MUKANDA WAMUCHIYEDI KUDI ATESALONIKA
1 Ami Pawulu, nidi hamu naSilivanusi* niTimotewu, inakusonekela chipompelu chawaTesalonika adikunda naTata yetu Nzambi niMwanta Yesu Kristu:
2 Luwi lwasweja nikuwunda jafumaña kudi Nzambi Tata nikudi Mwanta Yesu Kristu jiikali nanenu.
3 Enu anakwetu, mpinji yejima tudi namudimu wakuyisakililaku kudi Nzambi. Chumichi chinateleli, muloña chikuhwelelu chenu chinakutohelaku nankashi nikukeña kwenu wejima wenu kwakudikeña wumu namukwawu kunakuswejelaku. 4 Dichi, twayihamekaña muyipompelu yaNzambi muloña wakuumika kwenu nikushinshika kwenu kumwamwekeshaña mumakabisha ejima imunakuhitamu* nimakabi imunakumona.* 5 Ichi hichinjikijilu chinakumwekesha nawu Nzambi wasompeshaña mwaloña, nawa chumichi chikayileñela enu kuyimona nawu mwatelela Wanta waNzambi wumunakukabakena.
6 Iwu wunsompeshi waNzambi, waloña, muloña yena nakuyifweta lukadi antu ayiletelaña enu lukadi. 7 Ilaña enu munakumona lukadi, akayinookesha hamu nanetu hampinji yakamumwekeshawu Mwanta Yesu kufuma mwiwulu hamu nawañelu jindi añovu 8 mukesi kanakubidima, hampinji yakatendayi antu abula kumwiluka Nzambi niabulaña kwovwahila nsañu yayiwahi yahosha hadi Mwanta wetu Yesu. 9 Antu wenawa akayisompeshela kukujilumuka kwahaya nyaaka nakuyifumisha kumesu aMwanta nikukulema kwañovu jindi, 10 hampinji yakenzayi kulonda akamulemeshi mukachi kawantu jindi ajila nikumuhayama hefuku denodu kudi antu ejima amukuhweleleli, muloña enu mwakuhweleleli wunsahu wutwayishimwinini.
11 Dichi, twayilombelañaku mpinji yejima netu, Nzambi yetu yayimoneña nindi mwatelela mutambi windi, nawa nañovu jindi, yatweshi kushikija chikupu yuma yejima yamutiyishaña kuwaha ninyidimu yejima yimwakalakalaña nachikuhwelelu. 12 Wakela mwenimu kulonda ijina daMwanta wetu Yesu akadilemesheli mudi enu, ninenu nawa akayilemesheli mudi yena kwesekeja naluwi lwaNzambi yetu nilwaMwanta Yesu Kristu.
2 Hela chochu, enu anakwetu, kutalisha hakwikalahu kwaMwanta wetu Yesu Kristu nikutupompesha hamu kudi yena, tunayilombi 2 netu bayi muluwankana swayi-swayi muyitoñojoka yenu hela kuzaala namazu onenewa,* hela namazu ahakanwa hela namukanda wunakumwekana neyi wunafumi kudi etu nawu ifuku daYehova dinenzi dehiku.
3 Bayi ayiluwañesha* kudi muntu hela chantiku, muloña henohu odu ifuku kanda dinzi, kasekesha chiña kasambila kwinza nimuntu wakoñaña yuma yakuluwalala asambila kumusolola, yowu mwana kakujilumuka. 4 Wadikañaña nikudituumbakesha chikupu kubadika ejima atenañawu nawu nzambi hela chuma chakudifukulaku,* nawa chafumañamu, washakamaña mutembeli yaNzambi nakudimwekesha yomweni hatooka nindi hinzambi. 5 Komana himunakwanuka nenu hampinji yinachidiña nanenu nadiña nakuyileja yumiyiku?
6 Ichi dinu muneluki dehi chamukañeshaña muntu wafumpaña nshimbi, kulonda akamusololi mumpinji yindi yatelela. 7 Chalala, kutama kwaniwu muntu kwajindawu kunakuzatika, ilaña iku kutama kukatwalekahu kwikala kwakujinda sampu muntu wamukañeshaña anamufumishihu dehi. 8 Dichi, iwu muntu wafumpaña nshimbi akamusolola, owu akajilumunawu kudi Mwanta Yesu naspiritu yamukanwa kindi nikumufumishahu hampinji yakelukewa kwikalahu kwindi. 9 Ilaña iwu muntu wafumpaña nshimbi wekalilaku nyidimu yaSatana wamwinkaña ñovu yakuzata nyidimu yañovu yejima niyinjikijilu yakutwamba niyihayamisha* 10 niyuma yejima yakudimbana yabula kuloña yanowu anakuya nakunoña, kwikala nfwetu muloña hiyetejeli nikukeña chalala kulonda akayamwiniku. 11 Dichaletesheli Nzambi kwiteja yuma yakudimbana yiyihuñumuni kulonda eteji makudi, 12 kulonda wejima wawu ayisompeshi muloña hiyetejeli chalalaku, ilaña adiña nakuzañalela muyuma yabula kuloña.
