MUKANDA WAMUCHIYEDI KUDI AKORINDA

1 Ami Pawulu, kapostolu kaKristu Yesu atondeliwu kwesekeja nankeñelu yaNzambi, nidi hamu namanakwetu Timotewu, inakusonekela chipompelu chaNzambi chidi muKorinda wunu mukanda, kushilahu niakwakujila ejima adi muAkaya nami:

2 Luwi lwasweja nikuwunda jafumaña kudi Tata yetu Nzambi nikudi Mwanta Yesu Kristu jiikali nanenu.

3 Kulema kwiikali kudi Nzambi nawa Tata yaMwanta wetu Yesu Kristu, Tata wasweja luwi nawa Nzambi wakukundeja kwejima, 4 yena watukundejaña* mukweseka kwejima kutwamonaña,* kulonda ninetu tutweshi kukundeja antu amakwawu mukweseka kwejima kwamonañawu* kuhitila mukuyikundeja nakukundeja kutwatambwilaña kudi Nzambi. 5 Muloña neyi chochavula nankashi makabi etu kukoola Kristu, dichavula nankashi nikukundeja kutwatambwilaña kuhitila mudi Kristu. 6 Dichi neyi tumona kweseka,* chumichi chikuyikundeja enu nikuyaamwina; nawa neyi anakutukundeja, dikwila nawu ninenu anakuyikundeja, kukundeja kwayikwashaña kuumika makabi wowamu itunakumona ninetu. 7 Nawa kukuhwelela kwetu kutwayikuhwelela enu kwakola, nanochu chituneluki netu, neyi chochimunakumona makabi hamu nanetu, dichi chakayikundejawu hamu nanetu.

8 Muloña etu hitunakukeña enu anakwetu mubuli kwiluka lukadi lutwamweni kukabeta kaAsiyaku. Hayina mpinji twakabakeni nankashi, hitwatwesheli kuumika nañovu jetu etu aweniku, chakwila twelukili niwanyi neyi tunateli kuhanda hela nehi. 9 Kafwampi, twamweni netu anatusompesheli dehi kukufwa. Chumichi chamwekeni kulonda tubuli kudikuhwelela etu aweni, ilaña tukuhweleli mudi Nzambi wasañulaña afu. 10 Watupulwishili muniwu wubanji wakufwa nawa wakatupulwisha, tunamukuhweleli cheñi netu wakatwalekahu nakutupulwisha. 11 Ninenu nawa munateli kutukwasha kuhitila mukulomba kwenu kwakulembelela, kulonda antu amavulu atulombeleñaku nakulomba kwakusakilila, muloña wakuwaha kwatutiyañayi Nzambi nanochu chakulañayi kulomba kwawantu amavulu.

12 Tunateli kudisambila hachumichi, chakwila nawu: Chinleji chetu chamuchima chatulejaña nawu tunamwekeshi kujila nikwikala namuchima wawuwahi wakufuma kudi Nzambi hampinji yitudi nawantu mukaayi, nawa sweje-e neyi tudi hamu nanenu. Hitunashindameni hamaana amukaayiku, ilaña tunashindameni haluwi lwaNzambi lwasweja. 13 Muloña hitunakuyisonekela yuma yacheñiku chiña yuma yimwatela kutaña* nikutiyisha, nawa nakuhweleli nami mukutwalekahu nakutiyisha chikupu yumiyi,* 14 neyi chimunatiyishi enu nenu etu yetu tunakuyiletesha enu kudisamba, neyi chimukatuletesha ninetu kudisamba mwifuku daMwanta wetu Yesu.

15 Dichi, muloña wakwikala naniku kukuhwelela, nafwilileña nami nisambili kwinza kudi enu, kulonda mwakazañalali kamuchiyedi;* 16 muloña nafwilileña kuyihempula enu hakuya kuMasidoniya, nikufunta cheñi kudi enu hakufuma kuMasidoniya, nawa kuhiñahu, mukanshinjikijiku hakuya kuYudeya. 17 Hela chochu, chinafuukwileña mwenimu, komana naleteleña hohu maleñu tahindi? Hela, komana nafuukulaña yuma kwesekeja namwaya yitoñojoka yawuntu chakwila nakuminaña dakuhosha nami, “Eña, eña,” kuhiñahu cheñi nami, “Inehi, inehi,” tahindi? 18 Ilaña tunateli kumukuhwelela Nzambi, dichi mazu itunakuyileja enu hiyanateli kwikala “eña,” hampinji yoyimu cheñi netu “inehiku.” 19 Muloña Mwana kaNzambi, Yesu Kristu, ashimwininiwu mukachi kenu kuhitila mudi etu, dikwila nawu kuhitila mudi ami niSilivanusi* niTimotewu, hekalili “eña,” hampinji yoyimu cheñi “inehiku,” ilaña yena wekala “eña” mpinji yejima. 20 Muloña hela yikaninu yaNzambi yikuvula ñahi, mpinji yejima yekalaña “eña” muloña wayena. Dichi, kuhitila cheñi mudi yena dimu mutwahoshelaña netu “Ameni” kudi Nzambi, nawa chumichi chaleteshaña amulemeshi kuhitila mudi etu. 21 Ilaña owu wunayileji enu ninetu nindi tudi antu jaKristu nawa wunatuwayishi etu, hiNzambi. 22 Cheñi nawa natulamiki chilamiku chindi nawa natwinki spiritu yajila munyichima yetu. Kuhitila mukwila mwenimu, watuleja nkisu yayuma yitukatambwila kumbidi.

23 Ichi inakusanyika* kudi Nzambi kwikala chinsahu chami* nami, chuma chinaleteshi nibuli kwinza kuKorinda hayinu mpinji, nalondi nami niyaamwini kuchineñi. 24 Chumichi, hichinatalishi mukwila nawu tudi anyanta achikuhwelelu chenuku, ilaña tudi akwakukalakala hamu nanenu kulonda muzañalaleña, muloña chikuhwelelu chenu dichinakuyiletesha enu mwimani akola.

2 Muloña nafuukulihu kubula kuyineñesha hampinji yinakenza nakuyihempula kamuchiyedi. 2 Neyi niyineñesha enu mwantiyishaña kuwaha, hinyi wakantiyisha cheñi kuwaha? 3 Nasonekeli yuma yinakoñeli kulonda chinakenza, akabuli kunneñesha kudi antu atela kuntiyisha kuwaha, muloña neluki chikupu nami yuma yanzañaleshaña ami diyizañaleshaña wejima wenu nawa. 4 Muloña walukadi lwasweja nichineñi chasweja chidi mumuchima wami, nayisonekeleli namadilu amavulu, bayi neyi nalondeli nami niyineñeshiku, ilaña nami mwiluki nenu nayikeña chikupu.

