MUKANDA WATACHI KUDI ATESALONIKA

1 Ami Pawulu, nidi hamu naSilivanusi* niTimotewu, inakusonekela chipompelu chawaTesalonika adikunda naNzambi Tata niMwanta Yesu Kristu:

Luwi lwasweja nikuwunda jiikali nanenu.

2 Twamusakililaña Nzambi mpinji yejima chitwayitenaña wejima wenu mukulomba kwetu, 3 muloña kumesu aNzambi Tata yetu, mpinji yejima twanukaña mudimu wenu wumwazatili nachikuhwelelu nikukeña nichimwomikili muloña wakuchiñeja kwenu mudi Mwanta wetu Yesu Kristu. 4 Muloña tweluka kutondewa kwenu enu anakwetu akeñawu kudi Nzambi, 5 muloña nsañu yayiwahi yitwashimwinaña hiyenjili kudi enu namazu hohuku, ilaña yenjili hamu nañovu, naspiritu yajila ninakukuhwelela kwejima neyi chimweluka yuma yitwazatili kudi enu kukoola enu. 6 Nawa mwekalili akwakwimbujola etu niMwanta, nanochu chimwatambwilili mazu namuzañalu waspiritu yajila hela mwadiña mulukadi lweneni, 7 chakwila mwekalili akutalilahu kudi akwakwitiya ejima amuMasidoniya nimuAkaya.

8 Walala wudi wakwila nawu, mazu aYehova hiyanatiyakani hohu muMasidoniya nimuAkaya kufuma kudi enuku, ilaña chikuhwelelu chenu mudi Nzambi chinatiyakani mumaluña ejima chakwila hitukutwesha kuhosha chuma hela chimuku. 9 Muloña awenawu atulejaña chitwayiwanini enu katachi, ninochu chimwabalumukilili kudi Nzambi nakuleka kudifukula kudi ankishi jenu nakutachika kukalakela Nzambi wamumi nawa walala, 10 nakuhembelela Mwanindi kufuma mwiwulu, asañwiliyi kufuma mudi afu, dikwila nawu Yesu, watwamwinaña kukuzuwa kwaNzambi kunakwinza.

2 Enu anakwami, mweluka chikupu nenu kuhempula kutwayihempwili hikwadiña kwamukunkulwayiku. 2 Muloña hela twasambilili kukabakana nikutukabisha muFwilipi, neyi chimweluka, Nzambi watukwashili kwikala ahamuka* hakuyishimwina enu nsañu yayiwahi yaNzambi hampinji yitwamweneña ikañesha dasweja.* 3 Muloña kuyikonkomwena kutwayikonkomweneni hikwadiña kwayitoñojoka yatama, hela yawuzondu hela yakudimbanaku, 4 ilaña neyi chochatutiyañawu kuwaha kudi Nzambi nakutukunjika mudimu wansañu yayiwahi, dichi hitwahoshaña yuma yakutiyisha antu kuwahaku, chiña yamutiyishaña Nzambi kuwaha washinshikaña nyichima yetu.

5 Kuhosha hohu chalala, enu mweluka nenu hitwahosheleña mazu amwovu akulambisha hela kudimwekesha neyi twashinshika henohu munyichima yetu mudi lwisuku; Nzambi diyi chinsahu chetu. 6 Nawa etu hitwakeñaña netu atulemeshi kudi antu, hela kudi enu hela kudi antu amakwawuku, neyi chadiña mwenimu, mutenowu twadi kuyitwika enu chiteli chakutwakamena chineli tudi apostolu jaKristu. 7 Ilaña twadiña amwovu mukachi kenu neyi mama yawantu wunakwamusha chakamenañayi* chiwahi anyanindi. 8 Dichi, chineli twayikeñeli nankashi, hitwafwilileña* hohu kuyileja enu nsañu yayiwahi yaNzambiku, ilaña twahanini nimawumi etu muloña twayikeñeli chikupu.

