MUKANDA WATACHI WASONEKELIYI YOWANU

1 Tunakuyisonekela kutalisha hadi owu wadiñaku kufuma kukutachika waleta mazu awumi itwatiyili, itwamweni namesu etu, itunakuhemba nikukwata namakasa etu, 2 (chalala, wumi awusolweli, tunawumoni, tunakushimuna wunsahu hadi wena nawa tunakuyileja enu wumi wahaya nyaaka owu wadiña naTata nawa watusolweleliwu), 3 chuma chitunamoni nikutiya, tunakuyilejachu ninenu kulonda ninenu nawa mudikundeña* hamu nanetu. Nawa iku kudikunda kwetu, dikutwadikunda naTata niMwanindi Yesu Kristu. 4 Dichi, tunakusoneka yumiyi kulonda muzañalu wetu wusweji chikupu.

5 Iyi diyi nsañu yitwatiyili kudi yena nawa yitunakukeña kuyileja enu netu: Nzambi hichejeji, nawa mudi yena* himwekala mwidima hela wantiku. 6 Neyi tuhosha netu, “Twadikunda nindi,” ilaña iku tunakutwalekahu kwenda mumwidima, dikwila nawu tunakutwamba nawa hitunakwila mwaya chalalaku. 7 Hela chochu, neyi tunakwenda muchejeji neyi chekalayi yomweni muchejeji, dikwila nawu twadikunda wumu namukwawu, nawa mashi aMwanindi Yesu atutookeshaña kunshidi jejima.

8 Neyi tuhosha netu, “Hitukweti nshidiku,” dikwila nawu tunakudidimba etu aweni nawa chalala hichidi mudi etuku. 9 Nzambi washinshika nawa waloña chakwila neyi tushimuna nshidi jetu, wukutwanakena nshidi jetu nikututookesha kuyuma yejima yabula kuloña. 10 Neyi tuhosha netu, “Kanda tuvulumuneñahu dehi,” dikwila nawu tunakumwilisha yena kwikala mukwakutwamba, nawa mazu indi hiyadi mudi etuku.

2 Enu anyanami inakeña, inakuyisonekela yumiyi kulonda mubuli kukoña nshidi. Hela chochu, neyi muntu yakoña nshidi, tukweti nkwashi* mukwakuloña wudi naTata, yowu Yesu Kristu. 2 Nawa yena diyi mulambu wakufumishahu* nshidi jetu, hela chochu, bayi neyi jetu hohuku, ilaña nijakaayi kejima. 3 Neyi tutwalekahu kuhemba nshimbi jindi, chumichi chikumwekesha nawu tunamwiluki. 4 Muntu wahoshaña nindi, “Ami namwiluka,” ilaña hahembaña nshimbi jindiku, dikwila nawu himukwakutwamba nawa chalala, hichidi mudi iwu muntuku. 5 Ilaña muntu wahembaña mazu indi, dikwila nawu kukeña kwakumukeña Nzambi anakuwanishi kuhitila mudi iwu muntu. Nawa kuhitila muchumichi, tuneluki netu twadikunda nindi. 6 Muntu wahoshaña nindi wadikunda nindi, watela kutwalekahu kuhanda neyi chahandileñayi Yesu.*

7 Enu akwetu itwakeña, hinnakuyisonekela enu lushimbi lwaluhaku, ilaña lwolushimbi lwalukulu lumwekala nalu kufuma kukutachika. Ilu lushimbi lwalukulu, himazu imwatiyili. 8 Cheñi nawa, inakuyisonekela lushimbi lwaluha, lwalala kudi yena nikudi enu, muloña mwidima wunakuhita nawa chejeji chalala, chinakutoñeka.

9 Muntu wahoshaña nindi wudi muchejeji iku wahela manakwindi, owu muntu wuchidi mumwidima. 10 Muntu wakeña manakwindi, dikwila nawu wudi muchejeji nawa mudi yena himudi chuma chakuhukeshaku. 11 Ilaña muntu wahela manakwindi, dikwila nawu wudi mumwidima, nakwenda mumwidima nawa haneluki kunakuyayiku, muloña mwidima wunaputishi mesu indi.