5 Ilaña neyi kudi muntu wunaneñeshi akwawu, hananeñeshi amiku, ilaña naneñeshi enu ejima kushika kuchipimu chimu. Hela chochu, hinnakukeña kuhosha yuma yayivulu kutalisha haniyi nsañuku. 6 Kuzuwila kuyakuzuwilawu muntu wamuchidiwu kudi antu amavulu kunateleli; 7 ilaña mwatela kumwanakena nikumukundeja muntu wamuchidiwu, kulonda yabuli kusweja kwikala nachineñi. 8 Dichi, inakuyilembelela nami mumumwekesheli kukeña kwenu. 9 Muloña ichi dichuma cheñi chinaleteshi niyisonekeli enu: kulonda nimoni neyi mukwovwahila muyuma yejima. 10 Neyi mwanakena muntu chuma chinakoñiyi, ninami nawa namwanakeni. Kafwampi, chuma chejima chinnanakeni (neyi nanakeni chuma chidi chejima), neli mwenimu muloña wanenu kumesu aKristu, 11 kulonda abuli kutwimika mushindu* kudi Satana, muloña hitwayamba tufuta twindiku.*

12 Dichi, chinashikili muTirowasi nakushimwina nsañu yayiwahi hadi Kristu nichañenzunwininiwu chenzelu chakuzata nyidimu mudi Mwanta, 13 naneñeli nankashi muloña namuwanini wanyi manakwami Titusa. Dichi nayishalikili, kuhiñahu nayili kuMasidoniya.

14 Ilaña tumusakililenu Nzambi, watulombolaña mpinji yejima muchendu chakushindila hamu naKristu, nawa watandishaña ivumba dadiwahi dakumwiluka yena mumaluña ejima kuhitila mudi etu! 15 Muloña etu kudi Nzambi, tudi neyi ivumba dadiwahi nankashi daKristu hakachi kawantu anakwamwinawu nihakachi kawantu anakujilumuka; 16 kudi antu anakujilumuka, tudi ivumba* dakufwa datwalaña kukufwa, kudi antu anakupulwishawu, tudi ivumba dawumi datwalaña kuwumi. Nawa, hinyi wunashikilimu kuzata iwu mudimu? 17 Etu yetu tunashikilimu, muloña etu hitudi akwakulandisha izu* daNzambi neyi chelañawu antu amavuluku, ilaña twahoshaña nawalala chikupu chineli tudi antu atemeshawu kudi Nzambi, eña, adi kumesu aNzambi nawa adikunda hamu naKristu.

3 Komana, tukutachika cheñi kudihameka etu aweni kudi enu tahindi? Nawa, komana tunakukeña nyikanda yakuleta kudi enu hela yakufuma kudi enu yakutuhameka nachu neyi chelañawu antu amakwawu tahindi? 2 Enu yenu mukanda wetu, wasonekawu hanyichima yetu, welukawu nawa watañañawu kudi antu ejima. 3 Muloña enu anayimwekeshi kwikala mukanda waKristu wasonekawu kudi etu akwakukalakala, wasonekawu bayi nawulombuku, ilaña wasonekawu naspiritu yaNzambi wamumi, hiyawusoneka hamalola awubasaku, ilaña awusoneka hawubasa wakumujimba, dikwila nawu hanyichima.

4 Tukweti iku kukuhwelela kudi Nzambi kuhitila mudi Kristu. 5 Bayi neyi etu aweni yetu tunadilishi kwikala ashikilamu kuzata iwu mudimuku, ilaña Nzambi diyi wunatwilishi kwikala ashikilamu kuzata iwu mudimu, 6 yena diyi wunatuleteshi twiikali akwakukalakala ashikilamu achitiyañenu chachiha, bayi neyi anshimbi jasonekawuku, ilaña anshimbi jakuspiritu; muloña nshimbi jasonekawu jasompeshelaña muntu kukufwa, ilaña spiritu yahandishaña.

7 Dichi, neyi nshimbi jatwalaña muntu kukufwa nawa jabazililiwu hamalola, jenjili nakulema chakwila anyana kaIsarela akañenyi nikushinshika kumesu aMosi muloña wakulema kwadiña kumesu indi, oku kwateleleli kujiyishawu, 8 komana kuzata kwaspiritu hikunateli kwikala nakulema kwabadikaku, tahindi? 9 Muloña neyi nshimbi jasompeshelaña muntu kukufwa jadiña nakulema kwamuchidiwu, dikwila nawu kuloña kukabadika kulema nankashi. 10 Kafwampi, nichuma chalemesheliwu nankashi hakusambila anachihukuli kulema, muloña wakulema kunachibadiki. 11 Muloña neyi chuma chateleleli kujiyishawu achileteli nakulema, dikwila nawu chuma chakashala chakabadika kulema nankashi.

12 Chineli tukweti iku kuchiñeja, tunakuhosha nakukasunuka chikupu, 13 nawa hitwelaña neyi cheliliyi Mosi wabutili ihina kumesu indi kulonda anyana kaIsarela akañanyi kushinshika chikupu chuma chateleleli kujiyishawuku. 14 Ilaña yitoñojoka yawu yachinchikili. Muloña kushika nikwifuku dalelu idi ihina dodimu dichidi dakubuta nihampinji yinakutañawu chitiyañenu chachikulu, muloña idi ihina anateli hohu kudijiyisha kuhitila mudi Kristu. 15 Kafwampi, kushika nikwifuku dalelu, mpinji yejima yinakutañawu nsañu yasonekeliyi Mosi, idi ihina saña dabutila hanyichima yawu. 16 Ilaña neyi muntu yabalumukila kudi Yehova, idi ihina adibutununañahu. 17 Yehova hiSpiritu, nawa kwejima kudi spiritu yaYehova, kwenoku dikwekala nikusubuka. 18 Nawa wejima wetu kumesu etu kwakubuta ihina wanyi, tudi neyi yibanjilu yinakumwekesha kulema kwaYehova. Hampinji yitunakwila mwenimu, anakutubalumuna kwikala neyi chifwanisha chindi, nakumwekesha chikupu kulema neyi chakumwekeshañayi Yehova owu wekala Spiritu.

4 Dichi, muloña waniwu mudimu wunatukunjikiwu kwesekeja naluwi lwatutiyililiwu, hitwazeyañaku. 2 Ilaña etu tunakaani yuma yakujinda yaletaña nsonyi, hitwendaña munjila yakudimbana hela kuheñesha izu daNzambiku; ilaña kuhitila mukumwekesha chalala hatooka, tunakudihameka etu aweni kuyinleji yanyichima yawantu ejima kumesu aNzambi. 3 Kafwampi, neyi nsañu yayiwahi yitwashimwinaña ayibuta, dikwila nawu yinabutewi kudi antu anakujilumuka, 4 mudi wena, nzambi wanshakaminu yamakonu* naputishi yitoñojoka yawantu abula kwitiya, kulonda chejeji chakulema kwansañu yayiwahi yahosha hadi Kristu, owu wekala chifwanisha chaNzambi, chibuli kuyitoñekela. 5 Muloña hitunakushimwina hadi etu aweniku, ilaña tunakushimwina hadi Yesu Kristu netu diyi Mwanta nawa tunakushimwina hadi etu aweni netu tudi anduñu jenu kukoola Yesu. 6 Muloña Nzambi diyi wahosheli nindi: “Chejeji chitoñeki mumwidima,” nawa yena nakojeji nyichima yetu kutoñeka nakulema kwakumwiluka Nzambi kuhitila kumesu aKristu.

