MUKANDA WATACHI WASONEKELIYI PETULU

1 Ami Petulu, kapostolu kaYesu Kristu, inakuyisonekela enu munakushakama neyi akwakwenda mwambala mukanu kaayi, enu mwapalañena muPontu, muÑalija, muKapadosiya, muAsiya nimuBitiniya, kudi enu atondewa 2 kwesekeja namwaya kwilukila chadimu kwaNzambi Tata, enu ajilikawu naspiritu kulonda mwovwahileña nikwikala akusampwila mashi aYesu Kristu:

Luwi lwasweja nikuwunda jiyivulili enu.

3 Kulema kwiikali kudi Nzambi nawa Tata yaMwanta wetu Yesu Kristu, muloña kwesekeja naluwi lwindi lwasweja, watwilishili etu kuvwalika kamuchiyedi kulonda twiikali nakuchiñeja kwatwalekañahu kuhitila mukusañuka kwaYesu Kristu kufuma mudi afu, 4 kulonda twiikali nawuswana wakadi kutoka, wakadi kutamishewa nawa wabulaña kufukuluka. Wuswana weniwu ayihembelawu mwiwulu, 5 enu anakukiñawu nañovu jaNzambi kuhitila muchikuhwelelu chenu kulonda mumoni wamwinu wunaloñeshiwu dehi wakasololawu mumpinji yakukuminina. 6 Muloña wachumichi munakuzañalala chikupu, hela chakwila hakapinji kantesha munaneñi nakweseka kwashiyashana kumunakuhitamu, 7 kulonda chikuhwelelu chenu chinesekiwu dehi, chabadika kulema wuru yakisikaña hela chakwila anayeseki mukesi,* chikayileñeli enu akayihameki, akayilemeshi nikuyitiyakesha mpuhu hampinji yakamusololawu Yesu Kristu. 8 Hela chakwila himwamumwenihuku, mwamukeña. Hela chakwila hayinu mpinji himunakumumonaku, ilaña mwamukuhwelela nawa munakuzañalala chikupu namuzañalu waweni wakulema wakukañanya nikulumbulula, 9 hampinji yimunakufwila kutambwila yuma yimwakuhwelela, dikwila nawu wamwinu wenu.*

10 Muloña waniwu wamwinu, atuprofwetu aprofweteli kutalisha haluwi lwasweja lwadi kuyitiyilawu enu, alukeñakeñeli chikupu nikulusandujola. 11 Atwalekelihu nakukeñakeña kulonda eluki mpinji hela chilaaka chakashikijewa yuma yahosha hadi Kristu yashimwinini chadimu spiritu yajila yadiña mudi wena, iyi spiritu yashimwinini chadimu makabi akamonayi Kristu nikulema kukalondelahu. 12 Nzambi wayikojejeli atuprofwetu kwiluka nawu hiyadiña nakudiprofwetela awenawuku, ilaña adiña nakuprofwetela enu. Nawa ichi, iyi yuma anayisolweliyu enu kuhitila mudi owu ayishimwinini enu nsañu yayiwahi. Elili mwenimu muloña ayikwashili kudi spiritu yajila yafumini mwiwulu. Muyuma yeniyi añelu niwena anakufwila kushinshikamu chikupu.

13 Dichi, loñeshenu yitoñojoka yenu kulonda muzati mudimu; hembenuña chikupu yitoñojoka yenu; chiñejenuña luwi lwasweja lwakayiletelawu enu hampinji yakamumwekeshawu Yesu Kristu. 14 Hakwikala anyana ovwahilaña, lekenu kwiteja* kufwila kumwadiña naku kunyima kumwafwilileña mukubula kwiluka kuyiluwañeshiku, 15 ilaña ikalenu ajila muyilwilu yenu yejima, neyi chekalayi Owu Wajila wayitambikili enu, 16 muloña chasonekewa nawu: “Mwatela kwikala ajila, muloña ami najila.”

17 Nawa neyi munakutambika Tata wasompeshaña chakadi chaambu kwesekeja namwaya mudimu wamuntu-himuntu, mutiyenuña woma hampinji yimunakushakama neyi akwakwenda mwambala mukanu kaayi. 18 Muloña enu mweluka nenu hiyayisubwili* kuchihandilu chenu chamukunkulwayi chayishililiwu kudi ankakulula jenu nayuma yatokaña yidi neyi siliva hela wuruku. 19 Ilaña ayisubwili namashi alema wuseya, adi neyi amwana kamukoku wakadi wufwayi nawa wakadi ihuji, dikwila nawu Kristu. 20 Chalala, amwilukili dehi henohu kanda aali chikuku chakaayi,* ilaña amusolweli hatooka kukukuma kwampinji kukoola enu. 21 Kuhitila mudi yena, munekali akwakumwitiya Nzambi wamusañwili kufuma mudi afu nikumwinka kulema, kulonda chikuhwelelu chenu nikuchiñeja kwenu jiikali mudi Nzambi.

