MUKANDA WAMUCHIYEDI KUDI TIMOTEWU

1 Ami Pawulu, kapostolu kaKristu Yesu atondeliwu nankeñelu yaNzambi kwesekeja namwaya chikaninu chawumi kuhitila mudi Kristu Yesu, 2 kudi Timotewu, mwana wakeñewa:

Luwi lwasweja niwushona nikuwunda jafumaña kudi Nzambi Tata nikudi Kristu Yesu Mwanta wetu jiikali naneyi.

3 Namusakilili Nzambi innakuzatila mudimu wajila nachinleji chamuchima chitooka neyi chamuzatililiwu ankakulula jami, chakubula kuleka kukwanuka eyi mukulomba kwami kwakulembelela wufuku nimwaana. 4 Chinaanukaña madilu eyi, nafwilaña kukumona kulonda nisweji kuzañalala. 5 Muloña naanukaña chikuhwelelu cheyi chakadi wunfwikiji chasambilili kwikala mudi nkaaka yeyi Lowisi nimudi mama yeyi Yunisi, nawa nakuhweleli nami nineyi dichikuhwelelu chiwukweti.

6 Muloña wachumichi, inakukwanukishaku nami chawaana chaNzambi chidi mudi eyi chiwatambwilili hampinji yinakunañikili makasami, wuchisañumuni neyi kesi. 7 Muloña Nzambi hatwinkeli spiritu yawomaku, ilaña watwinkeli yañovu niyakukeña niyakutoñojoka mwamaana. 8 Dichi, eyi bayi wutiya nsonyi kushimwina nsañu yaMwanta wetu hela hadi ami akasawu mukaleya* kukoola yenaku, ilaña eyi kuminaku dakukabakana kukoola nsañu yayiwahi kuhitila mukushindamena hañovu jaNzambi. 9 Watwamwinini nikututambika namutambi wajila, bayi neyi muloña wanyidimu yetuku, ilaña muloña wankeñelu yindi niluwi lwindi lwasweja. Watutiyilili ilu luwi lwasweja kushankulu mudi Kristu Yesu, 10 ilaña ichi ilu luwi lwasweja analumwekeshi hatooka kuhitila mukusoloka kwaChamwinu chetu Kristu Yesu, wafumishilihu kufwa nikutusolwela hatooka chakwikala nawumi wabulaña kutoka kuhitila munsañu yayiwahi, 11 yantondeleliwu ami kwikala mukwakushimwina, kapostolu nawa ntañishi.

12 Ichi dichuma chikwawu chinakuletesha nikabakaneña nayumiyi, ilaña hinnakutiya nsonyiku. Muloña ami neluka Owu wunetiya nawa nakuhweleli nami yena nakuhemba chuma chinnamwinki kushika nikwifuku odu. 13 Londelaña mwaya mazu* amawahi* iwatiyili kudi ami nachikuhwelelu nikukeña jenzaña muloña wakudikunda naKristu Yesu. 14 Spiritu yajila yashakama mudi etu yikukwashi kuhemba ichi chuma chachiwahi.

15 Eyi weluka chumichi neyi, antu ejima akukabeta kaAsiya anafumi kudi ami, kubombelaku niaFwigelu naHemoni. 16 Mwanta* yatiyili luwi amwitala daOnesifwolu, muloña kakavulu diyi wankolesheleña nawa hatiyili nsonyi muloña wakukasewa kwami mumaleñiku.* 17 Ilaña hampinji yadiñayi muRoma, wankeñakeñeli chikupu nawa wanwanini. 18 Mwanta Yehova yakamutiyili luwi lwindi mwifuku odu. Nawa eyi weluka chiwahi nyidimu yejima yazatiliyi muEfwesesa.

