MUKANDA WASONEKELIYI YAKOBA

1 Ami Yakoba, nduñu yaNzambi niyaMwanta Yesu Kristu, kudi enu ejima nyichidi 12 yapalañena mweñi namweñi:

Nayimushi!

2 Enu anakwami, zañalalenuña hampinji yimunakuhita mukweseka kwashiyashana, 3 nanochu chimuneluki nenu chikuhwelelu chenu chinesekiwu muniyi njila, chikukolesha chikupu ñovu jenu jakuumika. 4 Ilaña, itejenu kuumika kumanishi mudimu waku, kulonda mwiikali awanina nawa alumbwa muyuma yejima, chakadi kukaankila chuma hela chimu.

5 Dichi, neyi hakachi kenu hadi muntu wunabuli maana, yatwalekihu kulomba kudi Nzambi nawa wakamwinka, muloña yena wahanaña kudi antu ejima namuchima wumu chakadi kuhoshola. 6 Ilaña yatwalekihu kulomba nakukuhwelela chakadi kujinoka hela chanti, muloña muntu wajinokaña, wudi neyi dinkanda dahakaluñalwiji dinakulelolawu kudi mpepela nikubwankañila. 7 Kafwampi, muntu wamuchidiwu bayi yakuhwelela kutambwila chuma hela chimu kufuma kudi Yehovaku; 8 muntu yeniwu himukwanyichima yiyedi, hemanaña chakola munjila jindi jejimaku.

9 Ilaña manakwetu wabula kulema,* yazañalali nanochu chinamutuumbakeshiwu, 10 nawa manakwetu waheta, niyena yazañalali nanochu chinamuzozeshiwu, muloña wakakisika neyi nkenu yamwisaña. 11 Muloña neyi chochaselaña itena* nankanza yadu nakuumisha mutondu, niwuluya wawu hiwukukukumuka nilubanji lwawu hilukumana, dichakamumwekena nisamaheta, wakajilumuka muyuma yafwilañayi.

12 Wukweti muzañalu yowu muntu watwalekañahu nakuumika hampinji yinakuhitayi mukweseka, muloña neyi Nzambi yamutiya kuwaha, wakatambwila chibaaba chawumi chakanayi Yehova antu atwalekañahu nakumukeña. 13 Muntu wunakuhita mukweseka, bayi yahosha nindi: “Anakuñeseka kudi Nzambiku.” Muloña Nzambi hiyamwesekaña nayuma yatamaku, hela yena yomweni hesekaña muntu hela wumuku. 14 Ilaña muntu wejima amwesekaña kuhitila mukumukokola nikumudimbeka* kukufwila kwindi yomweni. 15 Kufumahu, neyi kufwila kusweja chikupu,* kwaleñelaña muntu kukoña nshidi;* nawa hanyima yakwila nakoñi dehi nshidi, mwafumaña kufwa.

16 Enu anakwami inakeña, bayi ayidimbaku. 17 Yawaana yayiwahi yejima niyawaana yabadika kuwaha* yejima, yafumaña mwiwulu, yenzaña hamaseki kufuma kudi Tata yetu wayejeji yamwiwulu,* wabulaña kubalumoka neyi chabalumokaña nyevulu.* 18 Chineli yadiña hinkeñelu yindi, watuvweli namazu achalala kulonda twiikali nyikabu yatachi yahayuma yaleñeliyi.

19 Enu anakwami inakeña, ilukenu chumichi: Muntu wejima yanyakaleña kutiya, yalabeña kuhosha, yalabeña kuzuwa, 20 muloña kuzuwa kwamuntu, hikwaletaña kuloña kwaNzambiku. 21 Dichi, lekenu kwila yuma yawuzondu yejima niyuma yatama yejima,* nawa itejenu namuchima wawovu mazu anakutumbawu mudi enu anateli kuyamwina.*

22 Hela chochu, ikalenuña akwakwila mwaya mazu, bayi mwikala akwakutiya hohu nakudidimba enu aweni nayitoñojoka yakutwambaku. 23 Muloña neyi muntu himukwakutiya hohu mazu, ilaña kwilamu nehi, iwu muntu wudi neyi muntu wunakuditala kumesu indi muchibanjilu. 24 Muloña waditalaña yomweni, kuhiñahu hakufumaku, nawa hohenohu hakulalamena chinakumwekanayi. 25 Ilaña muntu washinshikaña chikupu munshimbi jawanina jakusubuka nakujilondela, muntu wamuchidiwu, wazañalalaña nayuma yelañayi, muloña nekali mukwakukalakala mudimu, bayi mukwakutiya nakulalamenaku.

