NAHUMI
1 Mazu akumusompesha Niniva:+ Mukanda wachimwenu chaNahumi* mwini Elikoshi:
2 Yehova hiNzambi wakeñaña antu kudifukula kudi yena hohu+ nawa watendaña;
Yehova watendaña nawa wadiloñesha kumwekesha kuzuwa kwindi.+
Yehova waditendaña nawakankunyi nindi,
Nawa wayihembelaña ayilumbu jindi kuzuwa.
3 Yehova hazuwaña swayiku+ nawa wabadika muñovu,+
Ilaña dinu Yehova habulaña kubabesha mwashikila antu avulumunañaku.+
Njila yindi yekala mumpepela yajilumunaña nimunvula yampepela,
Nawa mavu dilunkuñu lwakunyendu yindi.+
Bashani niKarimeli jalepaña,+
Nawa nkenu jaLebanoni jalepaña.
5 Mpidi jakankaña muloña wayena,
Nawa tupidi twasuñunukaña.+
Iseki dakekala mwipumba muloña wachamesu indi,
Hamu netuña ninowu ejima ashakamamu.+
6 Neyi yena nahili wunateli kwimanaku hinyi?+
Nawa neyi kuzuwa kwindi kunataati wunateli kuumika hinyi?+
Kulendumuka kwindi akakwichila neyi kesi,
Nawa malola akabaloka muloña wayena.
7 Yehova himuwahi,+ himpwembu mwifuku dayihuñu.+
Wakamenaña* anakukeña kuswama mudi yena.+
8 Wukujilumuna chikupu iluña dindi* nadibaji dakombaña,
Nawa ayilumbu jindi akwikala mumwidima.
9 Kafutanyi kimukumukasila Yehova?
Yena nakujilumuna chikupu.
Yihuñu hiyakenzahu cheñi kamuchiyediku.+
10 Muloña wena adi neyi nyiña yaditañila,
Nawa adi neyi antu anasheti walwa;*
Ilaña akasukuma neyi matahu oma.
11 Mudi eyi mwakafuma wamufuukwilaña Yehova yuma yatama,
Walejanaña maana amukunkulwayi.
12 Yehova nahoshi nindi:
“Hela chakwila adiña nañovu chikupu nawa amavulu,
Ilaña akayitema nawa akafwa.*
Nakuleteli* yihuñu, ilaña hinakakuletelahu cheñi yihuñuku.
13 Ichi dinu nukukotola mpaanda yindi nakuyifumisha hadi eyi,+
Nawa nakaketula nyonji yeyi hayedi.
14 Yehova nahoshi kutalisha hadi eyi* nindi,
‘Ijina deyi hidakatwalekahuku.
Nakakisañana ankishi akubaza niankishi ayikuñu* mwitala* dawanzambi jeyi.
Nakakwilila ijamu, muloña watama.’
15 Tiyaña! Hampidi hadi nyendu yamuntu wunakuleta nsañu yayiwahi,
Muntu wunakubidika kuwunda.+
Daku yawija yeyi,+ eyi Yuda, ilaku mwejima muwasanyikili,
Muloña muntu wamukunkulwayi hakahitahu cheñi mudi eyiku.
Akamukisañana chikupu.”
2 Wapalañeshaña nenzi nakukwimakena.*+
Hembenu mpwembu.
Talatalenuña kunjila.
Dimanyekenu* nawa dikoleshenu chikupu.
2 Muloña Yehova wukufuntisha kulema kwaYakoba,
Hamu nakulema kwaIsarela,
Muloña anayijilumuni dehi kudi akakujilumuna;+
Nawa anakisañani nyitombu yawu.
3 Nkebu jawayilobu jindi anajiloombi wulombu wuchinana,
Akakuzuña njita indi anavwali jichinana nge-e.
Manuñilu achikuñu amakalu indi anjita akejimaña neyi kesi
Mwifuku dadiloñeshañayi kuzuña njita,
Nawa mayoña anyinjunga akunyamuna dehi.
4 Makalu anjita atemukaña chikupu munyikwakwa.
Akandukaña nikukunkumuka lufuchi mumalubanza anyisumba.
Atoñekaña neyi yimunyi nawa akejimaña neyi nzaji.
5 Wakatambika amashidika indi.
Akahukanaña chakayañawu.
Atemukilaña kumpwembu yindi;
Atuñaña mukoleku.
7 Anahani lushimbi nawu: Anamushiyi hatooka,
Anamusendi, nawa añamba jindi awambanda anaabi;
8 Mumafuku indi ejima Niniva+ wadiña neyi ijiya damenji,
Ilaña ichi anakutemuka.
“Imanenu kuka-a! Imanenu kuka-a!”
Ilaña kwosi wunakutala hanyimaku.+
9 Puupenu siliva, puupenu wuru!
Maheta akumaña wanyi.
Mwenzala yuma yashiyashana yalema wuseya.
10 Mumusumba mwosi jidimu, nashali kwamahembi, najilumuki!+
Nyichima yawu yinasuñunuki nawoma, manuñu awu anazeyi, nkuma jawu jinakuzaala;
Wejima wawu kumesu kunadihombi.
11 Wina wawanyitupa wudi kudihi,+ mwadiilaña nyenzi yanyitupa,*
Mwedikañayi mutupa namwanindi,
Chakadi wakuyitiyisha woma?
12 Mutupa watabolilaña anyanindi mbiji yayivulu
Nawa washotomwenaña añodi jindi.
Wenzeshaña mayeñu indi nambiji,
Meena indi nawanyama akutabola.
