YONA
1 Izu daYehova denjili kudi Yona*+ mwana kaAmitayi nawu: 2 “Nyamukaku, yaku kuNiniva+ musumba weneni, nawa wubidiki nsañu yakuwusompesha, muloña kutama kwawu kunashiki kudi ami.”
3 Ilaña Yona wanyamukili nakumutemuka Yehova nakuya kuTashishi; wakunkumukili nakuya kuYopa nawa wawanini mbopolu yayileña kuTashishi. Dichi wafweteli mali nawa wakandamini nakuya hamu nawu kuTashishi, nakumutemuka Yehova.
4 Kufumahu, Yehova waleteli mpepela yeneni hakaluñalwiji, nawa iyi nvula yampepela yaswejeli hakaluñalwiji chakwila mbopolu yakeñeleña nikukisika. 5 Akakwendesha mbopolu atiyili woma chakwila muntu-himuntu watachikili kutambika nzambi yindi nindi ayikwashi. Nawa atachikili kunatila yuma yadiña mumbopolu hakaluñalwiji kulonda yipeeli.+ Ilaña Yona wayili mwiluña dimu mukachi kambopolu, nawa wakaamini tulu twatweni. 6 Mukulumpi wambopolu wamuwanini nakumwila nindi: “Wunakaaminidi? Hindukaku, tambikaku nzambi yeyi! Hadaha Nzambi walala wukutukwasha, kulonda tubuli kujiya.”+
7 Kuhiñahu adilejeli mulwawu nawu: “Ilenu tusakuli nachinjikijilu+ kulonda twiluki wunakojeji iku kukala.” Dichi asakwili nachinjikijilu, nawa chinjikijilu chaholokeleli hadi Yona.+ 8 Amwilili nawu: “Mwani tuleji, hinyi wunakojeji iku kukala kunatumwekeni? Wazataña mudimwinyi, nawa wunafumi kudihi? Wunafumi kwituñanyi, nawa kumutañanyi?”
9 Waakwili nindi: “Ami nidi kaHeberu, nawa namutiyaña woma* Yehova Nzambi yamawulu, waleñeli kaluñalwiji niiseki dooma.”
10 Hohenohu awa amayala aswejeli kutiya woma, nawa amwihwili nawu: “Chumanyi chiwuneli?” (Awa amayala elukili nawu nakumutemuka Yehova, muloña wayilejeli.) 11 Dichi amwihwili nawu: “Chumanyi chitukukwila kulonda kaluñalwiji kamweni?” Muloña mpepela yadiña nakuswejelaku hakaluñalwiji. 12 Waakwili nindi: “Nnyamunenu munnatili hakaluñalwiji, nawa kaluñalwiji kakumwena; muloña neluki nami yami inakojeji iyi nvula yampepela yasweja yiyishikeni.” 13 Hela chochu, awa amayala avuwileña nañovu kulonda atwali mbopolu kuchikumu, ilaña akañenyi, muloña mpepela hakaluñalwiji yadiña nakuswejelaku kutubadi twejima.
14 Dichi amutambikili Yehova nakuhosha nawu: “Eyi Yehova mwani, tunalembi, bayi tujiya muloña waniwu iyalaku!* Bayi twikala namuloña wamashi akadi muloñaku, muloña wuneli kwesekeja namwaya muchima weyi, eyi Yehova.” 15 Kufumahu, amunyamwini Yona nakumunatila hakaluñalwiji. Hohenohu kaluñalwiji kamweneni. 16 Dichi awa amayala amutiyili Yehova woma chikupu,+ amulambwili Yehova mulambu nawa asanyikili.
17 Yehova watemesheli inshi weneni nakumuminya Yona. Dichi Yona washakamini mwivumu danshi mafuku asatu, mwaana niwufuku.+
2 Kuhiñahu, Yona walombeli kudi Yehova Nzambi yindi mwivumu danshi,+ 2 nakuhosha nindi:
“Namutambikili Yehova hinadiña muyihuñu, nawa wañakwili.+
Naabili nami ankwashi hinadiña heshina haheni* Mwijamu.*+
Eyi watiyili izu dami.
3 Chiwannatilili mumanyiñi, hakachi kakaluñalwiji,
Hohenohu menji annyeñumukili.+
Mankanda eyi asweja ejima anhitili hewulu.+
4 Nawa nahosheli nami, ‘Ananfumishi dehi kumesu eyi!
Hanu dinu nakashinshika cheñi ñahi tembeli yeyi yajila?’
5 Menji annyeñumukili nawa akeñeleña kunjaha;+
Manyiñi ambutili.
Matahu amukaluñalwiji ampombeli kumutu.
6 Nanekamini kwishina damapidi.
Nyikomenu yeseki yañenzelelelimu haya nyaaka.
Ilaña eyi Yehova Nzambi yami, wafumishili wumi wami mwibuku.+
7 Wumi wami chiwakeheleña, eyi Yehova yeyi inanukili.+
Dichi kulomba kwami kwenjili kudi eyi, mutembeli yeyi yajila.+
8 Antu asha maana kudi ankishi amukunkulwayi, adiwulaña kaseloki kakukeña kwawu kwakashinshi.*
9 Ilaña ami, nukukulambulaña nezu dakusakilila.
Chuma chinnasanyiki, nakachiila.+
Wamwinu wafumaña kudi Yehova.”+
10 Chimwahitili mpinji Yehova walejeli inshi, dichi wamusanzilili Yona kumasaña.
3 Kufumahu, izu daYehova denjili kamuchiyedi kudi Yona nawu:+ 2 “Nyamukaku, yaku kuNiniva+ musumba weneni, nawa wubidiki kudi yena nsañu yinukukuleja.”