12 Enu anyanami inakeña, inakuyisonekela muloña nshidi jenu anayanakeniju muloña wejina dindi. 13 Enu atata jawantu, inakuyisonekela muloña munamwiluki owu wafuma kukutachika. Enu anyikwenzi, inakuyisonekela muloña munamwimiki watama mushindu. Enu anyana anyanya, nayisonekeli muloña munamwiluki Tata. 14 Enu atata jawantu, nayisonekeli muloña munamwiluki owu wafuma kukutachika. Enu anyikwenzi, nayisonekeli muloña wañovu yimukweti nimazu aNzambi adi mudi enu nawa munamwimiki watama mushindu.

15 Bayi mukeña kaayi hela yuma yidi mukaayiku. Neyi muntu wakeña kaayi, dikwila nawu kukeña kwakumukeña Tata hikudi mudi yenaku; 16 muloña yuma yejima yidi mukaayi, dikwila nawu yuma yafwilaña mujimba, yuma yafwilaña mesu nikudisamba nayuma yikwetiyi* muntu, hiyafumaña kudi Tataku, ilaña yafumaña mukanu kaayi. 17 Kubombelahu, kaayi kanakuhita nikufwila kwaku, ilaña muntu welaña nkeñelu yaNzambi watwalekañahu kushakama haya nyaaka nanyaaka.

18 Enu anyana anyanya, yinu himpinji yakukuminina, nawa neyi chimunatiyi nawu mukwakumudimbulula Kristu nakwinza, hela tuhu hayinu mpinji akwakumudimbulula Kristu anamwekani dehi, nawa chumichi chinatuleteshi kwiluka netu tunakushakama mumpinji yakukuminina. 19 Wenawa afumini mudi etu, muloña adiña etu wanyi;* muloña neyi adiña etu, mutenowu adi kutwalekahu kushakama nanetu. Ilaña wena afuminimu kulonda chimwekani hatooka to-o nawu, bayi neyi ejima wawu ekala kukabadi ketuku. 20 Hakwila enu ayiwayisha dehi kudi owu wajila, nawa wejima wenu muneluki chalala. 21 Nayisonekeli bayi neyi muloña wakwila mwabula kwiluka chalalaku, ilaña muloña wakwila mwachiluka, nawa nihamuloña wakwila nawu kwosi kutwamba kwafumaña muchalalaku.

22 Indi mukwakutwamba hinyi, komana hiyowu muntu wakaanaña nindi Yesu hidiyi Kristuku, tahindi? Muntu wamukaanaña Tata niMwana, diyi mukwakumudimbulula Kristu. 23 Muntu wejima wamukaanaña Mwana, hiyamutiyaña kuwaha kudi Tataku. Ilaña muntu wejima wamwitejaña Mwana, diyi atiyañawu kuwaha kudi Tata. 24 Ilaña enu, yuma yimunatiyi kufuma kukutachika, yitwalekihu kwikala mudi enu. Neyi yuma yimunatiyi kufuma kukutachika yikutwalekahu kwikala mudi enu, ninenu nawa mukutwalekahu kudikunda naMwana niTata. 25 Kubombelahu, chuma chatukanayi yomweni dichenichi, wumi wahaya nyaaka.

26 Nayisonekeli yumiyi kutalisha hadi antu anakukeña kuyiluwañesha enu. 27 Ilaña enu, Nzambi nayitondi* naspiritu yindi nawa iyi spiritu yidi mudi enu, nawa himunakukeñeka muntu hela wumu wakuyitañishaku; ilaña iku kutondewa naspiritu yajila kwalala, kwakutwamba wanyi nawa kunakuyidizisha enu yuma yejima. Twalekenuhu kudikunda nayena neyi chayidizishiliwu kudi spiritu yajila. 28 Dichi dinu, enu anyana inakeña, twalekenuhu kudikunda nindi kulonda neyi anamusololi dehi, tukahosheña nakukasunuka nikubula kufuma kudi yena nansonyi hakwikalahu kwindi. 29 Neyi mweluka nenu yena waloña, dikwila nawu mweluka nawa cheñi nenu, muntu wejima welaña mwaloña navwaliki kufuma kudi yena.

3 Talenu kukeña kwasweja kwatumwekeshelayi Tata, hakututena nawu anyana kaNzambi! Nawa ichi dichitwekala. Ichi dichaletesha kaayi kabuli kutwiluka, muloña kaayi hikamwiluka yenaku. 2 Enu akwetu itwakeña, ichi dinu tudi anyana kaNzambi, ilaña chitwakekala, kanda achisololi. Tweluka netu neyi yena anamusololi dehi, twakekala neyi yena, muloña etu twakamumona neyi chochekalayi. 3 Nawa muntu wejima wukweti iku kuchiñeja mudi yena, dikwila nawu waditookeshaña yomweni neyi chatookayi Yesu.