13 Yehova wamazaza nahoshi nindi, “Tiyaña! Nukukwimakena,+
Nukwocha chikupu makalu eyi,+
Nawa mpoku yakabali yikuda nyenzi yanyitupa* yeyi.
Anyama iwakwataña nukuyijiyisha hamaseki,
Nawa izu dawantemesha jeyi hidakatiyakanahu cheñiku.”+
3 Oyihuñu yikumona musumba wapwekeshaña mashi!
Wenzala chikupu namakudi niwukombi.
Habulenaña anyama akukwataku!
2 Kunakutiyakana yikoti yinakwetawu nilushindu lwatufumbu,
Tuwalu nimakalu anakutemuka.
3 Mukakwendela hakawalu, mpoku yakabali yinakukejima niiyoña dinakubekuma,
Antu amavulu anatapiwu ninyilumba yayibimbi,
Yibimbi yinakumana wanyi.
Anatwalekihu kudimbukila hayibimbi.
4 Yumiyi yinamwekani muloña wakuvula kwayilwilu yawuvumbi yachivumbi,
Owu wamuwahi nawa walubanji, nkaaka yawaloji wamumbanda.
Walawulaña nyuza nawuvumbi windi niyisaka nawuloji windi.
5 Yehova wamazaza nahoshi nindi, “Tiyaña! Nakwimakeni,*+
Nakakuvuula siketi yeyi nakukubuta kumesu;
Nakakojeja nyuza yakamoni nzekesi yeyi,
Nawa mawanta akamona nsonyi yeyi.
6 Nakakusukwila yuma yawuzondu
Nawa nakakubalumuna wakekali wasweja kutama;
Nakakubalumuna wakekali chuma chakahayamañawu.+
7 Wejima wakakumona wakakutemuka+ nakuhosha nindi,
‘Niniva anamujilumuni!
Hinyi wukumutiyila wushona?’
Nukuyiwana kudihi akakukukundeja?
8 Komana eyi wamubadika Nowamoni,*+ washakamaña kunyifwolu yaNile?+
Menji amunyeñumukili;
Maheta indi adiña kaluñalwiji nawa mpwembu yindi yadiña kaluñalwiji.
9 Etiyopiya diyi wadiña kaseloki kañovu jindi jabulaña kumana, niEjipitu.
Pati+ niakaLibiya diwu adiña ankwashi jeyi.+
10 Ilaña niyena wekalili nkoli;
Wayili muwunkoli.+
Anyanindi niwena ayichikilili hejima hakonekela mukwakwa.*
Antu jindi alemeshawu ayisakwili nachinjikijilu,
Nawa antu jindi aya mpuhu anayihati mumpompa.
11 Nineyi wakasheta;+
Wakaswama.
Wakakeña kuswama kudi chilumbu.
12 Mpwembu jeyi jejima jidi neyi nyitondu yayikuyu yidi nanyikaabu yinasambili kuha;
Neyi ayinyinkesha, yikuholokela mutunwa twawakakuda.
13 Tiyaña! Mazanvu amashidika eyi adi tuhu neyi ambanda adi mukachi keyi.
Yiisu yetuña deyi yakekala yachashi kulonda ayilumbu jeyi akeñili.
Kesi kakwocha nyikomenu yayiisu yeyi.
14 Tehunaku menji akukuchika nachu!+
Koleshaku mpwembu jeyi.
Kunkumukaku mumalowa nakuchaaka maseki;
Kwataku kuchikombola chamatafwali.
15 Nikwenoku kesi kakakwocha.
Mpoku yakabali yakakutapa.+
Yakakuda neyi chadaña nyana katuboola.+
Divulishi eyi aweni neyi nyana katuboola!
Eña, divulishi eyi aweni neyi nyana katuboola!
16 Wunadivulishili akakulanda nakulandulula kubadika tutumbwa twamumawulu.
Mwana kakaboola waduwulaña nakutuuka.
17 Anhembi jeyi adi neyi kaboola,
Nawa amashidika eyi adi neyi mukanka watuboola.
Ateekelaña mumayinda amalola hefuku dachishika,
Ilaña itena chidatoñeka, atuukaña;
Nawa kwosi welukaña kwadiwuku.
18 Eyi mwanta wakuAsiriya, atubiña tweyi anoñokaña;
Antu jeyi alema ashakamaña mumatala awu.
Antu jeyi apalañena hamapidi,
Nawa kwosi wunakuyipompesha hamuku.+
19 Kwosi wakukukwasha nayihuñu yeyiku.
Chilonda cheyi hiyakutwesha kuchuukaku.
Ejima anakutiya nsañu yeyi akweta nkoshi;+
Muloña hinyi wunabuli kukabakana nawukatu weyi wabulaña kumana?”+
Daya mukwila nawu, “Mukakunkundeja.”
Hela “Wahembaña.” MuchiHeberu, “Weluka.”
Dikwila nawu, daNiniva.
Hela “walwa watidiku.”
Hela hekwawu, “nawa wakahitamu.”
Dikwila nawu, Yuda.
Dikwila nawu, Asiriya.
Hela “ankishi akweñununa.”
Hela “tembeli.”
Dikwila nawu, Niniva.
MuchiHeberu, “Koleshaku nkuma.”
Hela “akachihumuna.”
MuchiHeberu, “nyichima.”
Hela “tunkudimba.”
Hela “nyenzi yanyitupa yawamayala.”
Hela “nyenzi yanyitupa yawamayala.”
Dikwila nawu, Niniva.
Dikwila nawu, Tebesi.
MuchiHeberu, “hamutu wanyikwakwa yejima.”