MUKANDA KUDI AÑALIJA

1 Ami Pawulu, nidi kapostolu, bayi neyi atondeliwu kudi antu hela kuhitila mudi muntuku, ilaña antondeli kudi Yesu Kristu niNzambi Tata yetu, wamusañwili kufuma mudi afu, 2 ami nianakwami ejima inidi nawu hamu, tunasonekeli nyikanda yipompelu yejima yamuÑalija:

3 Luwi lwasweja nikuwunda jafumaña kudi Tata yetu Nzambi nikudi Mwanta Yesu Kristu jiikali nanenu. 4 Wadihanini yomweni kukoola nshidi jetu kulonda yatukuuli kunshakaminu yamakonu yatama* kwesekeja nankeñelu yaNzambi yetu nawa Tata, 5 kudi yena kwiikali kulema haya nyaaka nanyaaka. Ameni.

6 Nadihayamini, muloña munakumushiya* swayi-swayi Owu wayitambikili naluwi lwasweja lwaKristu nakulondela nsañu yayiwahi yacheñi. 7 Bayi neyi kudi nsañu yikwawu yayiwahiku; ilaña kudi antu anakuyiletela enu kukala kulonda aluwañeshi nsañu yayiwahi yahosha hadi Kristu. 8 Hela chochu, neyi wumu hakachi ketu hela kañelu wukufuma mwiwulu yayileja nsañu yayiwahi yacheñi, yaambuka nanoyu yitwayishimwinini, yekali washiñewa. 9 Neyi chitunahoshi dehi, inakuhosha cheñi nami, Muntu wejima wunakuyishimwina nsañu yayiwahi yacheñi yaambuka nanoyu yimwatambwilili, yekali washiñewa.

10 Komana inakukeña kutiyisha antu kuwaha tahindi inakukeña kutiyisha Nzambi kuwaha? Neyi inakukeña kutiyisha antu kuwaha, dikwila nawu hinidi kambanji kaKristuku. 11 Enu anakwami, inakukeña mwiluki nenu, nsañu yayiwahi yinayishimwinini hiyafumini kudi antuku; 12 muloña iyi nsañu yayiwahi hinayitambwili kudi muntu hela kuyinshimwinayiku, ilaña kuhitila muyuma yammwekesheleliwu kudi Yesu Kristu.

13 Enu mwatiyili hayilwilu yami yinadiña nayu kunyima mukwitiya kwawaYudeya nenu, natwalekelihu nakukabisha chikupu* chipompelu chaNzambi nikuchikisañana; 14 nawa nadiña nakupaminaku chikupu mukwitiya kwawaYudeya kubadika antu amavulu amumuza wetu mutwesekeneneña, muloña nadiña neyena chikupu mutushidikilu twawatata jami. 15 Ilaña Nzambi wankojejeli ami kusemuka mwivumu damama yami nawa wantambikili kuhitila muluwi lwindi lwasweja, wamweni nindi chachiwahi 16 kusolola Mwanindi kuhitila mudi ami kulonda nishimwini kudi akwanyuza nsañu yayiwahi yahosha hadi yena, hinashikeneni kwihula muntu hela wumuku;* 17 nawa hinayili kuYerusalema kudi antu adiña apostolu henohu ami kanda niikali kapostoluku, ilaña nayili kuArabiya, kuhiñahu nafuntili kuDamakasa.

18 Chimwahitili yaaka yisatu, nayili kuYerusalema nakuhempula Kefwasi* nawa nashakamini nindi mafuku 15. 19 Ilaña, hinadimwenihu nakapostolu wejima hakachi kawapostolu amakwawuku, chiña hohu Yakoba mana kwaMwanta. 20 Ichi dinu kutalisha hayuma yinnakuyisonekela enu, inakuyileja chalala kumesu aNzambi nami, hinnakutwambaku.

21 Kuhiñahu, nayili mumaluña amuSiriya nimuSilisiya. 22 Ilaña, añilukili wanyi kuyipompelu yamuYudeya yadikudileña naKristu. 23 Atiyileña hohu nawu: “Muntu watukabishileña kunyima, ichi dinu nakushimwina nsañu yayiwahi yayuma yitwakuhwelela oyu yakisañeneñayi kunyima.” 24 Dichi, atachikili kumulemesha Nzambi muloña wanami.

