CHIMWEKESHU CHAMUMWEKESHELELIWU YOWANU

1 Ichi dichimwekeshu chamwekesheliyi* Yesu Kristu, chamwinkeliwu kudi Nzambi kulonda yamwekeshi kudi anduñu jindi yuma yikukeña kumwekana katataka. Yesu watemesheli kañelu kindi, nawa wamumwekesheleli nduñu yindi Yowanu ichi chimwekeshu kuhitila muyinjikijilu, 2 yeniwu washimwini wunsahu wamazu aNzambi niwunsahu washimwiniyi Yesu Kristu, niyuma yejima yamweniyi. 3 Wudi namuzañalu yowu muntu watañaña nezu dahewulu, ninowu atiyaña mazu aniwu wuprofwetu ninowu alondelaña yuma yiyasonekamu, muloña mpinji yatoñolawu yidi dehi kwakwihi.

4 Ami Yowanu, inakusonekela yipompelu 7 yekala mukabeta kaAsiya nami:

Luwi lwasweja nikuwunda jiikali nanenu, jafumaña kudi “Owu wudiku, wadiñaku nawa wunakwinza,” nawa jafumaña nikudi aspiritu 7 adi kumbidi yetanda dindi, 5 jafumaña nikudi Yesu Kristu, “Chinsahu Washinshika,” “wedi watachi kusañuka kufuma mudi afu,” nawa “Nyuuli yawanyanta ahamaseki.”

Kudi yena watukeña nawa watusubwili kunshidi yetu kuhitila mumashi indi yomweni, 6 nawa watwilishili etu kwikala wanta, niatupristu kudi Nzambi yindi nawa Tata, chalala, kudi yena kwiikali kulema niñovu haya nyaaka nanyaaka. Ameni.

7 Talenu! Yena nakwinza namavu, nawa mesu ejima akamumona, nawa antu ejima amupwikili yena; ninyichidi yejima yahamaseki yakadila makumbu muloña wayena. Chalala chumichi chakamwekana. Ameni.

8 Yehova Nzambi nahoshi nindi, “Ami yami Alefwa nawa yami Omega,* yami Owu wudiku, wadiñaku nawa wunakwinza, Wañovu Jejima.”

9 Ami Yowanu, manakwenu nawa mukwenu mumwamwenaña hamu lukadi lwolumu, imukayuulila hamu nindi muwanta nawa womikaña neyi chimwomikaña enu hakudikunda naYesu, nadiña hachituutu chatenañawu nawu Patamosa muloña nahosheleña hadi Nzambi nikushimuna wunsahu hadi Yesu. 10 Chañoneneniwu naspiritu yajila, nakashimukili nidi dehi mwifuku daMwanta, nawa natiyili kunyima yami izu dañovu neyi chivumina champuña, 11 nadu: “Yuma yiwunakumona, yisoneki mumuvuñilu, wuyitemeshi kuyipompelu 7: mu­Efwesesa, muSimirina, muPerigamu, muTiyatira, muSaradisa, muFiladelifiya nimuLayodikeya.”

12 Nashetumukili nami nitali wunakuhosha nanami, chinashetumukili namweni jakutentekahu manoñu jawuru 7, 13 nawa hakachi kajakutentekahu manoñu hadiña wadifwana namwana kamuntu, wavwalili chakuvwala chakuluka kushika nikunyendu nawa wadipombekeli chikaba chawuru hantulu yindi. 14 Kubombelahu, mutu windi ninsuki jindi jadiña jitooka neyi wanda wutooka, nawa neyi chatooka mayimakanza,* nimesu indi adiña neyi muzuzu wakesi, 15 nyendu yindi yadiña neyi wuneñu wawuwahi wunatookeshiwu muluteñu lwakesi nawa izu dindi datiyakeneña neyi chivumina champola yamenji amavulu. 16 Nawa muchikasa chindi chachidiilu mwadiña tutumbwa 7, mukanwa kindi nimwena mwedikileña mpoku yakabali yayilehi yatwa* yikweti wumwemu kuyedi, nawa kumesu indi kwatoñekeleña neyi itena* dinakutoñeka hampinji yidatoñekelañahu chikupu. 17 Chinamumweni, hohenohu nadibukili kunyendu yindi neyi kwiji nafwi.

Kuhiñahu wannañikili chikasa chindi chachidiilu nakunleja nindi: “Bayi wutiya womaku. Ami yami Mutachi nawa yami Nkuminina, 18 nawa yami kuhanda, nafwili, ilaña talaña! Ichi inakuhanda haya nyaaka nanyaaka nawa nikweti nsapi jakufwa niJejamu.* 19 Dichi, sonekaku yuma yiwamona, niyuma yidiku niyuma yikamwekana hanyima yayumiyi. 20 Imu dimwatalisha yuma yajila yakujinda yatutumbwa 7 tuwamona muchikasa chami chachidiilu nijakutentekahu manoñu awuru 7: Tutumbwa 7, tunakwimenaku añelu* adi muyipompelu 7, nawa jakutentekahu manoñu jawuru 7, jinakwimenaku yipompelu 7.

2 “Sonekelaku kañelu wachipompelu chamuEfwesesa neyi: Owu wakwata tutumbwa 7 muchikasa chindi chachidiilu nawa wendujolaña hakachi kajakutentekahu manoñu jawuru, iyi diyuma yinahoshiyi nindi: 2 ‘Neluka nyidimu yeyi, kukabakana kweyi nikuumika ninochu chiwabulaña kwiteja antu atama, nawa neluka nami wayesekaña antu adifwikijaña nawu hiyapostolu henohu hiyapostoluku, nawa wayimonaña neyi hiyakwakutwamba. 3 Wunakumwekesha yilwilu yakuumika nawa wunakudikita chikupu kukoola ijina dami, hiwunazeyiku. 4 Hela chochu, nakuwani naniwu muloña, muloña wunaleki kukeña kuwadiña naku hakusambila.

5 “‘Dichi, anukaku chiwadiña hakusambila, balumukaku mumuchima kulonda wukoñeña nyidimu yiwakoñeleña hakusambila. Neyi wukwilamu wanyi, nakenza kudi eyi nawa neyi wukubalumuka mumuchima wanyi, nakafumisha chakutentekahu inoñu cheyi muchekalaña. 6 Hela chochu, kudi chuma chiwunakwila chiwahi: wahela nyidimu yawantu alondelaña ntañishilu yaNikolayitani oyu yinahela ninami. 7 Dichi muntu wukweti matu, yatiyi chinakuhosha spiritu yajila kuyipompelu nayu: Muntu wemikaña mushindu nakamwiteja kuda kumutondu wawumi wudi muparadisa yaNzambi.’

8 “Nawa sonekelaku kañelu wachipompelu chamuSimirina neyi: ‘owu Mutachi nawa Nkuminina’ wafwili nawa wekalili cheñi nawumi, iyi diyuma yinahoshiyi nindi: 9 ‘Neluka lukadi niwuzweñi weyi, ilaña eyi waheta nawa neluka nikasawuntu kawantu aditenaña nawu hiyaYudeya henohu hidiwuku, ilaña antu wenawa hisinagogi yaSatana. 10 Bayi wutiya woma wayuma yiwukukeña kukabakanaku. Tiyaña! Diyabolu wukutwalekahu kunatila mukaleya antu amu hakachi kenu kulonda ayeseki chikupu, nawa mwakamona lukadi hadi mafuku 10. Wakekali washinshika kushika nikukufwa, nawa ami nakakwinka chibaaba chawumi. 11 Dichi muntu wukweti matu, yatiyi chinakuhosha spiritu yajila kuyipompelu nayu: Muntu wemikaña mushindu, hakafwa kufwa kwamuchiyediku.’

12 “Sonekelaku kañelu wachipompelu chamuPerigamu neyi: Owu wukweti mpoku yakabali yayilehi yatwa* yikweti wumwemu kuyedi, iyi diyuma yinahoshiyi nindi: 13 ‘Neluka kuwunakushakama, dikwila nawu, kudi itanda daSatana; ilaña wunatwalekihu kukakela chikupu kwijina dami, nawa hiwalekeli kunkuhwelelaku, hela tuhu nimumafuku aAntipasi chinsahu chami washinshika iyajahilili kumwashakamaña, oku kunakushakamayi Satana.

14 “‘Hela chochu, nakuwani namuloña muyuma yimu yantesha, muloña oku wukweti antu amu anakakeli kuntañishilu yaBalami, walejeli Balaki kusha chuma chakuhukeshaku anyana kaIsarela, kulonda adeña yuma yinalambuliwu antu kudi ankishi nikwila wuvumbi.* 15 Munjila yoyimu, nineyi nawa ikalaku nawantu amu anakukakela kuntañishilu yawantu alondelaña ntañishilu yaNikolayitani. 16 Dichi, balumukaku mumuchima. Neyi wukubula kwila mwenimu, inakwinza kudi eyi swayi, nawa nakalwa nawu njita nampoku yakabali yayilehi yamukanwa kami.

