Masamu

37 Bayi wutiya kutama* muloña wawantu atama

Hela kutiyila ichima antu elaña yatamaku.+

 2 Akalepa swayi-swayi neyi matahu+

Nikuuma neyi chomaña matahu atuuta.

 3 Mukuhweleli Yehova nawa ilaku mwamuwahi;+

Shakamaku hamaseki,* nawa ilaku mwakashinshi.+

 4 Zañalelaku chikupu mudi Yehova,

Nawa wakakwinka yuma yafwilaña muchima weyi.

 5 Kunjikaku njila yeyi kudi* Yehova;+

Mushindameni, nawa wukukukwashaku.+

 6 Wukwilisha kuloña kweyi kutoñeka neyi chatoñekaña itena nantetemena,

Niwuñanji weyi neyi chatoñekaña itena neyi dinashiki hakachi kamutu.

 7 Diwunjiki kumesu aYehova+

Nawa twalekakuhu kumuchiñilila chikupu.*

Bayi akuhilisha kudi muntu

Owu watweshaña kuzatisha tufuta twindiku.+

 8 Lekaku kuzuwa nawa lekaku ndulu;+

Bayi wuhila nakwila yuma yatamaku.*

 9 Muloña antu atama akayijilumuna,+

Ilaña antu amuchiñejaña Yehova akaswana iseki.+

10 Hakushimbula hohu chanti, antu atama hiyakekalaku nawa cheñiku;+

Wakatalatala hashakamineñawu,

Akekalahu wanyi.+

11 Ilaña amwovu akaswana iseki,+

Nawa akazañalala chikupu nakushakama mukuwunda kwakweni.+

12 Muntu watama wamukasilaña muntu waloña tufuta;+

Wamusumonenaña kumazewu indi.

13 Ilaña Yehova wakamuseha,

Muloña Yena weluka nindi ifuku dindi dakenza.+

14 Antu atama asomonaña mpoku jawu jatubali muyindalu nikwevula* mata awu anyikunji

Kulonda adimbwishi antu anakukabishawu niatuzweñi,

Kulonda ajahi antu elaña yuma yaloña.

15 Ilaña mpoku yawu yakabali yakapwika muchima wawu aweni+

Mata awu anyikunji akayikotola.

16 Yuma yantesha yamuntu waloña yayiwahi

Kubadika yuma yayivulu yawantu atama amavulu.+

17 Muloña makasa awantu atama akayikotola,

Ilaña Yehova wakakwasha antu aloña.

18 Yehova weluka kukala kwamonañawu antu abula muloña,*

Nawa wuswana wawu wakekala wahaya nyaaka.+

19 Hiyamba kayitiyisha nsonyi mumpinji yakukalaku;

Mumpinji yanzala yakapwelendendi akekala nayakuda yayivulu.

20 Ilaña antu atama akanoña;+

Ayilumbu jaYehova akajimañana neyi munyenvu walubanji;

Akajimañana neyi wishi.

21 Muntu watama wakongolaña, ilaña hafuntishañaku,

Hakwila muntu waloña wekala nachisambu* nawa wahanaña.+

22 Antu akiswilañayi Yena akaswana iseki,

Ilaña antu ashiñañayi Yena akayijilumuna.+

23 Yehova walombolaña* nyendu yamuntu+

Neyi amonamu kuwaha munjila yindi.+

24 Hela chakwila wukudimbuka, hakutwalekahu kwikala hamasekiku,+

Muloña Yehova wamukwashaña nachikasa Chindi.+

25 Nadiñi kansi nawa ichi nakuli,

Ilaña kanda nimoneñahu dehi muntu waloña anamushiyi chisayikila,+

Hela anyanindi anakuya nakulombalomba dinkendiku.*+

26 Mpinji yejima wakongweshaña namuchima wumu,+

Nawa anyanindi akatambwila nkisu.

27 Lekaku kwila yuma yatama, ilaña ilaku yayiwahi,+

Nawa wakashakama haya nayaaka.

28 Muloña Yehova wakeña wuñanji,

Nawa hamba kashiya indi ashinshikaku.+

Wakayikiñaña mpinji yejima;+

Ilaña anyana kamuntu watama akayijilumuna.+

29 Aloña akaswana iseki,+

Nawa akashakamahu haya nyaaka.+

30 Kanwa kamuntu waloña kalejanaña maana,*

Nawa idimi dindi dahoshaña mwawuñanji.+

31 Nshimbi jaNzambi yindi jidi mumuchima windi;+

Nyendu yindi hiyakahukanaku.+

32 Muntu watama wamukeñakeñaña waloña,

Kulonda amujahi.

33 Ilaña Yehova hamba kamulekela muchikasa chanowu muntu+

Hela kumuwana namuloña neyi anamusompeshiku.+

34 Muchiñeji Yehova nakulondela njila yindi,

Nawa wakakunyamuna kulonda wakaswani iseki.

35 Namoni muntu wakadi luwi, watama

Nakutaanda neyi mutondu wawuwahi weneni wunameni mwiseki dawushi.+

36 Ilaña wanyakeli kufwa nawa hamwekenihu cheñiku;+

Natwalekelihu kumukeñakeña, ilaña namuwanini wanyi.+

37 Mwiluki muntu wakadi muloña,*

Nawa twalekakuhu kumutala muntu woloka,+

Muloña mbidi yanowu muntu yakekala yawunda.+

38 Ilaña akakufumpa nshimbi ejima akayijilumuna;

Mbidi yawantu atama akayiketwisha.+

39 Wamwinu wawantu aloña wafumaña kudi Yehova;+

Yena diyi mpwembu yawu mumpinji yayihuñu.+

Wakayipulwisha kudi antu atama nikuyamwina,

Muloña abatamaña mudi yena.+