26 Dichi neyi muntu wadimonaña nindi himukwakudifukula kudi Nzambi, ilaña hayuulaña idimi dindiku, dikwila nawu nakudimba muchima windi yomweni, nawa kudifukula kwindi kwamukunkulwayi. 27 Kudifukula kwakadi majilu nawa kwakadi kutamishewa kwesekeja nachamonañayi Nzambi yetu nawa Tata, dikweniku: kuhemba chiwahi anyana anshona niambanda anfwila anakumona lukadi nikudaambula kuyuma yatama yamukanu kaayi.

2 Enu anakwami, komana munakuhemba chikuhwelelu chaMwanta wetu wakulema Yesu Kristu, hampinji yoyimu munakumwekesha chaambu tahindi? 2 Neyi muntu wunavwali kunyinu tuzeya twawuru niyakuvwala yasweja kuwaha yeñila mumunapompeli, mwenomu mwiñila nawa nikazweñi wunavwali yakuvwala yamajilu, 3 komana mukulemeshaku muntu wunavwali yakuvwala yasweja kuwaha nakumuleja nenu, “Eyi shakamaku hanichi chitwamu hahawahi,” nawa kazweñi mumuleja nenu, “Eyi twalekakuhu nakwimana” hela nenu, “Shakamaku hachina chitwamu hinadataña nyendu yami” tahindi? 4 Neyi dichimwelaña, dikwila nawu mwamonaña antu amu kulema kubadika antu amakwawu nawa munekali ansompeshi afuukulaña mwatama, hidimuku?

5 Tiyenu enu anakwami. Komana Nzambi hatondeli antu amonañawu mukaayi nawu hiyatuzweñi nakuyilisha kwikala aheta muchikuhwelelu nikwikala answana aWanta wakaniniyi antu amukeñaku, tahindi? 6 Ilaña enu munasawuli atuzweñi. Komana akwamaheta hidiwu ayikabishaña enu nakuyikokela kuyota yanyiloñaku? 7 Komana hiyasawulaña ijina dadiwahi dimwemenañakuku? 8 Dichi, neyi mwalondelaña lushimbi lwawanta kwesekeja namwaya nsona, lwakwila nawu, “Keñaku mukwenu neyi chiwadikeña eyi aweni,” dikwila nawu munakwila chiwahi chikupu. 9 Ilaña neyi mutwalekahu kumwekesha chaambu, munakuvulumuna nawa ilu lushimbi lunayifwishi namuloña nawu mudi akwakufumpa nshimbi.

10 Muloña neyi muntu yovwahila Nshimbi jejima, ilaña yafumpahu lushimbi lumu, dikwila nawu iwu muntu nafumpi nshimbi jejima. 11 Muloña owu wahosheli nindi, “Bayi wila wujilaku,” cheñi wahosheli nindi, “Bayi wujaha muntuku.” Dichi, neyi eyi hiwelaña wujilaku ilaña wajahanaña, dikwila nawu wunekali mukwakufumpa nshimbi. 12 Hoshenuña nikwila yuma neyi yelañawu antu akasompeshawu nalushimbi lwawantu asubuka.* 13 Muloña muntu wabulaña kutiyila akwawu luwi, akamusompesha chakadi kumutiyila luwi. Luwi lwemikaña mushindu wunsompeshi.

14 Enu anakwami, chumanyi chikuhetelamu muntu neyi yahosha nindi wukweti chikuhwelelu, ilaña hakweti nyidimuku? Chikuhwelelu chamuchidiwu hichikumwamwinaku, tahindi? 15 Neyi manakwetu hela muhela wudi nawuvu* nawa wudana yakuda yashikila yanodu ifuku, 16 ilaña wumu hakachi kenu hakumwila nindi, “Yaña mukuwunda; ikalaku neyena nawa ikutaku chikupu,” ilaña enu kumwinka yuma yinakaankiliyi kumujimba windi nehi, hanu dinu chikumukwasha ñahi? 17 Chochimu, chikuhwelelu chakadi nyidimu, chafwa.

