MUKANDA WAMUCHIYEDI WASONEKELIYI PETULU
1 Ami Shimona Petulu, nduñu nawa kapostolu kaYesu Kristu, inakusonekela antu ejima adi nachikuhwelelu chalema neyi chetu kuhitila mukuloña kwaNzambi yetu niChamwinu chetu Yesu Kristu:
2 Luwi lwasweja nikuwunda jiyivulili enu kuhitila mukwiluka kwalala kwakumwiluka Nzambi niYesu Mwanta wetu, 3 muloña ñovu jaNzambi jinatwinki* yuma yejima yatukwashaña mukuhanda kwetu nimukumwakama Nzambi kuhitila mukwiluka kwalala kwaNowu watutambikili nakulema kwindi nikuwaha kwindi. 4 Kuhitila muyumiyi, natwinki* chikaninu chalema nawa chasweja kutoha, kulonda mwiikali nayilwilu neyi yaNzambi kuhitila muyumiyi, nanochu chimunapuluki kukutoka kwamukaayi kwenzaña nakufwila kwatama.*
5 Muloña wachumichi, zatenu nañovu chikupu kulonda kuchikuhwelelu chenu mubombeliku kuwaha, kukuwaha kwenu mubombeliku kwiluka, 6 kukwiluka kwenu mubombeliku kudiyuula, kukudiyuula kwenu mubombeliku kuumika, kukuumika kwenu mubombeliku kumwakama Nzambi, 7 kukumwakama Nzambi kwenu mubombeliku kukeña kwakukeña anakwenu, kukukeña kwenu kwakukeña anakwenu mubombeliku kukeña. 8 Muloña neyi iyi yilwilu yiikala mudi enu nawa yivula nankashi, yikuyileñela mubuli kwikala azeya hela mubuli kuleka kusoña nyikabu kutalisha kukwiluka kwalala kwakumwiluka Mwanta wetu Yesu Kristu.
9 Muloña muntu wejima wukubula kwikala naniyi yilwilu, himputamesu, nabuti hamesu indi kuchiina kumona chejeji,* nawa navulameni kutookesha kwamutookesheliwu kunshidi jindi jakoñeliyi kunyima. 10 Dichi enu anakwami, zatenu nañovu kulonda mukwatishi kukukooleka kwenu kwakuyitambika nikwakuyitonda, muloña neyi mutwalekahu kubombelaku iyi yilwilu, chakadi nikujina mwakakañanya wanyi. 11 Kafwampi, neyi mwila mwenimu, akayikiswila chikupu nawa akayiteja kwiñila muWanta wahaya nyaaka waMwanta wetu nawa Chamwinu chetu Yesu Kristu.
12 Muloña wachumichi, mpinji yejima nakeñaña kuyanukisha kutalisha hayumiyi, hela chakwila mwayiluka dehi nawa mwashimata dehi chikupu muchalala chidi mudi enu. 13 Ilaña kwesekeja nakumona kwami, chachiwahi ami kuyanukisha enu cheñi hayumiyi hampinji yinichidi muniyi tabanaka,* 14 nanochu chinneluki nami katataka nishiyi iyi tabanaka, neyi chanlejeliyi Mwanta wetu Yesu Kristu chakadi kuhita mumbadi. 15 Mpinji yejima nukuzataña nañovu jami jejima kulonda neyi nayi dehi, mwakatweshi kwanuka* iyi yuma enu aweni.
16 Chitwayilejeli hañovu nikwikalahu kwaMwanta wetu Yesu Kristu, hitwashindameneni hampanji jakutwamba jahosheleñawu antu mukubabala kwawuku, ilaña twekalili ayinsahu amweni kulema kwindi kwabadika. 17 Muloña yena watambwilili kulema nikalemesha kufuma kudi Nzambi Tata hampanji yamulejeliwu awa mazu* kuhitila mukulema kwabadika nawu: “Iwu diyi Mwanami, inakeña, inatiyaña kuwaha.” 18 Chalala, awa mazu twayitiyili anakufuma mwiwulu hampinji yitwadiña nindi hampidi yajila.