2 Kuhiñahu, chimwahitili yaaka 14 nayili cheñi kuYerusalema hamu naBaranaba niTitusa. 2 Nayili muloña wayuma yammwekesheleliwu, nawa nayilumbulwilili nsañu yayiwahi yinnakushimwina kudi antu akunyuza. Hela chochu, antu iyamweneñawu nawu alema, nayilumbulwilili chumichi kumbadi kulonda chibuli kumwekana neyi natemukileña hela natemukili chamukunkulwayi. 3 Hela tuhu Titusa owu wadiña hamu nanami nawa wadiña kaGiriki, hiyamukanjikijili kwalamaku. 4 Ilaña, iyi nsañu yekaliliku muloña wawanakwetu akutwamba aleteli iyi nsañu mukuswamujoka owu enjili nakumona kuwunda kutwadiluñishaña muloña wakudikunda naKristu Yesu, kulonda atutwali muwuduñu; 5 hitwayovwahilili hela chanteshaku* kulonda chalala chansañu yayiwahi chitwalekihu nanenu.

6 Ilaña kutalisha kudi antu amweneñawu nawu alema, hela chakwila adiña antu amuchidinyi, hiyambadikiliku, muloña Nzambi hatalaña muntu kumesuku, wenowu amayala amweneñawu nawu alema, kwosi chuma hela chimu chachiha chandizishiliwuku. 7 Ilaña, chamweniwu nawu anankunjiki mudimu wakushimwina nsañu yayiwahi kudi antu abula kwalama, neyi chamukunjikiliwu Petulu mudimu wakushimwina nsañu yayiwahi kudi antu aalama, 8 muloña owu wamwinkeli Petulu ñovu yakwikala kapostolu kudi antu aalama, diyi wanyinkeli ninami ñovu yakwikala kapostolu kudi antu akunyuza, 9 nawa chelukiliwu luwi lwasweja lwammwekesheleliwu, aYakoba naKefwasi* niYowanu amwekeneña kwikala yishimi, atwimushili ami naBaranaba nachikasa chachidiilu nakumwekesha nawu twadinuña* hamu, kulonda etu tuyi kudi antu akunyuza, ilaña wena ayi kudi antu aalama. 10 Atulejeli hohu nawu twanukeña anakwetu atuzweñi, nawa chumichi dichinafwilaña chikupu kwila.

11 Hela chochu, Kefwasi* chenjiliyi kuAntiyoki, namulejelimu chakadi kumuhita mumbadi,* muloña welili chuma chatama.* 12 Muloña amayala amu afumini kudi Yakoba henohu kanda ashiki, wadiilileña hamu nawantu akunyuza; ilaña chashikiliwu, walekeli kwila chumichi nawa wadaambwili nawu muloña watiyili woma antu adiña aalama. 13 NiaYudeya ejima ashalilihu, niwena adibombeli hamu nindi muniwu wunfwikiji, chakwila niBaranaba niyena wahuñumukili nawunfwikiji wawu. 14 Ilaña chinamweni nami hiyanakwenda mwaya chalala chansañu yayiwahiku, namwihwili Kefwasi* hamesu awu ejima nami: “Neyi eyi kaYudeya, wunakushakama neyi chelañawu antu akunyuza bayi neyi chelañawu aYudeyaku, wunateli kukanjikija ñahi antu akunyuza kulonda ashakameña kwesekeja namwaya yaaku yawaYudeya?”