22 Dichi, chineli munaditookeshi dehi enu aweni* kuhitila mukwovwahila chalala nakukeña kwakudikeña nawanakwenu kwakadi wunfwikiji, dikeñenu chikupu wumu namukwawu chakufuma kumuchima. 23 Muloña enu anayilishi muvwaliki kamuchiyedi, bayi nambutu* yatokañaku, ilaña nambutu yabulaña kutoka, kuhitila mumazu aNzambi wamumi nawa wahanda haya nyaaka nanyaaka. 24 Muloña “antu ejima adi neyi matahu, nawa kulema kwawu kwejima kudi neyi wuluya wamwisaña; matahu omaña, ninkenu yawu yahulukaña, 25 ilaña mazu aYehova atwalekañahu haya nyaaka.” Nawa awa “mazu” hinsañu yayiwahi yayishimwininiwu enu.

2 Dichi, lekenu kutama kwejima, kudimbana, wunfwikiji, ichima nimatuñu ejima. 2 Chineli mudi anyikeki anavwaliki katataka, fwilenuña chikupu mayeli akadi majilu amumazu kulonda ayileteshi mukuli nakushika kuwamwinu, 3 chakala hohu munamutompi Mwanta nenu wukweti luwi.

4 Chimwenzaña kwilola dadumi dadiwiliwu antu ilaña datondawu kudi Nzambi nawa dalema wuseya kudi yena, 5 ninenu chineli mudi malola amomi, anakuyituña mwiikali itala dakuspiritu kulonda mwiikali atupristu ajila, mulambuleña nyilambu yakuspiritu yetejañayi Nzambi kuhitila mudi Yesu Kristu. 6 Muloña muNsona ashimunamu nawu: “Talenu! Inakwaala muZiyona ilola datondewa, ilola damwiwombu dalema wuseya dachikuku, nawa kwosi muntu hela wumu wukukuhwelela munidi ilola akatiyishawu nsonyiku.”

7 Dichi, yena nekali walema wuseya kudi enu muloña mudi akwakwitiya; ilaña kudi antu abula kwitiya, “ilola dadiwiliwu akwakutuña, dinekali dehi ilola damwiwombu dahewulu”* 8 nawa “ilola dakuhukesha niilola dakudimbwisha nachu.” Anakuhukana muloña adikañaña namazu. Iku dikukuma kunakuyihembelela. 9 Ilaña enu mudi “muchidi watondewa, atupristu awanta, muza wajila, antu elishawu kwikala iheta dadimena, kulonda mushimwini kumaluña ejima kuwaha kwejima”* Kwanowu wayitambikili kufuma mumwidima nindi mwinzi kuchejeji chindi chakuhayamisha. 10 Muloña enu kunyima himwadiña antu jaNzambiku, ilaña ichi munekali antu jaNzambi; kunyima hiyayitiyilili luwiku, ilaña ichi anayitiyili luwi.

11 Enu inakeña, inakuyilembelela nami, chineli mudi añiinza nawa akwakwenda mwambala, tondolwelenuña yuma yafwilaña mujimba, yalwaña njita nanenu.* 12 Twalekenuhu kwikala nayilwilu yayiwahi mukachi kawakwanyuza, kulonda hela akuyitena nawu mudi antu atama, wena akwikala ayinsahu ayilwilu yenu yayiwahi, nawa chuma chikafumamu akamulemesha Nzambi mwifuku dindi dakweseka.

13 Muloña waMwanta, ovwahilenuña antu akweti wuswa, hela mwanta wabadika kulema 14 hela anguvulu anatemeshiyi kulonda ababeshi antu akoñaña yuma yatama, ilaña ahameki antu akoñaña yuma yayiwahi. 15 Muloña nkeñelu yaNzambi yidi yakwila nindi, mumweneshi nhoshelu yawusupi yawantu abula maana kuhitila mukwila yuma yayiwahi. 16 Ikalenu antu asubuka, bayi muzatisheña kusubuka kwenu kukoñelamu yuma yatamaku, ilaña ikalenuña anduñu jaNzambi. 17 Lemeshenuña antu ejima, keñenuña anakwenu ejima,* mutiyenuña Nzambi woma, lemeshenuña mwanta.