7 Hela chochu, tukweti idi iheta munsaba jamawumba kulonda ñovu yabadika hañovu jawantu yifumi kudi Nzambi, bayi kudi etuku. 8 Anatushintakeshi mumbadi jejima, hela chochu, hitunakañanyi nihakudinyinkeshelaku; tunaluwankani, ilaña hitunakañanyi mwakwililaku;* 9 anakutukabisha, ilaña hiyanatushiyi chisayikilaku;* anatudimbwishi hamaseki, ilaña hiyanatujilumuniku. 10 Mpinji yonsu twomikaña mumujimba wetu yuma yatama yaletaña kufwa yahitilimu Yesu, kulonda chihandilu chaYesu chimwekeni nimumujimba wetu. 11 Muloña etu tunakuhanda, mpinji yonsu tunakutalañana nakufwa mesu-namesu kukoola Yesu, kulonda chihandilu chaYesu chimwekeni nimumujimba wetu wafwaña. 12 Dichi, kufwa kunakuzata mudi etu, ilaña wumi wudi mudi enu.

13 Ichi dichasonekawu nawu: “Nakuhweleleli, dichakojejeli nihoshi.” Ninetu nawa twamwekeshaña netu tukweti chikuhwelelu chochimu, ichi dichakojejaña tuhosheña, 14 nanochu chituneluki netu Owu wamusañwili Yesu, wakatusañula ninetu neyi chamusañwiliyi Yesu nawa wakatuleta hamu nanenu kumesu indi. 15 Muloña yuma yejimiyi yinamwekani kukoola enu, kulonda kuvula kwaluwi lwasweja kuyeña hohu nakuvulilaku muloña antu amakwawu amavulu anakulomba nakusakilila nakumulemesha Nzambi.

16 Dichi, hitwazeyañaku, ilaña hela chakwila wuntu wetu wahanji wunakuya nakunoña, chakadi nikujina, wuntu wetu wamukachi anakuwubalumuna kwikala wawuha hefuku-hefuku. 17 Muloña, hela chakwila lukadi lutwamonaña lwakapinji kantesha* nawa lwapepela, ilu lukadi lwatuleñelaña twiikali nakulema kwabadika chikupu* nawa kwahaya nyaaka; 18 hampinji yoyimu, hitwashinshikaña mesu etu hayuma yamwekanañaku, chiña hayuma yabulaña kumwekana. Muloña yuma yamwekanaña, yakapinji kantesha, hakwila yuma yabulaña kumwekana, yahaya nyaaka.

5 Muloña tuneluki netu neyi itala detu dahanu hamaseki, dikwila nawu idi itenti, adilemuna, tukekala netala dakufuma kudi Nzambi, itala dakubula kutuña namakasa, dahaya nyaaka mwiwulu. 2 Muloña munidi itala,* twaabaña chikupu, twafwilaña nankashi kuvwala odu itala detu dakufuma mwiwulu,* 3 kulonda neyi tunadivwali dehi, hiyakatuwana nzekesiku. 4 Kafwampi, etu tudi munidi itenti twaabaña, twatiyaña kulema, muloña hitwakeñaña kudivuula idi itentuku, ilaña tunakukeña kuvwala dikwawu, kulonda iwu mujimba wafwaña awuminyi kudi wumi wahaya nyaaka. 5 Muloña Nzambi diyi watuloñesheleli iwu wumi, diyi watwinkeli spiritu yajila. Kuhitila mukwila mwenimu, watuleja nkisu yayuma yitukatambwila kumbidi.

6 Dichi, mpinji yonsu twekalaña ahamuka chikupu nawa tweluka netu chineli tuchidi namukala wetu mumujimba, hitudi hamu naMwantaku, 7 muloña tunakwenda nachikuhwelelu, bayi mukumona namesuku. 8 Ilaña etu twekala ahamuka chikupu nawa tukutiya kuwaha kwikala namukala wetu naMwanta kubadika muniwu mujimba. 9 Dichi, hichikweti muloña nanoku kutwashakamañaku, hela twashakamaña nindi hela nehi, tunakufwila kuzata nañovu kulonda mpinji yejima twikaleña etejewa kudi yena. 10 Muloña wejima wetu twatela kumwekena kumbidi yachitwamu chakusompela chaKristu, kulonda muntu-himuntu akamufweti kwesekeja nayuma yakoñeleñayi hampinji yadiñayi mumujimba, chili yayiwahi hela yatama.

11 Dichi, chineli tweluka netu twatela kumutiya Mwanta woma, twatwalekañahu kushinjila antu, ilaña etu atwiluka chiwahi kudi Nzambi. Hela chochu, nakuhweleli nami niyinleji yenu yanyichima niyena yatwiluka chiwahi. 12 Hitunakudihameka cheñi etu aweni kudi enuku, ilaña tunakuhosha mwenimu kulonda tuyikoleshi enu mudisambileña hadi etu, kulonda mutweshi kwakula antu adisambilaña hammwekenu yawuntu wahanji, bayi hayuma yidi mumuchimaku. 13 Muloña neyi tuzaluka, twazalukaña kukoola Nzambi; ilaña neyi tunakutoñojoka mwamaana, tunakwila mwenimu kukoola enu. 14 Kukeña kukwetiyi Kristu kwatusañumunaña, muloña imu dimutunakunkululi netu, muntu wumu wafwilili antu ejima; dikwila nawu wejima wawu afwili. 15 Nawa wafwilili antu ejima kulonda antu anakuhanda abuli kudihandila awenawu, ilaña amuhandili owu wayifwilili nawa asañwiliwu.

16 Dichi, kufuma dalelu hitunelukihu muntu kwesekeja nammwenu yawuntuku. Hela chakwila hampinji yimu twamwilukili Kristu kwesekeja namwaya wuntu, chakadi nikujina, hayinu mpinji hidichitwamwilukaku. 17 Dichi, neyi muntu wadikunda naKristu, dikwila nawu anamuleñi chachiha; yuma yayikulu yinahiti dehi; ichi kunenzi dehi yuma yayiha. 18 Ilaña yuma yejima yafuma kudi Nzambi, owu watukundamishili cheñi kudi yomweni kuhitila mudi Kristu nawa watwinkeli mudimu wakukundamisha antu, 19 dikwila nawu, kuhitila mudi Kristu, Nzambi wakundamishili cheñi kaayi kudi yomweni chakadi kwanuka yiluwa yaku, nawa watukunjikili nsañu yakukundamisha cheñi antu.

20 Dichi, tudi añimeni emenañaku Kristu, neyi kwiji Nzambi nakuyilembelela enu kuhitila mudi etu. Hakwikala akwakumwimenaku Kristu, tunakulembelela netu: “Dikundamishenu cheñi kudi Nzambi.” 21 Muntu wabulili kukoñahu nshidi, Nzambi wamwilishili kwikala mulambu wanshidi jetu, kulonda kuhitila mudi yena tutweshi kwikala aloña kumesu aNzambi.

6 Hakwikala akwakukalakala hamu nindi, tunakuyilembelela cheñi netu mwiteji luwi lwaNzambi lwasweja nawa bayi mukañanya kwiluka nkeñelu yaluku. 2 Muloña yena wahosha nindi: “Nakutiyili mumpinji yakwitejelamu, nawa nakukwashili mwifuku dawamwinu.” Talenu! Yinu diyi mpinji yakwitejelamu chikupu. Talenu! Dinu didu ifuku dawamwinu.