19 Dichi tukweti mazu awuprofwetu alala chikupu, nawa enu munakwila chiwahi nankashi chimunakushaku maana kunawa mazu awuprofwetu neyi kwinoñu dinakutoñekela mwiluña mudi mwidima (sampu nichikukucha nawa nichikusela ntanda wakumacha) munyichima yenu. 20 Muloña enu munasambili kwiluka chumichi nenu, kwosi wuprofwetu wamuNsona wadilumbulwilañawu antu awenawuku. 21 Muloña kwosi wuprofwetu wenjili kwesekeja nankeñelu yamuntuku, ilaña antu ahosheleña jafumineña kudi Nzambi kwesekeja nachayilombweliwu* naspiritu yajila.
2 Hela chochu, mukachi kanawa antu mwafumini niatuprofwetu akutwamba, neyi chimukafuma nimukachi kenu antañishi akutwamba. Wenawa akaleta chaambu mukuswamujoka chikajilumuna chikuhwelelu chenu nawa akamukaana niyomweni wayilandili, nakudiletela awenawu kujilumuka swayi-swayi. 2 Kubombelahu, antu amavulu akalondela yilwilu yawu yawukapwa nsonyi,* nawa muloña wawena, njila yachalala akayitena kutama. 3 Cheñi nawa, muloña walwisu lwawu akayidimba enu namazu akutwamba. Ilaña wunsompeshi wawu wayifuukwililiwu kushankulu, hiwunakulabaku, nawa kujilumuka kwawu, chalala kunakwinza.
4 Chakadi nikujina, Nzambi wababesheli añelu avulumwini nakuyinatila muTatarusi* nikuyikasa mumaleñi* amwidima wasweja chikupu nakuyihemba kulonda akayisompeshi. 5 Nawa wababesheli nikaayi kakushankulu, ilaña wahandishili Nowa mukwakushimwina kuloña hamu nawantu amakwawu 7 hampinji yaleteliyi dibaji mukaayi mwadiña antu abulileña kumwakama Nzambi. 6 Nawa wayifwishili namuloña kuhitila mukwocha nyisumba yaSodoma naGomora yejima, chumichi chekala chakutalilahu kudi antu abulaña kumwakama Nzambi kutalisha hayuma yinakwinza. 7 Nawa wapulwishili Loti muntu waloña, owu waneñeli chikupu muloña wayilwilu yawukapwa nsonyi* yawantu afumpileña nshimbi, 8 muloña hefuku-hefuku, iwu muntu waloña wadiña nakukabisha wumi* windi waloña muloña wayilwilu yakufumpa nshimbi yamweneñayi nikutiya hampinji yashakamineñayi mukachi kanawa antu. 9 Dichi, Yehova weluka chakupulwisha antu amwakamaña adi mukweseka, ilaña antu abula kuloña ayihemba kulonda akayijilumuni* hefuku dawunsompeshi, 10 sweje-e dinu, antu adiñijaña muyilwilu yawuvumbi nawakwawu kulonda atamishi akwawu nawa adiwulaña akwawuswa.*
Chineli ahamuka nawa akeñaña kwila munakeñi nyichima yawu, hiyatiyaña woma kuyihosha antu akulema mazu atamaku, 11 ilaña añelu, hela chakwila akweti ñovu chikupu niwuswa kubadika awa antu, hiyafwishaña namuloña awa antu namazu akasawuntuku, muloña wakumulemesha Yehova. 12 Ilaña awa antu asawulaña yuma yabula kwilukawu, akayijilumuna muloña wayilwilu yawu yatama, neyi anyama abulaña kutoñojoka alombolewaña namaana asemukañawu nawu,* nawa asemukaña kulonda ayikwati nikuyijilumuna, 13 makabi akekala wufwetu wayilwilu yawu yatama.