17 “‘Dichi muntu wukweti matu, yatiyi chinakuhosha spiritu yajila kuyipompelu nayu: Muntu wemikaña mushindu, nakamwinka manina amu akusweka, nakamwinka niilola ditooka nawa hanidi ilola asonekahu ijina dadiha dabula kwilukawu kudi muntu hela wumu, chiña hohu muntu wunakutambwila idi ijina.’

18 “Sonekelaku kañelu wachipompelu chaTiyatira neyi: Mwana kaNzambi, owu wukweti mesu neyi muzuzu wakesi nawa wukweti nyendu neyi wuneñu wawuwahi, iyi diyuma yinahoshiyi nindi: 19 ‘Neluka nyidimu yeyi, kukeña kweyi, chikuhwelelu cheyi, nimudimu weyi iwakalakalaña nikuumika kweyi, nawa neluka nami nyidimu yiwunakukalakala chayinu mpinji, yinabadiki chikupu yiwadiña nakukalakala hakusambila.

20 “‘Hela chochu, nakuwani namuloña, muloña eyi wunamwiteji Yezebeli, mumbanda waditenaña nindi hikaprofwetu nawa watañishaña nikuluwañesha ambuñami kulonda eleña wuvumbi* nikuda yuma yalambulañawu antu kudi ankishi. 21 Namwinkeli mpinji nami yabalumuki mumuchima, ilaña yena hanakukeña kubalumuka mumuchima kulonda yaleki kwila wuvumbiku.* 22 Tiyaña! Katataka nimuleñeli yakati chakwila yakañanyi nikuhinduka hakadidi nawa antu anakwilayi nawu wujila, neyi akubalumuka munyichima wanyi nakuleka kukoña nyidimu yindi, inakuyinatila mulukadi lwasweja. 23 Nawa anyanindi nakayijaha nachipupu chajahanaña, kulonda yipompelu yejima yakeluki nawu ami yami nasandujolaña muyitoñojoka* yayeni yamukachi nimunyichima, nawa enu nakayifweta hamuntu-hamuntu kwesekeja nanyidimu yenu.

24 “‘Hela chochu, enu ejima mudi muTiyatira, enu ejima mwabulaña kulondela iyi ntañishilu ninowu abulili kwiluka yuma yatenañawu nawu “yuma yakunama yaSatana,” inakuyileja nami: Hinnakuyitwika chiteli chikwawuku. 25 Kwatishenu chochenochu kuyuma yimukweti kushika nimpinji yinakenza. 26 Ilaña muntu wemikaña mushindu nawa walondelaña nyidimu yami ndo-o nikunsa, nakamwinka wuswa hadi nyuza yejima, 27 nawa iwu muntu wakabiñaña antu nakabama kachikuñu kulonda yakayibaloli neyi yuma yamawumba, neyi chinatambwila ami wuswa kudi Tata. 28 Nawa nakamwinka ntanda wakumacha. 29 Dichi muntu wukweti matu, yatiyi chinakuhosha spiritu yajila kuyipompelu.’

3 “Sonekelaku kañelu wachipompelu chamuSaradisa neyi: Owu wukweti aspiritu 7 aNzambi nitutumbwa 7, iyi diyuma yinahoshiyi nindi: ‘Neluka nyidimu yeyi, eyi wudi hohu wamumi nejina, ilaña walala wudi wakwila nawu wafwa dehi. 2 Tonaña nawa koleshaku yuma yinashaliku yadiña kwakwihi nakufwa, muloña nawani kwila nawu wamanishili wanyi kukalakala nyidimu yeyi yejima kumesu aNzambi yami. 3 Dichi, twalekakuhu kwanuka yuma yiwunatambwili nikutiya, yihembeña nawa balumukaku mumuchima. Chakadi nikujina, neyi wukubula kutona, nakenza neyi chenzañayi ikombi nawa hiwakeluka hela hanti ora yinakenjilamu kudi eyiku.

4 “‘Hela chochu, wudi nawantu antesha* muSaradisa abulili kutamisha yakuvwala yawu, nawa akendela hamu nanami muyakuvwala yitooka muloña chinayiteleli. 5 Muntu wemikaña mushindu akamuvwika chakuvwala chitooka, nawa ami hinakajimañesha ijina dindi mumukanda wawumiku, ilaña naketeja ijina dindi kumesu aTata yami nikumesu awañelu jindi. 6 Dichi muntu wukweti matu, yatiyi chinakuhosha spiritu yajila kuyipompelu.’

7 “Sonekelaku kañelu wachipompelu chamuFiladelifiya neyi: Owu wajila, walala, wukweti nsapi* yaDavidi, wenzununaña yenzelu chakwila kwosi muntu hela wumu wukutwesha kuyenzela nawa wenzelaña chakwila kwosi muntu hela wumu wukutwesha kuyenzununa, iyi diyuma yinahoshiyi nindi: 8 ‘Neluka nyidimu yeyi, tiyaña! Nakwenzunwini chenzelu chakwila kwosi muntu hela wumu wukutwesha kuchenzela. Nawa neluka nami eyi wukweti ñovu yantesha, wahembeli mazu ami nawa hiwakaaninihu ijina dami hela hantiku. 9 Tiyaña! Antu adi musinagogi yaSatana ahoshaña nawu hiyaYudeya henohu hidiwuku, ilaña anakutwamba hohu, nakayilisha akenzi nakudifukula kunyendu yeyi nawa nakayilisha akeluki nawu nakukeña. 10 Chineli wahembeli mazu akuumika kwami,* ninami nawa nakakuhemba mumpinji yakweseka yinakwinza hamaseki hejima yakweseka antu ejima ashakama hamaseki. 11 Ami inakwinza swayi. Dichi twalekakuhu kukwatisha kuchuma chiwukweti, kulonda kubuli kwikala muntu hela wumu wukukutambula chibaaba cheyi.

12 “‘Muntu wemikaña mushindu, nakamwilisha kwikala chishimi mutembeli yaNzambi yami nawa hakafuma mwokuku, nawa nakasoneka hadi yena ijina daNzambi yami niijina damusumba waNzambi yami, yowu Yerusalema Yayiha yafumaña mwiwulu kudi Nzambi yami niijina dami dadiha. 13 Dichi muntu wukweti matu, yatiyi chinakuhosha spiritu yajila kuyipompelu.’

14 “Sonekelaku kañelu wachipompelu chamuLayodikeya neyi: Owu Ameni, chinsahu washinshika nawa walala, ntachikilu wayuma yejima yaleñeliyi Nzambi, iyi diyuma yinahoshiyi nindi: 15 ‘Neluka nyidimu yeyi, nami eyi hiwudi wutuuta hela wutataku. Inakutoña nami kachi wadiña wutuuta hela wutata. 16 Dichi chineli wudi kanvuyenki nawa hiwudi wutata hela wutuutaku, nukukufwija mukanwa kami. 17 Chineli wahoshaña neyi, “Ami nidi mukwamaheta nawa nekali namaheta amavulu, hinnakukeña chuma chidi chejimaku,” ilaña eyi wuneluki wanyi neyi wamonaña yihuñu, wudi nshona, wudi kazweñi, wudi mputamesu nawa wudi nawuvu, 18 inakukuleja nami wulandi kudi ami wuru yinatookeshiwu nakesi kulonda wiikali mukwamaheta, wulandi niyakuvwala yitooka kulonda wuvwali hakwila antu abuli kumona nzekesi yeyi nakukukojeja kutiya nsonyi, nawa wulandi niyitumbu yamesu yakusha mumesu eyi kulonda wumoneña.

19 “‘Antu ejima inakeña, nayizuwilaña nikuyibabesha. Dichi ikalaku neyena nawa balumukaku mumuchima. 20 Talaña! Ami nemani kuchiisu nakudondomwena. Neyi muntu yatiya izu dami nawa yenzununa kuchenzelu, nukwiñila mwitala dindi nakudiila hamu nindi kuda kwamelela, niyena nawa wukudiila hamu nanami. 21 Muntu wemikaña mushindu nakamwiteja kushakama hamu nanami hetanda dami, neyi chinemikili ami mushindu nakushakama naTata yami hetanda dindi. 22 Dichi muntu wukweti matu, yatiyi chinakuhosha spiritu yajila kuyipompelu.’”

4 Hanyima yayumiyi, chinelili nami nitali, namweni chenzelu chakwenzununa mwiwulu, nawa izu datachi dinatiyili datiyakeneña neyi mpuña iku dinakunleja nadu: “Inzaku munu mwiwulu kulonda nukuleji yuma yikumwekana.” 2 Hanyima yachumichi, hohenohu nekalili muñovu yaspiritu, namweni niitanda mwiwulu dadiña mwiluña dadu nawa hetanda denidi hadiña washakaminihu. 3 Owu washakaminihu wamwekeneña neyi ilola dajasiperi nawa neyi ilola dasaridini,* nawa kwitanda denidi kwanyeñumukili kansuluñunda kamwekeneña neyi ilola daemarodi.