3 Hitunakukoñahu chuma hela chimu chakuhukesha nachu antuku, kulonda mudimu wetu abuli hakuwutenena kutama; 4 ilaña muyuma yejima tunakudihameka etu aweni kwikala akwakukalakala aNzambi, kuhitila mukuumika muyuma yayivulu yidi neyi, mulukadi, mumpinji yakukaankila, mukukala, 5 mukutweta, mutuleya, mumapumba, mukuzata nañovu, mukubula kukaama, mukubula yakuda; 6 mukuhanda chihandilu chakadi majilu, mukukoña yuma kwesekeja namwaya kwiluka, mukudiwunjika nimukumwekesha luwi, mukwiteja spiritu yajila kulombola mawumi etu, mukumwekesha kukeña kwakadi wunfwikiji, 7 mukuhosha yuma yalala, mukushindamena hañovu yaNzambi; muyitwa yakuloña yidi muchikasa chachidiilu* nimuchachimunswa,* 8 mukulema nimukusawuka. Antu atuhoshaña yuma yatama niyayiwahi, atumonaña nawu tudi akwakudimbana, henohu twahoshaña yuma yalala, 9 atumonaña neyi antu abula kwilukawu, henohu twelukewa, atumonaña neyi antu anakufwa,* henohu tudi amomi, hela chakwila antu atubabesheli, hitwafwiliku, 10 twamwekanaña wushona, ilaña twazañalalaña mpinji yejima, twamwekanaña wuzweñi, ilaña twaheteshaña antu amavulu, twamwekanaña neyi tukweti yuma wanyi, ilaña tukweti yuma yayivulu.

11 Enu aKorinda, tunasami kanwa ketu kulonda tuhoshi nanenu,* nawa tunenzununi chikupu muchima wetu. 12 Etu tunakasunuki kuyimwekeshela enu kukeña,* ilaña enu himunakasunuki kutumwekeshela etu kukeñaku. 13 Dichi, inakuyileja neyi inakuleja anyanami nami, ninenu enzununenu chikupu nyichima yenu.*

14 Bayi mudikasa* mumpaanda yabula kutelela nawantu abula kwitiyaku, muloña himpaanda yacheñi. Indi kuloña nakuluwalala jinateli kutiyañana ñahi? Hela chejeji namwidima, jinateli kutiyañana ñahi? 15 Kubombelahu cheñi, komana Kristu naBeliyali* anateli kutiyañana tahindi? Hela, muntu wetiya* nateli kwesekana ñahi namuntu wabula kwitiya? 16 Nawa, tembeli yaNzambi yikutiyañana ñahi nawankishi? Muloña etu tudi tembeli yaNzambi wamumi; neyi chochahoshayi Nzambi nindi: “Nakashakama hakachi kawu nikwenda hakachi kawu, nakekala Nzambi yawu nawa wena akekala antu jami.” 17 “‘Dichi, fumenu mukachi kawu nawa daambulenumu,’ imu dimunahoshiyi Yehova, ‘nawa lekenu kukwata chuma chamajilu’”; “‘ninami nakayitambwila.’” 18 “‘Nawa nakekala tata yenu, enu mwakekala anyanami awamayala niawambanda,’ imu dimu munahoshiyi Yehova Wañovu Jejima.”

7 Dichi enu akwetu itwakeña, chineli atukana iyi yikaninu, tuditookeshenu kukutama kwejima kwamujimba nispiritu, kulonda tusweji kwikala ajila hampinji yitunakumutiya Nzambi woma.

2 Tutambwilenu munyichima yenu. Hitunakoñihu muntu hela wumu chatamaku, hitunakatishihu muntu hela wumuku, hitunadimbihu muntu hela wumu kulonda tuhetelimuku. 3 Hinnahoshi mwenimu kulonda niyifwishi namuloñaku. Muloña nahoshahu dehi nami enu mudi munyichima yetu kulonda mufwili hamu nanetu nikuhandila hamu nanetu. 4 Inakuhosha nanenu nakukasunuka chikupu. Nadisambilaña chikupu mudi enu. Ankundejaña chikupu; nidi namuzañalu chikupu mumakabi etu ejima.

5 Kafwampi, chitwashikili muMasidoniya, nyijimba yetu yanookelihu wanyi, ilaña twatwalekelihu kumona makabi mumbadi jejima, hanji hadiña madombu, mukachi mwadiña yuma yakutiyisha woma. 6 Ilaña Nzambi wakundejaña antu anadihombi, watukundejeli kuhitila mukutuhempula* kudi Titusa; 7 nawa bayi neyi kutuhempula kwindi hohuku, ilaña nimukutukundeja kwatukundejeliyi muloña wanenu, nanochu chatulejeliyi nsañu yimwamulejeli nenu munakuntalila nankashi, chineñi chenu chimukweti chikupu nimuchima* wakufwila kunkwasha; dichi, naswejeli kuzañalala chikupu.

8 Muloña hela chakwila nayineñesheli kuhitila mumukanda wunayisonekeleli enu, hinnakuditoñeshaku. Hela chakwila hatachi naditoñesheli, (namoni nami mukanda wayineñesheli hakapinji kantesha), 9 ichi nazañalali, bayi neyi hamuloña wakuyineñeshaku, ilaña hamuloña wakwila kuneña kumwaneñeli kwayileñeleli mubalumuki munyichima. Muloña kuneña kwenu kunesekani nankeñelu yaNzambi nawa chumichi dichayikwashili enu. Ichi dichuma chinaleteshi mubuli kumona yuma yatama muloña wayuma yitwahosheli kudi enu. 10 Muloña kuneña kwesekeja nankeñelu yaNzambi kwaleteshaña muntu kubalumuka mumuchima, kubalumuka mumuchima kwatwalaña kuwamwinu waleteshaña muntu kubula kuditoñesha; ilaña kuneña kwamukaayi kwaletaña kufwa. 11 Muloña talenu, kuneña kwesekeja nankeñelu yaNzambi chikunayikojeji enu mwiikali adikita, chikunayikwashi kudiyiñisha kuyiluwa, chikunayileteshi kutiya kutama, kutiya woma, kufwila kubalumuka mumuchima, chikunayileteshi kwikala neyena dakufwila kwolola yuma yinaheñi! Muyuma yejima mwadimwekesheli kwikala akadi majilu* muniyi nsañu. 12 Hela chakwila nayisonekeleli, hinayisonekeleli muloña wamuntu waluwañesheli hela muloña wamuntu aluwañesheliwuku, ilaña, kulonda kudikita kwenu kumunakutudikitila etu kumwekani mukachi kenu hatooka kumesu aNzambi. 13 Ichi dichuma chinaleteshi atukundejeña.

