MUKANDA KUDI AFWILIPI

1 Ami Pawulu niTimotewu, anduñu jaKristu Yesu, tunayisonekeli enu akwakujila ejima mwadikunda naKristu Yesu, enu mudi muFwilipi hamu nawatulama niankoñi akuzatila:

2 Luwi lwasweja nikuwunda jafumaña kudi Tata yetu Nzambi nikudi Mwanta Yesu Kristu jiikali nanenu.

3 Neyi niyanuka, namusakililaña Nzambi yami mpinji yejima 4 mukulomba kwakulembelela kwejima kunayilombelañaku wejima wenu. Mpinji yonsu, nayilombelañaku nakulembelela namuzañalu, 5 muloña wamudimu wumunazati wakutwala nsañu yayiwahi hambidi kufuma hefuku datachi kushika nihayinu mpinji. 6 Muloña nakuhweleli chumichi nami, owu watachikili mudimu wawuwahi mudi enu wakatwalekahu kuwuzata nakuwumanisha sampu nikwifuku daKristu Yesu. 7 Chinanteleli ami kutoñojoka muniyi njila kutalisha hadi enu ejima, chineli nayanukaña mumuchima wami, enu mwatutiyilañawu hamu luwi lwasweja hampinji yinekalaña mumaleñi* nihakuhakwilaku nikukolesha nsañu yayiwahi kwesekeja nanshimbi.

8 Muloña Nzambi diyi chinsahu chami wuneluki chinnakufwila kwikala hamu nanenu ejima muloña nayikeña neyi chayikeñayi Kristu Yesu. 9 Nawa chumichi dichinalombaña mpinji yonsu, nami kukeña kwenu kusweji nankashi nakwiluka kwalala nikashinshi kakeni; 10 kulonda mwiluki yuma yalema nankashi, kulonda mubuli hakuyinkela muloña nikubula kuhukesha akwenu kushika tuhu nikwifuku daKristu; 11 nawa kulonda mwinzali nanyikabu yaloña, yimunateli kusoña kuhitila mudi Yesu Kristu, kulonda amulemeshi Nzambi nikumuhameka.

12 Dichi enu anakwami, inakukeña mwiluki nenu, yuma yinakummwekena yinaleteshi nsañu yayiwahi kuyilaku hambidi, 13 chakwila kukasewa kwami mumaleñi* kukoola Kristu anakwiluki kudi Akwakuhemba Mwanta ejima niantu ejima. 14 Ichi anakwetu amavulu adikunda naMwanta anakoli muloña wakukasewa kwami mumaleñi* nawa anakumwekesha kuhamuka chikupu hakuhosha izu daNzambi chakadi woma.

15 Chalala, antu amakwawu anakushimwina nsañu yaKristu muloña wechima niyikonkojola, ilaña amakwawu namuchima wawuwahi. 16 Awa antu akweti muchima wawuwahi anakushimwina nsañu yaKristu muloña amukeña, muloña eluka nawu anantondi kulonda nihakwileñaku nsañu yayiwahi; 17 ilaña awa antu akweti ichima niyikonkojola ashimwinaña muloña wantaadi, bayi namuchima wawuwahiku, muloña anakufwila kunletela kukala mumaleñi* mwankasawu. 18 Yumanyi yafumañamu? Mwejima mwashimwinañawu antu, hela mwakutwamba hela mwalala, Kristu anakumushimwina nawa chumichi chanzañaleshaña. Ninami nukuzañalalaña, 19 muloña neluki nami chumichi chikañaamwina kuhitila mukulomba nakulembelela kwenu niwukwashu waspiritu yaYesu Kristu. 20 Chumichi chinesekani nayuma yinatalilaña nankashi niyinachiñejaña nami nakabuli kutiya nsonyi hela chanti, ilaña muloña wakwikala wakasunuka hakuhosha, ichi dinu Kristu, neyi chichekalaña mpinji yejima, akumutuumbakeshaña muloña wamujimba wami, hela inakuhanda hela nafwi.