15 Etu twela kuchisemwa tudi aYudeya, bayi neyi akwanshidi akunyuzaku, 16 tweluka netu muntu hiyamutenaña nawu waloña muloña wanyidimu yanshimbiku, chiña hohu neyi yakuhwelela mudi Yesu Kristu. Dichi tunamukuhweleli Kristu Yesu kulonda atuteni kuloña nanochu chitunamukuhweleli Kristu, bayi nanyidimu yanshimbiku, muloña kwosi muntu* hela wumu akatenawu kuloña muloña wanyidimu yanshimbiku. 17 Neyi etu tunakufwila netu atuteni kuloña kuhitila mudi Kristu, ilaña atuwana nawu tudi akwanshidi, komana Kristu diyi mukwakukoña nshidi tahindi? Inehi! 18 Neyi yuma yinahumwini niyituña cheñi, dikwila nawu namwekeshi nami nidi mukwakufumpa nshimbi. 19 Nafwili muloña wakwovwahila nshimbi kulonda niikali wamumi kudi Nzambi. 20 Anampopeli hamutondu hamu naKristu. Hiyami inakuhandaku, ilaña Kristu wadikunda nanami diyi wunakuhanda. Chalala, chihandilu chinahandaña hayinu mpinji mumujimba wawuntu, nahandaña muloña wakukuhwelela mudi Mwana kaNzambi, wankeñeli nawa wadihanini yomweni kukoola ami. 21 Ami hinakaanaña* luwi lwaNzambi lwaswejaku, muloña neyi chakwila muntu wekalaña waloña kuhitila munshimbi, dikwila nawu Kristu wafwili chamukunkulwayi.

3 Enu aÑalija abula maana! Hinyi wunayiluwañeshi ñaana henohu enu ayilumbulwilili chiwahi kutalisha hadi Yesu Kristu apopeleliwu hamutondu? 2 Inakukeña kuyihulaku* ichi chuma chimu nami: Komana ayinkeli spiritu yajila muloña mwakoñeli yuma yahosha nshimbi tahindi muloña wakukuhwelela yuma yimwatiyili? 3 Komana mwalala himukweti maanaku, tahindi? Enu hakutachika mwatachikili kwenda munjila yakuspiritu,* hanu dinu kumakumishilu munakwenda munjila yakumujimba* tahindi? 4 Komana mwahitili mumakabi amavulu chamukunkulwayi hohu tahindi? Ami namoni nami himwakabakeni hohu chamukunkulwayiku. 5 Dichi, owu wayinkaña spiritu nawa wakoñaña yihayamisha mukachi kenu, komana welaña mwenimu muloña wanyidimu yenu yanshimbi tahindi muloña wachikuhwelelu chenu muyuma yimwatiyili? 6 Neyi chochu Abarahama “chamukuhweleleliyi Yehova nawa amuteneni nawu waloña.”

7 Chalala mweluka nenu, antu akuhwelelaña diwu anyana kaAbarahama. 8 Dichi, nsona chiyamweneni chadimu nawu Nzambi wakatena antu akunyuza nindi aloña muloña wakukuhwelela, yashimwinini chadimu nsañu yayiwahi kudi Abarahama nawu: “Nyuza yejima akayikiswila kuhitila mudi eyi.” 9 Dichi, antu akuhwelelaña anakuyikiswila hamu naAbarahama wadiña nachikuhwelelu.

10 Antu ejima ashindamena hanyidimu yanshimbi ashiñewa, muloña chasonekewa nawu: “Muntu wejima wabulaña kwovwahila nikwila yuma yejima yasonekawu mumuvuñilu waNshimbi, washiñewa.” 11 Kubombelahu, chinamwekani kwila nawu kwosi muntu anateli kutenawu nawu waloña kudi Nzambi muloña wanshimbiku, muloña “muntu waloña wakahanda muloña wachikuhwelelu.” 12 Dichi, Nshimbi hijashindamena hachikuhweleluku. Ilaña “muntu wejima wahembaña iji Nshimbi, wakekala nawumi muloña wajihembaña.” 13 Kristu watulandili etu nakutukuula kwishiñu daNshimbi kuhitila mukwikala washiñewa chatela etu twiikali ashiñewa, muloña chasonekewa nawu: “Muntu wejima akudikawu hamutondu, diyi washiñewa.” 14 Chumichi chadiña mwenimu kulonda nkisu yaAbarahama yakenzi hadi akwanyuza kuhitila mudi Kristu Yesu, kulonda tukatambwili spiritu yajila yatukaniniwu muloña wakukuhwelela kwetu.

