MUKANDA KUDI AEFWESESA

1 Ami Pawulu, kapostolu kaKristu Yesu atondeliwu kwesekeja nankeñelu yaNzambi, kudi enu akwakujila adi muEfwesesa nawa ashinshika adikunda naKristu Yesu:

2 Luwi lwasweja nikuwunda jafumaña kudi Tata yetu Nzambi nikudi Mwanta Yesu Kristu jiikali nanenu.

3 Kulema kwiikali kudi Nzambi, Tata yaMwanta wetu Yesu Kristu, muloña natukiswili nkisu jakuspiritu jejima mumaluña amwiwulu muloña wakudikunda naKristu, 4 neyi chatutondeliyi kulonda tudikundeña nindi* henohu kanda aali chikuku chakaayi,* kulonda twiikali ajila nawa akadi ihuji kumesu indi mukukeña. 5 Muloña yena watutondeleli chadimu nakutwiteja kwikala anyanindi kuhitila mudi Yesu Kristu, kwesekeja nanomu mwatiyililiyi kuwaha ninanomu mwaya nkeñelu yindi, 6 kulonda amuhameki muloña wakulema kwaluwi lwindi lwasweja lwatutiyililiyi chawaana kuhitila mudi mwanindi akeñayi. 7 Kuhitila mudi yena, atukuula nefutu danyiloña damashi indi, dikwila nawu kutwanakena nshidi jetu kwesekeja nakuvula kwaluwi lwindi lwasweja.

8 Watuvulishilili ilu luwi lwasweja nikutwinka maana ejima nikwiluka kwejima,* 9 kuhitila mukutuleja yuma yajila yakujinda yankeñelu yindi. Kwesekeja nanomu mwatiyililiyi kuwaha, wafuukwilili chadimu 10 njila yakuyuulilamu yuma* yikashika hampinji yatoñolawu, yakupompesha yuma yejima mudi Kristu, yuma yamwiwulu niyuma yahamaseki. Dikwila nawu mudi yena 11 owu itwadikunda nindi nawa mwatutondelawu kwikala answana, nanochu chatutondeleliwu chadimu kwesekeja nakufuukula kwanowu wazataña yuma yejima kwesekeja namwaya nkeñelu yindi, 12 kulonda Nzambi amuhameki nikumulemesha kuhitila mudi etu twasambilili kukuhwelela mudi Kristu. 13 Ilaña ninenu mwamukuhweleleli chelili mutiyi mazu achalala, nsañu yayiwahi yawamwinu wenu. Chimwakuhweleleli, ayilamikili kuhitila mudi yena naspiritu yajila yakaniniwu, 14 oyu yekala chinjikijilu chawuswana wetu wakumbidi, kulonda Nzambi yakakuuli antu jindi* kuhitila mwifutu danyiloña kulonda akamuhameki nikumulemesha.

15 Diwu muloña waweni ninami nawa, chineli natiyi chikuhwelelu chenu chimukweti mudi Mwanta Yesu nikukeña kumwamwekeshelaña akwakujila ejima, 16 hinalekaña kuyisakililakuku. Nayitenaña mukulomba kwami mpinji yejima 17 nami, Nzambi yaMwanta wetu Yesu Kristu, Tata yakulema, yayinki spiritu yamaana niyakwiluka chikupu yuma yamwekeshañayi. 18 Natoneshi mesu amuchima wenu, kulonda mwiluki kuchiñeja kwayitambikililiyi nikulema kwasweja kwahembayi oku kwekala wuswana wawakwakujila, 19 nichabadika kutoha ñovu jindi jatumwekeshelañayi etu akwakwitiya. Iku kutoha kwaniyi ñovu kwamwekeneni mumudimu wañovu jindi jabadika, 20 owu wazatiliyi hampinji yamusañwiliyi Kristu kufuma mudi afu nikumushakamisha kuchikasa chindi chachidiilu mumaluña amwiwulu, 21 abadika chikupu jinfulumendi jejima, wuswa wejima, ñovu jejima, mawanta antuumba ejima nimajina ejima atenañawu, bayi neyi munshakaminu yamakonu* hohuku, ilaña nimunoyu yinakwinza. 22 Cheñi wovwahishili yuma yejima mwishina danyendu yaKristu nawa wamwilishili kwikala mutu wayuma yejima yakundama kuchipompelu, 23 ochu chekala mujimba windi, chenzala nayena wenzeshaña yuma yejima mwejima.