Ilaña kubombela hakutukundeja, twaswejeli kuzañalala chikupu muloña wamuzañalu waTitusa, chineli wejima wenu mwahizumwishili muchima windi. 14 Muloña neyi nidisambila kudi yena hadi enu, hiyanantiyishi nsonyi muloña wayuma yinahosheliku; ilaña kudisambila kwetu kudi Titusa kwalala, neyi chochekala yuma yejima yitwayileja. 15 Cheñi, kukeña kwindi kwayikeñayi enu kwabadika nankashi nanochu chanukañayi kwovwahila kwenu wejima wenu, ninochu chimwamutambwilili nawoma nikuzaala. 16 Nazañalali nankashi hakwiluka nami nayikuhwelela enu* muyuma yejima.

8 Enu anakwetu, ichi dinu tunakukeña mwiluki luwi lwaNzambi lwasweja lunatiyiliyi yipompelu yamuMasidoniya. 2 Hampinji yayesekeliwu namakabi asweja, muzañalu wawu wasweja chikupu niwuzweñi wawu wasweja, jayiletesheli kwikala namuchima wakuhana chikupu. 3 Muloña ahanineña kwesekeja nayuma yadiñawu nayu, inakuyileja nami, ahanineña kubadika nihayuma yadiñawu nayu, 4 nawa adiña nakutulembelela chikupu chakadi kuyikanjikija kulonda ekali nakukooleka kwakuhanaña yawaana yaluwi nikuzataku mudimu wakukwasha akwakujila. 5 Nawa akoñeli yuma yabadikili hayuma yitwakuhweleleli, muloña chatachi adihanini awenawu kudi Mwanta nikudi etu kuhitila munkeñelu yaNzambi. 6 Dichi, twamukolesheli Titusa netu yamanishi mudimu weniwu wakupompesha yawaana yenu yaluwi, chineli diyi watachikili iwu mudimu mukachi kenu. 7 Hela chochu, neyi chimunakwila chiwahi muyuma yejima, muchikuhwelelu nimumazu nimukwiluka nimukudikita chikupu nimukukeña kutwayikeña enu, ninenu nawa twalekenuhu chikupu kuhana iyi yawaana yaluwi.

8 Hinnakuhosha chumichi kulonda niyikanjikiji enuku, ilaña nalondi mwiluki chinakudikitawu antu amakwawu, nawa niyeseki kulonda nimona neyi kukeña kwenu kwalala. 9 Muloña mweluka luwi lwasweja lwaMwanta wetu Yesu Kristu lwakwila nawu, hela wadiña waheta, wekalili kazweñi kukoola enu, kulonda mwiikali aheta kuhitila muwuzweñi windi.

10 Nawa inakuyileja mwinnatoñojoki nami: Chumichi chikuyikwasha enu, muloña chaaka chinamani himwadiña hohu atachi kwila chumichiku, ilaña mwamwekesheli nimuchima wakufwila kuchikoña. 11 Dichi, manishenu kuzata chuma chimwatachikili dehi kuzata, kulonda chuma chimwafuukwilili chadimu, muchizati kwesekeja nayuma yimukweti. 12 Nzambi wetejaña hohu chawaana chahanañayi muntu kufuma kumuchima, muloña yena wakeñaña muntu kuhana chuma chikutweshayi, bayi kuhana chuma chikubula kutweshayiku. 13 Muloña hinnakukeña nami chiikali chakala kudi enu ilaña kudi antu acheñi chiikali chaswayiku; 14 ilaña inakukeña nami, kwiikali kwesekana, yuma yimukweti yinasompokihu hayinu mpinji, ayibombeli hayuma yantesha yikwetiwu antu amakwawu, kulonda niwena yuma yawu yinasompokihu yikwetiwu, ayibombeli hayuma yantesha yimukweti kulonda mwesekani. 15 Neyi chochasonekawu nawu: “Muntu wadiña nayuma yayivulu, hadiña nayuma yayivulu nankashiku, nimuntu wadiña nayuma yantesha, hadiña nayuma yantesha nankashiku.”

16 Dichi, tunakumusakilila Nzambi hakumuletesha Titusa kwikala namuchima wakuyakamena neyi chitwayakamenaña ninetu nawa, 17 muloña yena neteji mazu etu akumukolesha, ilaña, chineli yena nakufwila kuzata, wukudinjila yomweni kudi enu. 18 Ilaña tunakumutemesha hamu namanakwetu anahamekiwu muyipompelu yejima muloña wayuma yinakukoñayi hansañu yayiwahi. 19 Bayi neyi chenichi hohuku, ilaña amutondeli cheñi nikudi yipompelu kulonda yekali mukwakwenda hamu nanetu hampinji yitunakuzata mudimu wakwanzañana iyi yawaana yaluwi kulonda tumulemeshi Mwanta nikumwekesha netu tudi namuchima wakukwashana. 20 Tuneli mwenimu kuchiina muntu wudi wejima kutwinka muloña hamudimu wutunakuzata wakwanzañana yawaana. 21 Muloña etu ‘twakamenaña yuma yejima nakashinshi, bayi neyi kumesu aYehova hohuku, ilaña nikumesu awantu.’

22 Kubombelahu, tunakuyitemesha hamu namanakwetu ituneseki kakavulu nawa itunawani netu wadikita muyuma yayivulu, ilaña chayinu mpinji, kudikita kwindi kunasweji muloña wayikuhwelela enu chikupu. 23 Neyi munakumujinoka Titusa, himukwetu mutwazatilaña hamu nyidimu kulonda muhetelimu; nawa neyi munakuyijinoka amanakwetu, hiyapostolu ayipompelu nawa amuletelaña Kristu kulema. 24 Dichi, yimwekeshelenu kukeña kwenu nikuleja yipompelu chuma chacheni chatuletesheli tudisambileña mudi enu.

9 Ichi dinu kutalisha hamudimu wawakwakujila, hichinakukeñeka ami kuyisonekelenuku, 2 muloña neluki kudihana kwenu oku kunadisambilaña kudi akwaMasidoniya nami, akwaAkaya adiloñesheleli chadimu nawa hanahiti dehi chaaka chimu, cheñi nawa, iyena denu dinasañumuni antu amavulu mukachi kawu. 3 Ilaña inakutemesha anakwetu kulonda kudisamba kwetu kutwadisambilaña mudi enu muniyi nsañu, kubuli kwikala kwamukunkulwayi nawa mwiikali adiloñesha, neyi chinahosheli nami dichimwakekala. 4 Muloña neyi akwaMasidoniya akenza nanami nakuyiwana enu munadiloñeshi wanyi, dikwila nawu enu nanetu twakatiya nsonyi hakuyikuhwelela enu. 5 Dichi, natoñojoka nami chachiwahi kukolesha anakwetu anyakali kwinza kudi enu nakupompeshela chadimu yawaana yenu yakufuma kumuchima yimwakanini, kulonda twakawani iyi yawaana yakufuma kumuchima munayiloñesheli chadimu, nawa chumichi chikamwekesha nawu twayikanjikijili wanyi kuhana iyi yawaana.

6 Ilaña kutalisha hachumichi, muntu wejima wakuwaña yantesha, wamunaña yantesha, nawa muntu wejima wakuwaña yayivulu wamunaña yayivulu. 7 Dichi muntu-himuntu yeli kwesekeja nachinafuukuliyi mumuchima windi, bayi nakuneña hela chakumukanjikijaku, muloña Nzambi wakeña muntu wahanaña namuzañalu.