9 Chalala enu anakwetu, mwanukaña nyidimu yetu yakola nikukabakana kwetu. Twazatileña wufuku nimwaana kulonda tubuli kwikala chiteli kudi muntu hela wumu hakachi kenu hampinji yitwayishimwinineña enu nsañu yayiwahi yaNzambi. 10 Enu mudi ayinsahu niNzambi niyena hichinsahu, mweluka ochu chitwadiña ashinshika, aloña nawa akadi ihuji kudi enu akwakwitiya. 11 Mweluka chikupu nenu etu twayikonkomweneneña, kuyikundeja nikuyileja wejima wenu hamuntu-hamuntu neyi chelañayi tata yawantu nanyanindi, 12 kulonda mwendeña kwesekeja nachakeñañayi Nzambi wunakuyitambika kulonda mwiñili muWanta windi nimukulema kwindi.

13 Chalala, ichi cheñi dichuma chatuleteshaña tumusakilileña Nzambi chakadi kuleka, muloña chimwatambwilili mazu aNzambi imwatiyili kudi etu, himwayitambwilili neyi mazu akufuma kudi antuku, ilaña neyi mazu aNzambi, neyi chochekalawu, owu anakuzatika nawa nimudi enu akwakwitiya. 14 Muloña enu anakwami, mwekalili akwakwimbujola yipompelu yaNzambi yadikunda naKristu Yesu yidi muYudeya, muloña enu ayikabishileña kudi antu amwituña denu neyi chinakuyikabishawu anakwetu amuYudeya kudi aYudeya, 15 ajahili niMwanta Yesu niatuprofwetu, atukabishili ninetu nawa. Kubombelahu, hiyanakumutiyisha Nzambi kuwahaku, ilaña anakudikaña nayuma yaheteshaña antu ejima, 16 nanochu chinakukeñawu kutukañesha kushimwina kudi antu akunyuza kulonda akayamwini. Chiyanakwilawu mwenimu anakuvulishilaku nshidi jawu. Ilaña ichi kuzuwa kwindi kunenzi hadi wena.

17 Enu anakwami, chatwambwiliwu nanenu hakapinji kantesha (kumujimba bayi neyi munyichima yetuku) muloña wakufwila chikupu netu tuyimoni enu, twazatili nañovu kulonda tuyimoni.* 18 Muloña wachumichi, twafwilileña kwinza kudi enu, eña, ami Pawulu nakeñeleña kwinza kudi enu, bayi kamu hohuku, ilaña mapampa kayedi; hela chochu, Satana watujikilili munjila. 19 Indi kuchiñeja kwetu hela muzañalu hela chibaaba chakudisambilamu kudi Mwanta wetu Yesu hampinji yakwikalahu kwindi dichidihi? Komana hiyenuku? 20 Chalala, enu yenu kulema kwetu, yenu muzañalu wetu.

3 Dichi, chitwakañenyi kuumika, twatoñojokeli netu chachiwahi kushala kankawetu kuAtenisi; 2 nawa twatemesheli manakwetu Timotewu mukwakukalakala* wansañu yayiwahi yaNzambi yahosha hadi Kristu, kulonda yayikoleshi nikuyikundeja muloña wachikuhwelelu chenu, 3 kulonda kubuli kwikala muntu hela wumu wukuluwankana* nanilu lukadi. Muloña enu aweni mweluka nenu hitukutwesha kutondolwela ilu lukadiku.* 4 Muloña hampinji yitwadiña nanenu, twayilejeleleña chadimu netu etu tukamona lukadi, neyi chimweluka, chumichi dichinamwekani. 5 Dichi, ami chinakañenyi kuumika, namutemesheli Timotewu kudi enu kulonda niiluki chidi chikuhwelelu chenu, muloña natoñojokeleña nami hadaha Mukwakweseka nayeseki dehi, nawa mudimu wetu wunekali dehi wamukunkulwayi.

6 Ilaña Timotewu dihanafuntiyi kudi etu kufuma kudi enu, nawa natuleji nsañu yayiwahi kutalisha hakashinshi nikukeña kwenu, nindi mwatwanukaña nankashi mpinji yejima nawa mwafwilaña chikupu kutumona neyi chitunakufwila ninetu kuyimona enu. 7 Diwu muloña waweni enu anakwetu, hela tuhu muyihuñu yetu yejima nimulukadi, twakundejewaña muloña wanenu nikashinshi kimwamwekeshaña. 8 Dichi etu twekalaña nañovu* neyi enu mwimana akola mbe-e mudi Mwanta. 9 Hanu dinu tukutwesha ñahi kumusakilila Nzambi hadi enu kutalisha hamuzañalu wasweja wutunakutiya hadi enu kumesu aNzambi yetu? 10 Wufuku nimwaana twalombaña kulomba kwakulembelela chikupu netu tukadimoni nenu* nikuyikwashaku yuma yimunabuli kulonda chikuhwelelu chenu chikakoli.