21 Ilaña ami neyi inakuhanda, nahandaña muloña waKristu nawa neyi nafwi, kudi ami hiwufwetu. 22 Dichi neyi nitwalekahu nakuhanda,* chumichi hinyikabu yamudimu wami; ilaña chuma chinukutonda, hinukuchishimuna kudi antuku. 23 Ami nakasiki naniyi yuma yiyedi, muloña inakufwila chikupu kunkasununa kulonda nidikundeña naKristu, muloña chumichi chinabadiki kuwaha nankashi. 24 Hela chochu, chinanteleli ami kutwalekahu nakuhanda muloña wanenu. 25 Dichi, muloña wakukuhwelela chumichi, neluki nami nukutwalekahu nakuhanda nikwikala hamu nanenu ejima kulonda mupamineñaku nikwikala namuzañalu muloña wachikuhwelelu chenu, 26 kulonda kudisamba kwenu kusweji chikupu mudi Kristu Yesu muloña wanami hampinji yinakekala cheñi nanenu.

27 Ikalenuña nayilwilu yatelela* nsañu yayiwahi yaKristu kulonda hela neyi nakenza hela hinakenza nakuyitalaku, nakatiyi nikwiluka hadi enu nawu munemani akola mbe-e kuspiritu, nawumi* wumu, iku wejima wenu munakudikitila hamu kulonda mwiikali nachikuhwelelu chansañu yayiwahi, 28 nikubula kuyitiyisha woma kudi ayilumbu jenu. Kudi wena, chuma chenichi hichinjikijilu chakuyijilumuna, ilaña kudi enu hiwamwinu; nawa chumichi chafuma kudi Nzambi. 29 Muloña enu anayinki iku kukooleka kulonda mwimeneñaku Kristu, bayi neyi kumukuhwelela hohuku, ilaña nikukabakana kukoola yena. 30 Muloña enu munakulwisha nakukala neyi kumwamweni ami nakuhitamu, oku kumunakutiya nawu nihanu nichidi kuhitamu.

2 Neyi munakudikolesha mudi Kristu, neyi munakudikundeja mukukeña, neyi munakudikunda kuspiritu,* neyi munakudikeña nikuditiyila wushona, 2 dichi nzañaleshenuña chikupu kuhitila mukwikala nayitoñojoka yoyimu, nikukeña kwokumu, nikunuñañana chikupu,* nikutoñojoka mwomumu. 3 Bayi mukoña chuma hela chimu nantaadi hela nakudivwimba kwamukunkulwayiku, ilaña dizozenuña* nakumona akwenu nenu ayibadika enu, 4 iku munakufwila yuma bayi yayitiyishaña kuwaha enu aweni hohuku, chiña yuma yatiyishaña kuwaha niakwenu.

5 Ikalenuña nayitoñojoka niyilwilu neyi yadiña naKristu Yesu, 6 hela chakwila wadiña muchifwanisha chaNzambi, hadiña nayitoñojoka yakwila nindi kwesekana naNzambi dichuma chakeñeleñayi nankashiku. 7 Inehi, helili mwenimuku, ilaña yena washiyili yuma yejima yadiñayi nayu nakudibalumuna neyi nduñu, nawa wekalili muntu.* 8 Chabadika hachumichi dichenichi nawu, chenjiliyi neyi muntu,* wadizozeli nawa wovwahilili kushika nikukufwa, kwafwiliyi hamutondu wakuyandishila.* 9 Muloña wachumichi, Nzambi wamutuumbakesheli nakumwinka chifulu chahewulu niijina dabadika majina ejima, 10 kulonda kuhitila mwijina daYesu manuñu ejima akafukami, manuñu anowu adi mwiwulu, nianowu adi hamaseki, nianowu adi kwishina deseki, 11 nimadimi ejima aketeji hatooka nawu Yesu Kristu diyi Mwanta kulonda kulema kwakekali kudi Nzambi Tata.