2 Kubombelahu, Nzambi wayilishili enu kwikala amomi hela chakwila mwadiña afu kuyuma yatama yimwakoñeleña nimunshidi, 2 mumwendeleña mpinji yimu neyi mwomwaya nshakaminu yamakonu yamukanu kaayi, kwesekeja nachakeñaña nyuuli wawuswa wampepela, dikwila nawu spiritu yinakuzatika mudi antu adikañaña. 3 Hampinji yimu, wejima wetu twashakamineña mukachi kawu nakwila yuma kwesekeja namwaya kufwila kwamujimba wetu, twelileña mwaya kufwila kwamujimba wetu niyitoñojoka yetu, nawa kufuma tuhu hakuvwalika twadiña anyana atelela kuzuwa kwaNzambi neyi chekala antu amakwawu. 4 Ilaña Nzambi, chineli wasweja luwi nankashi, muloña wakukeña kwindi kwabadika kwatukeñeliyi, 5 watwilishili kwikala amomi hamu naKristu, nihampinji yitwadiña afu kuyuma yatama yitwakoñeleña, ilaña enu nayamwini muloña waluwi lwindi lwasweja. 6 Cheñi nawa, watusañwili hamu nikutushakamisha hamu naKristu Yesu mumaluña amwiwulu, 7 kulonda munshakaminu yinakwinza* yakamwekeshi kuvula kwaluwi lwindi lwasweja kuhitila muwushona windi watumwekeshelañayi etu twadikunda naKristu Yesu.

8 Muloña wanilu luwi lwasweja, anayipulwishi enu kuhitila muchikuhwelelu, bayi neyi enu anayamwini muloña wakukeña kwenuku; ilaña, hichawaana chaNzambi hohu. 9 Dichi chumichi hichazatikili muloña wanyidimu yenuku, kulonda kubuli kwikala muntu wukudisamba. 10 Etu tudi mudimu wamakasa aNzambi,* nawa muloña wakwila tudi atumbanji twaKristu Yesu, atuleñeli kulonda tukalakaleña nyidimu yayiwahi, yatufuukwililiyi Nzambi chadimu kulonda twendeñamu.

11 Dichi, anukenuña nenu hampinji yimu, enu antu akunyuza avwalika kumujimba, ayiteneneña nawu antu “abula kwalama” kudi antu atenañawu nawu “aalama,” owu aalamishawu kumujimba namakasa awantu. 12 Hayina mpinji himwamwilukili Kristuku, mwadiña ambuka namuza waIsarela, himwadiña muchitiyañenu chachikaninuku; himwadiña nakuchiñejaku, nawa himwamwilukili Nzambi mukaayiku. 13 Ilaña ichi, muloña wakudikunda naKristu Yesu, enu mwadiña kwakulehi naNzambi anayiswiji dehi kwakwihi nayena kuhitila mumashi aKristu. 14 Muloña yena natuleteli kuwunda, nabombi mazanvu ayedi kwikala dimu nawa nahumuni mbañu yadiña hakachi kawu. 15 Kuhitila mukulambula mujimba windi, wafumishilihu nkunyi, Nshimbi mwadiña mazu niyijila yakulondela, kulonda yabombi mazanvu ayedi adikunda nayena kwikala muntu wumu wamuha nikuleta kuwunda, 16 nikukundamisha chikupu mazanvu ayedi awantu kudi Nzambi mumujimba wumu namutondu wakuyandishila,* muloña kuhitila mukufwa kwindi, wafumishilihu nkunyi. 17 Nawa wenjili kudi enu mwadiña kwakulehi naNzambi nikudi owu adiña kwakwihi nayena nakuyishimwina nsañu yayiwahi yakuwunda, 18 muloña kuhitila mudi yena, etu mazanvu ayedi awantu, tudi akasunuka kumusolomoka Tata kuhitila mudi spiritu yimu.