15 Enu anakwami, inakuhosha kuhitila mukuzatisha chakutalilahu chamwekanaña muchihandilu chawantu nami: Neyi antu akasa chitiyañenu, hela chakwila anachikasi kudi muntu wumu, kwosi muntu wunateli kuchidiwula hela kubombelaku nsañu yikwawuku. 16 Iyi yikaninu, amukanini Abarahama nimwanindi.* Nsona hiyahosha nawu, “nikudi anyaneyi,”* neyi kwiji adiña amavuluku. Ilaña, yahosha nawu, “nikudi mwaneyi,”* dikwila nawu wumu hohu, yowu Kristu. 17 Kubombelahu, nahoshi nami: Nshimbi oyu yenjili nakwikalaku hanyima yayaaka 430, hiyinahimpi chitiyañenu chakasiliyi Nzambi kunyima kulonda yijiyishi chikaninuku. 18 Muloña neyi wuswana washindamena hanshimbi, dikwila nawu hiwashindamena hachikaninuku; ilaña Nzambi mukudikeñela wawuhanini kudi Abarahama kuhitila muchikaninu.

19 Hanu dinu, muloñadi chikwekalila Nshimbi? Ayibombeleliku kulonda nshidi yimwekani, sampu mwana* nashiki dehi, owu akaniniwu muchikaninu; nawa iyi nshimbi ayihanini kuhitila mudi añelu muchikasa chehaku. 20 Dichi, ihaku hanateli kwikalaku neyi chakwila hadi hohu muntu wumuku, ilaña Nzambi chahaniniyi chikaninu, wachihanini hohu nkawindi. 21 Komana Nshimbi yadikañaña nachikaninu chaNzambi tahindi? Inehi! Muloña neyi ahanini lushimbi lunateli kuhana wumi, dikwila nawu kuloña kwadi kwikalaku muloña wanshimbi. 22 Ilaña Nsona yatwalili antu ejima mukaleya kanshidi, kulonda chikaninu chashindamena hakumukuhwelela Yesu Kristu, achihani kudi antu akuhwelela.

23 Hela chochu, henohu chikuhwelelu kanda chishiki, atuhembeleña nanshimbi, nakututwala mukaleya nakuhembelela chikuhwelelu ochu chadiña kwakwihi nakusololawu. 24 Dichi Nshimbi jekalili mukwakutuhemba* ndo-o nichenjiliyi Kristu kulonda atuteni nawu twaloña muloña wakukuhwelela. 25 Ilaña chineli chikuhwelelu chinashiki dehi, hituchidi cheñi namukwakutuhembaku.*

26 Kafwampi, wejima wenu mudi anyana kaNzambi muloña wakumukuhwelela Kristu Yesu. 27 Muloña wejima wenu apapatishawu mudi Kristu, mwavwala Kristu. 28 Hikwekala kaYudeya hela kaGirikiku, hikwekala nduñu hela muntu wasubukaku, hikwekala iyala hela mumbandaku, muloña wejima wenu mudi wumu mwadikunda naKristu Yesu. 29 Kubombelahu, neyi mudi antu jaKristu, dikwila nawu mudi anyana* kaAbarahama chikupu, answana kwesekeja namwaya chikaninu.

4 Dichi inakuhosha nami nswana neyi wuchidi mwana wanyanya, haambukaña nanduñu hela hantiku, hela chakwila diyi mwanta wayuma yejima, 2 ilaña amuyuulaña kudi atupitawu nikudi atulama kushika tuhu niifuku datoñwelawu chadimu kudi tata yindi. 3 Chochimu ninetu nawa, hampinji yitwachidiña anyana anyanya, twadiña muwuduñu wayuma yawansi yamukaayi. 4 Ilaña mpinji chiyashikili chikupu, Nzambi watemesheli Mwanindi, owu wavwalikili kudi mumbanda nawa wadiña munshimbi, 5 kulonda yafweti wufwetu wakukuula nachu antu adi munshimbi hakwila nawu atwiteji kwikala anyana.

6 Dichi, chineli mudi anyana, Nzambi natemeshi spiritu yaMwanindi munyichima yetu, nawa yabidikaña nawu: “Aba,* Tata!” 7 Dichi, himudi cheñi anduñuku, ilaña mudi anyana; nawa neyi mudi anyana, dikwila nawu Nzambi nayilishi cheñi kwikala answana.