12 Dichi enu akwetu inakeña, neyi chimwovwahilaña mpinji yonsu, bayi neyi hampinji yinidi nanenu hohuku, ilaña sweje-e dinu nihampinji yinabulaña kwikala nanenu, ikalenuña nawoma nikuzaala hampinji yimunakufwila kutambwila wamwinu. 13 Muloña Nzambi diyi wayikoleshaña enu kuhitila mukuyinka muchima wakufwila kukoña yuma niñovu yakwilamu, kwesekeja nanochu chatiyañayi kuwaha. 14 Ilenuña yuma yejima chakadi kutooba nikutaadeka, 15 kulonda mwiikali akadi hakuyinkela muloña nawa ashinshika, anyana kaNzambi akadi ihuji mwikiñu datama dabulaña kukoña yuma yaloña, mumunakutoñekela neyi yejeji mukaayi, 16 iku munakwatishi chikupu kumazu ahanaña wumi. Kuhiñahu dinu niikali nahakuzañalela mwifuku daKristu, nanochu chinneluki nami hinatemukili chamukunkulwayi hela kudikita chamukunkulwayiku. 17 Dichi, hela chakwila anakunhuñununa neyi mulambu wavinyu hamulambu wamudimu wajila* wumunakuzata muloña wachikuhwelelu chenu, natiyi kuwaha nikuzañalela hamu nanenu wejima wenu. 18 Munjila yoyimu, ninenu mwatela kutiya kuwaha nikuzañalela hamu nanami.

19 Dichi, nakuhweleli mudi Mwanta Yesu kuyitemeshela Timotewu katataka, kulonda nakakoleshewi neyi nitiya chimunakuhanda. 20 Muloña hinukwetihu muntu mukwawu wudi namuchima neyi yena wukwakamena chikupu yuma yinakuyakamishaku. 21 Muloña akwawu ejima anakufwila hohu yuma yayitiyishaña kuwaha awenawu, bayi yuma yaYesu Kristuku. 22 Ilaña enu muneluki wunsahu wadishimwininiyi yomweni nindi, neyi mwana wunakukalakela hamu natata yindi, niyena dichi chakalakeliyi hamu nanami hakutwala nsañu yayiwahi hambidi. 23 Dichi, yeniwu diyi innakukeña kuyitemeshela katataka hampinji yinichidi kutalila yuma chiyikwikala kudi ami. 24 Eñañi, nakuhweleli mudi Mwanta nami, ninami nawa katataka ninzi.

25 Ilaña hayinu mpinji, namoni nami chidi chiwahi kuyitemeshelaku manakwami Epafwaditu, mukwetu mutwakalakelaña, mukwetu ishidika, ntemesha yenu nawa ñamba yami wayuma yinakaankilaña, 26 chineli nakufwila chikupu kuyimona wejima wenu nawa naneñi muloña mwatiyili nawu wakata. 27 Chalala, wakatili nankashi kwakwihi nakufwa; ilaña Nzambi wamutiyilili luwi, kafwampi, bayi neyi yena hohu diyi atiyililiwu luwiku, ilaña ninami nawa, kulonda nibuli kwikala nachineñi chasweja. 28 Dichi, inakumutemesha swayi-swayi, kulonda chimukumumona muzañalali cheñi, ninami nawa nileki kusweja kwakama. 29 Dichi, mutambwilenu neyi chimwatambwilaña akwakumulondela Mwanta namuzañalu wasweja, nawa lemeshenuña chikupu antu adi neyi awa, 30 muloña yena wadiña kwakwihi nakufwa* kukoola mudimu waKristu, kusha wumi windi muwubanji* kulonda yanzatili mudimu wumwateleleli kunzatila enu muloña wakwila himwadiña kunuku.

3 Nkumininaku, enu anakwami, twalekenuhu nakuzañalela mudi Mwanta. Hichidi nakukala kudi ami kuyisonekela yuma yoyimuku, muloña chumichi chakuyikiña enu.

2 Babalenu natuwa;* babalenu nawantu elaña yuma yatama; babalenu nawantu alemeshaña kwalama.* 3 Muloña etu yetu aalamishawu chalala, etu twakalakalaña mudimu wajila kuhitila mudi spiritu yaNzambi nikudisambila mudi Kristu Yesu nawa etu twabulaña kukuhwelela muyuma yakumujimba, 4 hela chochu, neyi kudi muntu wukweti yuma yikumuleñela yakuhweleli muyuma yakumujimba, iyami.