4 Muntu wakoñaña nshidi, dikwila nawu nakukoña yuma yakuluwalala nawa nshidi hikukoña yuma yakuluwalala. 5 Mweluka cheñi nenu, amusolweli kulonda yafumishihu nshidi jetu, nawa mudi yena himwekala nshidiku. 6 Muntu watwalekañahu kudikunda nayena hakoñaña nshidiku; nawa muntu wudi wejima wakoñaña nshidi kanda yamumoneñahu dehi hela kumwilukaku. 7 Enu anyana inakeña, bayi ayidimba kudi muntu hela wumuku; muntu welaña mwaloña, niyena waloña neyi chekalayi Yesu waloña. 8 Muntu wakoñaña nshidi, wekala wakukabadi kaDiyabolu, muloña Diyabolu natwalekihu nakukoña nshidi kufuma kukutachika.* Muloña wachumichi, dichamusolweleliwu Mwana kaNzambi kulonda yakisañani* nyidimu yaDiyabolu.

9 Muntu wejima wunavwaliki kudi Nzambi hakoñaña nshidiku, muloña mbutu* Jindi jatwalekañahu kwikala mudi muntu wamuchidiwu nawa hanateli kukoña nshidiku, muloña navwaliki kudi Nzambi. 10 Dichi, tunateli kwiluka anyana kaNzambi nianyana kaDiyabolu kuhitila muchumichi: Muntu wudi wejima wabulaña kwila mwaloña nimuntu wabulaña kukeña manakwindi, hiyadi akukabadi kaNzambiku. 11 Muloña iyi diyi nsañu yimwatiya dehi kufuma kukutachika yakwila nawu, twatela kudikeña wumu namukwawu; 12 bayi kufwana Kenaku, wadiña wakukabadi kanowu watama nawa wajahili manakwindi. Muloñadi chamujahililiyi? Muloña nyidimu yaKena yadiña yatama, ilaña nyidimu yamanakwindi yadiña yaloña.

13 Enu anakwami, bayi muhayama hakwiluka nenu kaayi kayihela enuku. 14 Etu tuneluki netu tunafumi dehi kukufwa nakwinza kuwumi, muloña twakeña anakwetu. Muntu wabulaña kukeña anakwindi, dikwila nawu yena wuchidi mukufwa. 15 Muntu wejima wahela manakwindi, himukwakujaha antu, nawa enu mweluka nenu kwosi muntu watwalekañahu nakujaha antu wakatambwila wumi wahaya nyaakaku. 16 Tuneluki nsañu yahosha hakukeña muloña wanowu walambwili wumi windi kukoola etu, nawa ninetu twatela kuhana wumi wetu kukoola anakwetu. 17 Ilaña muntu wejima wukweti maheta amukanu kaayi nawa nakumona manakwindi wudi mukukaankila ilaña kumutiyila wushona nehi, indi kukeña kwakumukeñayi Nzambi kukutwesha kwikala ñahi mudi yena? 18 Enu anyana inakeña, hitwatela kukeña akwetu namazu hela hakanwaku, ilaña munyidimu nimuchalala.

19 Kuhitila muchumichi, dimutwakelukila netu tudi muchalala, nawa twakeluka chikupu munyichima* yetu netu Nzambi watukeña 20 hela chakwila nyichima yetu yikutuhiisha muyuma yikwawu, muloña Nzambi wabadika nyichima yetu nawa weluka yuma yejima. 21 Enu akwetu itwakeña, neyi nyichima yetu yatuhiishaña wanyi, dikwila nawu tunateli kuhosha nakukasunuka naNzambi; 22 nawa chuma chejima chitwalombaña kudi yena, watwinkañachu, muloña twahembaña nshimbi jindi nawa twakoñaña yuma yamutiyishaña kuwaha. 23 Chalala, ilu dilu lushimbi lwindi lwakwila nawu: tukuhweleli mwijina daMwanindi Yesu Kristu nikudikeña wumu namukwawu neyi chatulejeliyi. 24 Kubombelahu, muntu wahembaña nshimbi jindi watwalekañahu kudikunda nayena, nawa niyena wadikunda namuntu yenowu. Tuneluki netu watwalekañahu kudikunda nanetu muloña waspiritu yatwinkeliyi.