2 Dichi eyi mwanami, twalekakuhu kwikala nañovu muluwi lwasweja ludi mudi Kristu Yesu; 2 nawa yuma yiwatiyili kudi ami yamweniwu kudi ayinsahu amavulu, kunjikaku yumiyi kudi antu ashinshika, akushikilamu kudizisha antu amakwawu yumiyi nawa. 3 Chineli wudi ishidika wamuwahi waKristu Yesu, kuminaku dakukabakana kukoola nsañu yayiwahi. 4 Kwosi muntu wunakuzata mudimu wawushidika wadiñijaña* mumudimu wakulanda nakulandululaku,* kulonda amutiyi kuwaha kudi muntu wamwiñijili wushidika. 5 Kubombelahu, muntu wejima wahemañaku yisela, hiyamusomwenaña* neyi yakañanya kulondela nshimbi yanochu chiselaku. 6 Ndimi wadikita chikupu diyi watela kwikala watachi kuda nyikabu. 7 Toñojokaña hayumiyi yinnakuhosha; Mwanta wukukukwasha kutiyishisha* yuma yejima.

8 Anukaku neyi Yesu Kristu amusañwili kufuma mudi afu nawa wadiña mwana* kaDavidi, kwesekeja nansañu yayiwahi yinashimwinaña, 9 yinnakukabakena nawa yinakunkasilawu neyi mbanji. Hela chochu, mazu aNzambi hiyakasewaku. 10 Muloña wachumichi, natwalekañahu nakuumika yuma yejima kukoola atondewa, kulonda niwena akayamwini kuhitila mukudikunda naKristu Yesu nawa akekali nakulema kwahaya nyaaka nanyaaka. 11 Awa mazu atelela kuyikuhwelela, akwila nawu: Kuhosha hohu chalala, neyi tufwila hamu nindi, twakahandila cheñi hamu nindi; 12 neyi tutwalekahu nakuumika, tukayuulila cheñi hamu nindi neyi anyanta; ilaña neyi tumukaana, niyena wakatukaana; 13 neyi tubula kwikala ashinshika, yena watwalekañahu kwikala washinshika, muloña hakutwesha kudikaana yomweniku.

14 Twalekakuhu nakuyanukisha yumiyi nikuyidizisha* kumesu aNzambi kulonda abuleña kutaadeka hamazu, chumichi hichinateli kuyiheteshaku, muloña chakuminaña hohu dakuluwañesha* antu anakutiyilila. 15 Zataku nañovu jeyi jejima kulonda wiikali muntu atiyañawu kuwaha kudi Nzambi, mukwakukalakala wakadi chuma chakutiyilahu nsonyi, watañishaña nikulumbulula chiwahi mazu achalala. 16 Ilaña tondolwelaña nhoshelu yamukunkulwayi yajilolaña yuma yajila, muloña iyi nhoshelu yakojejaña antu kudiñija chikupu muyilwilu yakubula kumwakama Nzambi, 17 nawa mazu awu ataandaña neyi chelaña iboñola. Hakachi kanawa antu hadi niaHimenusa naFwiletu. 18 Awa amayala anasenuki nakufuma kuchalala, anakuhosha nawu kusañuka kwawafu kunahiti dehi, nawa anakuzeyesha chikuhwelelu chawantu amu. 19 Hela chochu, chikuku chakola chaNzambi saña chakolela ngu-u, nawa chikweti ichi chinjikijilu chakwila nawu, “Yehova weluka antu jindi,” nawa nawu, “Muntu wejima wunakutambika hejina daYehova yatondolweli yuma yabula kuloña.”

20 Mwitala deneni himwekalaña yuma* yawuru nisiliva hohuku, ilaña mwekalaña niyanyitondu niyamawumba, yuma yimu yamudimu walema, yikwawu nawa yamudimu wabula kulema. 21 Dichi neyi muntu yadaambula kuniyi yuma yabula kulema, wukwikala chozelu* chamudimu walema, chajilikawu, chozelu chakuzatisha kudi mwinichu, chinaloñeshiwu kuchizatisha kunyidimu yayiwahi. 22 Dichi, temukaku kufwila kwawansi, ilaña fwilaña kuloña, chikuhwelelu, kukeña, kuwunda nikudinuña hamu nawantu atambikaña Mwanta nanyichima yitooka.

