MUKANDA KUDI AKOLOSI

1 Ami Pawulu, kapostolu kaKristu Yesu atondeliwu kwesekeja nankeñelu yaNzambi, nidi hamu namanakwetu Timotewu, 2 kudi enu akwakujila nikudi anakwetu ashinshika adikunda naKristu, enu mudi muKolosi:

Luwi lwasweja nikuwunda jafumaña kudi Tata yetu Nzambi jiikali nanenu.

3 Mpinji yejima neyi tunakuyilombelaku enu, twamusakililaña Nzambi Tata yaMwanta wetu Yesu Kristu, 4 nanochu chitwatiyili chikuhwelelu chimukweti mudi Kristu Yesu nikukeña kumwayimwekeshelaña akwakujila 5 muloña wakuchiñeja kunayihembeliwu mwiwulu. Mwatiyili dehi kunyima iyi nsañu yakuchiñeja kuhitila mumazu achalala ansañu yayiwahi 6 yinashiki kudi enu. Neyi chochinakusoña nsañu yayiwahi nyikabu nikuyilaku hambidi mukaayi kejima, dichiyinakwila nimukachi kenu kutachika hefuku dimwatiyili nikwiluka chikupu luwi lwaNzambi lwasweja muchalala. 7 Chumichi dichimwadizili kudi Epafwarasa, mukwetu nduñu itwakeña, mukwakukalakala washinshika waKristu watwimenañaku. 8 Nawa watulejeli kukeña kumwamwekeshaña nawukwashu waspiritu yaNzambi.

9 Dichi, kufuma tuhu hefuku ditwatiyili kukeña nichikuhwelelu chenu, twaleka wanyi kuyilombelaku netu mwiluki chikupu kwiluka kwalala kwankeñelu yaNzambi namaana ejima nikutiyishisha yuma yakuspiritu, 10 kulonda mwendeña kwesekeja nanochu chakeñañayi Yehova nakumutiyisha kuwaha chikupu hampinji yimunakutwalekahu nakusoña nyikabu munyidimu yayiwahi yejima nimukusweja kwiluka kwalala kwaNzambi; 11 nawa koleshewenu nañovu jabadika kwesekeja nakulema kwindi kwasweja kulonda muumiki chikupu nakuwunda nimuzañalu, 12 hampinji yimunakumusakilila Tata wayiletesheli mwiikali ashikilamu kutambwila iseka dawuswana wawakwakujila adi muchejeji.

13 Watwamwinini kuwuswa wamwidima nakututwala muwanta waMwanindi akeñayi, 14 kuhitila mudi yena atukuula nefutu danyiloña, dikwila nawu kutwanakena nshidi jetu. 15 Diyi chifwanisha chaNzambi abulaña kumonawu, diyi wedi wayileñaleña yejima; 16 muloña kuhitila mudi yena dimwaleñeleliwu yuma yejima yamwiwulu niyahamaseki, yuma yamwekanaña niyuma yabulaña kumwekana, hela chakwila himatanda, himawanta antuumba, hijinfulumendi hela akwawuswa. Yuma yejima ayileñeli kuhitila mudi yena nawa amuleñeleli yena. 17 Cheñi nawa, yena wadiña kwoku henohu yuma yejima kanda yiikaliku, nawa yuma yikwawu yejima yekaliliku kuhitila mudi yena, 18 nawa diyi mutu wamujimba, dikwila nawu chipompelu. Diyi kutachika, wedi watachi kusañuka kufuma mudi afu, kulonda yekali watachi muyuma yejima; 19 muloña Nzambi watiyili kuwaha kuleñela yuma yejima mudi yena yiikali yawanina, 20 nawa mudi yena, Nzambi nakundamishi yuma yejima kudi yomwenindi hakuleta kuwunda kuhitila mumashi apwekesheliyi Kristu hamutondu wakuyandishila,* chili hiyuma yahamaseki hela yuma yamumawulu.

21 Chalala, enu hampinji yimu mwadiña kwakulehi naNzambi nawa mwadiña ayilumbu muloña mwatoñojokeleña hohu hanyidimu yadiña yatama, 22 ilaña ichi nayikundamishi cheñi kuhitila mumujimba wanowu wadihanini yomweni kukufwa, kulonda yakayitwali kudi Nzambi iku mwajila, akadi ihuji nawa abula hakuyinkela muloña, 23 chakala hohu mutwalekihu nachikuhwelelu, ashimata hachikuku nawa akola mbe-e, akadi kufuma kukuchiñeja kwayina nsañu yayiwahi yimwatiyili nawa yashimwininiwu kuyuma yejima yekala mwishina dewulu. Ami Pawulu, nekalili mukwakukalakala hamuloña waniyi nsañu yayiwahi.