4 Kwitanda denidi kwanyeñumukili matanda 24, namweni akulumpi 24 anashakami hamatanda wenawa iku anavwali yakuvwala yitooka nawa kunyitu yawu kwadiña yibaaba yawuru. 5 Kunidi itanda kwafumineña nzaji, mazu nikudidima; nawa kunidi itanda kwadiña manoñu 7 abutukileña kesi, awa manoñu emenañaku aspiritu 7 aNzambi. 6 Kumbidi yanidi itanda kwadiña chuma chafwana ijiya damwekeneña neyi igilasi, iku neyi ilola dakrisitali.

Mukachi ketanda nikunyeñumuka itanda dejima, kwadiña yileñaleña yayumi yiwana yadiña namesu kwejima, kumbidi nikunyima. 7 Chileñaleña watachi wamwekeneña neyi mutupa, chileñaleña wamuchiyedi wamwekeneña neyi mwana kañombi wachizamba, chileñaleña wamuchisatu, kumesu indi kwamwekeneña neyi kwamuntu, nawa chileñaleña wamuchiwana wamwekeneña neyi mbuulu watuukaña. 8 Dichi iyi yileñaleña yayumi yiwana yadiña nampuula iwu 6, iwu 6; nawa iji mpuula jadiña namesu kwejima nimwishina. Nawa mpinji yejima, mwaana niwufuku yahoshaña nawu: “Wajila, wajila, wajila Yehova Nzambi, Wañovu Jejima, wadiñaku, wudiku nawa wunakwinza.”

9 Mpinji yejima yahanaña iyi yileñaleña yayumi kulema, kalemesha nikumusakilila Owu washakama hetanda, Owu wahandaña haya nyaaka nanyaaka, 10 awa akulumpi 24 adibukaña heseki kumesu aNowu washakama hetanda nikudifukula kudi Owu wahandaña haya nyaaka nanyaaka, nawa anatilaña yibaaba yawu kumbidi yetanda nakuhosha nawu: 11 “Yehova Nzambi yetu, watelela kutambwila kulema, kalemesha niñovu, muloña yeyi waleñeli yuma yejima nawa muloña wankeñelu yeyi, dichiyekalililiku nawa dichiwayileñe­leli.”

5 Nawa namweni muvuñilu wakusoneka mukachi nihanji wakulamika chikupu nayilamiku 6 wadiña muchikasa chachidiilu chaNowu washakamini hetanda. 2 Cheñi nawa namweni kañelu wañovu wabidikileña nezu datiyakana nindi: “Hinyi wunateleli kuvuñulula iwu muvuñilu nikulamuna yilamiku yawu?” 3 Ilaña kwosi hela wumu mwiwulu chili hamaseki hela kwishina deseki watwesheli kuwuvuñulula hela kutalamuku. 4 Nadilili chikupu muloña hikwadiña hela wumu wadiña watelela kuwuvuñulula hela kutalamuku. 5 Ilaña wumu hakachi kanowu akulumpi wanlejeli nindi: “Lekaku kudila. Tiyaña! Mutupa wakumuchidi waYuda, muji waDavidi, nemiki mushindu kulonda yavuñululi iwu muvuñilu nikulamuna yilamiku 7 yaniwu muvuñilu.”

6 Nawa mukachi* ketanda nimukachi kayileñaleña yayumi yiwana nawa nimukachi kawakulumpi, mwemeni mwana kamukoku wamwekeneña neyi anamujahi, wadiña nanseñu 7, mesu 7, nawa awa mesu emenañaku aspiritu 7 aNzambi anatemeshiwu mwahita iseki dejima. 7 Hohenohu iwu mwana kamukoku wayili nakutambula muvuñilu muchikasa chachidiilu chaNowu washakamini hetanda. 8 Chatambwiliyi muvuñilu, yileñaleña yayumi yiwana niakulumpi 24 adibukili heseki kumesu aMwana kaMukoku, wejima wawu adiña natudada niyeña yawuru yakunama mwenzeli insensi. (Insensi yinakwimenaku kulomba kwawakwakujila.) 9 Nawa embileña kamina kakaha nawu: “Eyi watelela kutambula muvuñilu nikulamuna yilamiku yawu, muloña eyi akujahili nawa wamulandilili Nzambi antu namashi eyi kufuma munyichidi yejima, mumadimi ejima, mudi antu ejima nimunyuza yejima, 10 wenawa wayilishili kwikala wanta niatupristu jaNzambi nawa akayuula neyi anyanta hamaseki hejima.”

11 Nawa namweni nikutiya izu dawañelu amavulu anyeñumukili itanda niyileñaleña yayumi niakulumpi, nawa kuvula kwawu adiña mazaza namazaza* nimakombakaji namakombakaji, 12 wenawa ahosheleña nezu datiyakana nawu: “Mwana kaMukoku ajahiliwu watelela kutambwila ñovu nimaheta nimaana niwuswa nikalemesha nikulema ninkisu.”

13 Nawa natiyili yileñaleña yejima yamwiwulu niyahamaseki niyakwishina deseki niyahakaluñalwiji, niyuma yejima yekalamu, yinakuhosha nawu: “Kudi Owu washakama hetanda nikudi Mwana kaMukoku, kwiikali nkisu nikalemesha nikulema niñovu haya nyaaka nanyaaka.” 14 Yileñaleña yayumi yiwana yahosheleña nawu: “Ameni!” nawa akulumpi adibukili heseki nakudifukula.

6 Nawa namweni Mwana kaMukoku chalamwineñayi chilamiku chimu chahayilamiku 7, nawa natiyili chileñaleña wumu wahadi yileñaleña yayumi yiwana nakuhosha nezu dakudidima nindi: “Inzaku!” 2 Chinelili nami nitali, namweni kawalu katooka, nawa owu washakamini hanaka kawalu wadiña nawuta wamukunji; amwinkeli nichibaaba nawa wayileña iku nakwimika mushindu kulonda yamanishi kwimika mushindu kwindi.

3 Chalamwiniyi chilamiku chamuchiyedi, natiyili chileñaleña wamumi wamuchiyedi nakuhosha nindi: “Inzaku!” 4 Kawalu kakwawu kachinana kedikili, nawa owu washakamini hanaka kawalu amwinkeli wuswa wakufumishahu kuwunda hamaseki kulonda antu adijaheña wumu namukwawu, nawa amwinkeli mpoku yakabali yeneni.

5 Chalamwiniyi chilamiku chamuchisatu, natiyili chileñaleña wamumi wamuchisatu nakuhosha nindi: “Inzaku!” Nawa chinelili nami nitali, namweni kawalu keyila, nawa owu washakamini hanaka kawalu wadiña napezu* muchikasa chindi. 6 Mukachi kayileñaleña yayumi yiwana, natiyilimu chuma chatiyakeneña neyi izu dahosheleña nadu: “Kwati yimu yatidiku, wuseya wayu hidenari yimu, nawa makwati asatu abali, wuseya wawu hidenari yimu; nawa bayi wukisañana manji amuolivi nivinyuku.”

7 Chalamwiniyi chilamiku chamuchiwana, natiyili izu dachileñaleña wamumi wamuchiwana nakuhosha nindi: “Inzaku!” 8 Nawa chinelili nami nitali, namweni kawalu katookoloka, owu washakamini hanaka kawalu wadiña nejina dakwila nawu Kufwa. Nawa Ijamu* damulondeleleña mukamwihi. Dichi ayinkeli wuswa hachibalu chimu chamuchiwana cheseki kulonda ajaheña antu nampoku yakabali yayilehi, nanzala yakapwelendendi, nachipupu chajahanaña ninawanyama amwisaña ayisumi.

9 Chalamwiniyi chilamiku chamuchitanu, namweni mawumi* awantu adiña mwishina dakameña, owu ajahiliwu kukoola mazu aNzambi nikukoola wunsahu washimwiniwu wena. 10 Abidikili nezu datiyakana nawu: “Mwanta Wabadika, wajila nawa walala, yaaka yiñahi yiwakatondolwela kusompa nikutendela mashi etu kudi antu ashakamaña hamaseki?” 11 Nawa wejima wawu ayinkeli nyinkukumba yitooka iwu wumu, iwu wumu, nawa ayilejeli nawu ahembeleliku hakapinji kantesha sampu anawanishi naambala yawakwawu anduñu nianakwawu adiña kwakwihi nakujahewa neyi chayijahiliwu wena.