8 Kubombelahu, Nzambi nateli kuyivulishila enu luwi lwindi lwasweja kulonda mpinji yejima mwikaleña nayuma yimunakukeña muyuma yejima nikwikala nayuma yayivulu yakuzatisha mumudimu wawuwahi. 9 (Neyi chochasonekawu nawu: “Nahani yawaana yayivulu;* nahani kudi atuzweñi. Kuloña kwindi kwatwalekañahu haya nyaaka.” 10 Dichi Owu wahanaña nankashi mbutu niyakuda kudi mukwakukuwa, wakayinka enu nikuyivulishila mbutu kulonda mwakatumbi nawa wakayikwasha kwaañula yuma yayiwahi munyidimu yenu yaloña.) 11 Anakuyihetesha enu muyuma yejima kulonda muhaneña yuma yayivulu, yaleñelaña antu amusakilileña Nzambi muloña wayawaana yenu yitukwinkaña antu amakwawu; 12 muloña iwu mudimu wakuzatila antu, bayi neyi wakukwasha hohu akwakujila muyuma yinakaankiliwuku, ilaña wakukwasha niantu kulonda amusakilileña Nzambi chikupu. 13 Muloña wawunsahu wafumaña muniwu mudimu wakukwasha, amulemeshaña Nzambi muloña wanenu mwovwahilaña nsañu yayiwahi yahosha hadi Kristu, neyi chimwayishimwinini kudi antu, nawa muloña wakwila mwahanaña yawaana kudi wena nikudi antu ejima chakufuma kumuchima. 14 Nawa wena hakuyilembelelaku, amwekeshaña kukeña kwayikeñawu enu muloña waluwi lwaNzambi lwasweja nawa lwabadika lwayitiyilañayi enu.

15 Tumusakililenu Nzambi hachawaana chindi chabadika chikupu chakukañanya nimwakuchilumbulwila.

10 Dichi ami Pawulu, inakukeña chikupu nami enu mulondeleña yuma yinnakuyileja. Hakuhosha nanenu, inakwimbujola Kristu wekala wovwaha nawa wukweti luwi. Ilaña antu amu mukachi kenu ahoshaña nawu namwekanaña kuzeyazeya neyi nidi hamu nanenu, ilaña neyi nidi kwakankawami, mwammonaña neyi muntu wahoshaña chakadi woma. 2 Chalala nakuhweleli nami, hampinji yinidi nanenu, hinatela kubabesha owu antu atumonaña nawu etu twamwekeshaña yilwilu neyi yamwekeshaña antu amukaayiku. 3 Hela chakwila twendaña kwesekeja namwaya mujimba wawuntu, hitwalwaña njita kwesekeja nanochu chitwekala mumujimba wawuntuku. 4 Muloña yitwa yakuzatisha hakulwa njita yetu hiyekala neyi yitwa yazatishañawu antu amukaayiku, ilaña hiyitwa yahanañayi Nzambi, yikweti ñovu yakubalumuna yuma yashimata chikupu. 5 Muloña tunakubalumuna yitoñojoka yawantu yatama niyuma yejima yakañeshaña antu kumwiluka Nzambi, nawa tunakutwala yitoñojoka yejima yatama muwuduñu kulonda yimwovwahileña Kristu; 6 nawa twadiloñesha dehi kubabesha antu ejima atwalekañahu nakudikaña, chiña hohu neyi enu munovwahili dehi chikupu.

7 Mwatalaña yuma kwesekeja nanochu chiyamwekanaña kumesu. Neyi kudi muntu wunadikuhweleli yomweni nindi himukwakumulondela Kristu, dichi watela kutoñojoka cheñi hachumichi nindi: Neyi chamulondelañayi Kristu, ninetu dichitwelaña. 8 Muloña hela ami nadisambi kakavulu kutalisha hawuswa watwinkeliwu kudi Mwanta wakuyituña enu, bayi neyi wakuyizeyeshaku, chumichi hichikuntiyisha nsonyiku. 9 Muloña hinnakukeña kumwekana neyi inakuyitiyisha woma nanyikanda yamiku. 10 Muloña wena ahoshaña nawu: “Nyikanda yindi yalema nankashi nawa yikweti ñovu, ilaña neyi wudi nanetu, wamwekanaña kuzeya nimazu ahoshañayi atiyakanaña wanyi.” 11 Muntu wamuchidiwu, yeluki nindi yuma yitwahoshaña* munyikanda hampinji yitunabuli kwikalahu, diyuma yitwakakoña* nihampinji yitwakekalahu. 12 Muloña etu hitwadishaña hachifulu hela kudesekeja nawantu adihamekaña awenawuku. Ilaña neyi adeseka mulwawu nawa adesekeja mulwawu, dikwila nawu hiyakweti maanaku.

13 Etu tukudisamba, hela chochu, bayi neyi tukubadika hitwatela kukuminaku. Tukudisamba hohu nayuma yitunateli kuzata mumudimu watwinkayi Nzambi. Iwu mudimu wabombelamu ninenu nawa. 14 Chalala, etu hitunakubadika hitwatela kukumina neyi kwiji hitwenjilihu nikudi enuku, muloña etu yetu twadiña atachi kuyishimwina enu nsañu yayiwahi yahosha hadi Kristu. 15 Etu tunakudisambila hanyidimu yitunakuzata, bayi hanyidimu yinakuzata antu acheñiku. Tunakuhweleli netu chikuhwelelu chenu chikutohelañaku kulonda muhamekeña chikupu nyidimu yitunazati. Chumichi chikutuleñela etu tusweji kuzata nañovu, 16 kulonda tushimwini nsañu yayiwahi kumatuña adi kwakulehi nanenu, hakwila nawu tubuli kudisambila munyidimu yinakoñiwu dehi mwiluña damuntu wacheñi. 17 “Ilaña muntu wadisambaña, yadisambileña mudi Yehova.” 18 Muloña muntu wadihamekaña yomweni, hidiyi atiyañawu kuwahaku, chiña muntu ahamekañawu kudi Yehova.

11 Nateli kutiya kuwaha neyi mukuñiteja mukubula maana kwami kwantesha. Hela chochu, munakuñiteja! 2 Muloña ami nayitiyilaña enu mukawu neyi mukawu* watiyañayi Nzambi, chineli nayikanini kuyisumbwisha kudi iyala wumu yowu Kristu nawa inakukeña kuyitwala kudi yena neyi mujiki wadihemba* wabulahu dehi kudikaama neyala. 3 Ilaña ami inakutiya woma, nami neyi chochamudimbiliwu Eva kudi kapela namakudi indi, hamwaha yitoñojoka yenu anateli kuyiluwañesha kuhitila mukuyifumisha kukashinshi nikukudihemba jatelela Kristu.* 4 Muloña neyi chochichidi, neyi muntu wacheñi yenza nakushimwina nsañu yaYesu waambuka nanowu itwashimwininihu, hela neyi mutambwila spiritu yaambuka nanoyu yimwatambwilili, hela neyi ayishimwina nsañu yayiwahi yaambuka nanoyu yimwatambwilili, owu muntu mwamwitejaña swayi. 5 Muloña ami natoñojoki nami, apostolu enu imwamonaña nenu abadika kulema, hiyambadika muchuma hela chimuku. 6 Hela chakwila hineluka kuhosha chiwahiku, ilaña mukwiluka kwamu, neluka; chakadi nikujina, twayileja enu hatooka mwatalisha iku kwiluka munjila jejima nimuyuma yejima.

