MUKANDA KUDI TITUSA

1 Ami Pawulu, nduñu yaNzambi nawa kapostolu kaYesu Kristu kwesekeja namwaya chikuhwelelu chawantu atondawu kudi Nzambi nikwiluka kwalala kwakwiluka chalala kwesekeja namwaya kumwakama Nzambi, 2 nawa yumiyi yashindamena hakuchiñeja kwawumi wahaya nyaaka wakaniniwu kushankulu kudi Nzambi wabulaña kutwamba; 3 ilaña hampinji yindi yatelela, wakojejeli mazu indi kuyiluka kuhitila mumudimu wakushimwina wankunjikiliwu kwesekeja namwaya lushimbi lwaNzambi, Chamwinu chetu; 4 kudi eyi Titusa, mwana walala wukweti chikuhwelelu chitwekala nachu ninetu nawa:

Luwi lwasweja nikuwunda jafumaña kudi Nzambi Tata nikudi Kristu Yesu Chamwinu chetu jiikali naneyi.

5 Nakushiyili muKereta kulonda wololi yuma yaheñeli* nikutonda akulumpi mumusumba-nimusumba neyi chinakulejeli nami: 6 mukulumpi hatela kwikala nahakumwinkela muloñaku, watela kwikala iyala wasumbula mumbanda wumu hohu, wukweti anyana etiya akadi kutiyakana mpuhu yakwikala nachihandilu chakadi kudiyuula* nawa abulaña kudikaña. 7 Muloña chineli hiñamba yaNzambi, kalama watela kwikala wakadi hakumwinkela muloña, bayi welaña yuma kwesekeja nachinakeñi muchima windiku, bayi wahilaña swayiku, bayi mukwakushetaku, bayi mukwamadombuku,* bayi wukweti lwisu lwakukeña kuheta munjila yawupwapokiku, 8 ilaña watela kwikala nachisambu, wakeña yuma yayiwahi, watoñojokaña mwamaana,* waloña, washinshika, wadiyuulaña, 9 wakwatisha kumazu alala* hampinji yinakuzatishayi wuswa windi wakutañisha, kulonda yatweshi kukolesha* antu chikupu nantañishilu yayiwahi* nikuzuwila antu adimbululaña iyi ntañishilu.

10 Muloña kudi akwakudikaña amavulu, antu ahoshaña yuma yamukunkulwayi niakwakudimbana, sweje-e dinu antu alemesha kwalama. 11 Chinateleli kuyimwenesha awa amayala, muloña anakuluwañesha chikuhwelelu chayisaka yejima kuhitila mukutañisha yuma yatela kubula kutañishawu muloña wakufwila kudihetesha awenawu nalwisu. 12 Muntu wumu mukachi kawu, yowu kaprofwetu wawu, wahosheli nindi: “AkwaKereta hiyakwakutwamba mpinji yejima, hiyanyama azuwa amwisaña nawa hiyankopi afwa hakuda.”

13 Iwu wunsahu walala. Dichi muloña wachumichi, wuyizuwileña chikupu kulonda ekali akola muchikuhwelelu, 14 nakubula kusha maana kutuheka twawaYudeya nikunshimbi jawantu asenukaña nakufuma kuchalala. 15 Kudi antu akweti nyichima yitooka, yuma yejima yitooka; ilaña kudi antu akweti nyichima yatama niabula kushinshika, kwosi chuma hela chimu chitookaku, muloña yitoñojoka yawu niyinleji yawu yanyichima ayitamisha dehi. 16 Ahoshaña hatooka kumesu awantu nawu amwiluka Nzambi, ilaña amukaanaña kuhitila munyidimu yawu, muloña wena hiwuzondu, hiyakwakudikaña nawa hiyashikilamu kuzata nyidimu yayiwahi yejimaku.

2 Ilaña eyi, twalekakuhu kuhosha yuma yaya mwaya ntañishilu yayiwahi.* 2 Amayala akulumpi eleña yuma nakwesekeja, asheña maana kuyuma, atoñojokeña mwamaana, ekali akola muchikuhwelelu, mukukeña nimukuumika. 3 Mwomumu nawa, ambanda akulumpi niwena ekaleña nayilwilu yaletaña kalemesha, bayi ekala akwamatuñuku, bayi ekala muwuduñu wakusweja kunwa vinyuku, ilaña ekaleña antañishi ayuma yayiwahi, 4 kulonda afumbi* ayañadima akeñeña anfumu jawu, akeñeña anyanawu, 5 atoñojokeña mwamaana, ekali adihemba, akwakukalakala kumatala awu,* amawahi, akwakwovwahila anfumu jawu kulonda mazu aNzambi abuli kuyihosha chatama.