4 Enu akwetu itwakeña, bayi mwiteja mazu ejima* atiyakanaña neyi kwiji onenewaku, ilaña mazu wenowu atiyakanaña neyi onenewa,* yesekenuña kulonda mwiluki neyi afuma kudi Nzambi hela nehi, muloña atuprofwetu amavulu akutwamba anapalañeni mukaayi.

2 Ichi dichi mwatela kwiluka mazu onenewa afuma kudi Nzambi: Mazu ejima onenewa etejaña nawu Yesu Kristu wenjili mumujimba wawuntu, afuma kudi Nzambi. 3 Ilaña mazu ejima onenewa abulaña kwiteja chumichi kutalisha hadi Yesu, hiyafuma kudi Nzambiku. Kubombelahu, awa himazu onenewa afuma kudi mukwakumudimbulula Kristu imwatiyili dehi nawu nakwinza, nawa ichi awa mazu anashiki dehi mukaayi.

4 Enu anyana inakeña, enu mudi akukabadi kaNzambi nawa wena munayimiki mushindu, muloña yena wadikunda nanenu nabadiki owu wadikunda nakaayi. 5 Wena ekala akukabadi kakaayi; dichahoshelañawu yuma yamukaayi nawa kaayi kayitiyililaña. 6 Etu tudi akukabadi kaNzambi. Muntu wejima wamwiluka Nzambi, watutiyililaña; ilaña muntu wejima wabula kumwiluka Nzambi, hatutiyililañaku. Mwenimu dimutwelukilaña mazu onenewa achalala nimazu onenewa akutwamba.

7 Enu akwetu itwakeña, tutwalekenuhu kudikeña wumu namukwawu, muloña kukeña kwafuma kudi Nzambi, nawa muntu wejima wakeñaña akwawu, wavwalika kudi Nzambi nawa diyi wamwiluka Nzambi. 8 Muntu wejima wabulaña kumwekesha kukeña, hamwiluka Nzambiku, muloña Nzambi hikukeña. 9 Muloña wachumichi, Nzambi wamwekesheli kukeña kwindi hadi etu hakutemesha mukaayi Mwanindi wumu hohu kulonda tukatweshi kwikala nawumi kuhitila mudi yena. 10 Imu dimwatalisha iku kukeña, Nzambi diyi watukeñeli etu nakututemeshela Mwanindi kwikala mulambu wakufumishahu* nshidi jetu, bayi neyi yetu twamukeñeliku.

11 Enu akwetu itwakeña, neyi ichi dichi chatukeñeliyi Nzambi, dikwila nawu ninetu twatela kudikeña wumu namukwawu. 12 Kwosi muntu hela wumu wamumonahu dehi Nzambiku. Neyi tukutwalekahu kudikeña wumu namukwawu, dikwila nawu Nzambi wukutwalekahu kwikala nanetu nawa kukeña kwindi kunawanini dehi mudi etu. 13 Kuhitila muchumichi, tweluka netu twadikunda nayena niyena nawa wadikunda nanetu, muloña natwinki spiritu yindi. 14 Kubombelahu, etu tunadimweni namesu etu kapu nawa tunakushimuna wunsahu netu, Tata watemesha dehi Mwanindi kwikala Chamwinu chakaayi. 15 Muntu wejima wetejaña nindi Yesu hiMwana kaNzambi, Nzambi wadikunda namuntu wamuchidowu nawa yenowu muntu wadikunda naNzambi. 16 Nawa etu tuneluki nikwiteja kukeña kwatukeñayi Nzambi.

Nzambi hikukeña, nawa muntu watwalekañahu kushakama mukukeña diyi wadikunda naNzambi, Nzambi niyena watwalekañahu kudikunda naniwu muntu. 17 Dichi kuhitila mwenimu, kukeña anakuwanishi dehi mudi etu kulonda tukatweshi kuhosha nakukasunuka* mwifuku dawunsompeshi, muloña neyi chochadiyi yena* dichi chitudi ninetu mukanu kaayi. 18 Kukeña hikwekala nawomaku, ilaña kukeña kwawanina kwamanishaña woma, muloña woma watukañeshaña kwikala akasunuka. Chalala, muntu watiyaña woma kanda yawanini mukukeña. 19 Etu twamwekeshaña kukeña, muloña yena diyi wasambilili kutukeña.

20 Neyi muntu yahosha nindi, “Ami namukeña Nzambi,” ilaña saña ahelelayi manakwindi, dikwila nawu hintwambi. Muloña muntu wabula kukeña manakwindi amonañayi namesu, hakutwesha kukeña Nzambi abula kumonayiku. 21 Nawa tukweti ilu lushimbi lwafuma kudi yena lwakwila nawu, muntu wejima wamukeña Nzambi watela kukeña nimanakwindi nawa.