7 Hela, komana nakoñeli nshidi hakudizoza ami aweni kulonda enu ayitoheshi nanochu chinayishimwinini enu nsañu yayiwahi yaNzambi chakadi kuyifwetesha tahindi? 8 Natambwili* yuma yayipompelu* yikwawu kulonda niyikalakeli enu. 9 Ilaña, hampinji yinadiña nanenu nawa hinadiña mukukaankila, hinekalilihu chiteli kudi muntu hela wumuku, muloña anakwetu afumini kuMasidoniya anyinkeli yuma yejima yinakaankilili. Chalala, muyuma yejima hinakeñeleña kwikala chiteli kudi enuku nawa nukutwalekahu kubula kwikala chiteli kudi enu. 10 Chineli chalala chaKristu chidi mudi ami, nakaleka wanyi iku kudisamba kunadisambilaña mumaluña amuAkaya. 11 Muloñadi chinabulilili kukeña kwikala chiteli kudi enu? Komana muloña wakwila nawu nayikeña enu wanyi tahindi? Nzambi weluka nindi nayikeña.

12 Ilaña yuma yinnakukoña, nukutwalekahu kuyikoña kulonda antu adifwikijaña neyi hiyapostolu abuli hakudisambila nihakuhoshela nawu mudimu wutwazataña diwu mudimu wuyazatañawu. 13 Muloña antu amuchidiwu hiyapostolu akutwamba, hiyakwakukalakala akudimbana, adifwikijaña neyi hiyapostolu jaKristu. 14 Chumichi hichakuhayamaku, muloña Satana yomweni wadifwikijaña neyi hikañelu kachejeji. 15 Dichi, chumichi chakuhayamisha wanyi neyi akwakukalakala indi niwena anakutwalekahu nakudifwikija neyi hiyakwakukalakala akuloña. Ilaña kukuma kwawu kwakashindamena hanyidimu yakoñañawu.

16 Inakuhosha cheñi nami: Bayi kwikala muntu hela wumu wukutoñojoka nindi hinikweti maanaku. Ilaña hela neyi mukutoñojoka mwenimu, dichi ñitejenu neyi muntu wabula maana kulonda ninami nawa nidisambi chantesha. 17 Ichi chinnakuhosha, hinnakulondela chahoshaña Mwantaku, ilaña inakuhosha neyi chinateli kuhosha muntu wabula maana, wadisambaña nikudikuhwelela yomweni. 18 Chineli antu amavulu anakudisamba kwesekeja namwaya mujimba wawuntu,* dichi ninami nukudisamba. 19 Chineli enu “mukweti maana nankashi,” mwetejaña namuzañalu antu abula maana. 20 Kafwampi, mwetejaña muntu wejima wayihembaña neyi anduñu, muntu wejima wabuwaña maheta enu, muntu wejima wahukulaña yuma yimukweti, muntu wejima waditoheshaña hadi enu nimuntu wejima wayetaña kumesu.

21 Nahoshi mwenimu kulonda tudisawishi etu aweni, muloña chinateli kumwekana neyi tunakoñi mwenimu muloña wakuzeyazeya kwetu.

Ilaña neyi antu amakwawu amwekesha kuhamuka, ninami nukumwekesha kuhamuka, inakuhosha neyi muntu wabula maana. 22 Komana hiyaHeberu tahindi? Ninami nidi kaHeberu. Komana hiyaIsarela tahindi? Ninami nidi kaIsarela. Komana hiyanyana* kaAbarahama tahindi? Ninami nidi mwana kaAbarahama. 23 Komana hiyakwakukalakala aKristu tahindi? Inakwakula neyi muntu wazaluka, ami nayibadika wejima wawu: Nazati nyidimu yayivulu, anankasi kakavulu mukaleya, anañeti kakavulu nawa nahiti muyuma yanshikijileña kwakwihi nakufwa. 24 Mapampa katanu, aYudeya añeteli yikoti 39, 25 añeteli mapampa kasatu natubama, añasili malola kamu, mapampa kasatu maatu asatu ashiyashana inakandaminimu akisikili, ifuku dimu nadiña hakaluñalwiji mwaana niwufuku; 26 kakavulu nadiña hawenyi, nahitileña muwubanji wahatuloña, akeñeleña kunjaha kudi atupondu, akeñeleña kunjaha kudi antu jami, akeñeleña kunjaha kudi akwanyuza, nahitileña muwubanji mumusumba, muwubanji mwisaña, muwubanji hakaluñalwiji, akeñeleña kunjaha kudi anakwami akutwamba, 27 mukuzata nyidimu yakola nimukukabakana, mukubula kukaama kakavulu, mukutiya nzala nimumpwila, mukubula yakuda yayivulu, mumpinji yamashika nimukubula yakuvwala.*

28 Kubombela hayuma yejimiyi, kudi nawa chuma chikwawu chankabishaña* hefuku-hefuku: chumichi hikwakamena yipompelu yejima. 29 Hinyi wunazeyi kubadika chinnazeyi ami? Hinyi wunahukani chakadi ami kutiya kutama?

30 Neyi nukudisamba, nukudisambila hayuma yamwekeshaña kuzeyazeya kwami. 31 Nzambi nawa Tata yaMwanta Yesu, Owu atela kulemeshañawu haya nyaaka nanyaaka, neluki nindi inakutwamba wanyi. 32 MuDamakasa, nguvulu yamwanta Aretasi wahembeleña musumba wawaDamakasa kulonda yankwati, 33 ilaña anshili muchimpaya* nakuñidishila munjanina yambañu yamusumba nakunzenzumwina heshina, dichi, napulukili mumakasa indi.

12 Natela kudisamba, dichi nukuhosha hayimwenu yakuhayamisha yammwekesheleliyi Mwanta ninsañu yanyinkeliyi hela chakwila kwila mwenimu kukunhetesha wanyi. 2 Neluka muntu wadikunda naKristu owu ahukwiliwu nakumutwala mwiwulu damuchisatu hadi yaaka 14 yinahitihu, kwiji dinu amuhukwilili kumu namujimba, indi kwiji hiyamuhukwilili kumu namujimbaku, neluki wanyi; Nzambi diyi wuneluki. 3 Mwamweni, namwiluka iwu muntu, kwiji dinu amuhukwilili kumu namujimba, indi kwiji hiyamuhukwilili kumu namujimbaku, neluki wanyi; Nzambi diyi wuneluki, 4 muntu yeniwu amuhukwili nakumutwala muparadisa nawa watiyili mazu akukañanya kuhosha nawa abula kwitejawu munshimbi kuyihosha kudi muntu. 5 Nukudisambila hadi muntu wamuchidiwu, ilaña hinukudisambila hadi ami aweniku, chiña hohu mukuzeyazeya kwami. 6 Hela chakwila inakukeña kudisamba, hinukwikala muntu wabula maanaku, muloña nukuhosha chalala. Ilaña natondolweli kwila mwenimu kulonda kubuli kwikala muntu hela wumu wukunlemesha nankashi kubadika yuma yamonañayi mudi ami hela yatiyañayi kudi ami, 7 muloña wayuma yabadika yammwekesheleliwu.