8 Hela chochu, hampinji yimwabulili kumwiluka Nzambi, mwadiña anduñu kudi anzambi akutwamba. 9 Ilaña ichi, chineli munamwiluki dehi Nzambi, hela netu chinayilukiwu dehi kudi Nzambi, muloñadi chimunakufuntila cheñi kuyuma yabula kukola nikuyuma yawansi yamukunkulwayi nakukeña kwikala anduñu ayumiyi cheñi? 10 Munakuhemba chikupu mafuku nitukweji niyilaaka niyaaka. 11 Inakuyakamena enu nami, hadaha nakisañani hohu ñovu jami hadi enu chamukunkulwayi.

12 Enu anakwami, nayilembeleli, ikalenu neyi chinidi ami, muloña ninami nadiña neyi chimudi enu. Himwankoñelihu katamaku. 13 Ilaña mweluka nenu chikatu chami dichanletesheli niyishimwini enu nsañu yayiwahi katachi. 14 Hela chakwila chikatu chami chadiña hikweseka kudi enu, himwansawili hela kummona neyi chuma chawuzonduku;* ilaña mwantambwilili neyi kañelu kaNzambi, hela neyi Kristu Yesu. 15 Indi muzañalu wumwadiña nawu wudi kudihi? Muloña ami inakuyileja chalala nami, neyi chatweshekeli, mutenowu mwadi kufumisha mesu enu nakuyinyinkawu ami. 16 Dichi, komana nekali chilumbu chenu muloña nayilejaña chalala tahindi? 17 Antu amu anakufwila chikupu kuyikokola enu, ilaña dinu bayi neyi nankeñelu yayiwahiku; anakukeña kuyifumisha kudi ami kulonda mufwileña chikupu kuyilondela wena. 18 Hela chochu, chachiwahi mpinji yejima neyi muntu nakufwila chikupu kuyikokola enu nankeñelu yayiwahi nawa bayi neyi hampinji yinidi hamu nanenu hohuku, 19 enu anyanami inakeña, enu innakutiyila cheñi nyisoñu yakuvwala sampu munamwekeshi yilwilu yaKristu. 20 Inakutoña nami kachi nadiña hamu nanenu katatakichi kulonda nihoshi nenu munjila yaambukaku, muloña neluki wanyi chinatela kuyila enu.

21 Nlejenu, enu munakukeña kwikala munshimbi, komana mwatiyaña chahoshaña Nshimbi tahindi? 22 Chakutalilahu, chasonekewa nawu Abarahama wadiña nawanyana ayedi, wumu wamuvwalilili mudi ñamba wamumbanda, mukwawu nawa mudi mumbanda wasubuka; 23 ilaña mwana wavwalililiyi mudi ñamba wamumbanda, wavwalikili kwesekeja nachisemwa,* hakwila mwana wavwalililiyi mudi mumbanda wasubuka, wavwalikili kwesekeja nachikaninu. 24 Iyi yuma yadiña hichinjikijilu chayuma yikamwekana kumbidi; muloña awa ambanda ayedi emenañaku yitiyañenu yiyedi, chimu chakuMpidi yaSinayi, chavwalaña anyana nakuyitwala muwuduñu, nawa diyi Haga. 25 Dichi, Haga hiSinayi, mpidi yamuArabiya nawa makonu wemenañaku Yerusalema, muloña wudi muwuduñu hamu nawanyanindi. 26 Ilaña Yerusalema wamwiwulu wasubuka, nawa diyi mama yetu.

27 Muloña chasonekewa nawu: “Zañalalaku eyi mumbanda nshinta wabulaña kuvwala anyana; eyi mumbanda wabulaña kutiya nyisoñu yakuvwala, bulaku nyiñula* namuzañalu; muloña anyana kamumbanda anashiyiwu chisayikila* kudi nfumwindi, anabadiki kuvula anyana kamumbanda wukweti nfumwindi.” 28 Dichi enu anakwami, mudi anyana achikaninu neyi chadiñayi Isaka. 29 Ilaña neyi chichadiña kunyima, mwana wavwalikili kwesekeja nachisemwa,* watachikili kukabisha mwana wavwalikili kwesekeja namwaya spiritu, dichi chichidi nimakonu. 30 Hela chochu, komana nsona yahosha nawudi? Yahosha nawu, “Muhañi iwu ñamba wamumbanda nimwanindi, muloña mwana kaniwu ñamba wamumbanda, chalala, hamba kekala nswana hamu namwana kamumbanda wasubukaku.” 31 Dichi, enu anakwami, tudi anyana bayi kaniwu ñamba wamumbandaku, ilaña tudi anyana kaniwu mumbanda wasubuka.