Wena amonaña nawu chachiwahi kudiñija muchihandilu chakudiluñisha, hela tuhu mumpinji yamwaana. Adi neyi mabeña ahachakuvwala nimahuji akumesu muntañishilu yawu yakudimbana iku anakudiila hamu nanenu. 14 Mesu awu enzala wujila, hiyatweshaña kuleka kukoña nshidiku nawa akokolaña antu* azeya muchikuhwelelu.* Akweti nyichima yadizishawu lwisu. Hiyanyana ashiñewa. 15 Anayisenwishi muloña wakushiya njila yoloka. Analondeli njila yaBalami mwana kaBeyori, owu wakeñeli wufwetu wayilwilu yatama, 16 ilaña amuzuwilili muloña wafumpili nshimbi jaloña. Kanyama kabulaña kuhosha kasendaña yiteli kahosheli nezu damuntu, kakañesheli yilwilu yakuzaluka yaniwu kaprofwetu.
17 Awa antu hituseloki twakadi menji, himbundu yalelulañawu kudi mpepela yasweja yamankanda, nawa anayihembeli mwidima wasweja chikupu. 18 Ahoshaña yuma yatiyakanaña neyi yalema nankashi, ilaña yamukunkulwayi. Kuhitila mukufwila yuma yafwilaña mujimba niyilwilu yawukapwa nsonyi,* anakokoli antu anafumi tuhu nakutemuka mudi antu akoñaña yuma yatama. 19 Awa antu atama anakukana nawu antu alondelaña yuma yahoshañawu wena akekala asubuka, kutoña awenawu hiyanduñu akutoka; muloña neyi muntu wejima amwimika mushindu kudi mukwawu, dikwila nawu nekali nduñu yanowu wunamwimiki mushindu.* 20 Chalala, neyi hanyima yakwila anatemuki dehi kufuma kukuditamisha kwamukaayi kuhitila mukwiluka kwalala kwakumwiluka Mwanta nawa Chamwinu Yesu Kristu, ilaña adiñija cheñi muyumiyi nawa yiyimika mushindu, dikwila nawu chihandilu chawu chakukuminina chinatami chikupu kubadika chakusambila. 21 Chadi kuwaha neyi abulili kwiluka chikupu njila yakuloña, kubadika hanyima yakwiluka iyi njila, hiyakuleka kulondela lushimbi lwajila luyatambwililiwu. 22 Dichi chishimu chalala chinashikijewi kudi wena, chakuhosha nawu: “Kawa nafunti cheñi kumasanjila indi, ningulu* anaweleshiwu nafunti cheñi nakudivuba mumalowa.”
3 Enu akwetu itwakeña, iwu diwu mukanda wamuchiyedi winnakuyisonekela wakusañumuna wuswa wenu wakutoñojoka chiwahi kuhitila mukuyanukisha enu nsañu jimu, neyi chinayisonekeleli mumukanda wami watachi, 2 nami mwanukeña yuma yahosheliwu dehi* atuprofwetu ajila nilushimbi lwaMwanta nawa Chamwinu, lwayinkeliwu kuhitila mudi apostolu jenu. 3 Chatachi, ilukenu chumichi nenu, mumafuku akukuminina mwakenza akwakuseha yuma yayiwahi nawa akakoña yuma yatama yafwilañawu awenawu, 4 nakuhosha nawu: “Indi chikaninu chakwikalahu kwindi chakanawu chidi kudihi? Muloña kufuma tuhu mpinji yafwiliwu ankakulula jetu, yuma yejima yinatwalekihu kwikala neyi chiyadiña hampinji yatachikiliwu kuleña yuma.”
5 Muloña adiwulaña mumushikila ichi chikuma chalala chakwila nawu, mawulu adiña kwoku kushankulu nawa iseki adaambwili kufuma kumenji nimukachi kamenji nezu daNzambi; 6 nawa muloña wayumiyi, kaayi kamuyina mpinji kajilumukili hampinji yikenzelelimu namenji. 7 Ilaña kuhitila mwizu dodimu, mawulu nimaseki adiku hayinu mpinji, anayihembeli kesi nawa anakuyihemba kushika nikwifuku dawunsompeshi nawa dakujilumuna antu abulaña kumwakama Nzambi.