24 Ichi dinu inakuzañalala namakabi innakumona kukoola enu, nawa inakumona yihuñu yaKristu yichidi kanda yiikali mumujimba wami kukoola mujimba windi, dikwila nawu chipompelu. 25 Nekalili mukwakukalakala wanichi chipompelu kwesekeja namudimu wawuñamba wanyinkeliwu kudi Nzambi kukoola enu, kulonda nishimwini chikupu mazu aNzambi, 26 dikwila nawu yuma yajila yakujinda yajindiliwu munshakaminu yakunyima* nikumakiñu akunyima. Ilaña ichi nayisololi kudi akwakujila indi, 27 owu atiyañayi Nzambi kuwaha kuyisolwela maheta indi alema aniyi yuma yajila yakujinda mukachi kawakwanyuza, dikwila nawu Kristu wadikunda nanenu, nakuchiñeja kwakulema kwindi. 28 Diyi itunakushimwinahu, nakukonkomwena muntu-himuntu nikutañisha muntu-himuntu mumaana ejima, kulonda tukashikiji muntu wejima wapama kuspiritu kudi Nzambi muloña wakudikunda naKristu. 29 Ichi dichinakunkojeja kudikita chikupu nikudishaku kwesekeja nañovu jindi jinakuzatika nankashi mudi ami.

2 Muloña inakukeña mwiluki chinnakulwisha chikupu kukoola enu niantu adi muLayodikeya nikukoola antu ejima abulahu dehi kummona.* 2 Chumichi chinekali mwenimu kulonda nyichima yawu yikundejewi nawa adinuñi hamu chiwahi mukukeña nikwikala namaheta abadika afumaña mukutiyishisha chalala chikupu, kulonda atiyishishi yuma yajila yakujinda yaNzambi, dikwila nawu Kristu. 3 Mudi yena dimwajindilawu chiwahi maheta ejima amaana nikwiluka. 4 Inakuhosha mwenimu kulonda kubuli kwikala muntu hela wumu wukuyidimbeka namazu akulambisha. 5 Hela chakwila kumujimba hinidi hamu nanenuku, ilaña kuspiritu nidi hamu nanenu, dichi nazañalali hakumona chimunakuzata yuma munjila yayiwahi nikukola kwachikuhwelelu chenu mudi Kristu.

6 Dichi, neyi chochimwamwiteja Kristu Yesu Mwanta, endenuña nakumwovwahila yena, 7 iku munashimati nikutuñewa mudi yena nikukola muchikuhwelelu, kwesekeja nanochu chayidizishiliwu nakusakilila chikupu.

8 Babalenu, kwakenda kekala muntu wukuyitwala muwunkoli kwesekeja namaana awantu, nintañishilu yamukunkulwayi yamwaya tushidikilu twawantu, nimwaya yuma yawansi yamukaayi, ilaña bayi neyi kwesekeja naKristuku; 9 muloña mudi yena dimwenzala yilwilu yaNzambi yejima. 10 Dichi muloña wayena wekala mutu wajinfulumendi jejima niantu ejima akweti wuswa, kwosi chuma hela chimu chimunakaankiliku. 11 Muloña wakudikunda nayena, ninenu nawa ayalamishili kwalama kwakadi kuzatisha makasa awantu hakuvuula mujimba wawuntu wanshidi, muloña ichi dichatela kwalamishawu ambuña jaKristu. 12 Muloña enu ayijiikili hamu nindi muchipapatishu chindi, nawa kuhitila muwubwambu wenu nayena, ayisañwili hamu nindi muloña wachikuhwelelu chenu munyidimu yañovu yaNzambi wamusañwili kufuma mudi afu.

13 Kubombelahu, hela chakwila mwadiña afwa kuyuma yatama yimwelileña nimukubula kwalama kwakumujimba wenu, Nzambi wayilishili kwikala amomi hamu nayena. Dichi muloña waluwi lwindi, wejima wetu watwanakena yuma yatama yitwelileña 14 nakujimañesha mukanda wakusoneka namakasa mwadiña nshimbi wamwekesheleña yiluwa yetu hatooka. Yena wawufumishahu kuhitila mukuwupopela hamutondu wakuyandishila.* 15 Dichi namutondu wakuyandishila,* navuuli jinfulumendi niakwawuswa nakuyishiya nzekesi nawa namwekeshi hatooka to-o nindi nayimiki mushindu, nakuyisenda muchendu neyi antu akasawu mukaleya.