18 Anduñu ovwahileña ankaaka jawu nakuyitiya woma chikupu, bayi amawahi niamwovu muchima hohuku, ilaña ninowu akalisha. 19 Nzambi watiyaña kuwaha muntu wafwilaña chikupu kwikala nachinleji chamuchima chitooka kudi yena, hela chakwila nakuumika kukala* nikumukabisha chakadi muloña. 20 Neyi ayeta hamuloña wakuvulumuna nawa muumika, chumanyi chimukuhetelamu? Ilaña neyi muumika makabi muloña wakukoña yuma yayiwahi, chumichi chamutiyishaña Nzambi kuwaha.

21 Kafwampi, ichi dichuma chayitambikililiwu, muloña Kristu niyena wakabakeni kukoola enu, nakuyishila chakutalilahu kulonda enu mulondeleña chikupu muntampu jindi. 22 Yena hakoñelihu nshidiku, nawa mukanwa kindi hiyawaninimu makudiku. 23 Chadiña nakumutukawu,* yena hafuntishili cheñi matukaku. Chakabakeneñayi, hayitiyishili woma* antu amuleñeleli yakabakaniku, ilaña wadikunjikili yomweni kudi Owu wasompaña mwaloña. 24 Yena wasendeli nshidi jetu mumujimba windi hamutondu, kulonda tufwi kunshidi ilaña tuhandi kukuloña. Nawa “ayuukili kuhitila muyilonda yindi.” 25 Muloña enu mwadiña neyi anyikoku apwapukili, ilaña ichi munafunti kudi kabiña nawa kalama wamawumi enu.

3 Munjila yoyimu, enu ambanda, ovwahilenuña anfumu jenu, kulonda amayala abulaña kwovwahila mazu aNzambi, ayikoki chakadi mazu kuhitila muyilwilu yawañodi jawu, 2 muloña wakudimwena awenawu yilwilu yenu yayiwahi nikalemesha kenu kasweja. 3 Kudiwahisha kwenu bayi kwikala kwahanji yamujimba, kwakuyindayinda nsuki, kwakudikobeka yingelingeli yawuru hela yakuvwala yayiwahiku, 4 ilaña kwiikali kwawuntu wakujinda wamumuchima, kwakuvwala chakuvwala chabulaña kutoka chaspiritu yakuwunda nikwovwaha, yalema wuseya chikupu kumesu aNzambi. 5 Muloña ichi dichavwalileñawu niambanda ajila akushankulu amukuhweleleli Nzambi, nakwovwahila anfumu jawu, 6 neyi Sara chovwahililiyi Abarahama nakumutena nindi mwanta. Nawa ninenu munekali anyana kaSara, chakala hohu mutwalekahu kukoña yuma yayiwahi nikubula kwiteja chuma hela chimu kuyitiyisha woma.

7 Munjila yoyimu, enu amayala, shakamenuña nawañodi jenu nakuyiluka chiwahi chadiwu.* Yilemeshenuña neyi chuma chabula kukola, chineli niwena hiyanswana hamu nanenu anatiyiliwu luwi lwakwikala nawumi, kulonda kulomba kwenu kubuli kukañeshewa.

8 Nkumininaku, wejima wenu nuñañanenu muyitoñojoka,* dakamenenuña, keñenuña anakwetu, ditiyilenuña wushona nikudizoza. 9 Bayi mufuntisha katama kudi muntu wunayili katamaku, hela kutuka muntu wunayitukiku. Ilaña yikiswilenuña, muloña chumichi dichayitambikililiwu kulonda mutweshi kuswana nkisu.

10 Muloña “muntu wejima wukukeña kudiluñisha wumi nikumona mafuku amawahi, watela kuhemba idimi dindi kubula kuhosha yuma yatama ninyivumbu yindi kubula kuhosha yuma yakudimbana. 11 Yaleki kukoña yuma yatama, ilaña yakoñeña yuma yayiwahi; yakeñakeñeña kuwunda nakukufwila chikupu. 12 Muloña mesu aYehova atalaña antu aloña, nimatu indi atiyililaña kukulomba kwawu kwakulembelela, ilaña Yehova wafutalelaña antu akoñaña yuma yatama.”

13 Chalala, neyi mwikala neyena dakwila yuma yayiwahi, hinyi wukuyila chuma chatama? 14 Ilaña neyi mukabakana kukoola kuloña, mukweti muzañalu. Hela chochu, bayi mutiya woma yuma yatiyañawu wena womaku,* hela bayi muluwankanaku. 15 Ilaña mujilikenuña Kristu neyi Mwanta munyichima yenu, mpinji yejima ikalenu adiloñeshela chadimu kudihakwila enu aweni kudi muntu wejima wukuyihula kutalisha hakuchiñeja kumukweti, hela chochu, mwileña mwenimu namuchima wawovu nikalemesha chikupu.