Neyi kudi muntu wunakutoñojoka nindi wukweti yuma yikumuleñela yakuhweleli muyuma yakumujimba, ami namubadiki: 5 añalamishili hefuku damuchitanu nachisatu, nidi wakumuza waIsarela, nidi wakumuchidi waBenjamini, nidi kaHeberu wavwalika kudi aHeberu; kwesekeja nanshimbi, nidi kaFwarisi; 6 kuhosha heyena, nadiña neyena dakukabisha chipompelu; kutalisha kukuloña kwashindamena hanshimbi, nadiña wakadi hakunyinkela muloña. 7 Hela chochu, yuma yanhetesheleña, ichi nayinati* hamuloña waKristu. 8 Sweje-e dinu, namonaña cheñi yuma yejima nami yamukunkulwayi muloña wakusweja kuwaha kwakumwiluka Kristu Yesu Mwanta wami. Kukoola yena, nanati yuma yejima nawa nayimonaña nami hinswadi* hohu, kulonda niheti Kristu 9 nawa akanwani inakudikunda nindi, bayi neyi hamuloña wakuloña kwami kwakwovwahila Nshimbiku, ilaña muloña wakuloña kwenzaña kuhitila mukukuhwelela mudi Kristu, kuloña kwafumaña kudi Nzambi kwashindamena hachikuhwelelu. 10 Chuma chinnakufwila, hikumwiluka yena niñovu yakusañuka kwindi nikukabakena hamu mumakabi indi, nikufwa, kufwa kudi neyi kwafwiliyi yena, 11 kulonda nimoni neyi chakwila nateli kwikala hakusañuka kwatachi kufuma mudi afu.

12 Hichinatalishi mukwila nawu natambwili dehi chumichi hela nami anañilishi dehi kwikala wawaninaku, ilaña inakufwila chikupu kulonda nimoni neyi nukutwesha kutambwila chuma chaletesheli Kristu Yesu yantondi.* 13 Enu anakwami, ami hinnakudimona nami natambwili dehi chumichiku, ilaña kudi chuma chimu chinelaña: Navulamenaña yuma yakunyima nakufwila yuma yidi kumbidi, 14 inakutemuka lufuchi nachikwonkwanyi chakutambwila wufwetu wamutambi wamwiwulu waNzambi kuhitila mudi Kristu Yesu. 15 Dichi etu ejima apama kuspiritu, twikaleña naniyi yitoñojoka niyilwilu, ilaña neyi munakutoñojoka mwambukaku, Nzambi wakayisolwela iyi yitoñojoka niniyi yilwilu. 16 Hela chochu, kwesekeja nakupama kwejima kutunapaminiku, tutwalekenuhu kwenda chiwahi muniyi njila yoyimu.

17 Enu anakwami, dinuñenu hamu nakuñimbujola nawa shinshikenu mesu enu hadi antu anakulondela chakutalilahu chetu chitwayishilili enu. 18 Muloña kudi antu amavulu anakudiwula kufwa kwaKristu kwafwiliyi hamutondu wakuyandishila.* Nayiteneneña kakavulu kudi enu, hidimuku? Ilaña ichi nayitenaña kudi enu iku inakudila. 19 Kukuma kwawu hikujilumuka, ivumu dawu diyi nzambi yawu, adisambilaña muyuma yinateli kuyitiyisha nsonyi nawa atoñojokaña hayuma yahamaseki. 20 Ilaña wenimbu wetu wamwiwulu, nawa tunakutalila chikupu chamwinu wakafuma mwiwulu, Mwanta Yesu Kristu, 21 wakabalumuna nyijimba yetu yazeya kulonda yakabalumuki* neyi mujimba windi walema kuhitila mukuzatisha ñovu yindi yabadika yamukwashaña kwovwahisha yuma yejima kudi yomweni.

4 Dichi enu anakwami inakeña nawa inafwilaña kumona, enu muzañalu wami, enu chibaaba chami, imanenu akola mbe-e chochenichi mudi Mwanta, enu akwetu inakeña.