16 Dichi, bayi mwiteja muntu hela wumu yayisompeshi muloña wayuma yimukuda nikunwa hela kutalisha hansañu yakwanakana chawija hela kumwekana kwakakweji hela sabataku. 17 Yumiyi himwevulu wayuma yakenza, ilaña yuma yalala yayumiyi yaKristu. 18 Dichi bayi mwiteja muntu hela wumu yayikañeshi kutambwila isomu denuku, muntu watiyaña kuwaha nakudizoza kwakutwamba nikudifukula kudi añelu, “wakuhwelelaña” yuma yamonañayi. Muntu wamuchidiwu wadivwimbaña chamukunkulwayi nayitoñojoka yindi yakumujimba, 19 nawa yena hovwahilaña owu wekala mutuku, oku kwatambwilaña mujimba wejima yuma yakeñekaña nikunuñañana hamu chiwahi namanuñi awu ninyisisa yawu nakuwuletesha kukula nañovu jaNzambi.

20 Neyi mwafwili hamu naKristu muloña wakukaana yuma yawansi yamukaayi, hanu dinu muloñadi chimunakwilila yuma neyi kwiji muchidi kukabadi kakaayi kuhitila mukwovwahila nshimbi jakwila nawu: 21 “Bayi musenda chumaku, hela kutompaku, hela kukwata kuchumaku,” 22 kutalisha kuyuma yakisikaña neyi anayizatishi kwesekeja namwaya nshimbi nintañishilu yawantu? 23 Hela chakwila yumiyi yamwekanaña neyi yamaana neyi chakwila muntu nakudifukula kwesekeja nankeñelu yindi, nakudizoza kwakutwamba nikukabisha chikupu mujimba, yumiyi hiyakwashaña kukañesha yuma yakumujimbaku.

3 Hela chochu, neyi ayisañwili hamu naKristu, fwilenuña yuma yamwiwulu mwashakamayi Kristu kuchikasa chachidiilu chaNzambi. 2 Toñojokenuña hayuma yamwiwulu, bayi hayuma yahamasekiku. 3 Muloña enu mwafwili, niwumi wenu awusweka hamu naKristu hakudikunda naNzambi. 4 Mpinji yakela Kristu, mukwakuleta wumi, anamumwekeshi dehi, dihakayimwekeshawu ninenu hamu nindi mukulema.

5 Dichi, jahenu yiidi yenu yamujimba yidi hanu hamaseki mwamwekenaña yilwilu yatama, yidi neyi wuvumbi,* wuzondu, mpwila yakutiya wuvumbi yakubula kudiyuula, kufwila kwatama, nilwisu, dikwila nawu kupesha. 6 Muloña wayumiyi, kuzuwa kwaNzambi kunakwinza. 7 Ninenu dichimwadiña nakwila* muchihandilu chenu chakunyima.* 8 Ilaña ichi mwatela kuleka yuma yejimiyi: kuzuwa, kuhila, kutama, nawa nhoshelu yakasawuntu ninhoshelu yawuzondu bayi jifumaña mukanwa kenuku. 9 Bayi muditwambilaña wumu namukwawuku. Vuulenu wuntu wenu wawukulu niyilwilu yawu, 10 nawa vwalenu wuntu wawuha, wunakwilishawu kwikala wawuha kuhitila mukwiluka kwalala kwesekeja namwaya chifwanisha chaNowu wawuleñeli, 11 mwabula kaGiriki hela kaYudeya, waalama hela wabula kwalama, ñiinza hela kaSikita,* nduñu hela muntu wasubuka; ilaña Kristu diyuma yejima nawa wekala muyuma yejima.

12 Dichi, chineli mudi antu atondawu kudi Nzambi, ajila nawa akeñayi, vwalenu muchima wawushona, luwi, kudizoza, kwovwaha nikudiwunjika. 13 Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña namukwawu. Neyi chayanakeneniyi Yehova chakufuma kumuchima, ninenu nawa mwatela kwila mwomumu. 14 Ilaña chabadika hayuma yejimiyi, vwalenu kukeña, muloña dikwanuñañeshaña chikupu antu mumpaanda yimu.

15 Cheñi nawa, itejenu kuwunda kwaKristu kuyuuleña munyichima yenu,* muloña kuniku kuwunda, dikwayitambikililiwu mumujimba wumu. Nawa sakililenuña. 16 Itejenu mazu aKristu ashakameña mudi enu chikupu kulonda ayikojeji enu mwiikali namaana ejima. Ditañishenuña nikudikolesha* wumu namukwawu namasamu, muhamekenuña Nzambi, imbenuña tumina twakuspiritu nakusakilila, mwimbilenuña Yehova munyichima yenu. 17 Yuma yejima yimwelaña, hela mumazu chili muyilwilu, yililenuña mwijina daMwanta Yesu nakumusakilila Nzambi Tata kuhitila mudi yena.