18 Hela chochu, muntu wumu wukuhosha nindi: “Eyi wukweti chikuhwelelu, ami nikweti nyidimu. Nleji chikuhwelelu cheyi chakadi nyidimu, ninami nikukuleja chikuhwelelu chami nanyidimu yami.” 19 Eyi wakuhwelela neyi kwekala Nzambi wumu, hidimuku? Wunakwila chachiwahi. Andemoni niwena dichakuhwelelawu nawa azaalaña. 20 Eyi muntu wabula kwiluka, hiwunakukeña kwiluka neyi chikuhwelelu chakadi nyidimu chamukunkulwayiku, tahindi? 21 Komana tata yetu Abarahama hiyamuteneni nawu waloña muloña wachuma cheliliyiku? Diimu, amuteneni nawu waloña hanyima yakusha mwanindi Isaka hakameña. 22 Wunamoni kwila nawu chikuhwelelu chindi chadiña chakola hamu nanyidimu yindi nawa chikuhwelelu chindi achiwanishili muloña wanyidimu yindi, 23 ninsona yashikijeweli, yahosha nawu: “Abarahama wamukuhweleleli Yehova nawa amuteneni nawu waloña,” dichi amuteneni cheñi nawu ibwambu daYehova.

24 Dichi munamoni nenu muntu amutenaña nawu waloña muloña wanyidimu, bayi nachikuhwelelu hohuku. 25 Munjila yoyimu, komana Rahaba mumbanda chivumbi, niyena hiyamuteneni nawu waloña muloña wanyidimu yindi chelili yatambwili antemesha nachisambu nakuyileja nindi afuntili munjila yacheñiku, tahindi? 26 Chalala, neyi chochiwekala wafwa mujimba wakadi spiritu,* dichi nichikuhwelelu chakadi nyidimu chafwa.

3 Enu anakwami, amavulu hakachi kenu hiyatela kwikala antañishiku, nanochu chimuneluki nenu akatusompesha chikupu kubadika antu amakwawu. 2 Muloña wejima wetu twahukanaña* kakavulu. Neyi kudi muntu wabulaña kuhukana mumazu, dikwila nawu himuntu wawanina, nawa natweshi nikuyuula mujimba windi wejima. 3 Neyi tusha nyibulu* kutunwa twawatuwalu netu atwovwahileña, twateñululaña ninyijimba yawu yejima. 4 Toñojokenu cheñi hadi jimbopolu: Hela chakwila jamaneni nankashi nawa ajikumpulaña kudi mpepela yasweja, ajiteñululaña nachilapu chanyanya chikupu nakuya kwejima kunakukeña kuyayi mukwakuteñulula.

5 Munjila yoyimu, idimi hichidi chamujimba chanyanya, hela chochu, dadivwimbaña nankashi. Toñojokenu kesi kantesha chikwochaña mpata yeneni chikupu! 6 Idimi nidena hikesi. Hakachi kayiidi yetu yamujimba, idimi demenañaku yuma yabula kuloña yejima, muloña datamishaña mujimba wejima nikwocha chihandilu chamuntu chejima,* nawa idimi nidena adochaña nakesi kamuGehena.* 7 Muloña nyichidi yejima yawanyama amwisaña, atuda, yuma yazalalaña niyuma yamutuluñalwiji ayifwomonaña, nawa ayifwomonahu dehi kudi antu. 8 Ilaña kwosi muntu wunateli kufwomona idimiku. Dakala kudolola, datama nawa denzala wulembi wajahanaña. 9 Idimi dodimu, twamuhamekaña nachu Yehova Tata, nawa idimi dodimu twashiñaña nachu antu aleñawu “muchifwanisha chaNzambi.” 10 Mukanwa kokamu mwafumaña nkisu nikushiñana.

Enu anakwami, yumiyi hiyatela kwikalaña chochichiku. 11 Komana kaseloki kokamu kanateli kuseluka menji amawahi* nialula? 12 Enu anakwami, komana mutondu wachikuyu wukutwesha kusoña maolivi, hela mutondu wamuvinyu wukutwesha kusoña nyikuyu? Hela tuhu menji amuñwa hiyanatweshi kufumisha menji amawahiku.