11 Ichi dinu Nzambi yetu yomweni nawa Tata niMwanta wetu Yesu, atulomboli munjila kulonda twakenzi kudi enu. 12 Kubombelahu, Mwanta yavulishi kukeña kwenu kwakudikeña wumu namukwawu nikwakukeña antu ejima, neyi chitwelaña etu nanenu, 13 kulonda yakoleshi nyichima yenu chikupu, mwiikali ajila akadi hakuyinkela muloña kumesu aNzambi Tata hampinji yakwikalahu kwaMwanta wetu Yesu hamu nawakwakujila indi ejima.

4 Nkumininaku enu anakwetu, neyi chimwatambwilili nshimbi kudi etu kutalisha hachimwatela kwenda kulonda mumutiyisheña Nzambi kuwaha, kafwampi neyi chochimunakwenda, tunayilombi nakuyilembelela kuhitila mudi Mwanta Yesu netu, mutwalekihu kwila mwenimu chikupu. 2 Muloña enu mweluka nshimbi jitwayinkeli kuhitila muwuswa waMwanta Yesu.

3 Muloña iyi diyi nkeñelu yaNzambi nindi, mwatela kwikala ajila nikuleka wuvumbi.* 4 Muntu-himuntu hakachi kenu watela kwiluka chakuyuula mujimba windi yomweni mukujila nimukalemesha, 5 bayi nalwisu nimpwila yakutiya wuvumbi yakubula kudiyuula neyi chelañawu akwanyuza abula kumwiluka Nzambiku. 6 Kwosi muntu hela wumu watela kubadika* hakukumina nikumukoña manakwindi chatama hayumiyiku, muloña Yehova diyi wukasompesha antu kutalisha hayumiyi, neyi chitwayilejeli enu kunyima nikuyisoñamisha chikupu. 7 Muloña Nzambi natutambiki kukujila bayi kuwuzonduku. 8 Dichi, muntu wadiwulaña chumichi, hadiwulaña muntuku, ilaña wadiwulaña Nzambi wayinkaña enu spiritu yindi yajila.

9 Hela chochu, hansañu yakukeña anakwetu, hitwatela nikuyisonekela enuku, muloña enu ayidizisha dehi kudi Nzambi chakudikeña wumu namukwawu. 10 Kafwampi, munakwila mwenimu kudi anakwetu ejima adi muMasidoniya mwejima. Ilaña tunakuyilembelela enu anakwetu netu, mutwalekihu kwila mwenimu chikupu. 11 Fwilenuña chikupu kushakama mukuwunda nawa bayi mudiñijaña munsañu jawakwenuku, ilaña muzateña namakasa enu neyi chitwayilejeli, 12 kulonda mwendeña chiwahi kumesu awantu ahanji nikubula kukaankila chuma chidi chejima.

13 Kubombelahu, enu anakwami, tunakukeña mwiluki* hansañu yawantu akaama mutulu twakufwa, kulonda mubuli kwikala nachineñi chekalaña nawantu abula chikuhwelelu. 14 Muloña neyi twakuhwelela netu Yesu wafwili nawa amusañwili, dikwila nawu niantu akaama mutulu twakufwa kuhitila mudi Yesu, Nzambi wakayisañula nakuyipompesha hamu kulonda akekali hamu nayena. 15 Muloña chumichi dichitwayilejaña kwesekeja namazu aYehova netu, etu amomi anakuhanda kushika nihampinji yakwikalahu kwaMwanta, hitwakatwaminañahu dehi kumbidi kubadika antu akaama mutulu twakufwaku; 16 muloña Mwanta yomweni wakafuma mwiwulu namutambi wañovu, nezu damukulumpi wawañelu ninampuña yaNzambi, nawa antu afwila mudi Kristu, diwu akasambila kusañuka. 17 Kuhiñahu dinu, etu amomi tuchidi nakuhanda, tukaya nawu hamu mumavu nakudibulakana naMwanta muluzwizu; twakekalaña hamu naMwanta mpinji yejima. 18 Dichi, twalekenuhu nakudikundeja wumu namukwawu nanawa mazu.