16 Ikalenuña nachinleji chamuchima chachiwahi, kulonda mwejima mwatama munakuyihoshawu enu, antu anakuyihosha mwatama atiyi nsonyi muloña wayilwilu yenu yayiwahi nanochu chimudi akwakumulondela Kristu. 17 Muloña neyi diyi nkeñelu yaNzambi nindi mukabakani muloña wakukoña yuma yayiwahi, chachiwahi, kubadika enu kukabakana muloña wakukoña yuma yatama. 18 Muloña Kristu wafwili kamu hohu kukoola nshidi, muntu waloña wafwilili antu abula kuloña, kulonda yayilomboli kudi Nzambi. Amujahili mumujimba wawuntu, ilaña amuhandishili muspiritu. 19 Nawa hadiñayi muspiritu, wayili nakushimwina kudi aspiritu adiña mukaleya, 20 owu adikañili kunyima hampinji yadiwunjikiliyi Nzambi nakuchiñilila* mumafuku aNowa, iku watu anakuwutuña, mwahandilili antu antesha, dikwila nawu mawumi* 8 abulili kufwa namenji.

21 Chipapatishu chesekana nanichi chuma chamwekeni, nichena chinakuyamwina enu (chipapatishu bayi neyi hikufumisha majilu amujimbaku, ilaña hikulomba chinleji chamuchima chachiwahi kudi Nzambi), kuhitila mukusañuka kwaYesu Kristu. 22 Yena wudi kuchikasa chaNzambi chachidiilu, muloña wayili mwiwulu, añelu, akwawuswa niakwañovu amwovwahishililiwu.

4 Chineli Kristu wakabakeni hampinji yadiñayi mumujimba wawuntu, ninenu ikalenu nayitoñojoka yoyimu;* muloña muntu wunakabakani dehi mumujimba naleki dehi kukoña nshidi, 2 kulonda mpinji yinashaliku yakuhanda kwindi mumujimba wawuntu, yaleki kufwila yuma yafwilañawu antu, ilaña yafwileña kwila mwaya nkeñelu yaNzambi. 3 Muloña mpinji yakwila mwaya nkeñelu yawakwanyuza yinahiti dehi, yimwakoñeleña yilwilu yawukapwa nsonyi,* kufwila yuma yatama, kusweja kunwa walwa, yidika yamapumba,* kusheta nikupesha kwakufumpa nshimbi. 4 Anadihayamini hakwiluka nawu munaleki kutemukila nawu hamu muchihandilu chakadi kudiyuula, dichi ahoshaña yuma yatama hadi enu. 5 Ilaña, awa antu akadilumbulwila awenawu kudi owu wadiloñeshela dehi chadimu kusompesha antu amomi niafu. 6 Kafwampi, ichi dichaletesheli nsañu yayiwahi ayishimwini nikudi afu, kulonda akatweshi kuhanda kwesekeja nanochu chamonañayi Nzambi hela chakwila ayisompesha dehi mumujimba wawuntu kwesekeja nachamonañawu antu.

7 Hela chochu, kukuma kwayuma yejima kunaswini dehi kwakwihi. Dichi toñojokenuña mwamaana nawa mpinji yejima ikalenu adiloñesha* kulonda mulombeña. 8 Kubombela hayuma yejimiyi, dikeñenu chikupu wumu namukwawu, muloña kukeña kwabutaña hanshidi jajivulu. 9 Ikalenu nachisambu kudi wumu namukwawu chakadi kutooba. 10 Kwesekeja nachawaana chatambulayi muntu-himuntu, yachizatisheña hakudikalakela wumu namukwawu nanochu chimudi añamba amawahi aluwi lwaNzambi lwasweja lwamwekenaña munjila jashiyashana. 11 Neyi kudi muntu wukweti wuswa wakuhosha, yahoshi mazu akufuma kudi Nzambi; neyi kudi muntu wukweti wuswa wakukalakela akwawu, yakalakaleña kushindamena hañovu jahanañayi Nzambi; kulonda Nzambi amulemeshi muyuma yejima kuhitila mudi Yesu Kristu. Kulema niñovu jekala jindi haya nyaaka nanyaaka. Ameni.