23 Kubombelahu, wukaaneña kutaadeka kwawusupi nawa kwamukunkulwayi, nanochu chiweluka neyi mwafumaña ndombu. 24 Muloña nduñu yaMwanta hatela kuzuñaku, ilaña watela kwikala wamwovu* kudi antu ejima, washikilamu kutañisha akwawu, wadiwunjikaña neyi anamuvulumuni, 25 yadizisheña namuchima wamwovu antu adikañaña. Hadaha Nzambi wukuyileñela kubalumuka munyichima* kulonda ekali nakwiluka kwalala kwakwiluka chalala, 26 nawa kulonda ekali cheñi nawuswa wawu wakutoñojoka chiwahi nikusopoka mumuhetu waDiyabolu, hakwiluka nawu anayikwati amomi kudi yena kulonda eleña nkeñelu yindi.

3 Ilaña ilukaku chumichi neyi, mumafuku akukuminina mwakekala mpinji jakala. 2 Muloña antu akekala akwakudikeña awenawu, asweja kukeña mali, akwakudinka wanta, akwakuditohesha, akwakasawuntu, abulaña kwovwahila anvwali, abulaña kusakilila, abula kushinshika, 3 abulaña kukeña akwawu antu, abulaña kukeña kutiyañana nawakwawu, akwakutwambila akwawu, abulaña kudiyuula, asweja kuzuwa, abulaña kukeña yuma yayiwahi, 4 akwakufukejela akwawu, achinchika, akwakudivwimba, akwakukeña jakuzañalesha chatela akeñi Nzambi, 5 amwekanaña neyi kwiji amwakama Nzambi, ilaña akaanaña ñovu yaniku kwakama; dichi ambukaku kudi antu amuchidiwu. 6 Mukachi kanawa antu dimu mwafumaña antu ayaña mumatala mukubabala nakukokola ambanda azeya akweti nshidi jajivulu, alumbukila mukufwila kweñi-nakweñi, 7 adizaña mpinji yejima ilaña hiyatweshaña kwikala nakwiluka kwalala kwakwiluka chalalaku.

8 Dichi, neyi aYanesa naYamberesa chadikañiliwu naMosi, awa antu niwena adikañaña nachalala. Antu amuchidiwu aluwankana chikupu muyitoñojoka nawa ayikaanaña muloña hiyendaña kwesekeja namwaya chikuhweleluku. 9 Hela chochu, kwosi kwakayawuku, muloña wusupi wawu akawusolola hatooka kumesu awantu ejima neyi chasolweliwu wusupi wanawa amayala ayedi. 10 Ilaña eyi wunalondeli chikupu ntañishilu yami, chihandilu chami, nkeñelu yami, chikuhwelelu chami, kudiwunjika kwami, kukeña kwami, kuumika kwami, 11 mumakabisha nimumakabi adi neyi inahitilimu muAntiyoki, muIkoniyumu nimuLisitira. Nomikili awa makabisha nawa Mwanta wampulwishili muyuma yejimiyi. 12 Kafwampi, antu ejima afwilaña kuhanda kwesekeja namwaya kumwakama Nzambi muloña wakudikunda naKristu Yesu, niwena akayikabisha. 13 Ilaña antu atama niakwakuluwañesha antu, akayaña nakutaminaku nawa akaluwañeshaña akwawu niwena akayiluwañeshaña.

14 Ilaña eyi, twalekakuhu kulondela yuma yiwadizili niyuma yakushinjililiwu yakukwashili kwitiya, muloña wuneluki antu akudizishili yumiyi 15 nawa kufuma kuwukeki wuneluki nsona jajila jinateli kukukojeja kwikala namaana, nawa awa maana akakukwasha kumona wamwinu kuhitila mukukuhwelela mudi Kristu Yesu. 16 Nsona yejima ayonena kudi Nzambi nawa yawahila kudizisha nachu, kuzuwila nachu, kwolola* nachu, nikubabesha nachu munjila yakuloña, 17 kulonda muntu waNzambi yekali washikilamu chikupu, wadiloñesha chikupu kuzata nyidimu yayiwahi yejima.

