ZEFWANIYA
1 Izu daYehova denjili kudi Zefwaniya* mwana kaKushi, Kushi mwana kaGedaliya, Gedaliya mwana kaAmariya, Amariya mwana kaHezekiya mumafuku aYosiya+ mwana kaAmoni+ mwanta waYuda, nawu:
2 Yehova nahoshi nindi, “Nakakomba yuma yejima heseki.”+
3 Yehova nahoshi nindi, “Nakakomba muntu nikanyama.
Nakakomba atuda amuluzwizu niinshi jamukaluñalwiji,+
Niyuma yakuhukesha*+ kushilahu niantu atama;
Nawa nakafumisha antu heseki.”
4 “Nakolwela chikasa chami hadi Yuda
Nihadi antu ejima ashakamaña muYerusalema.
Nawa munidi iluña nakajiyisha kachibalu kejima kaBayali,+
Ijina dawatupristu anzambi wakutwamba* hamu nawatupristu,+
5 Ninowu adibukilaña hewulu damatala kuyuma yamumawulu,+
Ninowu adibukaña nikukana nawu akwikala ashinshika kudi Yehova+
Iku anakukana kwikala ashinshika kudi Malikami;+
6 Ninowu alekaña kumulondela Yehova+
Nawa ninowu abulaña kumukeñakeña Yehova hela kumwihula.”+
7 Mwenaku nzo-o kumesu aYehova Mwanta Wabadika, muloña ifuku daYehova dindi kwakwihi.+
Yehova naloñeshi mulambu; najiliki owu atambikiliyi.
8 “Hefuku damulambu waYehova, nakababesha ayilolu,
Anyana kamwanta,+ ninowu ejima anavwali yakuvwala yacheñi.
9 Hanodu ifuku nakababesha muntu wejima wakandamaña hachinañamu,*
Ninowu enzeshaña itala dankaaka yawu namadombu nimakudi.
10 Hanodu ifuku,” dichinahoshiyi Yehova,
“Kuchiisu Chanshi+ kwakatiyakana ipumba dakudila,
KuNkambi Yayiha yamusumba kwakatiyakana makumbu,+
Nikutupidi kwakatiyakana chivumina cheneni chakuhumuka.
11 Enu antu mwashakamaña muMakiteshi,*
Muloña akakuselujola* ejima anayijiyishi;*
Ejima apimaña siliva anayikisañani.
12 Hanoyu mpinji nakakeñakeña chikupu muYerusalema namanoñu,
Nakasompesha antu abulaña kwakama, ahoshaña mumuchima wawu nawu,
‘Yehova hakela chuma chachiwahiku, nawa hakela chuma chatamaku.’+
13 Maheta awu akayipuupa nawa matala awu akayikisañana.+
Akatuña matala, ilaña hiyakashakamamuku;
Nawa akadima matempa anyivinyu, ilaña hiyakanwa vinyu yawuku.+
14 Ifuku deneni daYehova didi kwakwihi!+
Didi kwakwihi nawa dinakunyakala chikupu!+
Chivumina chefuku daYehova chakufwisha mutentu.+
Henohu dihakadilayi mushidika makumbu.+
15 Odu ifuku hiifuku dakuzuwa,+
Ifuku dayihuñu nimakabi,+
Ifuku danvula yampepela nikujilumuna,
Ifuku damwidima nawa dakwiyila,+
Ifuku damavu nikwiyila kwasweja,+
16 Ifuku dakuvumishila luseñu nikabobobu kanjita,+
Nyisumba yakiñewa nituposhi twatulehi twahamawombu.+
Mashi awu akayimwaña neyi lunkuñu,
Ninyijiñwa yawu neyi tuji.+
18 Siliva yawu hela wuru yawu hiyakatwesha kuyipulwisha hefuku dakuzuwa kwaYehovaku;+
Muloña iseki dejima dakasukuma nakuzuwa kwindi kudi neyi kesi,+
Muloña wakajilumuna antu ejima ashakamaña hamaseki, mwamweni kwakekala kuhondeka chikupu.”+
2 Henohu lushimbi kanda lutachiki kuzatika,
Henohu ifuku kanda dihiti neyi muzuñu,
Henohu kuzuwa kwaYehova kwasweja kanda kuyishikeni,+
Henohu ifuku dakuzuwa kwaYehova kanda diyishikeni,
3 Mukeñakeñenu Yehova,+ enu ejima amwovu* mwashakamaña hamaseki,
Enu mwovwahilaña nshimbi jindi jaloña.*
Keñakeñenu kuloña, keñakeñenu kwovwaha.*
Hadaha* akayisweka hefuku dakuzuwa kwaYehova.+
4 Muloña musumba waGaza akawushiya chisayikila;
Nawa Ashikeloni akamushiya kwamahembi.+
5 “Oyihuñu yakamona antu ashakamaña kumukulishu wakaluñalwiji, muza wawaKereti!+
Izu daYehova dinayimakeni.