19 Dichi himuchidi cheñi antu acheñi hela añiinzaku, ilaña mudi enimbu hamu nawakwakujila nawa mudi antu amuchisaka chaNzambi, 20 nawa enu anayituñi hachikuku chawapostolu niatuprofwetu, hakwila Kristu Yesu diyi ilola damwiwombu dachikuku. 21 Kuhitila mukudikunda nayena, itala dejima danuñañawu chiwahi hamu, dakulaña nakwikala tembeli yajila yaYehova. 22 Muloña wakudikunda nayena, ninenu anakuyituñila hamu kulonda mwiikali iluña mwakushakama Nzambi kuhitila muspiritu.

3 Muloña wachumichi, ami Pawulu muntu akasawu mukaleya* kukoola Kristu Yesu muloña wanenu antu akunyuza, 2 neyi chalala, munatiyi nsañu yawuñamba wanyinkeliyi Nzambi muloña waluwi lwindi lwasweja lwantiyililiyi kukoola enu, 3 yakwila nawu yuma yajila yakujinda ayimmwekesheleli ami, neyi chinayisonekeleli enu mumazu antesha kunyima. 4 Dichi neyi mutaña iyi nsañu, mukwiluka ochu chinatiyisha chikupu yuma yajila yakujinda yaKristu. 5 Mumakiñu amakwawu, iyi nsañu yakujinda ayisolweleli wanyi anyana kawantu neyi chinayisolweliwu apostolu niatuprofwetu indi ajila kuhitila muspiritu. 6 Nsañu yakujinda yidi yakwila nawu kuhitila mukudikunda naKristu Yesu nimunsañu yayiwahi, antu akunyuza ekali answana hamu nanetu, akwetu mutwekalila yiidi yimu yamujimba nawa mutwakatambwila chikaninu hamu. 7 Nekalili mukwakukalakala waniyi nsañu yakujinda kwesekeja nachawaana chaluwi lwaNzambi lwasweja lwanyinkeliyi kuhitila muñovu jindi.

8 Ami wabadika kukeha chikupu mukachi kawakwakujila ejima asweja kukeha, antiyilili luwi lwasweja kulonda nishimwini nsañu yayiwahi kudi akwanyuza yahosha hayuma yayiwahi yaKristu yakadi kutwesha kutiyishisha yejima 9 nawa yatela kuleñela muntu wejima kumona chiyuulu chayuma yajila yakujinda, yinajindiwu hadi yaaka yayivulu kudi Nzambi waleñeli yuma yejima. 10 Chumichi chadiña mwenimu kulonda akwanfulumendi niakwawuswa ekala mumaluña amwiwulu eluki maana aNzambi amwekenaña munjila jamboka-mboka, kuhitila muchipompelu. 11 Chumichi chinesekani nankeñelu yindi yahaya nyaaka yafuukwiliyi kutalisha hadi Kristu, Yesu Mwanta wetu, 12 kuhitila mudi yena, tudi akasunuka hakuhosha nihakumusolomoka Nzambi, muloña wakukuhwelela mudi yena. 13 Dichi, nayilembeleli nami bayi muzeya muloña wamakabi inamonaña kukoola enuku, muloña yumiyi diyinateli kuyiletela enu kulema.

14 Muloña wachumichi, nafukami nakulomba kudi Tata, 15 kwatambwila ijina chisaka chejima chamwiwulu nichahamaseki. 16 Nalombi nami yakoleshi wuntu wenu wamukachi kuhitila mukuyinka ñovu naspiritu yindi, muloña kulema kwindi kwabadika chikupu, 17 nawa kuhitila muchikuhwelelu chenu, Kristu yekali munyichima yenu nakukeña. Mukoli neyi chashimata nyiji yamutondu nikutuñewa hachikuku chakola, 18 kulonda enu hamu nawakwakujila mutweshi kutiyisha chikupu mwatalisha wihi, kuleha, chiminu nikukunama kwachalala, 19 nikwiluka kukeña kwaKristu, oku kwabadika kwiluka kulonda mwiikali chikupu nayilwilu yaNzambi yahanañayi.