3 Dichi Yona wovwahilili izu daYehova,+ wanyamukili nakuya kuNiniva.+ Niniva wadiña musumba weneni nankashi,* wakwenda mafuku asatu. 4 Kuhiñahu, Yona weñilili mumusumba, nawa chendeliyi lwendu lwefuku dimu, wadiña nakubidika nindi: “Kunashali mafuku 40 hohu, Niniva akumujilumuna.”
5 Dichi antu amuNiniva amukuhweleleli Nzambi,+ nawa abidikili mbila nawu ashakami chakadi kuda nikuvwala yisasa, kutachikila kudi muntu walema nakushika kudi wabula kulema. 6 Chelili iyi nsañu yishiki kudi mwanta waNiniva, wanyamukili hetanda dindi, wavuulili chakuvwala chindi chawanta nakuvwala yisasa nawa washakamini mumawuti. 7 Kufumahu, washimwini nindi abidiki mwahita Niniva yejima nawu,
“Kwesekeja nalushimbi lwamwanta niayilolu jindi: Kwosi muntu hela kanyama, ñombi hela mukoku, watela kuda chuma chidi chejimaku. Bayi ada yakuda hela kunwa menjiku. 8 Wejima wawu avwali yisasa, muntu nikanyama. Amutambiki Nzambi chikupu nawa afumi munjila jawu jatama nikuleka madombu awu. 9 Wuneluki hinyi hekwawu Nzambi walala wukuhimpa* mwakeñaña kwilayi nikuleka kuzuwa kwindi kwasweja, kulonda tubuli kujiya?”
10 Nzambi chamweniyi yuma yeliliwu, nanochu chalekeliwu yuma yatama yelileñawu,+ wahimpili yitoñojoka* nakuleka kuleta yihuñu yashimwiniyi nindi wakayiletela, nawa hayileteliku.+
4 Nawa chumichi chamutiyishili Yona kutama nawa wazuwili nankashi. 2 Dichi walombeli kudi Yehova nindi: “Eyi Yehova, talaña, komana ichi hidichuma chinakamineña hinadiña mwituña detuku? Dichaletesheli nitemukili kuTashishi+ hakusambila; muloña eyi wukweti wushona* nawa wudi Nzambi waluwi, hiwazuwaña swayiku nawa wavulisha kukeña kwakashinshi,+ watiyaña kutama yihuñu. 3 Ichi dinu eyi Yehova, mwani njahi hohu, muloña chikuwaha ami kufwa kubadika kuhanda.”+
4 Yehova wehwili nindi: “Chidi hohu chiwahi eyi kuzuwa ñana?”
5 Kufumahu, Yona wafumini mumusumba nawa wayili nakushakama kumusela wamusumba. Wadituñilili chisolu kwenoku nawa washakamini muwulelu wachu kulonda yamoni chuma chikumwekena musumba.+ 6 Dichi Yehova Nzambi wamenesheli kamutondu katandalaña* hadi Yona, kulonda kamuleteleña wulelu nikumumanishila chineñi. Nawa Yona wazañaleli nankashi nanaka kamutondu katandalaña.
7 Ilaña Nzambi walala watemesheli kabubu hankunku yakucha hefuku dalondelelihu, kadiili kamutondu katandalaña nawa komini. 8 Itena chidatachikili kutoñeka, Nzambi watemesheli mpepela yakumusela yitaata, dichi mwaana wamwocheli Yona mumutu nawa wahwidilili. Walombeleña nindi afwi,* nawa wahosheleña nindi, “Chikuwaha ami kufwa kubadika kuhanda.”+
9 Nzambi wamwihwili Yona nindi: “Chidi hohu chiwahi eyi kuzuwa ñana hamuloña wakamutondu katandalaña?”+
Hohenohu yena waakwili nindi: “Eña, natela kuzuwa, nazuwi chakwila inakukeña nikufwa.” 10 Yehova wamulejeli nindi: “Eyi wunatiyili luwi kamutondu katandalaña, kiwabula kutumba hela kukulisha. Kakula wufuku wumu hohu nawa kajiya wufuku wumu hohu. 11 Komana ninami kwila nitiyila luwi Niniva musumba weneni,+ mudi antu akubadika ha 120,000 abula nikwiluka chachiwahi nichatama, kushilahu niyimuna yawu yayivulu nehi?”+
Daya mukwila nawu, “Kapompa.”
Hela “nadifukulaña kudi.”
Hela “muloña wawumi waniwu iyalaku!”
MuchiHeberu, “mwivumu.”
Hela “Shelu,” dikwila nawu, ijamu dawantu ejima. Talenu Kulumbulula.
Hela hekwawu, “kashinshi kawu.”
MuchiHeberu, “musumba weneni kudi Nzambi.”
Hela “wukuditoñesha.”
Hela “waditoñesheli.”
Hela “wumuwahi.”
Hela hekwawu, “lumwonu.”
Hela “nindi wumi windi wufwi.”