5 Kristu watusubwili muwuduñu kulonda twiikali nakusubuka kwamuchidiwu. Dichi, imanenu mbe-e nawa bayi mudikasila cheñi mumpaanda yawuduñuku.

2 Tiyenu! Ami Pawulu inakuyileja nami, neyi mukwalama, mukuhetelamu wanyi muchuma chakoñayi Kristu. 3 Inakuleja cheñi iyala wejima aalamishañawu nami, watela kwovwahila Nshimbi jejima. 4 Enu munakufwila nenu ayiteni kuloña muloña wakwovwahila nshimbi, munadaambuli kudi Kristu; munafumi kuluwi lwindi lwasweja. 5 Ilaña etu, muloña waspiritu, tunakutalila chikupu kuchiñeja kwakwikala aloña muloña wachikuhwelelu. 6 Kutalisha kudi antu adikunda naKristu Yesu, kwalama hela kubula kwalama jamukunkulwayi hohu, ilaña chikuhwelelu chazatikaña nakukeña, dichalema.

7 Mwatemukileña chiwahi. Hanu dinu hinyi wayikañesheli kutwalekahu kwovwahila chalala? 8 Nzambi wunakuyitambika enu, hayishinjilili nindi muleki kwovwahila chalalaku. 9 Iluñi dantesha davuvumwishaña chikanka chejima. 10 Nakuhweleli chikupu nami, enu mwadikunda naMwanta himwakatoñojoka mwacheñiku; ilaña muntu wunakuyikabisha, chili himuntu wamuchidinyi, akamusompesha wunsompeshi wamutelela. 11 Enu anakwami, neyi chakwila nichidi kushimwina nsañu yakwalama, hanu dinu muloñadi chiyachidi kunkabishilawu? Dikwila nawu mutondu wakuyandishila* hiwunekali chuma chakuhukeshaku. 12 Chikuwaha neyi amayala anakuyileja enu nawu mwalami, adalamishi* awenawu.

13 Enu anakwami, ayitambikili kulonda mwiikali asubuka; hela chochu, bayi muzatisha iku kusubuka kulonda mufwileña yuma yafwilaña mujimbaku, ilaña dikalakelenuña wumu namukwawu muloña wakukeña. 14 Muloña Nshimbi jejima jinashikijeweli* munilu lushimbi lwakwila nawu: “Keñaku mukwenu neyi chiwadikeña eyi aweni.” 15 Dichi, neyi mutwalekahu nakudisumona nikudiida wumu namukwawu, babalenu kulonda mubuli kudijilumuna wumu namukwawu.

16 Ilaña inakuyileja nami, Endenuña naspiritu, nawa himukukoñaña yuma yafwilaña mujimbaku. 17 Muloña yuma yafwilaña mujimba yambuka nayuma yafwilaña spiritu, spiritu niyena yaambuka namujimba; nawa yumiyi hiyatiyañanañaku, kulonda enu mubuli kukoña yuma yimunakukeña kukoña. 18 Kubombelahu, neyi anakuyilombola kudi spiritu, dikwila nawu himudi munshimbiku.

19 Dichi nyidimu yamujimba wanshidi yamwekanaña hatooka, nawa diyeniyi, wuvumbi,* wuzondu, yilwilu yawukapwa nsonyi,* 20 kupesha, kupanda, kuhelañana, yikonkojola, ichima, kuzuwa, kubula kutiyañana, chaambu, kulondela ntañishilu jawantu, 21 lwisu, kusheta, yidika yamapumba,* niyuma yafwana iyi. Inakuyisoñamishila chadimu kutalisha hayumiyi neyi chinayisoñamishili dehi nami, antu akoñaña yuma yamuchidiwu, hiyamba kaswana Wanta waNzambiku.