12 Nawa namweni chalamwineñayi chilamiku chamu 6, dichi hohenohu kwenjili mutentanshi weneni; nawa itena deyilili bwi-i neyi chisasa chiyila chamavuji,* nawa kakweji kejima kabalumukili neyi mashi, 13 nawa tutumbwa twamwiwulu twaholokeleli hamaseki neyi mutondu wachikuyu chiwawulumunaña nyikuyu yayisu neyi anawunyinkeshi kudi mpepela yasweja. 14 Iwulu dadivuñili neyi muvuñilu wunakuvuñawu nawa dajimañeni, dichi mpidi jejima niyituutu yejima ajituntulwili hamaluña hijadiña. 15 Kuhiñahu, anyanta ahamaseki, ayilolu, akulumpi jamashidika, akwamaheta, akwañovu, anduñu ejima niantu ejima asubuka, aswamini mumayeñu nimumalola akumapidi. 16 Nawa atwalekelihu nakuleja jimpidi nimalola nawu: “Tuhinukilenu kulonda mutusweki kumesu aNowu washakama hetanda nikukuzuwa kwaMwana kaMukoku, 17 muloña ifuku deneni dakuzuwa kwawu dinashiki dehi, nawa hinyi wukutwesha kupuluka kunidi ifuku?”

7 Hanyima yayumiyi, namweni añelu awana anemani kumawombu awana eseki iku anakwatishi chikupu mpepela jiwana jeseki, kulonda kubuli kwikala mpepela yikukunkila hamaseki hela hakaluñalwiji hela kumutondu wudi wejima. 2 Nawa namweni kañelu mukwawu nakukanduka kufuma kumusela iku wukweti chilamiku chaNzambi wamumi; wabidikili nezu datiyakana kudi owu añelu awana enkeliwu wuswa wakujilumuna iseki nikaluñalwiji, 3 nindi: “Bayi mukisañana iseki hela kaluñalwiji hela nyitonduku, sampu tunalamiki dehi anduñu jaNzambi yetu hamahama awu.”

4 Nawa natiyili kuvula kwawantu alamikiliwu, adiña 144,000, alamikiliwu kufuma kunyichidi yejima yawanyana kaIsarela:

11 Añelu ejima emeni iku ananyeñumuki itanda niakulumpi niyileñaleña yayumi yiwana, nawa adibukili chamesu hamaseki kumbidi yetanda nakudifukula kudi Nzambi, 12 nakuhosha nawu: “Ameni! Kudi Nzambi yetu kwiikali kuhameka, kulema, maana, kusakilila, kalemesha, ñovu niwuswa haya nyaaka nanyaaka. Ameni.”

13 Mukulumpi wumu hadi awa akulumpi wañihwili nindi: “Indi awa anavwali nyinkukumba yitooka hiyanyi, nawa anafumi kudihi?” 14 Dichi hohenohu namwakwili nami: “Mwanta wami, yeyi wuneluki.” Kuhiñahu yena wanlejeli nindi: “Awa diwu anafumi mulukadi lwasweja, nawa anakosi nyinkukumba yawu nakuyitookesha mumashi aMwana kaMukoku. 15 Ichi dichayiletesha ekali kumbidi yetanda daNzambi, nawa anakumukalakela mudimu wajila mwaana niwufuku mutembeli yindi; Owu washakama hetanda wakalemena itenti dindi hadi wena. 16 Hiyamba katiya nzala hela mpwila cheñiku, nawa itena* hela nkanza hijikayochaku, 17 muloña Mwana kaMukoku wudi mukachi* ketanda, wakayibiñaña nikuyilombola kutuseloki twamenji awumi. Nawa Nzambi wakakombola madilu ejima kumesu awu.”

8 Chalamwiniyi chilamiku chamu 7, mwiwulu mwamweneni nzo-o kwakwihi nachikunku chaora yimu. 2 Nawa namweni añelu 7 anemani kumesu aNzambi nawa wayinkeli mpuña 7.

3 Kañelu mukwawu, owu wadiña nachuma chakwochelahu insensi, wenjili nawa wemeni hakameña, kuhiñahu amwinkeli insensi yayivulu kulonda yayilambuli hakameña kawuru kadiña kumbidi yetanda hampinji yalombeleñawu akwakujila ejima. 4 Wishi wainsensi wafumineña muchikasa chakañelu, wakakumukili nakuya kumesu aNzambi hamu nakulomba kwawakwakujila. 5 Ilaña, hohenohu kañelu wanoneli chakwochelahu insensi, wachinzesheli nakesi kahakameña nakuchinatila hamaseki. Nawa kwadiña kudidima, mazu, kukena kwanzaji nimutentanshi. 6 Awa añelu 7 adiña nampuña 7, adiloñesheli kulonda embi iji mpuña.

7 Kañelu watachi wembili mpuña yindi. Kuhiñahu kwanokeli nvula yamalola nikesi kadibomba namashi, nawa ajinatili hamaseki; dichi chibalu chamuchisatu cheseki chasukumini, nawa chibalu chamuchisatu chanyitondu chasukumini, niyuma yejima yituuta yamenaña niyena yasukumini.

8 Kañelu wamuchiyedi wembili mpuña yindi. Kuhiñahu chuma chadiña neyi mpidi yeneni chabutukileña kesi, achinatilili mukaluñalwiji. Nawa chibalu chamuchisatu chakaluñalwiji chabalumukili nakwikala mashi; 9 nawa chibalu chamuchisatu chayileñaleña yayumi* yamukaluñalwiji chafwili, nawa chibalu chamuchisatu chajimbopolu chakisikili.

10 Kañelu wamuchisatu wembili mpuña yindi. Kuhiñahu katumbwa keneni kabutukileña neyi inoñu, kaholokeli kufuma mwiwulu nakushikena hachibalu chamuchisatu chatuloña nihatuseloki twamenji. 11 Ijina danaka katumbwa hiMutondu Walula. Nawa chibalu chamuchisatu chamenji chabalumukili nakwikala mutondu walula, dichi antu amavulu afwili nanawa menji muloña ayilulishili.

12 Kañelu wamuchiwana wembili mpuña yindi. kuhiñahu chibalu chamuchisatu chetena* nichibalu chamuchisatu chakakweji nichibalu chamuchisatu chatutumbwa, ajeteli kulonda chibalu chaju chamuchisatu achiyilishi bwi-i, nawa kulonda chibalu chamuchisatu chamwaana nichibalu chamuchisatu chawufuku, jibuli kwikala nachejeji.

13 Nawa namweni nikutiya mbuulu watuukileña muluzwizu nakubidika nezu datiyakana nindi: “Oyihuñu, oyihuñu, oyihuñu yakamonawu antu ashakama hamaseki muloña wakuvuma kwampuña jinashaliku jawañelu asatu adi kwakwihi nakwimba mpuña jawu!”

9 Kañelu wamuchitanu wembili mpuña yindi. Kuhiñahu namweni katumbwa kaholokeleli hamaseki kufuma mwiwulu, nawa amwinkeli nsapi yakukanwa kekela.* 2 Wenzunwini kukanwa kekela* nawa wishi wakakumukili nakufuma mukanwa* neyi wishi wamuluteñu lwakesi lweneni, itena* nimpepela jeyilili bwi-i nawishi wakakumukileña mukanwa.* 3 Dichi muwishi mwafumini tuboola twenjili hamaseki, nawa atwinkeli wuswa neyi wukweti tunjimbu twahamaseki. 4 Itu tuboola atulejeli nawu bayi tukisañana yuma yamenaña hamaseki hela chuma chejima chituuta hela mutondu wudi wejimaku, ilaña chiña hohu kukisañana antu abula chila­miku chaNzambi hamahama awu.

5 Nawa tuboola atwinkeli wuswa wakukabisha awa antu hadi tukweji tutanu ilaña chakadi kuyijaha, nawa kukabisha kwanitu tuboola kwadiña neyi kukata kwatiyañayi muntu anasumiwu kudi kanjimbu. 6 Mumafuku wenowu antu akakeñakeñaña kufwa, ilaña hiyakatwesha kukuwanaku, nawa akafwilaña kufwa, ilaña kufwa kwakayitemukaña wena.