13 Komana hakachi kenu, hadihu muntu wukweti maana nikwiluka? Muntu wamuchidiwu yekali nayilwilu yayiwahi yamwekeshaña nawu welaña yuma yejima namuchima wawovu wenzaña hamuloña wakwikala namaana. 14 Ilaña neyi mudi nechima datama niyikonkojola* munyichima yenu, bayi mudisambaña nikutwambila chalalaku. 15 Awa bayi neyi himaana afumaña mwiwuluku; ilaña himaana ahamaseki, awunyama nawa awundemoni. 16 Muloña kwejima kudi ichima niyikonkojola,* kwenoku kwekalaña nikuluwañeshewa niyuma yawuzondu yejima.

17 Ilaña maana afumaña mwiwulu, chatachi amawahi, kuhiñahu awunda, hiyakolelaña kumu hohuku, anyakalaña kwovwahila, enzala naluwi ninyikabu yayiwahi, hiyakweti chaambu hela wunfwikijiku. 18 Kubombelahu, antu aletaña kuwunda, atumbaña mumpinji yakuwunda nawa añulaña nyikabu yakuloña.

4 Indi majita nikuzuñañana kudi mukachi kenu jinakufuma hanka? Komana hijinakufuma muyuma yafwilaña mujimba wenu yazuñaña mukachi kenuku,* tahindi? 2 Mwafwilaña yuma, ilaña himwekalaña nayuku. Mwatwalekañahu kujaha akwenu nikuyitiyila lwisu, ilaña yuma yimwafwilaña himwayitambulañaku. Mwatwalekañahu kuzuña nikulwa njita. Himukweti yumiyiku, muloña himwalombañaku. 3 Neyi mulomba, himwatambwilañaku, muloña mwalombaña yumiyi nankeñelu yakuyizatisha munjila yatama, kulonda muyikisañeni kukufwila kwamujimba wenu.

4 Enu ayivumbi,* muneluki wanyi nenu kukwata wubwambu nakaayi hiwulumbu naNzambiku, tahindi? Dichi, muntu wejima wunakukeña kukwata wubwambu nakaayi, nakudilisha yomweni kwikala chilumbu chaNzambi. 5 Hela, komana munakutoñojoka nenu nsona yahosha chamukunkulwayi nawu: “Spiritu yalwisu yashakamaña mudi etu yafwilaña yuma yashiyashana” tahindi? 6 Hela chochu, luwi lwasweja lwatutiyilañayi Nzambi lwabadika chikupu. Dichi nsona yahosha nawu: “Nzambi wadikañaña nawakwakudivwimba, ilaña akwakudizoza wayitiyilaña luwi lwasweja.”

7 Dichi, mwovwahilenuña Nzambi; ilaña dikañenu naDiyabolu, niyena wukuyitemuka. 8 Swinenu kwakwihi naNzambi, niyena wukuswina kwakwihi nanenu. Enu akwanshidi, tookeshenu makasa enu, nawa enu akwanyichima yiyedi, tookeshenu nyichima yenu. 9 Tiyenu kutama kumuchima, neñenu nawa dilenu. Kuseha kwenu kubalumuki kuneña, nawa muzañalu wenu wubalumuki kudihomba. 10 Dizozenu kumesu aYehova, niyena wukuyitohesha.

11 Dichi enu anakwami, lekenu kudihosha chatama wumu namukwawu. Muntu wejima wukumuhosha manakwindi chatama hela wukumusompesha manakwindi, dikwila nawu nakuhosha nshimbi chatama nawa nakusompesha nshimbi. Dichi neyi wusompesha nshimbi, dikwila nawu hiwudi mukwakwila mwaya nshimbiku, ilaña wudi nsompeshi. 12 Kwekala hohu Mukwakuhana Nshimbi wumu niNsompeshi wumu, diyi wunatweshi kwamwina nikujilumuna. Ilaña eyi yeyinyi mwaka wusompeshi mukwenu?

13 Tiyenu enu mwahoshaña nenu: “Dalelu hela kumadiki twakaya kuniwu musumba, twakashakamaku chaaka chimu nawa twakazata mudimu wakulanda nakulandulula kulonda twakawaninimu mali,” 14 kutoña himuneluki chakekala chihandilu chenu kumadikiku. Muloña enu mudi neyi mbundu yamwekanaña hakapinji kantesha kuhiñahu yihita. 15 Ilaña, mwatela kuhosha nenu: “Neyi Yehova neteji, twakahanda nawa twakela ichi hela china.” 16 Ilaña ichi, munakudinka wanta kuhitila mukudisamba kwenu kwamukunkulwayi. Kudisamba kwejima kwamuchidiwu, kwatama. 17 Dichi, neyi muntu weluka chakwila mwaloña, ilaña kwilamu nehi, dikwila nawu yenowu muntu neli nshidi.