18 Enu ambanda, ovwahilenuña anfumu jenu, muloña dichuma chatelela mudi Mwanta. 19 Enu amayala, keñenuña añodi jenu nawa bayi muyilendumokelañaku.* 20 Enu anyana, ovwahilenuña anvwali jenu muyuma yejima, muloña chumichi dichamutiyishaña Mwanta kuwaha. 21 Enu atata jawantu, bayi muhilishaña* anyanenuku, kulonda abuli kudihomba.* 22 Enu anduñu, ovwahilenuña ankaaka jenu* ayiñija nyidimu muyuma yejima, bayi kuzata hohu hampinji yinakuyimonawu kulonda mutiyishi antu kuwahaku, ilaña zatenuña namuchima wawuwahi nakumutiya Yehova woma. 23 Yuma yejima yimunakwila, yilenuña nawumi wejima,* neyi munakumuzatila Yehova bayi antuku, 24 muloña mweluka nenu kudi Yehova dikumukatambwila wuswana kwikala wufwetu wenu. Kalakelenuña Mwanta, Kristu. 25 Kuhosha hohu chalala, muntu wejima wakoñaña yuma yatama akamubabesha kwesekeja nayuma yatama yakoñeliyi, nawa Nzambi hekala nachaambuku.

4 Enu ankaaka jawantu, hembenuña anduñu jenu munjila yaloña nawa yayiwahi, nanochu chimuneluki nenu ninenu nawa mudi naNkaaka yenu mwiwulu.

2 Lombenuña chakadi kuzeya, bayi mulalamena kulombaku, ilenuña mwenimu nakusakilila. 3 Hampinji yoyimu, tulombelenuñaku ninetu nawa kulonda Nzambi yatwenzunwini chenzelu chamazu indi, hakwila nawu tushimwini yuma yajila yakujinda yaKristu yankasilawu mumaleñi,* 4 kulonda niyishimuni chiwahi kwesekeja nanochu chinatela kwila.

5 Endenuña namaana kumesu awantu adi hanji, nawa zatishenuña chiwahi mpinji yenu.* 6 Mazu enu mpinji yejima ekaleña amawahi, akutoweja namuñwa kulonda mwiluki chimwatela kwakula muntu-himuntu.

7 Manakwami Tikikusa inakeña, mukwakukalakala washinshika nawa mukwetu nduñu mudi Mwanta, diyi wukayileja nsañu yejima hadi ami. 8 Inakumutemesha kudi enu kulonda mwiluki chitunakuhanda nawa yakundeji nyichima yenu. 9 Nakwinza hamu namanakwami Onesimusa washinshika nawa inakeña, wafuma mukachi kenu; wenawa akayileja yuma yejima yinakumwekana kunu.

10 Anayimushi kudi mukwetu Arisitaka mwatukasilawu hamu mukaleya, niMaku musonya Baranaba (owu iyayilejeliwu nawu mukamutambwili chiwahi neyi yenza kudi enu), 11 niYesu atenañawu nawu Yusitu, ekala akwakwalama. Awa diwu hohu akwetu akwakukalakala hamu nanami munyidimu yaWanta waNzambi, nawa ankundejaña* chikupu. 12 Anayimushi kudi Epafwarasa nduñu yaKristu Yesu, wafuma mukachi kenu. Mpinji yejima nakudikita chikupu nakuyilombelaku enu mukulomba kwindi, kulonda mushimati chikupu nikukuhwelela muyuma yejima kwesekeja namwaya nkeñelu yaNzambi. 13 Muloña namuhakwilañaku nami yena wadikitaña nankashi kukoola enu ninowu adi muLayodikeya nimuHerapoli.

14 Luka, ndotolu itwakeña, nayimushi, Demasi niyena nayimushi. 15 Muñimushiliku anakwetu adi muLayodikeya nimuhela Nyamfwasa nichipompelu chekala mwitala dindi. 16 Nawa neyi iwu mukanda munawutañi dehi mukachi kenu, mukawutemeshi kuchipompelu chawaLayodikeya kulonda nikwena akawutañi, ninenu nawa mukatañi mukanda wukafuma kuLayodikeya. 17 Nawa mumuleji Akipusa nenu: “Shaku muchima kumudimu wuwatambwilili mudi Mwanta kulonda wuwumanishi chiwahi.”

18 Ami Pawulu, yami inasoneki iku kwimusha nachikasa chami. Anukenuña chankasawu mumaleñi.* Luwi lwasweja lwiikali nanenu.