13 Hela chochu, enu anakwetu akeñawu kudi Yehova, etu tudi namudimu wakuyisakililaku kudi Nzambi mpinji yejima, muloña kufuma kukutachika, Nzambi wayitondeli nindi akayamwini nanochu chayijilikiliyi naspiritu yindi nihamuloña wakukuhwelela kwenu muchalala. 14 Wayitambikili kuchumichi kuhitila munsañu yayiwahi yitwashimwinaña kulonda mwiikali nakulema kwaMwanta wetu Yesu Kristu. 15 Dichi dinu enu anakwetu, imanenu akola mbe-e nawa kwatenu chikupu kunshimbi jitwayilejeli, chili twayilejeli namazu ahakanwa hela kuhitila mumukanda wafumini kudi etu. 16 Kubombelahu, Nzambi Tata yetu watukeña, nawa muloña waluwi lwindi lwasweja, watwinkaña kukundeja kwahaya nyaaka nikuchiñeja kwakuwahi. Tunakulomba netu Yena niMwanta wetu Yesu Kristu, 17 akundeji nyichima yenu nikuyikolesha chikupu munyidimu yejima yayiwahi nimumazu ejima.
3 Nkumininaku, enu anakwetu, tulombelenuñaku kulonda mazu aYehova atwalekihu kutaanda swayi-swayi nikuyilemesha mukachi kawantu neyi chimunakuyilemesha ninenu, 2 nawa kulonda yatwamwini kudi antu atama nawa ambanji, muloña chikuhwelelu hichekalaña nawantu ejimaku. 3 Ilaña Mwanta washinshika nawa wakayikolesha enu nikuyikiña kudi muntu watama. 4 Kubombelahu, tunakuhweleli mudi Mwanta kutalisha hadi enu netu, munakulondela nshimbi jitwayilejaña nawa mukutwalekahu kujilondela. 5 Mwanta yatwalekihu kulombola nyichima yenu chiwahi kulonda mumukeñeña Nzambi nikuumika kukoola Kristu.
6 Ichi dinu enu anakwetu, tunakuyinka nshimbi mwijina daMwanta wetu Yesu Kristu netu, tondolwelenu manakwetu wejima wunakwenda mukubula kuloña nawa wabulaña kwenda kwesekeja nanshimbi jimwatambwili* kudi etu. 7 Muloña enu aweni mweluka chimwatela kutwimbujola, muloña etu hitwamwekesheli yilwilu yakadi kuloña mukachi kenu, 8 hela kuda yakuda yamuntu chawaanaku.* Kwambukaku, kuhitila mukuzata nyidimu yakola nikukabakana, twazatileña wufuku nimwaana kulonda tubuli kutwika muntu hela wumu chiteli hakachi kenu. 9 Bayi neyi chumichi chinatalishi mukwila nawu hitukweti wuswaku, ilaña twakeñeleña kudihana etu aweni kwikala akutalilahu kulonda enu mutwimbujoleña. 10 Kafwampi, chitwadiña hamu nanenu, twayilejeleña netu: “Neyi muntu nakukeña kuzata wanyi, bayi yadaku.” 11 Muloña tunakutiya nawu antu amu hakachi kenu hiyanakwenda mukuloñaku, ilaña anakudiñija munsañu yabula kuyikundama. 12 Antu amuchidowu, tunakuyileja nikuyikonkomwena mudi Mwanta Yesu Kristu netu atela kuzata mukudiwunjika nikuda yakuda yinazatiliwu awenawu.
13 Hakwila enu anakwetu, bayi muleka kwila yuma yayiwahiku. 14 Ilaña neyi kudi muntu wunakudikaña namazu itunasoneki muwunu mukanda, mwilukenu chiwahi yenowu muntu, nawa lekenu kudikunda nindi kulonda yatiyi nsonyi. 15 Hela chochu, bayi mumumoneña neyi hichilumbuku, ilaña twalekenuhu nakumufumba nanochu chineliyi himanakwenu.
16 Dichi, Mwanta wakuwunda yomweni yayinkeña kuwunda mpinji yejima muyuma yejima. Mwanta yekali nanenu ejima.
17 Ami Pawulu, yami inasoneki iku kwimusha nachikasa chami, dichinjikijilu chanyikanda yami yejima; ichi dichinasonekaña.
18 Luwi lwasweja lwaMwanta wetu Yesu Kristu lwiikali nanenu ejima.
Atenañawu cheñi nawu Silasi.
Hela “mulukadi lwejima lumunakuhitamu.”
Hela “imunakuumika.”
Hela “kuzaala naspiritu.” Talenu Kulumbulula, “Spiritu.”
Hela “ayidimbeka.”
Hela “chalemeshañawu.”
Hela “niyimwenu.”
Hela hekwawu, “jiyatambwili.”
Hela “chakadi kufwetaku.”