Hakwila nibuli kuditohesha chikupu, anshili mwiña mumujimba wami, dikwila nawu kañelu kaSatana kulonda yañeteña jimbañala kuchiina nakenda kaditohesha chikupu. 8 Namulembeleleli Mwanta mapampa kasatu nami, iwu mwiña wunfumi. 9 Ilaña yena wanlejeli nindi: “Luwi lwami lwasweja lunakuteleli eyi, muloña mukuzeyazeya kweyi dimunakulumbulukila ñovu jami.” Dichi, nukuzañalala chikupu kudisambila mukuzeyazeya kwami kulonda ñovu jaKristu jitwalekihu mudi ami neyi itenti. 10 Dichi, natiyaña kuwaha mukuzeyazeya, mumatuka, mumpinji yakukaankila, mumakabisha nimukukala kukoola Kristu. Muloña neyi nazeyi, dihu hinekalaña nañovu.

11 Nekali wakadi maana. Yenu munankojeji niikali ñaana, muloña yenu mwateleleli kunhameka. Muloña apostolu enu imwamonaña nenu abadika kulema hiyambadikili muchuma hela chimuku, hela chakwila nidi wamukunkulwayi. 12 Eñañi, nadimwekesheli kudi enu nami nidi kapostolu kuhitila mukuumika kwami, muyinjikijilu, muyihayamisha* nimunyidimu yañovu. 13 Chuma chaletesheli enu mwaambuki nayipompelu yikwawu, chidi chakwila nawu ami nekalili chiteli kudi enu wanyi. Mwani ñanakenenuku hanichi chiluwa.

14 Tiyenu! Aka dikapampa kamuchisatu kinnakwinza kudi enu nawa nukwikala chiteli kudi enu wanyi. Muloña ami hinnakukeña yuma yenuku, ilaña inakukeña enu aweni; muloña anyana hiyatela kuhembela anvwali jawu yumaku, chiña anvwali diwu atela kuhembela anyanawu yuma. 15 Muloña, ami nakahana yuma yami yejima namuzañalu nikudihana ami aweni kukoola enu.* Neyi chakwila ami nayikeña enu nankashi, komana enu mwatela kunkeña ami chantesha? 16 Hela chochu, ami nekalilihu chiteli kudi enu wanyi. Ilaña, mwahoshaña nenu ami “nadiña wababala” nawa nenu nayidimbili “kuhitila mukuzatisha tufuta.” 17 Komana ami nayidiilili yuma yenu kuhitila mudi antu inayitemesheleli tahindi? 18 Namukolesheli Titusa kwinza kudi enu nawa namutemesheli hamu nanowu manakwetu. Komana Titusa wayidiililihu yuma yenu tahindi? Komana hitwadiña nayitoñojoka yoyimuku, tahindi? Nawa hitwelileña yuma yoyimuku, tahindi?

19 Komana mpinji yejimiyi munakututoñojokela nenu etu tunakudihakwilaku etu aweni hanyiloña yimunakutwinka tahindi? Tunakuhosha kumesu aNzambi nanochu chitwadikunda naKristu. Ilaña enu akwetu itwakeña, yuma yejima yitwakoñaña twayikoñaña kulonda yiyituñi enu. 20 Muloña inakutiya woma nami hadaha chinakashika oku, yilwilu yenu yakaambuka nanoyu yinakakeña, nawa yilwilu yami yakaambuka nanoyu yimwakakeña, ilaña, hekwawu nakawana kudi yikonkojola, ichima, kuzuwa, kudaambola, matuñu, tushawushawu, kudinka wanta nimapumba. 21 Hamwaha chinakenza cheñi, Nzambi yami wakantiyisha nsonyi hamesu enu, nawa nakenda kadila antu amavulu akoñeli nshidi kunyima anabuli kubalumuka munyichima nakuleka yilwilu yawu yawuzondu, wuvumbi* niyilwilu yawu yawukapwa nsonyi* yakoñeleñawu.

13 Aka dikapampa kamuchisatu kinnakwinza kudi enu. “Wunsahu wukushimuna* ayinsahu ayedi hela asatu, nsañu yejima yikulumbuluka.” 2 Hela nidi kwakulehi nanenu, ilaña mazu ami muyimoni neyi kwiji inakuyileja mazu wenawa mulwendu lwami lwamuchiyedi. Dichi, neyi chochinelili kunyima, dichi inakusoñamishila chadimu antu akoñeli nshidi kunyima niantu amakwawu ejima nami, neyi nenzi cheñi, nakayileka wanyi, 3 neyi nila mwenimu, nakamwekesha kudi enu nami, Kristu owu wabula kuzeya kudi enu ilaña wekala wakola kudi enu, chalala nakuhosha kuhitila mudi ami. 4 Mwamweni, amujahilili hamutondu muloña wakuzeya, ilaña ichi wamumi muloña wañovu jaNzambi. Chalala, ninetu twazeyela hamu nayena, ilaña twakashakama hamu nayena muloña wañovu jaNzambi jinakuzata mudi enu.

5 Desekenuña kulonda mwiluki neyi mudi muchikuhwelelu; dishinshikenuña kulonda mwiluki chimwekala enu aweni. Hela, komana muneluki wanyi nenu Yesu Kristu wadikunda nanenu tahindi? Chiña hohu neyi anayikaani. 6 Nakuhweleli chikupu nami mukwiluka nenu etu hiyatukaanaku.

7 Ichi tunakulomba kudi Nzambi netu mubuli kukoña chuma chatama, bayi neyi tunalondi netu etu atumoneña nawu atwitejaku, ilaña netu enu mwileña yuma yayiwahi, hela chakwila etu tunateli kumwekana neyi atukaana. 8 Muloña etu hitunateli kwila chuma hela chimu chinateli kukañesha chalalaku, ilaña chiña chinateli kukwasha chalala. 9 Twazañalalaña chikupu mpinji yejima neyi enu mwikala nañovu ilaña etu tuzeya. Nawa ichi dichuma chitunakulomba netu, mwololi cheñi yitoñojoka yenu. 10 Ichi dichuma chinaleteshi nisoneki iyi yuma hela chakwila nidi kwakulehi nanenu, kulonda neyi nenzi kudi enu, nakabuli kuyizuwila enu kuhitila mukuzatisha wuswa wanyinkawu kudi Mwanta, wakuyikolesha enu bayi wakuyizeyeshaku.

11 Nkumininaku, enu anakwetu, twalekenuhu nakuzañalala, ololenuña yitoñojoka yenu, dikundejenuña, ikalenuña nayitoñojoka yoyimu nikushakama mukuwunda; Nzambi wakukeña nawa wakuwunda wukwikalaña nanenu. 12 Mudimushi wumu namukwawu nakudifufwa kwajila.* 13 Akwakujila ejima anayimushi.

14 Luwi lwasweja lwaMwanta wetu Yesu Kristu nikukeña kwaNzambi nispiritu yajila yitwekala nayu wejima wetu jiikali nanenu ejima.