2 Inakumulembelela Eyodiya nawa inakulembelela niSintiki nami ekali nayitoñojoka yoyimu mudi Mwanta. 3 Chalala, inakukulembelela nineyi nawa mukwetu washinshika mutwakalakelaña hamu nanami,* nami wutwalekihu kukwasha awa ambanda anadikitili hamu nanami* mumudimu wansañu yayiwahi, niKelementa niakwetu ejima akalakelaña hamu nanetu akweti majina awu adi mumukanda wawumi.

4 Zañalelenuña mudi Mwanta mpinji yejima. Nukuhosha cheñi nami, Zañalalenuña! 5 Mwekeshenu kwovwaha kwenu kudi antu ejima. Mwanta wudi hakamwihi. 6 Bayi mwakama chuma hela chimuku, ilaña muyuma yejima, mukulomba nimukulomba kwakulembelela nimukusakilila, mulejenuña Nzambi yuma yonsu yimunakukeña; 7 nawa kuwunda kwaNzambi kwabadika kwiluka kwejima kwakahemba nyichima yenu niyitoñojoka yenu kuhitila mudi Kristu Yesu.

8 Nkumininaku, enu anakwami, toñojokenuña hayumiyi,* yuma yejima yalala, yuma yejima yalema, yuma yejima yaloña, yuma yejima yakadi majilu, yuma yejima yasañumunaña kukeña, yuma yejima yatenañawu antu nawu yayiwahi, yuma yejima yayiwahi niyuma yejima yahamekañawu. 9 Yuma yimwadizili niyimwetejeli, nawa yimwatiyili nikumona kudi ami, yilenuña, nawa Nzambi wakuwunda wukwikalaña nanenu.

10 Nazañalali chikupu mudi Mwanta hakwiluka nami ichi munatachiki cheñi kuñakamena. Hela chakwila mwadiña nakuñakamena, ilaña hakapinji kantesha mwakañenyi kwikala nampinji yakwila mwenimu. 11 Bayi neyi inakuhosha mwenimu muloña wakukaankilaku, muloña nadidizishi kuzañalela muyuma yinukweti, hichikweti muloña nanochu chidi chihandilu chamiku. 12 Neluka chikupu chakuhanda nayuma yantesha nichakuhanda nayuma yayivulu. Muyuma yejima nimukuhanda kwejima, nadidizishi dehi chakwikuta nichakwikala nanzala, chakwikala nayuma yayivulu nichakubula kwikala nayuma. 13 Nikweti ñovu yakuhita muyuma yejima muloña wanowu wanyinkaña ñovu.

14 Hela chochu, mwelili chiwahi himwankwashili mulukadi lwami. 15 Kafwampi, enu aFwilipi mweluka cheñi nenu, chelili munadizi dehi nsañu yayiwahi hampinji yinafuminiku kuMasidoniya, kwosi chipompelu hela chimu chazatilili hamu nanami kutalisha kunsañu yakuhana hela kutambwilaku, chiña enu hohu; 16 muloña hampinji yinadiña muTesalonika, mwantemesheleli yuma yinakaankilili, bayi kamu hohuku, ilaña kayedi. 17 Bayi neyi inakukeña nami munyinki chawaanaku, ilaña inakukeña nami mukoñeña nyidimu yayiwahi yinateli kuyihetesha nankashi. 18 Hela chochu, nikweti yuma yejima yinnakukeña, nawa yayivulu. Hinnakukaankila chuma hela chimuku, muloña natambwili yuma kudi Epafwaditu yimwatemesheli, yikweti ivumba dadiwahi, wowu mulambu wetejewa, watiyañayi Nzambi kuwaha. 19 Kuhitila mudi Kristu Yesu, Nzambi yami wakayinka yuma yejima yimunakukaankila kwesekeja nakuvula kwakulema kwindi. 20 Ichi dinu kudi Nzambi yetu nawa Tata, kwiikali kulema haya nyaaka nanyaaka. Ameni.

21 Muñimushiliku akwakujila ejima adikunda naKristu Yesu. Anakwetu inidi nawu hamu anayimushi. 22 Akwakujila ejima anayimushi, sweje-e dinu amwitala daKesari.

23 Luwi lwasweja lwaMwanta Yesu Kristu lwiikali nanenu muloña waspiritu yimwamwekeshaña.