22 Ilaña nyikabu yaspiritu hikukeña, muzañalu, kuwunda, kudiwunjika, luwi, kuwaha, chikuhwelelu, 23 kwovwaha, kudihemba. Kwosi lushimbi lwalekeshaña yumiyiku. 24 Kubombelahu, antu jaKristu Yesu apopela mujimba hamutondu hamu nayuma yakeñaña mujimba nikufwila kwawu.

25 Neyi tunakuhanda kwesekeja namwaya wunlomboli waspiritu, dichi twendeña chiwahi kwesekeja namwaya wunlomboli waspiritu. 26 Bayi twikalaña akwakudivwimba kwamukunkulwayi, kusañumuna kudibecha wumu namukwawu nikuditiyila lwisu wumu namukwawuku.

6 Enu anakwami, hela chakwila muntu nafuukuli kukoña chuma chatama henohu yomweni kanda yeluki, enu mwapama kuspiritu fwilenu kumwolola muntu wamuchidowu naspiritu yakwovwaha. Ilaña, babalenuña kuchiina ninenu akenda kayeseka. 2 Dikwashenuña wumu namukwawu kudisendelaku yuma yinakuyilemena, nawa neyi mwila mwenimu, mukushikija lushimbi lwaKristu. 3 Muloña neyi muntu nakutoñojoka nindi walema henohu wamukunkulwayi, nakudidimba yomweni. 4 Ilaña muntu-himuntu, yashinshiki chekala yilwilu yindi yomweni, kuhiñahu dinu yazañaleli muyuma yindi yomweni, bayi kudesekeja namukwawuku. 5 Muloña muntu-himuntu wakadisendela chiteli chindi yomweni.*

6 Kubombelahu, muntu wejima anakulejawu mazu,* yamwinkihu yuma yayiwahi owu wamulejaña oyu ntañishilu.*

7 Bayi ayiluwañeshaku: Nzambi hiyamusupishañaku. Muloña chuma chinakukuwayi muntu, dichakamunayi; 8 muloña muntu wunakukuwa kumujimba, wakamuna kutoka kumujimba windi, ilaña muntu wunakukuwa kuspiritu, wakamuna wumi wahaya nyaaka kuspiritu. 9 Dichi, bayi tuleka kwila yuma yayiwahiku, muloña mumpinji yatelela tukamuna neyi tubula kuzeya.* 10 Neyi twikala nampinji yakwila mwenimu,* dichi tukoñeña yuma yayiwahi kudi antu ejima, sweje-e dinu kudi akwetu akwakwitiya.

11 Talenu iwu mukanda winnayisonekeli nachikasa chami wudi nansona jamaneni.

12 Antu ejima akeñaña kudimwekesha nawu ekala chachiwahi muyuma yakumujimba,* diwu afwilaña kuyikanjikija enu nawu mwalami, akoñaña mwenimu kuchiina kuyikabisha muloña wamutondu wakuyandishila* waKristu. 13 Muloña hela tuhu antu anakwalama, hiyahembaña Nshimbiku, ilaña anakukeña nawu enu mwalami kulonda adisambileña hanyijimba yenu. 14 Ilaña ami, hinakeñaña kudisambaku, chiña kudisambila hamutondu wakuyandishila* waMwanta wetu Yesu Kristu, nawa kuhitila mudi yena, kaayi anakijahi* muloña wanami nawa ninami ananjahi muloña wakaayi. 15 Muloña kwalama hichumaku, nawa kubula kwalama nikwena hichumaku, ilaña kuleñewa chachiha kwaleñeliyi Nzambi dikwalema. 16 Hakwila antu ejima endaña mukuloña kwesekeja namwaya ilu lushimbi lwayilwilu, kuwunda niluwi jiikali hadi wena, eñañi, hadi Isarela waNzambi.

17 Kufuma dalelu, bayi kwikala muntu wukunkabishañaku, muloña ami nidi nayibata hamujimba wami yinakumwekesha nawu nidi nduñu yaYesu.

18 Enu anakwami, luwi lwasweja lwaMwanta Yesu Kristu lwiikali nanenu muloña waspiritu yimwamwekeshaña. Ameni.