20 Kwesekeja nañovu jindi jinakuzatika mudi etu, yena nateli kukoña yuma yabadika chikupu yuma yitwamulombaña hela yitwatoñojokaña, 21 dichi, kudi yena kwiikali kulema kuhitila muchipompelu nimudi Kristu Yesu kushika nikumakiñu ejima haya nyaaka nanyaaka. Ameni.

4 Dichi, ami muntu akasawu mukaleya* kukoola Mwanta, nayilembeleli nami mwendeña kwesekeja namutambi wayitambikiliwu, 2 nakudizoza kwejima, nakwovwaha, nakudiwunjika nikuditiyilila wumu namukwawu mukukeña, 3 ikalenu mukuwunda wumu namukwawu nawa fwilenuña chikupu kuhemba kunuñañana kwenu kumwekalaña naku kuhitila mudi spiritu yajila. 4 Kwekala mujimba wumu nispiritu yimu, neyi chayitambikiliwu enu kukuchiñeja kumu kwamutambi wenu wayitambikiliwu; 5 kudi Mwanta wumu, chikuhwelelu chimu, chipapatishu chimu; 6 niNzambi wumu Tata yawantu ejima, wabadika yuma yejima nawa wazatishaña yuma yejima kulonda yakalakali yuma.

7 Dichi, wejima wetu hamuntu-hamuntu atutiyilili luwi lwasweja, nawa chumichi chadiña mwenimu kwesekeja nachawaana chapiminiyi Kristu. 8 Muloña chahoshewa nawu: “Chakandukiliyi nakuya hewulu nankashi, wasendeli ankoli; wahanini amayala kwikala yawaana.” 9 Indi mazu akwila nawu “chakandukiliyi nakuya mwiwulu,” komana hiyatalisha mukwila nawu wasambilili kukunkumuka nakwinza mumaluña amwishina, dikwila nawu hamasekiku, tahindi? 10 Owu wakunkumukili diyi cheñi wakandukili chikupu nakupandakana mawulu ejima, kulonda yashikiji yuma yejima.

11 Nawa amu wayihanini kwikala apostolu, amakwawu atuprofwetu, amakwawu akwakushimwina nsañu yayiwahi, amakwawu atubiña, amakwawu nawa antañishi, 12 nankeñelu yakwolola* akwakujila kulonda akalakeleña akwawu nikutuña mujimba waKristu, 13 sampu wejima wetu tunadinuñi hamu muchikuhwelelu nimukwiluka kwalala kwakwiluka Mwana kaNzambi, nikwikala muntu wapama chikupu, nakwikala wapama neyi chapamayi Kristu. 14 Dichi, bayi twikala cheñi anyana anyanyaku, muloña muntu walondelaña ntañishilu yakutwamba yawantu adimbaña akwawu, wakekala neyi watu walelujolañawu kudi mpepela nimankanda. 15 Ilaña muloña wakukeña, hampinji yitunakuhosha chalala, tupameña muyuma yejima mudi Kristu wekala mutu. 16 Kudi yena, dikwanuñilawu chiwahi yiidi yamujimba wejima nawa chiidi-hichiidi chakwashaña chiidi chikwawu kwakamena mujimba. Neyi chiidi-hichiidi chikalakala mudimu wachu chiwahi, chumichi chaleñelaña mujimba kukula chachiwahi kulonda mujimba wejima wiikali wakola mukukeña.