7 Itu tuboola twamwekeneña neyi tuwalu tunaloñeshiwu kuya kunjita; hanyitu yatu hadiña yuma yamwekeneña neyi yibaaba yawuru, nawa kumesu atu kwamwekeneña neyi kumesu awantu, 8 ilaña nsuki yatu yadiña neyi nsuki yawambanda. Nawa mazu atu adiña neyi anyitupa, 9 itu tuboola twadiña nayuma yakujika hantulu yadifwana nayuma yayikuñu yakujika hantulu. Nawa lushindu lwampuula jatu lwatiyakeneña neyi lushindu lwamakalu anakukokawu kudi tuwalu tunakutemukila kunjita. 10 Cheñi nawa, itu tuboola tukweti nyikila yidi nammuna neyi yatunjimbu, nawa kunyikila yatu diku kudi ñovu jakukatisha nachu antu hadi tukweji tutanu. 11 Tuboola twenitu tukweti mwanta watu, diyi kañelu wekela. MuchiHeberu ijina dindi diyi Abadoni,* ilaña muchiGiriki wukweti ijina dakwila nawu Apoliyoni.*

12 Ihuñu dakusambila dinahiti dehi. Dichi tiyenu! Hanyima yayumiyi kunakwinza yihuñu yikwawu yiyedi.

13 Kañelu wamu 6 wembili mpuña yindi. Kuhiñahu natiyili izu dafumini munseñu jakameña kawuru kadiña kumesu aNzambi 14 dinakuleja kañelu wamuchitanu wadiña nampuña nadu: “Kasununaku añelu awana anakasiliwu hakaloña keneni Yufurati.” 15 Dichi wakasunwini awa añelu awana aloñeshelawu dehi ora, ifuku, kakweji nichaaka kulonda akajahi chibalu chamuchisatu chawantu.

16 Kuvula kwamashidika endelaña hatuwalu adiña mazaza amazaza ayedi;* dichi natiyili kuvula kwawu. 17 Nawa ichi dichinamweni tuwalu muchimwenu ninowu ashakaminihu: Avwalili yuma yakujika hantulu yamwekeneña kuchinana neyi kesi, yamwekeneña neyi wusombu nawa neyi wulombu wansela, nawa nyitu yatuwalu yamwekeneña neyi nyitu yanyitupa, mutunwa twatu mwafumineña kesi, wishi nimulañi wakesi kamalola abutukaña kesi. 18 Chibalu chamuchisatu chawantu achijahili kudi iyi yipupu yisatu, kesi, wishi nimulañi wakesi kamalola abutukaña kesi jafumineña mutunwa twawu. 19 Muloña ñovu janotu tuwalu jekala mutunwa twatu nikunyikila yatu, muloña nyikila yatu yidi neyi tupela nawa yikweti nyitu, nawa twakatishaña antu naniyi nyikila.

20 Ilaña antu ejima ashalilihu abulili kujahawu naniyi yipupu, hiyabalumukili munyichima nakuleka kukoña nyidimu yamakasa awuku; hiyalekeli kudifukula kudi andemoni, ankishi awuru, asiliva, awuneñu, amalola nianyitonduku, yuma yabulaña kumona hela kutiya hela kwenda. 21 Nawa hiyabalumukili munyichima nakuleka kujaha antu hela kuleka nyidimu yawu yakupanda hela kuleka kwila wuvumbi* hela kuleka wukombi wawuku.

10 Kuhiñahu namweni kañelu mukwawu wañovu wadiña nakufuma mwiwulu iku navwali ivu* nawa kumutu windi kwadiña kansuluñunda, kumesu indi kwadiña neyi itena* nawa nyendu yindi yadiña neyi yishimi yakesi, 2 nawa wakwatili muvuñilu wanyanya muchikasa chindi wadiña wakuvuñulula dehi. Wadatili mwendu windi wachidiilu hakaluñalwiji ilaña wachimunswa hamaseki, 3 nawa wabidikili nezu datiyakana neyi chabulumaña mutupa. Chabidikiliyi, mazu akudidima 7 ahosheli.

4 Kudidima 7 chikwahosheli, nadiña kwakwihi nakusoneka yuma yikwahosheli, ilaña natiyili izu dafumini mwiwulu nakunleja nadu: “Lamikaku yuma yahosha kudidima 7 nawa bayi wuyisonekaku.” 5 Kañelu inamweni nadati mwendu wumu hakaluñalwiji wukwawu hamaseki, wolweli chikasa chindi chachidiilu mwiwulu, 6 nawa wasanyikili mwijina daNowu washakamaña haya nyaaka nanyaaka, waleñeli iwulu niyuma yekalamu, waleñeli iseki niyuma yekalahu nawa waleñeli kaluñalwiji niyuma yekalamu, nindi: “Hikwakekala kushintajala cheñiku. 7 Ilaña mumafuku akela kañelu wamu 7 wudi kwakwihi nakwimba mpuña yindi, yuma yajila yakujinda yashimwiniyi Nzambi kudi anduñu jindi atuprofwetu kwikala nsañu yayiwahi, yikashikijewa chikupu.”

8 Nawa natiyili izu dafumini mwiwulu danlejeli cheñi nadu: “Yaña wutambuli muvuñilu wakuvuñulula dehi wudi muchikasa chakañelu wunadati mwendu wumu hakaluñalwiji wukwawu hamaseki.” 9 Dichi nayili kudi kañelu nawa namulejeli kunyinka muvuñilu wanyanya. Kuhiñahu yena wanlejeli nindi: “Tambulaku wuwiidi nawa wukululisha mwivumu deyi, ilaña mukanwa keyi wukutowala neyi wuchi.” 10 Natambwili muvuñilu wanyanya muchikasa chanowu kañelu nawa nawudiili, dichi mukanwa kami mwatoweli neyi wuchi, ilaña chinawudiili, mwivumu dami mwalulili. 11 Nawa anlejeli nawu: “Watela kuprofweta cheñi kutalisha hadi antu, akwanyuza, akwamadimi nihadi anyanta amavulu.”

11 Nawa wanyinkeli iteti damwekeneña neyi mbwechi yakupima nachu nakunleja nindi: “Nyamukaku wupimi tembeli yajila yaNzambi nikameña niantu ejima anakudifukwilamu. 2 Ilaña lubanza ludi hanji yatembeli yajila, wululeki, bayi wulupimaku, muloña analuhani kudi akwanyuza nawa musumba wajila akawudatola hadi tukweji 42. 3 Nakelisha ayinsahu jami ayedi kulonda akaprofweti hadi mafuku 1,260 iku anavwali yisasa.” 4 Nyitondu yanyiolive yiyedi nijakutentekahu manoñu jiyedi jinakwimenaku awa ayinsahu ayedi nawa anemani kumesu aMwanta weseki.

5 Neyi kudi muntu wejima wunakukeña kuyikoña awa ayinsahu chuma chatama, kesi kafumaña mutunwa twawu nakujilumuna ayilumbu jawu. Neyi kudi muntu wejima wunakukeña nindi yayikoñi wena chuma chatama, ichi dichiyanateli kumujahawu niyena. 6 Wenawa akweti wuswa wakwenzela mwiwulu kulonda nvula yibuli kunoka mumafuku akuprofweta kwawu, nawa akweti wuswa wakubalumuna menji kwikala mashi nikweta iseki nayipupu yamboka-mboka kwesekeja namwejima munakeñeliwu.

7 Chakamanishawu kushimuna wunsahu wawu, kanyama wamwisaña chisumi wafumini mwikela, wakalwa nawu njita nakuyimika mushindu nikuyijaha. 8 Nawa yibimbi yawu yakakaama mumukwakwa weneni wamumusumba weneni watenañawu muchifwikija nawu Sodoma niEjipitu mwajahililiwu niMwanta wawu hamutondu. 9 Nawa antu amboka-mboka, akwanyichidi, akwamadimi niakwanyuza akatalaña hayibimbi yawu hadi mafuku asatu nachikunku, nawa hiyaketeja kukaamika yibimbi yawu mwijamuku. 10 Nawa antu ashakama hamaseki akazañalala nikudiluñisha muloña wawena, akaditemeshelaña yawaana wumu namukwawu muloña awa atuprofwetu ayedi adiña nakukabisha antu ashakama hamaseki.

11 Hanyima yamafuku asatu nachikunku, spiritu yawumi yafumini kudi Nzambi yeñilili mudi wena, kuhiñahu emeni nawa antu ayimweni, atiyili woma chikupu. 12 Nawa atiyili izu datiyakana dafumini mwiwulu nakuyileja wena nadu: “Inzenu munu mwiwulu.” Kuhiñahu ayili mwiwulu mwivu, nawa ayimweni kudi ayilumbu jawu. 13 Hayoyenoyu ora kwenjili mutentanshi weneni, dichi chibalu chamu 10 chamusumba chakundukili; nawa antu 7,000 afwili namutentanshi, kuhiñahu antu amakwawu ashalilihu atiyili woma nawa atachikili kumulemesha Nzambi wamwiwulu.

14 Ihuñu damuchiyedi dinahiti dehi. Tiyenu! Ihuñu damuchisatu dinakwinza swayi-swayi.

15 Kañelu wamu 7 wembili mpuña yindi. Kuhiñahu mwiwulu mwatiyakeni mazu atiyakana, ahosheleña nawu: “Wanta wakaayi wunekali dehi Wanta waMwanta wetu niwaKristu windi, nawa yena wakayuula neyi mwanta haya nyaaka nanyaaka.”