4 Nakukonkomweni kumesu aNzambi niaKristu Yesu wakasompesha amomi niafu, hampinji yakasolokayi nihampinji yakenzayi muWanta windi, nami: 2 Shimwinaku mazu, yishimwineña swayi-swayi mumpinji yayiwahi nimumpinji yakala; zuwilaku, soñamishaku chikupu, konkomwenaku, nakudiwunjika chikupu nikutañisha chiwahi. 3 Muloña kwakenza mpinji yakakaanawu antu ntañishilu yayiwahi,* ilaña akalondela yuma yafwilañawu awenawu nikudivulishila antañishi akahoshaña* yuma yakeñañawu kutiya namatu awu. 4 Akaleka kutiyilila kuchalala nakusha maana kumpanji jakutwamba. 5 Ilaña eyi, hembaña yitoñojoka yeyi muyuma yejima, umikaku kukala, kalakalaña mudimu wamukwakushimwina,* zataku chikupu mudimu weyi.

6 Muloña ami anatachiki dehi kunhuñununa neyi mulambu wavinyu, nawa mpinji yami yakukasunuka yinashiki dehi mukamwihi. 7 Ami nalwi njita yayiwahi, natemuki dehi lufuchi ndo-o nikumufunda, nawa nahembi chikuhwelelu. 8 Kufuma hayinu mpinji, ananhembeli chibaaba chakuloña chakanyinkayi Mwanta, nsompeshi waloña hanodu ifuku kwikala wufwetu wami, hela chochu, hakenka ami hohuku, ilaña wakenka niantu ejima akeña kusoloka kwindi.

9 Zataku nañovu jeyi jejima kulonda winzi swayi-swayi kudi ami. 10 Muloña Demasi nanshiyi muloña nakeñi nshakaminu yamakonu* nawa nayi kuTesalonika, Kereseni niyena nayi kuÑalija,Titusa niyena nayi kuDalamatiya. 11 Nashali hohu naLuka. Wakenzi naMaku kunu, muloña yena wankwashaña chikupu mumudimu. 12 Ilaña Tikikusa namutemeshi kuEfwesesa. 13 Chiwakenzaña, wakansendeli kahuma kinashiyili kuTirowasi kudi Karapu ninyivuñilu, sweje-e yayitembi.

14 Alesanderi muchiji wawuneñu wankoñeli yuma yatama nankashi. Yehova wakamufweta kwesekeja nanyidimu yindi. 15 Nineyi watela kubabala nindi, muloña yena wadikañili chikupu namazu etu.

16 Hakudihakwilaku kwami kwatachi, kwosi muntu hela wumu wadiña kukabadi kamiku, ilaña wejima wawu anshiyili chisayikila. Dichi bayi ayinka muloñaku. 17 Hela chochu, Mwanta wemeni kukabadi kami nawa wanyinkeli ñovu kulonda mudimu wakushimwina wuzatewi chikupu kuhitila mudi ami nikuwutiya kudi akwanyuza yejima; nawa ampulwishili kukanwa kamutupa. 18 Mwanta wakampulwisha kunyidimu yatama yejima nikuñamwina kulonda nakekali muWanta windi wamwiwulu. Kudi yena kwiikali kulema haya nyaaka nanyaaka. Ameni.

19 Wuñimushiliku aPrisila naAkwila niamwitala daOnesifwolu.

20 Erasitusi washalili muKorinda, ilaña Tirofwimusa namushiyili kuMiletusa muloña wadiña wakata. 21 Zataku nañovu jeyi jejima kulonda wushiki kunu henohu tukweji twamashika kanda.

Anakwimushi kudi Ebulusa niPudensa niLinusa niKulodiya nianakwetu ejima.

22 Mwanta yekali naneyi muloña waspiritu yiwamwekeshaña. Luwi lwindi lwasweja lwiikali nanenu.