17 Dichi, inakuyileja enu chumichi nikuyilembelela mwijina daMwanta nami, bayi mwendeña cheñi neyi chendañawu akwanyuza muyitoñojoka yawu yamukunkulwayiku. 18 Wena adi mumwidima muyitoñojoka nawa anadaambuli kuwumi waNzambi, muloña hiyakeñaña kumwilukaku, muloña wakuchinchika* kwanyichima yawu. 19 Chalekeliwu kutiya nsonyi, adihanini awenawu kuyilwilu yawukapwa nsonyi* nikwila yuma yawuzondu yejima nalwisu.

20 Ilaña enu mwadizili nikwiluka nenu Kristu dichekalayi wanyi, 21 neyi chalala mwamutiyili nawa ayidizishili kuhitila mudi yena, neyi chochidi chalala mudi Yesu. 22 Ayilejeli kuvuula wuntu wawukulu wesekana nayilwilu yenu yimwadiña nayu kunyima, wunakudimbewa nakufwila kwatama kwayiluwañeshaña. 23 Nawa mwatela kutwalekahu kubalumuka nakwikala amaha muyitoñojoka nimuyilwilu yenu,* 24 nikuvwala wuntu wawuha waleñeliwu kwesekeja nankeñelu yaNzambi mukuloña kwalala nimukashinshi.

25 Dichi, chineli munaleki dehi kudimbana, muntu-himuntu yahosheña chalala namukwawu, muloña tudi yiidi yamujimba wumu. 26 Zuwenu, ilaña bayi muvulumunaku; bayi muhumisha itena* iku saña mwahililaku; 27 bayi mumushila Diyabolu hakwiñililaku.* 28 Muntu weyaña yaleki kwiya, ilaña yazati nañovu, yakalakali mudimu wawuwahi namakasa indi kulonda yekali nayuma yakwinkahu muntu wunakaankili. 29 Mukanwa kenu bayi mwidika mazu atokaku, chiña amawahi hohu, anateli kutuña akwenu hampinji yinakukeñawu kuyikwasha kulonda atweshi kuhetesha antiyilili. 30 Cheñi, bayi muneñeshaña spiritu yajila yaNzambiku, muloña diyi yinayilamikiwu nachu kushika nikwifuku dakayikuulawu nefutu danyiloña.

31 Lekenu nkunyi yejima, kuhila, kuzuwa, kuzazoka, nhoshelu yakasawuntu niyuma yejima yatama. 32 Ilaña, ditiyilenuña luwi wumu namukwawu, wushona nikudanakena wumu namukwawu neyi chayanakeneniyi Nzambi kuhitila mudi Kristu.

5 Dichi, ikalenu akwakwimbujola Nzambi neyi anyana akeñayi, 2 nawa endenuña mukukeña neyi chatukeñeliyi* Kristu nikudihana yomweni kukoola etu* nakwikala mulambu wevumba dadiwahi kudi Nzambi.

3 Wuvumbi,* niyuma yawuzondu yejima nilwisu bayi mujitenaña mukachi kenuku, muloña yumiyi hiyatelela akwakujilaku; 4 hela yilwilu yansonyi, hela nhoshelu yawusupi, hela kusenseka kwawuzondu, iyi hiyuma yabula kutelela, chiña kumusakililaña Nzambi. 5 Muloña enu aweni mweluka chikupu chumichi nenu, kwosi chivumbi,* hela muntu wakoñaña yuma yamajilu, hela mukwalwisu, dikwila nawu mukwakupesha, wakaswana Wanta waKristu niwaNzambiku.

6 Bayi kwikala muntu wukuyidimba namazu amukunkulwayiku, muloña, hamuloña wayumiyi, kuzuwa kwaNzambi kunakwinza hadi antu adikañaña. 7 Dichi, bayi mudikunda nawuku; 8 muloña kunyima mwadiña mwidima, ilaña ichi mudi chejeji muloña mudi antu jaMwanta. Endenuña neyi anyana kachejeji, 9 muloña chejeji* chamwekeshaña kuwaha kwejima, nikuloña nichalala. 10 Twalekenuhu kwiluka yuma yetejañayi Mwanta; 11 lekenu kukoña nyidimu yamukunkulwayi yamumwidima; ilaña, yisololenuña chiyekala hatooka. 12 Muloña yuma yajindañawu hakuyikoña, hakuyitena yekala yansonyi. 13 Yuma yejima yinakusololawu,* anakuyisolola kudi chejeji, muloña yuma yejima yinakusololawu hatooka, yinekali chejeji. 14 Dichi, Nzambi wahosha nindi: “Eyi mukwakukaama tulu, tonaku, sañukaku kufuma mudi afu nawa Kristu wukukutoñekela.”