16 Nawa akulumpi 24 ashakamini kumesu aNzambi hamatanda awu, adibukili chamesu heseki nakudifukula kudi Nzambi, 17 nakuhosha nawu: “Tunakusakilili Yehova Nzambi, Wañovu Jejima, eyi wudiku nawa wadiñaku, muloña wunanoni ñovu jeyi jabadika jidi mumakasa eyi nakutachika kuyuula neyi mwanta. 18 Ilaña akwanyuza azuwili, nawa kuzuwa kweyi kwenjili, nimpinji yatoñolawu yakusompesha afu yashikili, niyakufweta anduñu jeyi atuprofwetu niakwakujila niantu atiyaña woma ijina deyi, alema niabula kulema nikujilumuna antu anakukisañana iseki.”

19 Nawa tembeli yajila yaNzambi mwiwulu ayenzunwini nawa chimbañu chachitiyañenu chindi nachimweni mutembeli yindi yajila. Nawa kwadiña kukena kwanzaji, mazu, kudidima, mutentanshi ninvula yeneni yamalola.

12 Kuhiñahu namweni chinjikijilu cheneni mwiwulu: Namweni mumbanda wavwalili itena,* mwishina danyendu yindi mwadiña kakweji, nawa kumutu windi kwadiña chibaaba chadiña natutumbwa 12, 2 nawa wadiña nevumu. Chelili wadiña kwakwihi nakuvwala, wadilileña muloña wakukabakana nanyisoñu yakuvwala.

3 Namweni cheñi chinjikijilu chikwawu mwiwulu. Chinelili nami nitali, namweni chanzañombi muneni wuchinana neyi kesi, wadiña nanyitu 7 ninseñu 10 nawa hanyitu yindi hadiña yibañula* 7; 4 nawa mukila windi wakokeli chibalu chamuchisatu chatutumbwa twamwiwulu nakutunatila hamaseki. Nawa chanzañombi watwalekelihu nakwimana kumesu amumbanda wadiña kwakwihi nakuvwala, kulonda neyi owu mumbanda navwali dehi, chanzañombi yamudiili mwana.

5 Mumbanda yenowu wavweli mwana weyala wakabiñaña akwanyuza yejima nambwechi yachikuñu. Nawa mwanindi amuhukwili* nakumutwala kudi Nzambi nikwitanda dindi. 6 Nawa owu mumbanda watemukilili mwisaña mwamuloñesheleliwu iluña kudi Nzambi mwamudiishilileñawu hadi mafuku 1,260.

7 Nawa mwiwulu mwatachikili njita: Mikeli* niañelu jindi alwili njita nachanzañombi, nawa chanzañombi niañelu jindi alwili nawu njita 8 ilaña hiyatwesheli kwimika mushinduku,* nawa mwiwulu himwadiña iluña dakushakama wena cheñiku. 9 Dichi chanzañombi muneni amunatili, kapela wakushankulu atenañawu nawu Diyabolu nawa Satana, wunakuluwañesha antu ashakama hamaseki hejima; amunatilili hamaseki nawa añelu jindi niwena ayinatilili hamu nayena. 10 Natiyili izu datiyakana dafumini mwiwulu nadu:

“Ichi dinu Nzambi naleti wamwinu kudi antu, ñovu, Wanta waNzambi yetu nawa Kristu windi natachiki dehi kuzatisha wuswa windi, muloña mukwakwinka nyiloña anakwetu anamunatili dehi heseki, wayinkaña nyiloña kumesu aNzambi yetu mwaana niwufuku. 11 Nawa amwimikili mushindu muloña wamashi aMwana kaMukoku nimuloña wamazu awunsahu wawu, nawa hiyakeñeli kukiña mawumi* awu hela tuhu nihampinji yatalañeniwu nakufwaku. 12 Dichi muloña wachumichi, enu mawulu ninenu mwashakamamu zañalalenu! Oyihuñu yiwukumona eyi iseki nikaluñalwiji, muloña Diyabolu nayisulukili dehi enu, nahili chikupu nanochu chinelukiyi nindi nashali dehi nakapinji kantesha.”

13 Dichi chanzañombi chamweniyi nindi anamunatili dehi hamaseki, wakabishili owu mumbanda wavweli mwana weyala. 14 Ilaña yenowu mumbanda amwinkeli mpuula jiyedi jambuulu weneni kulonda yatuuki nakuya mwisaña kwiluña damuloñesheleliwu, kwakamudiishilañawu hampinji nihajimpinji nichikunku champinji* kwakulehi kwakadi kumumona kudi owu kapela.

15 Dichi owu kapela wamupumbilili mumbanda menji kunyima kufuma mukanwa kindi neyi kwiji kaloña, kulonda yamukojeji yanwini mukaloña. 16 Ilaña iseki damukwashili owu mumbanda, kuhiñahu iseki daasamini mukanwa kadu nakumina kaloña kapumbiliyi chanzañombi kufuma mukanwa kindi. 17 Dichi chanzañombi wamuhililili chikupu owu mumbanda, nawa wayili nakulwa njita nawanyana* kanowu mumbanda ashalilihu, ahembaña nshimbi jaNzambi nawa akweti mudimu wakushimwina nsañu yahosha hadi Yesu.

13 Nawa yena* wemeni hawusekulula wakukaluñalwiji.

Kuhiñahu namweni kanyama wamwisaña chisumi wakandukileña mukaluñalwiji, wadiña nanseñu 10 ninyitu 7, nawa kunseñu jindi kwadiña yibañula* 10, ilaña hanyitu yindi hadiña majina akasawuntu. 2 Dichi owu kanyama wamwisaña chisumi inamweni wamwekeneña neyi chisumpa, ilaña nyendu yindi yadiña neyi yabera nawa kanwa kindi kadiña neyi kamutupa. Nawa chanzañombi wamwinkeli owu kanyama ñovu jindi, itanda dindi niwuswa windi wabadika.

3 Namweni mutu windi wumu wunakumwekana neyi anawukatishi chikupu, ilaña chilonda chindi chakutwala kukufwa chakusukili, nawa antu ejima ahamaseki amulondeleleña owu kanyama wamwisaña chisumi iku anakudikomokela. 4 Nawa awa antu adifukwili kudi chanzañombi muloña wamwinkeli kanyama wamwisaña chisumi wuswa, kuhiñahu awa antu adifukwili kudi kanyama wamwisaña chisumi namazu akwila nawu: “Hinyi wudi neyi iwu kanyama wamwisaña chisumi, nawa hinyi wunateli kulwa nindi njita?” 5 Kanyama wamwisaña chisumi amwinkeli wuswa wakudisamba niwakuhosha mazu akusawula Nzambi, nawa amwinkeli niwuswa wakukoña yuma yinakukeñayi yomweni hadi tukweji 42. 6 Nawa waasamini mukanwa kindi nakumuhosha Nzambi mazu akasawuntu, kusawula ijina dindi niiluña mwashakamañayi, kushilahu ninowu ashakamaña mwiwulu. 7 Amwitejeli kulwa njita nawakwakujila nakuyimika mushindu, nawa amwinkeli wuswa hadi akwanyichidi yejima, antu ejima, akwamadimi ejima niakwanyuza yejima. 8 Nawa antu ejima ashakama hamaseki akadifukula kudi yena. Kufuma tuhu haaliliwu chikuku chakaayi,* kwosi ijina hela dimu dahamajina awu dasonekawu mumuvuñilu waMwana kaMukoku ajahiliwu.

9 Dichi muntu wukweti matu, yatiyi. 10 Neyi kudi muntu watelela kuya muwunkoli, wakaya muwunkoli. Neyi kudi muntu wukujahañana nampoku yakabali,* niyena atela kumujaha nampoku yakabali. Aha dinu akwakujila dihakeñekañawu kwikala omika nikukuhwelela.

11 Kuhiñahu namweni kanyama mukwawu wamwisaña chisumi wafumineña hamaseki, nawa wadiña nanseñu jiyedi neyi jamwana kamukoku, ilaña watachikili kuhosha neyi chanzañombi. 12 Iwu kanyama wazatishili wuswa wejima wanona kanyama watachi wamwisaña chisumi iku yena nakutalaku. Nawa welishaña iseki niantu ashakamañahu kudifukula kudi kanyama watachi wamwisaña chisumi, owu wadiña nachilonda chakutwala kukufwa chakusukili. 13 Nawa wamwekeshaña yinjikijilu yamaneni, nikwilisha kesi kufuma mwiwulu nakuholokela hamaseki iku antu anakutalaku.

14 Waluwañeshaña antu ashakama hamaseki muloña wayinjikijilu yamwitejeliwu kukoña kumesu akanyama chisumi, hampinji yoyimu, walejaña antu ashakama hamaseki nindi aleñi chifwikija chakanyama wamwisaña chisumi wadiña nachilonda chamutapiliwu nampoku yakabali nawa wakoleli. 15 Nawa amwitejeli kwonena muuya* muchifwikija chanowu kanyama wamwisaña chisumi, kulonda chifwikija chakanyama wamwisaña chisumi, chihosheña nikujahisha antu ejima akaanaña kudifukula kudi chifwikija chanowu kanyama wamwisaña chisumi.

