Yeremiya
29 Awa diwu mazu adiña mumukanda watemesheliyi kaprofwetu Yeremiya kufuma muYerusalema kudi akulumpi ejima adiña hadi ankoli, atupristu, atuprofwetu niantu ejima, afumishiliwu muYerusalema kudi Nebukaneza nakuyitwala muwunkoli kuBabiloni, 2 hanyima yakwila Mwanta Yekoniya,+ mama yamwanta,+ ayilolu amuchota, atulamba amuYuda niamuYerusalema niakawukalawenu niakakuzata nayikuñu* anafumi dehi muYerusalema.+ 3 Watemesheli mukanda naElasa mwana kaShafani+ niGemariya mwana kaHilikiya, owu watemesheliyi Mwanta Zedekiya+ kuBabiloni kudi Mwanta Nebukaneza wakuBabiloni. Wahosheleña nawu:
4 “Ami Yehova wamazaza, Nzambi yaIsarela, nahoshi kudi enu ankoli ejima innafumishi muYerusalema nakuyitwala muwunkoli muBabiloni nami, 5 ‘Tuñenu matala mushakameñamu. Dimenu matempa mudeña nyikaabu yawu. 6 Sumbulenu ambanda nawa vwalenu anyana awamayala niawambanda; yisumbwilenu anyanenu awamayala ambanda nawa sumbwishenu anyanenu awambanda, kulonda niwena avwali anyana awamayala niawambanda. Musemununi mwenomu, nawa bayi mukehaku. 7 Nawa fwilenuña nenu mumusumba mwinnayitwali muwunkoli mwiikali kuwunda, nawa wulombelenuñaku kudi Yehova, muloña neyi mwikala kuwunda ninenu mukwikala mukuwunda.+ 8 Muloña Yehova wamazaza, Nzambi yaIsarela, nahoshi nindi: “Bayi mwiteja ayidimbi+ kudi atuprofwetu enu niakakuhoña enu adi mukachi kenuku, nawa bayi mutiyilila kuyilota yinakulotawuku. 9 Yehova nahoshi nindi, ‘Muloña anakuyiprofwetela jamakudi mwijina dami. Hinnayitemeshiku.’”’”+
10 “Muloña Yehova nahoshi nindi, ‘Neyi yaaka 70 yinashikili dehi, nakabalumukila kudi enu,+ nawa nakashikija munakanini mwamuwahi kuhitila mukuyifuntisha munidi iluña.’+
11 “Yehova nahoshi nindi, ‘Neluki yuma yinnakuyitoñojokela, hiyitoñojoka yakuwunda, bayi yayihuñuku,+ yakuyinka mbidi yayiwahi nikuchiñeja.+ 12 Dichi mwakantambika, mwakenza nawa mwakalomba kudi ami, nawa nakayitiya.’+
13 “‘Mwakankeñakeña nawa mwakanwana,+ muloña mwakankeñakeña namuchima wenu wejima.+ 14 Nawa nakadisolola kudi enu,’+ dichinahoshiyi Yehova. ‘Nawa nakapompesha ankoli jenu nikuyikuñulwila enu hamu kufuma munyuza yejima nimumaluña munayipalañesheleli,’+ dichinahoshiyi Yehova. ‘Nawa nakayifuntisha kwiluña kunayifumishili nakuyitwala muwunkoli.’+
15 “Ilaña munahoshi nenu, ‘Yehova natunyamwini atuprofwetu muBabiloni.’