Eyi Kenani, ituña dawaFilisitinu, nakakukisañana,
Chakwila hiwakashala namuntu hela wumuku.
6 Nawa mukulishu wakaluñalwiji wakekala iluña dakudiila ayimuna,
Wakekala namashima awatubiña nimayinda amalola awanyikoku.
7 Wakekala iluña mwakushakama ashalahu amwitala daYuda;+
Kwenoku dikwakadiilañawu.
Akakaamaña mumatala aAshikeloni namelela.
9 Dichi, kwesekeja nachinahanda ami,” dichinahoshiyi Yehova wamazaza, Nzambi yaIsarela,
“Mowabi wakashala neyi Sodoma,+
Nawa aAmoni neyi Gomora,+
Iluña datunyuñi, ibuku damuñwa nawa mahembi ahaya nyaaka.+
Wenawa akayipuupa kudi antu jami ashalahu,
Nawa akayihaña kudi ashalahu amumuza wami.
10 Ichi dichuma chikayimwekena muloña wakudivwimba kwawu,+
Muloña asupishili antu jaYehova wamazaza nikudisambila hadi wena.
11 Yehova wakayitiyisha woma chikupu;
Muloña wakajiyisha anzambi ejima ahamaseki,
Nawa yituutu yejima yanyuza yakadibuka* kudi yena,+
Iwu heluña dindi, iwu heluña dindi.
12 Ninenu aEtiyopiya mpoku yami yakabali yakayitapa.+
13 Wakwolwela chikasa chindi kukabeta kakuchimunswa nakukisañana Asiriya,
Nawa Niniva wakamushiya kwamahembi,+ wooma neyi chinkalampata.
14 Mudi yena mukakaamaña nyikanka yawanyama, nyichidi yejima yawanyama amwisaña.*
Nkumbi nichisaka akakaamaña hewulu dayishimi.
Izu dakembila hawindu.*
Hawiñililu hakekala yuma yinakisañaniwu;
Muloña wakashiya mapulanga anyisinda hatooka.
15 Iwu diwu musumba wadivwimba wadiña wakiñewa,
Wahosheleña mumuchima windi nindi, ‘Yami hohu, kwosi mukwawuku.’
Ochinekaliyi chuma chakuhayama chikupu,
Iluña mwakukaama anyama amwisaña!
Muntu wejima wukuhitaña kwakwihi wukwimbaña muloji nikuzuya nkonyi.”+
3 Oyihuñu yikumona musumba wadikaña, watamishawu, wakabishanaña!+
2 Hanovwahili izuku;+ haneteji kufumbaku.+
Hanakuhweleli mudi Yehovaku;+ hanaswini kwakwihi naNzambi yindiku.+
3 Ayilolu adi mudi yena hiyanyitupa abulumaña.+
Ansompeshi jindi nawufuku hiyatuñwidi;
Hiyashiyañahu ifwaha dakubokota hela dimu kushika nintetemenaku.
4 Atuprofwetu twindi akweti kasawuntu, hiyantu adimbanaña.+
5 Yehova waloña mukachi kaniwu musumba;+ haluwañeshañaku.
Ntetemena-hintetemena washimunaña wusompeshi windi,+
Wabulaña kukañanya neyi chatoñekaña mwaana.
Ilaña muntu wabula kuloña hatiyaña nsonyiku.+
6 “Najilumwini nyuza; tuposhi twawu twahamawombu twakisikili.
Nakisañeni nyikwakwa yawu, chakwila kwosi niwumu wahitileñamuku.
Nyisumba yawu yajilumukili, himwashalilihu muntuku, kwosi washakamineñamuku.+
7 Nahosheli nami, ‘Chakadi nikujina, mwakantiya woma nawa mwaketeja kufumba,’*+
Kulonda iluña dindi mwashakamañayi abuli kudikisañana,+
Natela kumubabesha muloña wayuma yejimiyi.