16 Washinjilaña antu ejima, alema niabula kulema, aheta niatuzweñi, asubuka nianduñu, nindi awa antu ayishi chinjikijilu hamakasa awu achidiilu hela hamahama awu, 17 nawa nindi kubuli kwikala muntu hela wumu wukulanda hela kulandisha, chiña hohu muntu wukweti chinjikijilu, ijina dakanyama wamwisaña chisumi hela wukweti naambala yejina daniwu kanyama. 18 Aha dinu dihakeñekaña kwikala namaana: Dichi muntu wukweti kashinshi yachindi naambala yakanyama wamwisaña chisumi, muloña hinaambala yamuntu, nawa naambala yindi hi 666.

14 Kuhiñahu, chinelili nami nitali, namweni Mwana kaMukoku nemani haMpidi yaZiyona hamu nawa 144,000 akweti ijina dindi niijina daTata yindi akusoneka hamahama awu. 2 Nawa natiyili chivumina chafuminini mwiwulu chatiyakeneña neyi chivumina champola yamenji amavulu nawa neyi chivumina chakudidima kwasweja; nawa izu dinatiyili datiyakeneña neyi dawañimbi adiña nakwimbila hamu tudada twawu. 3 Nawa adiña nakwimba kamina katiyakeneña neyi hikamina kakaha kumbidi yetanda nikumesu ayileñaleña yayumi yiwana nikwawakulumpi, nawa hikwadiña muntu hela wumu watwesheli kudiza oku kaminaku, chiña hohu a 144,000 alandawu kufuma hamaseki. 4 Awa hiyaditamishilihu nawambandaku; kafwampi hiyajiki. Awa diwu alondelaña Mwana kaMukoku kwejima kwayañayi. Wenawa ayilandili hakachi kawantu kwikala nyikabu yatachi yaNzambi niyaMwana kaMukoku, 5 nawa mutunwa twawu himwawanikewelihu mazu akudimbanaku; hiyakweti hakuyinkela muloñaku.

6 Namweni kañelu mukwawu watuukileña muluzwizu, wadiña nansañu yayiwahi yahaya nyaaka yakushimwina kudi antu ashakama hamaseki, akwanyuza yejima, akwanyichidi yejima, akwamadimi ejima niantu ejima. 7 Wadiña nakuhosha nezu datiyakana nindi: “Mutiyenu Nzambi woma nikumulemesha muloña mpinji yakusompesha kwindi yinashiki dehi, dichi difukulenu kudi Owu waleñeli iwulu, iseki, kaluñalwiji nituseloki twamenji.”

8 Kañelu wamuchiyedi walondelelihu, wahosheli nindi: “Babiloni Muneni nahumuki, nahumuki! Owu welishili akwanyuza yejima kunwa vinyu yakojejaña kutiya mpwila yawuvumbi windi!”

9 Kañelu mukwawu wamuchisatu wayilondeleli, wahosheli nezu datiyakana nindi: “Neyi kudi muntu wadifukulaña kudi owu kanyama wamwisaña chisumi nikudi chifwikija chindi nikwiteja kumusha chinjikijilu hehama dindi hela hachikasa chindi, 10 wakanwa nivinyu yakuzuwa kwaNzambi yakadi kufumpula yinahuñunwiniwu mukaapu* kakuzuwa Kwindi, nawa akamukabisha nakesi ninamulañi wakesi kamalola abutukaña kesi kumesu awañelu ajila nikumesu aMwana kaMukoku. 11 Antu adifukulaña kudi owu kanyama wamwisaña chisumi nikuchifwikija chindi nimuntu wetejaña kumusha chinjikijilu chejina danowu kanyama, wishi wafumaña hakesi kanakuyikabisha, wakakakumukaña haya nyaaka nanyaaka, nawa mwaana niwufuku hiyanookañaku. 12 Aha dinu akwakujila dihakeñekañawu kwikala omika, owu ahembaña nshimbi jaNzambi nikukakela chikupu kuchikuhwelelu chakukuhwelela Yesu.”

13 Nawa natiyili izu dafuminini mwiwulu nakunleja nadu, “Sonekaku neyi: Akweti muzañalu wowu afwilaña mudi Mwanta kufuma hayinu mpinji kuya nikumbidi. Spiritu yinahoshi chalala nayu, yilekenu anooki kunyidimu yawu yakola, muloña yuma yakoñeliwu yayilondelaña.”

14 Kuhiñahu, chinelili nami nitali, namweni ivu ditooka nawa washakamini hanodu ivu wamwekeneña neyi mwana kamuntu iku navwali chibaaba chawuru kumutu windi nawa muchikasa chindi mwadiña chikwakwa chatwa.*

15 Kañelu mukwawu wedikili kufuma mutembeli yajila, wabidikileña nezu datiyakana kudi owu washakamini hevu nindi: “Tachikaku kumuna nachikwakwa cheyi muloña mpinji yakumuna yinashiki dehi nawa mbutu yahamaseki yinahi nankashi.” 16 Owu washakamini hevu wazuyili chikwakwa chindi hamaseki nakumuna mbutu yahamaseki.

17 Nawa kañelu mukwawu cheñi wedikili kufuma mutembeli yajila yekala mwiwulu, niyena wadiña nachikwakwa chatwa.

18 Cheñi nawa kañelu mukwawu wedikili kufuma mukameña, nawa wadiña nawuswa hakesi. Wabidikili nezu datiyakana kudi owu wadiña nachikwakwa chatwa nindi: “Tachikaku kumuna nachikwakwa cheyi chatwa kulonda wupompeshi yizokofu yamuvinyu wahamaseki, muloña nyivinyu yawu yinahi dehi.” 19 Dichi kañelu wazuyili chikwakwa chindi hamaseki nakupompesha nyivinyu yahamaseki, nawa wanatilili mutondu wavinyu muwukamwinu weneni wavinyu wakuzuwa kwaNzambi. 20 Nyivinyu ayidatoleleli hanji yamusumba, mashi afumini muwukamwinu wavinyu ashikili kwakwihi nanyibulu* yakasiliwu atuwalu nawa mashi wenowu ashikili muchintampu chachilehi mabulu 1,600.*

15 Kuhiñahu, namweni chinjikijilu chikwawu mwiwulu, cheneni nawa chakuhayamisha chawañelu 7 adiña nayipupu 7. Iyi diyi yipupu yakukumishaku, muloña muniyi yipupu dimukumanina kuzuwa kwaNzambi.

2 Nawa namweni chuma chamwekeneña neyi kaluñalwiji kegilasi kadibomba nakesi, namweni ninowu amwimikili mushindu owu kanyama wamwisaña chisumi nichifwikija chindi ninaambala yejina dindi, anemani kwakwihi nakaluñalwiji kegilasi iku anakwati tudada twaNzambi. 3 Embileña kamina kaMosi nduñu yaNzambi nikamina kaMwana kaMukoku, nawu:

“Yehova Nzambi, Wañovu Jejima, nyidimu yeyi yabadika chikupu nawa yakuhayamisha. Mwanta wahaya nyaaka nanyaaka, njila jeyi jaloña nawa jalala. 4 Yehova, hinyi wukubula kukutiya woma nikulemesha ijina deyi chineli yeyi hohu washinshika kankaweyi? Muloña akwanyuza yejima akwinza nakudifukula kumesu eyi, muloña nshimbi jeyi jaloña jinasoloki hatooka.”

5 Hanyima yachumichi, namweni mwiluña dajila damwitenti* anenzununimu mwiwulu, hiitenti mwekala wunsahu waNzambi, 6 nawa añelu 7 adiña nayipupu 7, edikili kufuma mwiluña dajila iku anavwali mahina akadi majilu, akejima, nawa adipombekeli yikaba yawuru hantulu jawu. 7 Chileñaleña wumu wahadi yileñaleña yayumi yiwana, wenkeli añelu 7 yeña yawuru mwenzeli kuzuwa kwaNzambi wahandaña haya nyaaka nanyaaka. 8 Nawa mwiluña dajila mwenzeli wishi muloña wakulema kwaNzambi nimuloña wañovu jindi, nawa kwosi niwumu watwesheleña kwiñila omu mwiluña dajila sampu nichamanini yipupu 7 yawañelu 7.

16 Kuhiñahu, natiyili izu datiyakana dafumini mwiluña dajila dalejeli añelu 7 nadu: “Yenu muhuñunwini hamaseki kuzuwa kwaNzambi kudi muyeña yakunama 7.”

2 Kañelu watachi wayili nawa wahuñunwinini hamaseki yuma yadiña mucheña chindi chakunama. Kuhiñahu, maboñola asweja enjili hadi antu adiña nachinjikijilu chakanyama wamwisaña chisumi nawa adifukwileña kudi chifwikija chindi.