12 Enu akwetu itwakeña, bayi muhayama muloña wakweseka kumunakuhitamu kudi neyi kesi, nakumona neyi kwiji himuneluki chuma chinakuyimwekenaku. 13 Kwambukaku, chineli munakumona kukala kwokumu neyi kwamweniyi Kristu, twalekenuhu nakuzañalala, kulonda neyi kulema kwindi anakusololi dehi, mwakazañalali nikutiya kuwaha chikupu. 14 Neyi anakuyisawula* kukoola ijina daKristu, mukweti muzañalu, muloña spiritu yakulema, dikwila nawu spiritu yaNzambi, yidi hadi enu.

15 Hela chochu, ami hinnakukeña muntu hela wumu hakachi kenu yakabakani muloña wakwikala mukwakujaha antu hela ikombi hela muntu watama hela mukwakudiñija munsañu jawantu acheñiku. 16 Ilaña neyi kudi muntu wukukabakana muloña wakwikala mukwaKristu, bayi yatiya nsonyiku, ilaña yatwalekihu kumulemesha Nzambi iku anakumutena idi ijina. 17 Muloña yinu himpinji yatoñolawu yawunsompeshi wukutachikila mwitala daNzambi. Dichi neyi wukutachikila kudi etu, hanu dinu chakekala ñahi kudi antu akaanaña kwovwahila nsañu yayiwahi yaNzambi? 18 “Neyi mukwakuloña hakwila nawu amwamwini chiña yazata nañovu chikupu, hanu dinu chakekala ñahi kudi muntu wabulaña kumwakama Nzambi nikudi mukwanshidi?” 19 Dichi dinu, antu ejima anakukabakana muloña wakwila mwaya nkeñelu yaNzambi, atwalekihu kudikunjika* awenawu kudi Nleñi washinshika iku anakwila mwamuwahi.

5 Dichi, chineli nidi mukwenu mukulumpi,* chinsahu wamweni makabi aKristu nawa akalemeshelawu hamu nawatondewa mukulema kukasololawu, inakuyilembelela* akulumpi adi mukachi kenu nami: 2 Biñenuña mukanka wanyikoku yaNzambi wunayikunjikiwu nawu muwuhembeña, hakwikala atulama,* bayi mukalakaleña chakuyikanjikijaku, ilaña mukalakaleña namuchima wakudihana kudi Nzambi; bayi kufwila kuheta munjila yawupwapokiku, ilaña mukudikeñela chikupu; 3 bayi mwikala anyanta jawantu anekali answana jaNzambiku, ilaña ikalenuña akutalilahu kudi mukanka wanyikoku. 4 Nawa kabiña muneni chakamusololawu, enu mwakatambwila chibaaba chakulema chabulaña kufukuluka.

5 Mwomumu nawa ninenu anyikwenzi, ovwahilenuña akulumpi. Ilaña wejima wenu dizozenuña* kudi wumu namukwawu, muloña Nzambi wadikañaña nawakwakudivwimba, ilaña akwakudizoza wayitiyilaña luwi lwasweja.

6 Dichi, dizozenu ­mwishina dachikasa chaNzambi chañovu kulonda yakayituumbakeshi mumpinji yatelela. 7 Muumbilenuña kwakama* kwenu kwejima, muloña yena wayakamenaña. 8 Hembenuña yitoñojoka yenu, tonenuña! Mukwankunyi nenu Diyabolu wendujolaña neyi mutupa wunakubuluma, wunakukeñakeña watela kudayi. 9 Ilaña dikañenuña nindi, ikalenu akola mbe-e muchikuhwelelu, nanochu chimuneluki nenu makabi wowamu imunakuhitamu enu, diwu anakuhitamu nianakwenu ejima mukaayi. 10 Ilaña hanyima yakwila munakabakani dehi hakapinji kantesha, Nzambi waluwi lwasweja lwejima wayitambikili kukulema kwindi kwahaya nyaaka muloña wakudikunda naKristu, wakamanisha yomweni kuyidizisha. Wakayikolesha, wakayinka ñovu, wakayishimatisha chikupu. 11 Kudi yena kwiikali ñovu haya nyaaka. Ameni.

12 Nayisonekeli enu mazu antesha kuhitila mudi Silivanusi* inamonaña kwikala manakwetu washinshika, kulonda niyikoleshi nikuyileja wunsahu waweni chikupu nami ilu hiluwi lwaNzambi lwalala. Kolelenuña chikupu muluwi lwenilu. 13 Mumbanda watondewa neyi enu wudi muBabiloni nayimushi, mwanami Maku niyena nayimushi. 14 Dimushenu wumu namukwawu nakudifufwa kwakukeña.

Enu ejima mwadikunda naKristu, kuwunda kwiikali nanenu.