15 Dichi, ilukenu chimwendaña, bayi mwendeña neyi antu abula maanaku, ilaña neyi akwamaana, 16 zatishenuña chiwahi mpinji yenu,* muloña anu mafuku anatami. 17 Muloña wachumichi, lekenu kwikala abula maana, ilaña ilukenuña chidi nkeñelu yaYehova. 18 Cheñi nawa, bayi musheteña vinyuku, muloña yakojejaña kwikala nachihandilu chakadi kudiyuula, ilaña inzalenuña naspiritu. 19 Hampinji yimunakuhanjeka wumu namukwawu,* zatishenuña mazu amasamu, muhamekenuña Nzambi nikwimba tumina twakuspiritu. Mwimbilenu Yehova tumina twakumuhameka twakufuma heshina danyichima yenu, 20 mpinji yejima musakililenuña Nzambi yetu nawa Tata wayuma yejima kuhitila mwijina daMwanta wetu Yesu Kristu.

21 Dovwahilenuña wumu namukwawu muloña wakumutiya Kristu woma. 22 Ambanda ovwahileña anfumu jawu neyi kudi Mwanta, 23 muloña iyala diyi mutu wañodindi neyi chochekalayi Kristu mutu wachipompelu, chineli yena diyi chamwinu chaniwu mujimba. 24 Kafwampi, neyi chipompelu chichovwahilaña Kristu, ambanda niwena dichiyatela kwovwahilawu anfumu jawu muyuma yejima. 25 Enu amayala, keñenuña añodi jenu neyi chakeñeliyi Kristu chipompelu nikudihana yomweni nakuchikoola, 26 kulonda yachijiliki nikuchitookesha kuhitila mukuchikosa namenji amazu aNzambi. 27 Welili mwenimu kulonda yelishi chipompelu kwikala chalema kumesu indi, chakadi ihuji, hela nyiku* hela yuma yidi chochichi, ilaña chiikali chajila nawa chakadi hakuchinkela muloña.

28 Munjila yoyimu, amayala atela kukeña añodi jawu neyi chakeñawu nyijimba yawu aweni. Iyala wakeña ñodindi, wadikeña yomweni, 29 muloña kwosi muntu wahelahu dehi mujimba windiku, ilaña wawudiishaña nikuwuhemba chiwahi, neyi chahembañayi Kristu chipompelu, 30 muloña tudi yiidi yamujimba windi. 31 “Hamuloña wachumichi, iyala wakashiya tata yindi nimama yindi nakukakela ñodindi,* nawa wejima wawu ayedi akekala mujimba wumu.” 32 Iyi yuma yajila yakujinda yalema nankashi. Ichi dinu, inakuhosha hadi Kristu nichipompelu. 33 Hela chochu, ninenu muntu-himuntu watela kukeña ñodindi neyi chadikeñayi yomweni; mumbanda niyena nawa watela kwikala nakalemesha chikupu kudi nfumwindi.

6 Enu anyana, ovwahilenuña anvwali jenu kwesekeja nachakeñañayi Mwanta, muloña chumichi dichaloña. 2 “Lemeshaku tata yeyi nimama yeyi,” ilu dilu lushimbi lwatachi ludi nachikaninu chakwila nawu: 3 “Kulonda yuma yikuwahileña* nawa wushakami yaaka yayivulu hamaseki.” 4 Ninenu atata jawantu, bayi muhilishaña anyanenuku, ilaña yikulishenuña* kuhitila mukuyifumba nikuyikonkomwena* kwesekeja nachakeñañayi Yehova.

