Ansompeshi
18 Munowu mafuku, muIsarela himwadiña mwantaku.+ Nawa munowu mafuku muchidi waDani+ wakeñeleña iluña dakushakamahu,* muloña kushika nihanoyu mpinji hiyatambwilihu wuswana hakachi kanyichidi yaIsarelaku.+
2 Eni Dani atemesheli amayala atanu kufuma muchisaka chawu, amayala ashikilamu kufuma kuZora nikuEshitayoli+ kuya nakwendesha ituña nikutala chididi. Ayilejeli nawu: “Yenu mwakatali chidi odu ituña.” Chashikiliwu kwiluña damapidi daEfuremu kwitala daMika,+ akaamini kwenoku. 3 Chashikiliwu kwakwihi netala daMika, atiyili izu damukwenzi kaLevi nawa adilukili, dichi ayili kudi yena nakumwihula nawu: “Hinyi wakuleteli kunu? Chumanyi chiwunakwila kunu? Chumanyi chinakuleteshi wushakami kunu?” 4 Yena wayakwili nindi: “Mika nañilili munganji kanaña, nawa nanyiñiji mudimu wakwikala kapristu kindi.”+ 5 Kuhiñahu, amwilili nawu: “Mwani mwihuli Nzambi twiluki neyi tukwenda chiwahi hela nehi.” 6 Dichi kapristu wayilejeli nindi: “Yenuña mukuwunda. Yehova wudi nanenu halwendu lwenu.”
7 Dichi owu amayala atanu atwalekelihu nalwendu lwawu nawa ashikili kuLayishi.+ Antu awaniniwu mwenomu adiña antu adikuhwelela neyi eni Sidoni. Ashakamineña mukuwunda nawa chakadi kwakama,+ hikwadiñahu mukakwimika mushindu walukukili ituña dawu kulonda ayikabishiku. Adiña kwakulehi nankashi nawaSidoni nawa hiyadikundileñahu nawantu adi ejimaku.
8 Chafuntiliwu kudi amanakwawu kuZora nikuEshitayoli,+ amanakwawu ayihwili nawu: “Mwenda ñahi?” 9 Wena aakwili nawu: “Tuyenu twakazuñi nawu, muloña tunamoni netu ituña dawu dadiwahi chikupu. Muloñadi chimunakushintajalila? Bayi mulabajala kuya nakutambula odu ituñaku. 10 Chimwakashika, mwakawana antu abulaña kwakama chuma chidi chejima,+ nawa ituña dawu deneni. Nzambi nayinki enu odu ituña, hiiluña mwakadi kukaankila chuma chejima chahamaseki.”+
11 Kufumahu, amayala 600 kufuma muchisaka chawaDani adimanyekeli kuya nakuzuña njita, anyamukili kufuma kuZora nikuEshitayoli.+ 12 Ayili nawa ateekeleli kuKiriyati Yeyarimi+ muYuda. Dihafuma idi iluña dekalila kumujika waKiriyati Yeyarimi aditeneña nawu Mahanedani*+ kushika nikulelu. 13 Afumini kwenoku nakuya kwiluña damapidi daEfuremu nawa enjili kwitala daMika.+
14 Kuhiñahu, awa amayala atanu ayili nakwendesha ituña daLayishi,+ alejeli amanakwawu nawu: “Muneluki ntahi nenu munawa matala mudi ifwodi,* yifwikija yawaterafi,* nkishi wakusoña nichifwikija wachikuñu?*+ Monenu chimwatela kwila.” 15 Dichi emeni nakuya kwitala danowu mukwenzi kaLevi+ dadiña kwakwihi netala daMika, nawa amwihwili chahandileñayi. 16 Haniyi mpinji, antu jaDani 600+ adimanyekeli kuzuña njita emeni kuwiñililu wakuchiisu. 17 Ana amayala ayili nakwendesha ituña+ eñilili mukachi nakunona nkishi wakusoña, ifwodi,+ yifwikija yawaterafi*+ ninkishi wachikuñu.*+ (Kapristu+ wemeni kuwiñililu wakuchiisu hamu nawamayala 600 adimanyekeli kuzuña njita.) 18 Ayili mwitala daMika nawa anoneli nkishi wakusoña, ifwodi, yifwikija yawaterafi* ninkishi wachikuñu.* Kapristu wayihwili nindi: “Munakwiladi?” 19 Wena amwilili nawu: “Mwena nzo-o. Kwata hakanwa nawa tuyi hamu wiikali tata* nawa kapristu ketu. Chachiwahi chidihi, eyi kwikala kapristu mwitala damuntu wumu+ tahindi kwikala kapristu kamuchidi nawa kachisaka chamuIsarela?”+ 20 Dichi awa mazu amutiyishili kapristu kuwaha, nawa wanoneli ifwodi, yifwikija yawaterafi* ninkishi wakusoña+ nakuya hamu nawantu.
21 Kufumahu, abalumukili nakutwalekahu nalwendu lwawu, atwamijili anyana hambidi yawu, yimuna niyuma yalema wuseya. 22 Chendeliwu chintampu chachilehi kufuma kwitala daMika, amayala ashakamineña mumatala adiña kwakwihi netala daMika adipompesheli hamu nawa ayipupilili eni Dani nakuyiwana. 23 Chayibidikiliwu eni Dani, hohenohu eni Dani abalumukili nakuyitala nawa amwihwili Mika nawu: “Kunasoñidi? Muloñadi chimunadipompesheli hamu?” 24 Yena wayakwili nindi: “Munansendeli anzambi ami inatuñili nawa munasendi nikapristu. Chumanyi chinnashali nachu? Hanu dinu munakuñihwiladi nenu, ‘Kunasoñidi?’” 25 Eni Dani amwilili nawu: “Bayi wutuzuwilaku; mukunkulwayi, amayala azuwa akukwila chuma chatama nawa chumichi chikuletesha wujimbeshi wumi weyi nimawumi awantu amwitala deyi.” 26 Dichi eni Dani atwalekelihu nalwendu lwawu; nawa Mika chamweniyi nindi akola kumubadika, wabalumukili nakufunta kwitala dindi.
27 Chelili anasendi dehi anzambi atuñiliyi Mika, kushilahu nikapristu kindi, ayili kuLayishi+ kwadiña antu ashakamineña mukuwunda nawa abulileña kwakama chuma chidi chejima.+ Ayitapili nampoku yakabali nikwocha musumba nakesi. 28 Hikwadiña wakwamwina iwu musumbaku, muloña wadiña kwakulehi nankashi naSidoni. Iwu musumba waLayishi wadiña muchana chachinekineki chaBetirehobi+ nawa antu adiñamu hiyadikundileña nawantu adi ejimaku. Kuhiñahu, atuñulwili iwu musumba nakutachika kushakamamu. 29 Kubombelahu, iwu musumba awutuumbili nawu Dani,+ ijina datata yawu Dani avweliwu kudi Isarela.+ Ilaña hatachi, iwu musumba awuteneneña nawu Layishi.+ 30 Kufumahu, eni Dani adimikilili nkishi wakusoña,+ nawa Yonatani+ mwana kaGeshomu,+ Geshomu mwana kaMosi, hamu namwanindi weyala ekalili atupristu amuchidi waDani sampu niifuku dayitwaliliwu muwunkoli antu ashakamineña munodu ituña. 31 Nawa emikili nkishi wakusoña watuñiliyi Mika, owu nkishi washakamineña kwenoku mafuku ejima adiña itala daNzambi walala muShilo.+