Masamu

107 Musakililenu Yehova, muloña himuwahi;+

Kukeña kwindi kwakashinshi kwahaya nyaaka.+

 2 Antu akuuliliwu kudi Yehova ahoshi awa mazu,

Owu akuuliliyi kuchikasa chamukankunyi,*+

 3 Owu apompesheliyi kufuma kumatuña,+

Kufuma kumusela nikufuma kumujika,*

Kufuma kukabeta kakuchimunswa nikufuma kakuchidiilu.+

 4 Alulutili mwisaña, muchinkalampata;

Hiyawanini njila yaya kumusumba kwadi kushakamawuku.

 5 Atiyili nzala nimpwila;

Atiyili* lunshetela muloña wakuzeya.

 6 Atwalekelihu kumudilila Yehova muyihuñu yawu;+

Wayipulwishili kumakabi awu.+

 7 Wayendesheli munjila yalala+

Kulonda enzi kumusumba kwadi kushakamawu.+

 8 Antu amusakilili Yehova+ muloña wakukeña kwindi kwakashinshi

Nihanyidimu yindi yakuhayamisha yakoñeleliyi anyana kawantu.+

 9 Muloña namanishi mpwila yawantu anatiyi mpwila*

Nawa adiña nanzala wayikutishili* nayuma yayiwahi.+

10 Amakwawu ashakamineña mumwidima wasweja,

Atuyili* adiña nakukabishawu nawa adiña muyikuñu.

11 Muloña adikañili nezu daNzambi;

Adiwili kufumba kwaMukakubadika Chikupu.+

12 Dichi wazozesheli nyichima yawu namakabi amweniwu;+

Ahukeni nawa kwadiña muntu wakuyikwashaku wanyi.

13 Amutambikili Yehova kulonda ayikwashi muyihuñu yawu;

Wayamwinini kumakabi awu.

14 Wayifumishili mumwidima wasweja,

Nawa waketwili maleñi awu ayikasiliwu.+

15 Antu amusakilili Yehova muloña wakukeña kwindi kwakashinshi+

Nihanyidimu yindi yakuhayamisha yakoñeleliyi anyana kawantu.

16 Muloña nabaloli yiisu yawuneñu

Nikuketola yikuñu yakuyiisu.+

17 Adiña ayisupi nawa akabakeni+

Muloña wanshidi jawu niyiluwa yawu.+

18 Alekeli kutiya chipepa chayakuda* yejima;

Aswinini kwakwihi nayiisu yakufwa.

19 Amutambikileña Yehova kulonda ayikwashi muyihuñu yawu;

Wadiña nakuyamwina kumakabi awu.

20 Watemesheleña izu dindi nakuyuuka+

Nawa wayipulwishileña mumabuku mwafwileñawu.

21 Antu amusakilili Yehova muloña wakukeña kwindi kwakashinshi

Nihanyidimu yindi yakuhayamisha yakoñeleliyi anyana kawantu.

22 Alambuli nyilambu yakusakilila+

Nikushimuna nyidimu yindi nakudila kwamuzañalu.

23 Owu endaña hatuluñalwiji mujimbopolu,

Owu azatilaña nyidimu yawu hamenji amavulu,+

24 Anamoni nyidimu yaYehova

Ninyidimu yindi yakuhayamisha mwinyiñi;+

25 Ochanyamukaña mpepela yasweja nezu dindi,+

Nakunyamuna mankanda ahakaluñalwiji.

26 Ayinyamunaña mwiwulu kudi mankanda;

Nawa aholokelaña hakachi kakaluñalwiji.

27 Aheñwañilaña nikutedañila neyi muntu wunasheti,

Nawa nyidimu yawu yejima yelukawu yekalaña yamukunkulwayi.+

28 Kuhiñahu amutambikaña Yehova kulonda ayikwashi muyihuñu yawu;+

Nawa wayamwinaña kumakabi awu.

29 Wawundishaña mpepela yasweja;

Mankanda ahakaluñalwiji amwenaña.+

30 Azañalalaña neyi yumiyi yinemani kuka-a,

Nawa wayilombolaña kwiluña kwashikenaña jimbopolu kunakeñiwu.

31 Antu amusakilili Yehova muloña wakukeña kwindi kwakashinshi

Nihanyidimu yindi yakuhayamisha yakoñeleliyi anyana kawantu.+

32 Amutuumbakeshi muchipompelu chawantu,+

Nawa amushimeki hampuña* yawakulumpi.

33 Wabalumunaña tuloña kwikala chinkalampata

Nituseloki twamenji kwikala iseki dooma,+

34 Iseki dawushi kwikala ikula damukunkulwayi,+

Muloña wakutama kwanowu ashakamañamu.

35 Wabalumunaña chinkalampata kwikala majiya amenji mudi mateti,

Niiseki dooma kwikala tuseloki twamenji.+

36 Welishaña adi nanzala kushakama mwenomu,+

Kulonda atuñi musumba mwatela kushakamawu.+

37 Adimaña maha nimatempa anyivinyu+

Omu mwafumaña mbutu jajivulu.+

38 Wayikiswilaña nawa avulaña chikupu;

Hetejaña ñombi jawu kujiyaku.+

39 Ilaña akehaña cheñi nawa asawukaña

Muloña wamakabi, yihuñu nichineñi.

40 Wayisawulaña antu alema

Nikuyiletesha aluluteña muchinkalampata mwabula njila.+

41 Ilaña wakiñaña* atuzweñi abuli kukabakana+

Nawa wavulishaña yisaka yawu neyi mukanka wayimuna.

42 Oloka amonaña chumichi nawa azañalalaña;+

Ilaña ejima abula kuloña ajikaña tunwa twawu.+

43 Wejima wudi namaana wukuhembaña yumiyi+

Nawa wukutoñojokaña chikupu hanyidimu yaYehova yakukeña kwakashinshi.+