5 Enu anduñu, ovwahilenuña ankaaka jenu* ayiñija nyidimu, nakuyilemesha nikuyitiya woma nanyichima yayiwahi, neyi kudi Kristu, 6 bayi kuzata hohu mwenimu hampinji yinakuyimonawu kulonda mutiyishi antu kuwahaku,* ilaña muzateña neyi anduñu jaKristu anakwila mwaya nkeñelu yaNzambi nawumi* wejima. 7 Zatenuña namuchima wawuwahi, neyi munakumuzatila Yehova bayi antuku, 8 muloña mweluka nenu chuma chejima chachiwahi chazatañayi muntu-himuntu, akamufuntishilachu kudi Yehova, hela chakwila hinduñu hela himuntu wasubuka. 9 Ninenu ankaaka jawu nawa, ilenuña mwomumu kudi wena, bayi muyitiyisheña womaku, muloña mweluka nenu Nkaaka yawu owu wekala Nkaaka yenu nawa, wudi mwiwulu, yena kwindi wekala nachaambu wanyi.

10 Nkumininaku, tambulenu ñovu kufuma kudi Mwanta kuhitila muñovu jindi jabadika. 11 Dimanyekenu yitwa yanjita yejima yafuma kudi Nzambi kulonda mutweshi kwimana akola mbe-e kutufuta twaDiyabolu; 12 muloña tunakulwisha,* bayi nawantu akweti nyisunyi nimashiku, ilaña tunakulwisha najinfulumendi, nawakwawuswa, nawanyuuli akaayi kaniwu mwidima, namazaza awandemoni adi mumaluña amwiwulu. 13 Dichi muloña wachumichi, dimanyekenu yitwa yanjita yejima yafuma kudi Nzambi, kulonda mutweshi kwimika mushindu mwifuku datama, nawa neyi munamanishi dehi yuma yejimiyi, mwimani akola mbe-e.

14 Dichi, imanenu akola mbe-e, iku munakasi mushipi wachalala mumbunda yenu nawa vwalenu chuma chakujika hantulu chakuloña, 15 nikuvwala nkwabilu kunyendu yenu yinakumwekesha nawu munadiloñeshi kushimwina nsañu yayiwahi yakuwunda. 16 Kubombela hayuma yejimiyi, nonenu nkebu yeneni yachikuhwelelu, yimukutwesha kujima nachu nyivu yakesi yanowu watama. 17 Cheñi, vwalenu kumutu wenu itepa dawamwinu, nawa sendenu mpoku yakabali yaspiritu muchikasa chenu, dikwila nawu mazu aNzambi, 18 iku munakulomba mpinji yejima kulomba kwamboka-mboka nikulomba kwejima kwakulembelela kuhitila muspiritu. Nawa tonenuña mpinji yejima, iku munakulomba nakuyilembelelaku akwakujila. 19 Nlombelenuñaku ninami kulonda neyi naasami mukanwa kami, nitweshi kushimuna yuma yajila yakujinda yansañu yayiwahi chakadi woma, 20 oyu yanleñela ami kwikala ñimeni akasawu mumaleñi,* kulonda nishimuni iyi nsañu nakuhamuka, neyi chochinatela kuhosha.

21 Dichi, hakwila nawu mwiluki nawa hadi ami ninochu chinnakuzata, manakwetu Tikikusa itwakeña nawa mukwakukalakala waMwanta washinshika, diyi wukayileja yuma yejima. 22 Inakumutemesha kudi enu muloña waniyi nsañu, kulonda mwiluki chitunakuhanda nawa yakundeji nyichima yenu.

23 Kudi anakwetu kwiikali kuwunda nikukeña hamu nachikuhwelelu jafuma kudi Nzambi Tata nikudi Mwanta Yesu Kristu. 24 Dichi, luwi lwasweja lwiikali nawantu ejima amukeña Mwanta wetu Yesu Kristu kukeña kwabulaña kumana.