5 Muntu wakuhwelelaña nindi Yesu diyi Kristu, dikwila nawu wavwalika kudi Nzambi, nawa muntu wamukeña Nzambi, wakeña nimuntu wejima wavwalika kudi yena. 2 Neyi tukumukeña Nzambi nikuhemba nshimbi jindi, dihu dinu hitukwilukila netu twakeña anyana kaNzambi. 3 Muloña kumukeña Nzambi kwatalisha mukwila nawu tuhembeña nshimbi jindi; nawa nshimbi jindi hijakalaku, 4 muloña muntu wejima wavwalika* kudi Nzambi wemikaña kaayi mushindu. Nawa kaayi tunakimiki dehi mushindu nachikuhwelelu chetu.

5 Hinyi wunateli kwimika kaayi mushindu? Komana himuntu wakuhwelela nindi Yesu hiMwana kaNzambiku, tahindi? 6 Iwu diyi ona wenjili kuhitila mumenji nimumashi, Yesu Kristu, bayi namenji hohuku, ilaña namenji nimashi. Nawa spiritu yinakushimuna wunsahu, muloña spiritu dichalala. 7 Muloña kudi yuma yisatu yashimunaña wunsahu: 8 spiritu, menji nimashi; nawa iyi yuma yisatu yashimunaña wunsahu wowumu.

9 Neyi twetejaña wunsahu wafumaña kudi antu, dikwila nawu wunsahu wafumaña kudi Nzambi wabadika chikupu wawantu. Muloña iwu diwu wunsahu wahanañayi Nzambi, wowu wunsahu washimunayi kutalisha hadi Mwanindi. 10 Muntu wamukuhwelela Mwana kaNzambi wamwekeshaña nindi mumuchima windi wukweti yuma yamudizishawu kudi Nzambi. Muntu wabula kumukuhwelela Nzambi namwilishi kwikala mukwakutwamba, muloña yenowu muntu hanakuhweleli wunsahu wunashimuniyi Nzambi kutalisha hadi Mwanindiku. 11 Nawa iwu diwu wunsahu wakwila nawu, Nzambi watwinkeli wumi wahaya nyaaka, nawa iwu wumi wudi mudi Mwanindi. 12 Muntu wadikunda naMwana, wukweti iwu wumi; ilaña muntu wabulaña kudikunda naMwana kaNzambi, hakweti iwu wumiku.

13 Nayisonekeli yumiyi kulonda enu mwakuhwelela mwijina daMwana kaNzambi mwiluki nenu mukweti wumi wahaya nyaaka. 14 Nawa twamukuhwelela Nzambi* netu, chuma chejima chitunateli kumulomba kwesekeja namwaya nkeñelu yindi, yena watutiyaña. 15 Nawa neyi twiluka netu chuma chejima chitwamulombaña yena watutiyaña, twelukaña netu twakekala nayuma yitunamulombi, chineli tunalombi yumiyi kudi yena.

16 Neyi muntu yamona manakwindi nakukoña nshidi yabulaña kuleta kufwa, yamulombeliku, nawa Nzambi wukumwinka wumi, dikwila nawu wumi wenkañayi antu abulaña kukoña nshidi yaletaña kufwa. Kwekala nshidi yaletaña kufwa. Dichi hinamulejaña iwu muntu nami yamulombeliku muntu wakoñaña iyi nshidi yaletaña kufwaku. 17 Yuma yejima yabula kuloña hinshidi, hela chochu, kwekala nshidi yabulaña kuleta kufwa.

18 Tweluka netu muntu wejima wavwalika kudi Nzambi hakoñaña nshidiku, ilaña owu wavwalika kudi Nzambi* wamuhembaña, nawa watama hakutwesha kumukwataku. 19 Tweluka netu tudi antu jaNzambi, ilaña kaayi kejima kadi mumakasa awatama. 20 Tweluka netu Mwana kaNzambi wenza dehi nawa natwinki kashinshi* kulonda twiikali nakwiluka kwakumwiluka owu walala. Nawa kuhitila mudi Mwanindi Yesu Kristu, twadikunda nayena walala. Eñañi, iwu diyi Nzambi walala nawa diyi wumi wahaya nyaaka. 21 Enu anyana inakeña, tondolwelenu kupesha ankishi.