5 Dichi dinu enu anakwetu, hichatelela kuyisonekela kutalisha hampinji niyilaaka yatoñolawuku. 2 Muloña enu aweni mweluka chikupu nenu, ifuku daYehova dinakwinza neyi chenzañayi ikombi nawufuku. 3 Mpinji chiyakashika hakahoshawu nawu, “Kuwunda nikukiñewa!” hohenohu kujilumuka kwakayishikena neyi nyisoñu yakuvwala chiyashikenaña mumbanda wudi nevumu, nawa hiyakapulukaku. 4 Ilaña enu anakwetu, himwekala mumwidima chakwila odu ifuku dikayishintakeshi neyi amakombiku, 5 muloña wejima wenu mudi anyana kachejeji nawa anyana kamwaana. Hitwekala anyana kawufuku hela mwidimaku.

6 Dichi dinu, bayi tukaama mutulu neyi chelañawu antu amakwawuku, ilaña tutoneña nikuhemba yitoñojoka yetu. 7 Muloña antu akaamaña tulu, akaamaña nawufuku, niantu ashetaña, ashetaña nawufuku. 8 Ilaña etu twekala mumwaana, tuhembeña yitoñojoka yetu nikuvwala chuma chakujika hantulu chakuloña nikukeña, nikuvwala kumutu itepa dakuchiñeja dawamwinu 9 muloña Nzambi hatutondeli nindi tukamoni kuzuwa kwindiku, ilaña nindi tukamoni wamwinu kuhitila mudi Mwanta wetu Yesu Kristu. 10 Wafwili kukoola etu, kulonda hela tunakutona hela tunakaami mutulu,* tukahandeña hamu nindi. 11 Dichi, dikoleshenuña* wumu namukwawu nikudituña wumu namukwawu neyi chimunakwila.

12 Ichi dinu, tunakuyilembelela enu anakwetu netu, lemeshenuña antu anakudikita chikupu mukachi kenu nawa anakuyilombola mudi Mwanta nikuyifumba; 13 nikuyitoñojokelaku chikupu mukukeña muloña wanyidimu yawu. Ikalenuña mukuwunda wumu namukwawu. 14 Cheñi nawa enu anakwetu, tunakuyilembelela netu, yifumbenu* chikupu antu abulaña kwenda mukuloña, kundejenu antu ananeñi,* koleshenu azeya nawa ikalenu mukuwunda nawantu ejima. 15 Bayi mwiteja muntu hela wumu kuditenda namukwawu wunamukoñi katamaku, ilaña mpinji yejima fwilenuña kudilila yuma yayiwahi wumu namukwawu nikudi antu ejima.

16 Zañalalenuña mpinji yejima. 17 Lombenuña mpinji yejima. 18 Sakililenuña hayuma yejima. Iyi diyi nkeñelu yaNzambi hadi enu mudi Kristu Yesu. 19 Bayi mujima kesi kaspirituku. 20 Bayi mudiwula wuprofwetuku. 21 Esekenu yuma yejima nakutondahu yayiwahi; nawa kakelenu chikupu kuyumoyu. 22 Lekenu yuma yejima yatama.

23 Nzambi wakuwunda yomweni yayijiliki chikupu. Nawa enu anakwetu, spiritu yenu, wumi* wenu nimujimba wenu jiikali jajiwahi mwejima, nawa jakadi hakujinkela muloña hampinji yakwikalahu kwaMwanta wetu Yesu Kristu. 24 Owu wunakuyitambika enu washinshika nawa wakelamu chikupu.

25 Enu anakwetu, tulombelenuñaku.

26 Yimushenu anakwetu ejima nakudifufwa kwajila.*

27 Inakuyilembelela mudi Mwanta nami muyitañili anakwetu ejima iwu mukanda.

28 Luwi lwasweja lwaMwanta wetu Yesu Kristu lwiikali nanenu.