8 Hela chochu, enu akwetu itwakeña, bayi mudiwula ichi chikuma chalala chakwila nawu kudi Yehova ifuku dimu desekana nayaaka 1,000 nawa yaaka 1,000 yesekana nefuku dimuku. 9 Yehova hanakulaba kutalisha hakushikija chikaninu chindi neyi chatoñojokañawu antu amu nawu nalabiku, ilaña wadiwunjika nanenu muloña hakeñaña muntu hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima. 10 Ilaña ifuku daYehova dakenza neyi chenzañayi ikombi, dichi hefuku denodu mawulu akahita nalushindu lwasweja, ilaña yuma yamwiwulu yakasuñunuka muloña wakutata chikupu neyena, nawa iseki ninyidimu yadu akayisolola hatooka.
11 Chineli yuma yejimiyi yikasuñunuka chochichi, toñojokenu muchidi wawantu imwatela kwikala. Mwatela kwikala antu akweti yilwilu yakujila nawa kalakalenuña nyidimu yakumwakama Nzambi, 12 hampinji yimunakuchiñilila nikwanuka* chikupu kwikalahu kwefuku daYehova, mwakajilumwinawu mawulu nanyizuzu yakesi, nawa yuma yamwiwulu niyahamaseki yikasuñunuka neyena dasweja chikupu! 13 Ilaña kudi mawulu amaha niiseki dadiha jitwatalilaña kwesekeja nachikaninu chindi, nawa mwenimu dimu mwakekalaña kuloña.
14 Dichi, enu akwetu itwakeña, chineli munakutalila yumiyi, zatenu nañovu jenu jejima kulonda akayiwani akadi ihuji, akadi hakuyinkela muloña nawa akayiwani mukuwunda. 15 Kubombelahu, monenuña kudiwunjika kwaMwanta wetu nenu hiwamwinu, neyi chasonekeliyi nimanakwetu itwakeña Pawulu kwesekeja namwaya maana amwinkeliwu. 16 Kafwampi, yena wasoneka kutalisha hayumiyi munyikanda yindi yejima. Hela chochu, yuma yikwawu yidi muniyi nyikanda yakala kutiyishisha nawa yumiyi anakuyiheñesha kudi akwakuyamba* nikudi antu azeya muchikuhwelelu,* neyi chelañawu naNsona jikwawu nakudiletela awenawu kujilumuka.
17 Dichi enu akwetu itwakeña, chineli munelukili chadimu yumiyi, dihembenuña kulonda abuleña kuyiluwañesha kudi akwakuyamba niantu azeya muchikuhwelelu nayilwilu yatama yawakwakufumpa nshimbi nakuyileñela enu kubula kwimana chakola* mbe-e munjila yaloña. 18 Ilaña twalekenuhu kupama muluwi lwasweja nimukwiluka kwakumwiluka Mwanta wetu nawa Chamwinu Yesu Kristu. Kudi yena kwiikali kulema hayinu mpinji nihaya nyaaka nanyaaka. Ameni.
Hela “jinatwinki mukukasunuka.”
Hela “natwinki mukukasunuka.”
Hela “muloña walwisu.”
Hela hekwawu, “himputamesu, wamwenaña hakamwihi.”
Hela “munidi itenti,” dikwila nawu, mujimba windi wahamaseki.
Hela “kutena.”
MuchiGiriki, “idi izu.”
MuchiGiriki, “chayisendeliwu; chayihoshesheliwu.”
MuchiGiriki, aselegeya hiizu dalumbulula yuma yayivulu. Talenu Kulumbulula.
Talenu Kulumbulula.
Hela hekwawu, “mumabuku.”
MuchiGiriki, aselegeya. Talenu Kulumbulula.
Talenu Kulumbulula.
MuchiGiriki, “kuyiketulaku.”
Hela “mawanta antuumba.”
Hela “achisemwa.”
Hela “mawumi.”
Hela “abula kwimana chakola.”
MuchiGiriki, aselegeya. Talenu Kulumbulula.
Hela “anamwimiki mushindu kudi chuma, dikwila nawu, nekali nduñu yanochu chuma.”
Hela “niñulu.”
Hela “yuma yashimwiniwu dehi.”
Hela “nikufwila.” MuchiGiriki, “kunyakesha.”
Hela “abula kudiza.”
Hela “abula kwimana chakola.”
Hela “kwimana akola.”