,+ Madimana, Sanisana, 32 Lebayoti, Shilihimi, Ayini niRimoni.+ Nyisumba yejima yadiña 29 hamu nanyikala yayu.

33 Nyisumba yadiña muShefela+ yadiña: Eshitayoli, Zora,+ Ashina, 34 Zanowa, Enganimi, Tapuwa, Enami, 35 Yarimuti, Adulami,+ Soko, Azeka,+ 36 Shayarayimi,+ Aditayimi niGedera niGederotayimi.* Nyisumba 14 hamu nanyikala yayu.

37 Zenani, Hadasha. Migidaligadi, 38 Dileyani, Mizipi, Yokiteyeli, 39 Lakishi,+ Bozikati, Egiloni, 40 Kaboni, Lahimami, Kitilishi, 41 Gederoti, Betidagoni, Nayama niMakeda.+ Nyisumba 16 hamu nanyikala yayu.

42 Libina,+ Eteri, Ashani,+ 43 Ifita, Ashina, Nezibi, 44 Keyila, Akizibi niMaresha. Nyisumba 9 hamu nanyikala yayu.

45 Ekironi hamu namatawuni* anyeñumukiliku ninyikala yayu; 46 kufuma kukabeta kakumujika waEkironi nimaluña ejima adiña kunsa yaAshidodi ninyikala yayu.

47 Ashidodi+ nimatawuni* anyeñumukiliku ninyikala yayu; Gaza+ nimatawuni anyeñumukiliku ninyikala yayu kushika nikuMuhoñi waEjipitu, kuKaluñalwiji Keneni* niiluña mwaditalashaninawu.+

48 Nyisumba yamwiluña damapidi yadiña, Shamiri, Yatiri,+ Soko, 49 Dana, Kiriyati Sana, dikwila nawu Debiri, 50 Anabi, Eshitemo,+ Animi, 51 Gosheni,+ Holoni niGilo.+ Nyisumba 11 hamu nanyikala yayu.

52 Arabi, Duma, Eshani, 53 Yanimi, Betitapuwa, Afeka, 54 Humitahi, Kiriyati Ariba, dikwila nawu Hebironi,+ niZiyori. Nyisumba 9 hamu nanyikala yayu.

55 Mayoni,+ Karimeli, Zifi,+ Yuta, 56 Yezireyeli, Yokideyami, Zanowa, 57 Kayini, Gibeya niTimina.+ Nyisumba 10 hamu nanyikala yayu.

58 Halihuli, Betizuri, Gedori, 59 Mayarati, Betanoti niElitekoni. Nyisumba 6 hamu nanyikala yayu.

60 Kiriyati Bayali, dikwila nawu Kiriyati Yeyarimi,+ niRaba. Nyisumba yiyedi hamu nanyikala yayu.

61 Nyisumba yamwisaña yadiña, Betaraba,+ Midini, Sekaka, 62 Nibishani, Musumba waMuñwa niEngedi.+ Nyisumba 6 hamu nanyikala yayu.

63 Ilaña aYebusi+ owu ashakamineña muYerusalema,+ akañenyi kuyihañamu kudi amayala akumuchidi waYuda,+ dichi aYebusi atwalekahu kushakama nawantu amuYuda muYerusalema kushika nikulelu.