5 Tiyenu enu akwamaheta, dilenu makumbu hamakabi anakwinza hadi enu. 2 Maheta enu anatoki dehi nawa yakuvwala yenu anayiidi dehi kudi tunzembula. 3 Wuru yenu nisiliva yenu, jineli dehi kadala, nawa kadala kaju kakekala wunsahu wakuyihiisha nachu nawa kakada nyijimba yenu. Yuma yimunadilumbikili yakekala neyi kesi mumafuku akukuminina. 4 Tiyenu! Wufwetu wumunabuli kuyifweta akwakukalakala añwili maha enu, wunatwalekihu nakubilela, nawa kubilela kwawakwakumuna kwakukeña kuyikwasha kunashiki dehi kumatu aYehova wamazaza. 5 Munashakami chihandilu chakudiluñisha nikuditiyisha kuwaha hamaseki. Munadi nikununa kushika nikwifuku dakuyijaha. 6 Munahiishi; munajahi mukwakuloña. Komana yena hanakudikaña nanenuku, tahindi?

7 Dichi dinu, enu anakwetu, diwunjikenuña kushika nimpinji yakwikalahu kwaMwanta. Tiyenu! Ndimi watalilaña nyikabu yayiwahi yahamaseki, wadiwunjikaña nakuhembelela nyikabu kushika nimpinji yikashika nvula yatachi niyakukumishaku. 8 Ninenu nawa diwunjikenuña, koleshenuña nyichima yenu, muloña kwikalahu kwaMwanta kunaswini dehi kwakwihi.

9 Enu anakwetu, bayi muditoobeshaña* wumu namukwawuku kulonda akabuli kuyisompesha. Tiyenu! Nsompeshi nemani dehi hayiisu. 10 Enu anakwetu, imbujolenuña chakutalilahu chakuumika yuma yatama nichakudiwunjika chawatuprofwetu ahosheli mwijina daYehova. 11 Tiyenu! Antu anomiki twayimonaña netu akweti muzañalu.* Enu munatiyi chomikiliyi Yoba nawa muneluki nkisu oju Yehova jamukiswililiyi, muneluki nenu Yehova wukweti wushona chikupu niluwi.

12 Enu anakwetu, chuma chabadika hayuma yejima, lekenu kusanyika, chili kutena iwulu hela kutena iseki hela kutena chuma chidi chejima. Ilaña neyi mwiteja nenu “Eña,” ilenu mwomwenomu nawa neyi mukaana nenu “Inehi,” ilenu mwomwenomu kulonda abuli kuyisompesha.

13 Hakachi kenu, hadihu muntu wunakumona lukadi tahindi? Yatwalekihu nakulomba. Hakachi kenu, hadihu muntu wunazañalali tahindi? Yembeña masamu. 14 Hakachi kenu, hadihu muntu wakata tahindi? Yatambiki akulumpi achipompelu kulonda amulombeliku nakumuwayisha manji mwijina daYehova. 15 Nawa kulomba kwakukuhwelela, kukukolesha muntu wakata* nawa Yehova wukumuhindwisha. Cheñi, neyi nakoñi nshidi, akumwanakena.

16 Dichi, itejenuña nshidi jenu hatooka kudi wumu namukwawu nikudilombelaku wumu namukwawu kulonda ayuuki. Kulomba kwakulembelela kwamuntu waloña kwekala nañovu chikupu.* 17 Elija wadiña muntu watiyileña neyi chitwatiyaña etu, ilaña chalombeliyi chikupu nindi nvula bayi yinokaku, chalala nvula yanokeleli wanyi hamaseki hadi yaaka yisatu natukweji 6. 18 Walombeli cheñi, dichi iwulu danokesheli nvula nawa iseki dedishili nyikabu.

19 Enu anakwetu, neyi wumu hakachi kenu anamusenwishi nakufuma kuchalala, nawa mukwawu yamufuntisha, 20 ilukenu nenu muntu wejima wunakwashi mukwakukoña nshidi kufuma kuyuma yatama yinakoñiyi, owu muntu wakamwina wumi windi nawa akamwanakena nshidi jindi jajivulu.