MUKANDA KUDI FWILEMONI
1 Ami Pawulu, muntu akasawu mukaleya* kukoola Kristu Yesu, nidi hamu namanakwetu Timotewu, kudi eyi Fwilemoni mukwetu itwakeña mukwakukalakala hamu nanetu, 2 nikudi muheletu Afwiya, nikudi mukwetu ishidika Akipusa, nikuchipompelu chidi mwitala deyi:
3 Luwi lwasweja nikuwunda jafumaña kudi Tata yetu Nzambi nikudi Mwanta Yesu Kristu jiikali nanenu.
4 Namusakililaña Nzambi yami mpinji yejima chinakutenaña mukulomba kwami, 5 nanochu chinatiyaña chikuhwelelu cheyi nikukeña kuwamukeña Mwanta Yesu niakwakujila ejima. 6 Inakulomba nami chikuhwelelu chiwukweti chitwekala nachu ninetu nawa chikuleñeli wiluki yuma yejima yayiwahi yitukweti mudi Kristu. 7 Muloña nazañaleli chikupu nikukundejewa nankashi chinatiyili kukeña kuwukweti, muloña eyi manakwami wunahizumwishi nyichima yawakwakujila.*
8 Muloña wachumichi, hela chakwila ami nidi nawuswa chikupu mudi Kristu wakukuleja eyi kulonda wukoñeña yuma yayiwahi, 9 chikuwaha ami kukulembelela muloña wakukeña kuwamwekeshaña, chineli ami Pawulu nashinakaji dehi nawa chayinu mpinji nidi muntu akasawu mukaleya* kukoola Kristu Yesu. 10 Inakukulembelela hansañu yamwanami Onesimusa inekalili tata yindi kuspiritu hampinji yinadiña mukaleya.* 11 Hakusambila wadiña wamukunkulwayi kudi eyi, ilaña ichi nekali walema chikupu kudi eyi nikudi ami nawa. 12 Inakumufuntisha cheñi kudi eyi, yena diyi muchima wamami aweni.*
13 Nakeñi nami nishakami nindi kunu kulonda yahiñi hadi eyi, yankalakeleña hampinji yinankasiwu mukaleya kukoola nsañu yayiwahi. 14 Ilaña ami hinnakukeña kwila chuma hela chimu chakadi eyi kwitejaku, kulonda mudimu wejima wawuwahi wuwukunzatila wubuli kwikala wakukukanjikija, ilaña wiikali wakufuma kumuchima weyi. 15 Hekwawu ichi dichuma chaletesheli yafumi kudi eyi hakapinji kantesha* kulonda wakamwiteji cheñi kushakama nindi haya nyaaka, 16 hakekala cheñi nduñuku, ilaña wakabadika hadi nduñu, himanakwetu wakeñewa, inakeña nankashi, sweje-e dinu eyi wamukeña chikupu muloña mwadikunda kumujimba nimudi Mwanta. 17 Dichi, neyi ami wammonaña neyi nidi ibwambu deyi,* wakamutambwili chachiwahi neyi chiwunateli kuntambwila ninami nawa. 18 Kubombelahu, neyi wakukoñelihu chuma chatama hela neyi wudi namukudi weyi, wakankalilimu ami. 19 Ami Pawulu, nasoneki iwu mukanda nachikasa chami nawa nakukani nami nakakufweta yuma yejima yakongweliyi Onesimusa kudi eyi. Kafwampi, nineyi wukweti mukudi kudi ami, mukudi weniwu wunabombelimu wumi weyi. 20 Chalala, manakwami, nkwashiku mudi Mwanta; hizumwishaku muchima wami* mudi Kristu.
21 Nakuhweleli nami wakela mwejima mwinnakuleji, dichi nakusonekeli nanochu chinneluki nami wakela niyuma yinnabuli kushimuna. 22 Kubombela hayumiyi, nloñeshelenu nikapeka mwakushikena, muloña nakuhweleli nami kuhitila mukulomba kwenu, akanfuntisha cheñi* kudi enu.
23 Epafwarasa mukwetu mwatukasilawu hamu mukaleya muloña wakudikunda naKristu Yesu, nakwimushi, 24 aMaku, naArisitaka, naDemasi niLuka, akwetu mutwakalakelaña niwena anakwimushi.
25 Luwi lwasweja lwaMwanta Yesu Kristu lwiikali nanenu muloña waspiritu yimwamwekeshaña.
Hela “kayili.”
Hela “wunasañumuni kukeña kwawakwakujila.”
Hela “kayili.”
MuchiGiriki, “mumpompa.”
Hela “kukeña kwami.”
MuchiGiriki, “haora yimu.”
MuchiGiriki, “mutwanzañenaña.”
Hela “sañumunaku kukeña kwami.”
Hela “akansubula nakunleta.”