Ilaña wena aswejeleliku nikukoña yuma yatama.+
8 ‘Dichi nchiñililenuña,’*+ dichinahoshiyi Yehova,
‘Sampu ifuku dinashiki hinakanyamuka nakupuupa,*
Muloña mazu ami awunsompeshi akupompesha nyuza, kupompesha mawanta,
Kulonda niyihuñunwini kulendumuka kwami, kuzuwa kwami kwejima kwasweja;+
Muloña iseki dejima dakasukuma nakuzuwa kwami kudi neyi kesi.+
9 Muloña hanoyu mpinji nakahimpa idimi dawantu ashiyashana dakekali idimi ditooka,
Kulonda wejima wawu akatambiki hejina daYehova,
10 Kutachikila kwiluña datuloña twamuEtiyopiya,
Antu anakulemba kudi ami, dikwila nawu mwana wamumbanda wanowu apalañenamu, akanletela chawaana.+
11 Hanodu ifuku hiyakakutiyishahu nsonyi
Muloña wanyidimu yejima yatama yiwadikañili nachu nanamiku,+
Muloña hanoyu mpinji nakafumisha mukachi keyi adivwimbaña chikupu;
Nawa eyi hiwakadivwimbahu cheñi kumpidi yami yajilaku.+
13 Antu ashalahu hadi aIsarela+ hiyakakoñahu yuma yabula kuloñaku;+
Hiyakahoshahu makudiku, nawa mutunwa twawu himwakawanikahu idimi dadimbanañaku;
Akadaña nikukaama, nawa kwosi wakayitiyishaña womaku.”+
14 Bulaku nyiñula, eyi mwana kaZiyona wamumbanda!
Dikuwi namuzañalu, eyi Isarela!+
Zañalalaku nawa tiyaku kuwaha namuchima weyi wejima, eyi mwana kaYerusalema wamumbanda!+
15 Yehova nafumishi wunsompeshi hadi eyi.+
Nahañili ayilumbu jeyi kwakulehi.+
Mwanta waIsarela, Yehova, wudi mukachi keyi.+
Eyi wakachiinahu cheñi makabi wanyi.+
16 Hanodu ifuku Yerusalema akamuleja nawu:
“Eyi Ziyona, bayi wutiya womaku.+
Bayi wuzeyesha makasa eyiku.
17 Yehova Nzambi yeyi wudi mukachi keyi.+
Chineli hiMukañovu, wakakwamwina.
Wakazañalela hadi eyi namuzañalu wasweja.+
Wakamwena nzo-o* mukukeña kwindi.
Wakazañalela hadi eyi nanyiñula yamuzañalu.
18 Nakapompesha hamu antu anakuneña hakubula kwinza kuyawija yeyi;+
Hiyadiña hamu naneyiku, muloña ayisupishileña kukoola eyi.+
19 Tiyaña! Hanoyu mpinji nakemakena ejima anakukukabisha;+
Nawa nakamwina wunakubalakata,+
Nawa nakapompesha wapalañenamu.+
Nakayibalumuna kwikala chuma chakushimeka nikutuumbakesha*
Mwituña dejima mwayitiyishañawu nsonyi.
20 Hanoyu mpinji nakayifuntisha,
Hampinji yinakayipompesha hamu.
Muloña nakayibalumuna mwakekali chuma chakutuumbakesha* nikushimeka+ kudi antu ejima ashiyashana ahamaseki,
Hampinji yinakafuntisha antu jenu adi muwunkoli iku munakutalaku,” dichinahoshiyi Yehova.+
Daya mukwila nawu, “Yehova Nasweki (Nahembi).”
Chakadi nikujina, hiyuma hela nyidimu yakundama kukudifukula kudi ankishi.
Hela “anzambi wakwacheñi.”
Hela “hawiñililu.” Hekwawu hichinañamu chetanda damwanta.
Hadaha chibalu chaYerusalema chadiña kwakwihi naChiisu Chanshi.
Hela “akakulanda nakulandulula.”
MuchiHeberu, “anayimweneshi.”
Hela “adizoza.”
MuchiHeberu, “wunsompeshi windi.”
Hela “kudizoza.”
Hela “Hekwawu.”
Hela “itena mwiwulu.”
Hela “wakayakamena.”
Hela “yakadifukula.”
MuchiHeberu, “anyama ejima amumuza.”
Hela “hanjanina.”
Hela “kwolola.”
Hela “nhembelelenuña nakudiwunjika.”
Hela hekwawu, “hinakanyamuka neyi chinsahu.”
Hela “Nakudifukula kudi yena nakunuñañana.”
Hela “Wakadiwunjika.”
MuchiHeberu, “niijina.”
MuchiHeberu, “Ijina.”