6 Mwomumu nawa, twalekakuhu nakukonkomwena anyikwenzi kulonda atoñojokeña mwamaana, 7 nakudimwekesha eyi aweni wiikali wakutalilahu munyidimu yayiwahi yejima. Tañishaña yuma yayiwahi* nakushaku maana chikupu, 8 nakuzatisha nhoshelu yayiwahi* yinateli kubula kudiwulawu, kulonda antu adimbululaña atiyi nsonyi, abuli kwikala nachuma chatama chakuhosha hadi etu. 9 Anduñu ovwahileña ankaaka jawu muyuma yejima, afwileña kuyizañalesha, bayi kuyidimbululaku, 10 bayi ayiyilañaku, ilaña atela kwikala ashinshika chikupu, kulonda muyuma yejima, awahisheña ntañishilu yaNzambi, Chamwinu chetu.

11 Muloña luwi lwasweja lwaNzambi analumwekeshi, nawa lwaletaña wamwinu kudi antu ejima. 12 Ilu luwi, lwatudizishaña kukaana yilwilu yakubula kumwakama Nzambi nikufwila kwayuma yamukaayi, nakutoñojoka mwamaana, nakulondela mwaya kuloña nikumwekesha yilwilu yakumwakama Nzambi muyinu nshakaminu yamakonu,* 13 hampinji yitunakuhembelela kuchiñeja kwaletaña muzañalu nikusoloka kwakulema kwaNzambi muneni nikwaChamwinu chetu, Yesu Kristu, 14 wadihanini yomweni kukoola etu kulonda yatusubuli* kukuluwalala kwejima nikuditookeshela yomweni antu anekali iheta dindi dadimena, owu afwilaña nyidimu yayiwahi.

15 Twalekakuhu kuhosha yumiyi nikukonkomwena* nikuzuwila nawuswa chikupu. Bayi witeja muntu hela wumu yakudiwuliku.

3 Twalekakuhu nakuyanukisha ovwahileña jinfulumendi niakwawuswa, nawa ekaleña adiloñeshela chadimu kuzata nyidimu yayiwahi yejima, 2 abuleña kuhosha muntu hela wumu kasawuntu, bayi abobolaña nawakwawuku, ilaña ekaleña ovwaha nakumwekesha kudizoza kwejima kudi antu ejima. 3 Muloña ninetu mpinji yimu twadiña akadi maana, akwakudikaña, atusenwishileña, anduñu akufwila kweñi-nakweñi niayuma yakuzañalesha, twakoñeleña yuma yatama nikwikala nalwisu, twadiña akwakukoña yuma yawuzondu niakwakudihela wumu namukwawu.

4 Hela chochu, luwi lwaNzambi, Chamwinu chetu nikukeña kwakeñayi antu chijasolokeli 5 (bayi nanyidimu yayiwahi yitwakoñeliku, ilaña naluwi lwindi), watwamwinini kuhitila mukutuwelesha kwatuleteli kuwumi nikutwilisha kwikala amaha naspiritu yajila. 6 Watuhuñunwinini chikupu iyi spiritu kuhitila mudi Yesu Kristu Chamwinu chetu, 7 kulonda neyi anatuteni dehi nawu twaloña kuhitila muluwi lwasweja lwayenowu, twiikali answana kwesekeja namwaya kuchiñeja kwawumi wahaya nyaaka.

8 Awa mazu atelela kuyikuhwelela nawa inakukeña eyi wutwalekihu nakukonkomwena haniyi nsañu, kulonda antu anamwitiyi Nzambi ashi nyichima hakutwalekahu kukalakala nyidimu yayiwahi. Yumiyi yayiwahi nawa yaheteshaña antu.

9 Ilaña tondolwelaña kutaadeka kwawusupi, kuchinda yisaka yawankakulula, yikonkojola nikuzuñila Nshimbi, muloña yumiyi yamukunkulwayi nawa kwosi chuma chafumañamuku. 10 Kutalisha hadi muntu wataandishaña ntañishilu yakutwamba, neyi wunamufumbi* kapampa kamuchiyedi, ilaña yena kutiya nehi, lekaku kudikunda nindi, 11 nanochu chiwuneluki neyi muntu wamuchidiwu nasenuki dehi munjila, nakuvulumuna nawa nadifwishi dehi yomweni namuloña.

12 Chinakatemesha Atemasi hela Tikikusa kudi eyi, wakazati nañovu jeyi jejima kulonda wakenzi kudi ami kuNikopoli, muloña kweniku diku kwinnafuukuli kushakama mutukweji twamashika. 13 Zataku hanakumini ñovu jeyi jejima wukwashi Zenasi weluka Nshimbi chikupu niApolosi kulonda akabuli kukaankila chuma chidi chejima halwendu lwawu. 14 Antu jetu niwena adizi kutwalekahu kukalakala nyidimu yayiwahi kulonda atweshi kukwashana neyi kunamwekani kukaankila kunakukeñeka kuzatilahu swayi-swayi, kuchiina akenda kekala antu abulaña kusoña nyikabu.

15 Antu ejima adi hamu nanami anakwimushi. Ñimushiliku akwetu atukeña nawa adi muchikuhwelelu.

Luwi lwasweja lwiikali nanenu ejima.