Ansompeshi
17 Kwadiña iyala wumu washakamineña mwiluña damapidi daEfuremu,+ ijina dindi Mika. 2 Wamulejeli mama yindi nindi: “Ayina yikunku yasiliva 1,100 yakunoneleliwu yinatiyili wunakushiñilahu muntu wayinoneli, yami nikweti. Yami nayinoneli.” Hohenohu mama yindi wahosheli nindi: “Eyi mwanami Yehova akukiswili.” 3 Dichi wamufuntishilili mama yindi yikunku yasiliva 1,100, ilaña mama yindi wahosheli nindi: “Chakadi nikujina, nukumwinka* Yehova siliva kufuma muchikasa chami kulonda eyi mwanami wuyizatishi kutuñilamu nkishi wakusoña nichifwikija wachikuñu.*+ Dichi inakukufuntishilawu.”
4 Chafuntishiliyi oyu siliva kudi mama yindi, mama yindi wanonelihu yikunku yasiliva 200 nakwinka muchiji wasiliva. Watuñili nkishi wakusoña nichifwikija wachikuñu;* nawa ayitentekeli mwitala daMika. 5 Iwu iyala Mika wadiña netala dawanzambi, watuñili ifwodi*+ niyifwikija yawaterafi*+ nawa waswanyikili* mwanindi wumu weyala kulonda amukalakeleña yena mudimu wawupristu.+ 6 Munowu mafuku, muIsarela+ himwadiña mwantaku. Muntu-himuntu welileña chuma chamweneñayi nindi chaloña.*+
7 Dichi kwadiña mukwenzi wakuBetelemi+ muYuda wamuchisaka chaYuda. Wadiña kaLevi+ washakaminiku kwenoku mpinji yimu. 8 Iwu mukwenzi wafumini mumusumba waBetelemi muYuda nakuya nakukeña iluña hakushakama. Chayileñayi, washikili kwiluña damapidi daEfuremu kwitala daMika.+ 9 Kufumahu, Mika wamwihwili nindi: “Wunafumi kudihi?” Yena wamwakwili nindi: “Nidi kaLevi nafumi kuBetelemi muYuda, nawa inakuya nakukeña iluña hakushakama.” 10 Dichi Mika wamulejeli nindi: “Shakamaku nanami, wiikali tata* nawa kapristu kami. Hachaaka-hachaaka nukukwinkaña yikunku yasiliva 10 niyakuvwala niyakuda.” Dichi owu kaLevi weñilili mwitala. 11 Hohenohu kaLevi wetejeli kushakama nanowu iyala, nawa owu mukwenzi wekalili neyi wumu wahadi anyanindi awamayala. 12 Kubombelahu, Mika waswanyikili* kaLevi kwikala kapristu kindi,+ nawa washakamineña mwitala daMika. 13 Kufumahu, Mika wahosheli nindi: “Ichi dinu neluki nami Yehova wukuñilila mwamuwahi, muloña kaLevi nekali kapristu kami.”