16 “Muloña Yehova nahoshi kudi mwanta wunashakami hetanda daDavidi+ nikudi antu ejima anakushakama muniwu musumba, amanakwenu anabuli kuya nanenu muwunkoli, nindi 17 ‘Yehova wamazaza nahoshi nindi: “Inakuyitemeshela mpoku yakabali, nzala yakapwelendendi nichipupu,*+ nawa nakayibalumuna neyi yikuyu yatoka* chakwila hiyakutwesha nikuyidaku.”’+
18 “‘Nawa nukuyikumpisha nampoku yakabali,+ nanzala yakapwelendendi ninachipupu, nukuyibalumuna ekali chuma chakuhayama chikupu kudi mawanta ejima ahamaseki,+ ishiñu nawa chuma chakuhayamisha, chuma chakwimbila muloji+ nawa chakusupisha kudi nyuza yejima mwinnayipalañesheli,+ 19 muloña hiyanakutiyilila mazu ami inayitemesheleli nawambuñami atuprofwetuku, inayitemesheleleña kapampa kakavulu,’*+ dichinahoshiyi Yehova.
“‘Ilaña himunatiyililiku,’+ dichinahoshiyi Yehova.
20 “Dichi, tiyenu chinnahoshi ami Yehova, kudi enu ankoli ejima innafumishi muYerusalema nakuyitwala muBabiloni. 21 Ami Yehova wamazaza , Nzambi yaIsarela, nahoshi hadi Ahabi mwana kaKolaya nihadi Zedekiya mwana kaMayaseya, anakuprofweta jamakudi mwijina dami,+ nami, ‘Ichi inakuyihana muchikasa chaMwanta Nebukaneza* wakuBabiloni, nawa yena wukuyijahila hamesu enu. 22 Nawa chuma chikuyimwekena chikwikala ishiñu dakahoshañawu ankoli jaYuda ejima adi muBabiloni nawu: “Yehova akwilishi wiikali neyi Zedekiya nawa neyi Ahabi, ocheliyi mwanta waBabiloni mukesi!” 23 muloña anakoñi chuma chansonyi muIsarela,+ kwila wujila nawañodi jawakwawu nikuhosha mazu akutwamba mwijina dami inabulili kuyileja.+
“‘“Yami ineluki, nawa yami chinsahu,”+ dichinahoshiyi Yehova.’”
24 “Hakwila Shemaya+ wakuNehelami wumuleji neyi, 25 ‘Yehova wamazaza, Nzambi yaIsarela, nahoshi nindi: “Chineli watemesheli nyikanda mwijina deyi kudi antu ejima adi muYerusalema, kudi Zefwaniya+ mwana kaMayaseya, kapristu, nikudi atupristu ejima, neyi, 26 ‘Yehova nakutondi wiikali kapristu nakumusinsa Yehoyada kapristu kulonda wiikali mukulumpi wetala daYehova, wakutala muntu wejima wazaluka wunakwila neyi kaprofwetu kulonda wumushi mumpompa nimumaleñi amunshiñu;+ 27 hanu dinu muloñadi chiwunabulili kumuzuwila Yeremiya wakuAnatoti,+ wunakuyiprofwetela enu?+ 28 Muloña watutemesheleli nimazu kuBabiloni, nindi: “Hakahita mpinji yayilehi! Tuñenu matala mushakameñamu. Dimenu matempa mudeña nyikaabu yawu,+—”’”’”
29 Chelili kapristu Zefwaniya+ atañi iwu mukanda kumatu akaprofwetu Yeremiya, 30 izu daYehova denjili kudi Yeremiya nawu: 31 “Temeshaku mazu kudi ankoli ejima, neyi, ‘Yehova nahoshi kutalisha hadi Shemaya wakuNehelami nindi: “Chineli Shemaya waprofweteli kudi enu, hela chakwila hinamutemesheliku, nawa wesekeli kuyiluwañesha kulonda mukuhweleli mumakudi,+ 32 dichi, Yehova nahoshi nindi, ‘Inakumubalumukila Shemaya wakuNehelami niamuchisaka chindi. Kwosi muntu wamuchisaka chindi hela wumu wukupuluka mukachi kanawa antuku, nawa hakumona yuma yayiwahi yinakayilila antu jamiku,’ dichinahoshiyi Yehova, ‘muloña nakuleja antu kudikaña naYehova.’”’”