3 Kañelu wamuchiyedi wahuñunwinini mukaluñalwiji yuma yadiña mucheña chindi chakunama. Kuhiñahu, kaluñalwiji kabalumukili nakwikala mashi neyi mashi amuntu wafwa, nawa yileñaleña yejima yayumi* yamukaluñalwiji yafwili.

4 Kañelu wamuchisatu wahuñunwinini mutuloña nimutuseloki twamenji yuma yadiña mucheña chindi chakunama. Kuhiñahu, jejima jabalumukili mashi. 5 Natiyili kañelu wadiña nawuswa hamenji nakuhosha nindi: “Eyi wudiku nawa wadiñaku, Eyi washinshika, waloña nanochu chiwunasompi muniyi njila, 6 muloña apwekesheli mashi awakwakujila niawatuprofwetu, nawa wunayinki mashi kulonda anwi; chumichi chinayiteleli wena.” 7 Nawa natiyili izu dafumini mukameña nadu: “Eñañi, Yehova Nzambi, Wañovu Jejima, kusompesha kweyi kwalala nawa kwaloña.”*

8 Kañelu wamuchiwana wahuñunwinini hetena* yuma yadiña mucheña chindi chakunama, nawa itena adinkeli ñovu yakwocha antu nakesi. 9 Dichi iyena dasweja dayocheli antu, ilaña asawili ijina daNzambi wukweti wuswa haniyi yipupu, nawa antu wenawa hiyabalumukili munyichima yawu nakumulemeshaku.

10 Kañelu wamuchitanu wahuñunwinini hetanda dakanyama wamwisaña chisumi yuma yadiña mucheña chindi chakunama. Kuhiñahu, wanta windi weyilili bwi-i, nawa antu atachikili kutafunya madimi awu muloña wakutiya kukata, 11 ilaña amusawili Nzambi wamwiwulu muloña wakukata kwatiyileñawu nimaboñola awu, nawa hiyabalumukili munyichima yawu nakuleka nyidimu yawuku.

12 Kañelu wamu 6 wahuñunwinini hakaloña weneni Yufurati yuma yadiña mucheña chindi chakunama, kuhiñahu, menji amuniwu kaloña ominimu chawu-u kulonda aloñesheli chadimu njila yawanyanta akafumina kwaselelaña itena.*

13 Namweni mazu onenawu* asatu amwekeneña neyi yuula anakufuma mukanwa kachanzañombi nimukanwa kakanyama wamwisaña chisumi nimukanwa kakaprofwetu wakutwamba. 14 Kafwampi, awa mazu, himazu onenawu kudi andemoni nawa akoñaña yihayamisha, ayaña kudi anyanta ahanu hamaseki hejima nakuyipompeshela hamu kunjita yefuku deneni daNzambi Wañovu Jejima.

15 “Tiyenu! Inakwinza neyi chenzañayi ikombi. Wudi namuzañalu yowu muntu watonaña nikuhemba yakuvwala yindi yahewulu kuchiina wakenda nzekesi kulonda antu amoni nsonyi yindi.”

16 Nawa ayipompesheli hamu kwiluña datenañawu muchiHeberu nawu Amagedoni.*

17 Kañelu wamu 7 wahuñunwinini hampepela yuma yadiña mucheña chindi chakunama. Hohenohu mwiluña dajila mwatiyakeni izu datiyakana dafumini mwitanda nadu: “Ichi dinu kunahu!” 18 Dichi kwekalili kukena kwanzaji, mazu nikudidima nawa kwenjili mutentanshi weneni wabadikili nyitentanshi yejima yamwekanahu dehi kufuma hampinji yaleñeliwu antu hamaseki, iwu mutentanshi wadiña weneni nawa wañovu chikupu. 19 Musumba weneni wabalukili muyibalu yisatu, nawa nyisumba yawakwanyuza yahumokeli; Nzambi wamwanukili Babiloni Muneni kulonda yamwinki kaapu* mwadiña vinyu yandulu yakuzuwa kwindi yanwi. 20 Nawa yituutu yejima yatemokeli, mpidi nijena hiyajiwaniniku. 21 Kuhiñahu, nvula yamalola yeneni yenjili kufuma mwiwulu nakunokela antu, ilola dimu dalemeni neyi ntalenta* yimu, dichi antu amusawili Nzambi muloña wachipupu chanvula yamalola yayinokeleli, muloña chipupu chenochu chatoheli chikupu.

17 Kañelu wumu wahadi añe­lu 7 adiña nayeña yakunama 7, wenjili nakunleja nindi: “Inzaku kunu, nukukuleja wunsompeshi wakamusompeshawu mumbanda chivumbi muneni washakama hamenji amavulu, 2 owu anyanta ahamaseki elili nindi wuvumbi, nawa antu ashakama hamaseki wayikojejeli kusheta navinyu yindi yemenañaku yilwilu yindi yawuvumbi.”

3 Nawa wantwalili mwisaña nañovu yaspiritu. Kuhiñahu, namweni mumbanda nashakami hakanyama wamwisaña chisumi wuchinana nge-e wenzeli namajina akasawuntu nawa wadiña nanyitu 7 ninseñu 10. 4 Yenowu mumbanda wavwalili chakuvwala chawusombu nichichinana nge-e, wadiwahishili nayuma yawuru niyamalola alema wuseya niyamperola, nawa muchikasa chindi wakwatili kaapu kawuru* mwenzeli yuma yawuzondu niyuma yamajilu yawuvumbi* windi. 5 Hehama danowu mumbanda asonekelihu ijina dakujinda nawu: “Babiloni Muneni, mama yawayivumbi nimama yayuma yawuzondu yahamaseki.” 6 Nawa namweni nami yenowu mumbanda washeteli namashi awakwakujila ninamashi awayinsahu jaYesu.

Chinamumweni, nahayamini chikupu. 7 Dichi kañelu wañihwili nindi: “Muloñadi chiwunahayamini? Nukukuleja nsañu yakujinda yanowu mumbanda niyakanyama wamwisaña chisumi wunamweleki wudi nanyitu 7 ninseñu 10: 8 Kanyama wamwisaña chisumi iwamona wadiñaku, ilaña wudiku wanyi, hela chochu, katataka yafumi mwikela nawa akumujilumuna. Nawa antu ashakama hamaseki abula kusonekawu majina awu mumuvuñilu wawumi kufuma haaliliwu chikuku chakaayi,* akahayama chakamumonawu yenowu kanyama wamwisaña chisumi wadiñaku, ilaña wudiku wanyi, hela chochu, wakekalaku cheñi nawa.

9 “Yitoñojoka yamaana* yakeñekaña hakwila nawu muntu yatiyishi mwatalisha chumichi: Nyitu 7, yinakwimenaku mpidi 7 hashakama yenowu mumbanda. 10 Nawa kudi anyanta 7: Atanu anadimbuki dehi, wumu wudi kwoku, nawa mukwawu kanda yashiki; ilaña neyi nashiki dehi, wakashakama hohu kapinji kantesha. 11 Nawa kanyama wamwisaña chisumi wadiñaku, ilaña wudiku wanyi, diyi mwanta wamu 8, hela chochu, wafuma mudi anyanta 7, nawa nkumininaku akamujilumuna.

12 “Nseñu 10 jiwamona, jinakwimenaku anyanta 10 achidi kanda atambwili wanta, ilaña atambwilaña wuswa wakuyuula neyi anyanta hamu nakanyama wamwisaña chisumi hadi ora yimu. 13 Wenawa akweti yitoñojoka yoyimu, dichi amwinkaña kanyama wamwisaña chisumi ñovu niwuswa wawu. 14 Akalwa njita naMwana kaMukoku, ilaña chineli diyi Mwanta wawanyanta nawa Nkaaka yawankaaka, yena wakayimika mushindu. Cheñi nawa, owu adiyi nawu atambikawu, atondawu nawa ashinshika, akemikila hamu nindi mushindu.”

15 Wanlejeli nindi: “Menji iwamona hanashakami chivumbi, anakwimenaku antu, mazaza, akwanyuza niakwamadimi. 16 Nawa nseñu 10 nikanyama wamwisaña chisumi jiwamona, jikamuhela chivumbi, jikamukisañana, jikamuvuula, jakada nyisunyi yindi nawa jakamwocha wejima chikupu nakesi. 17 Muloña Nzambi nachishi munyichima yawu kulonda akoñi mwaya nkeñelu yindi, eñañi, kulonda ekali nayitoñojoka yoyimu yakuhana wanta wawu kudi yenowu kanyama wamwisaña chisumi sampu mazu aNzambi anashikijewi dehi. 18 Nawa mumbanda iwamona, nakwimenaku musumba weneni wukweti wanta wakuyuula anyanta ahamaseki.”

18 Hanyima yachumichi, namweni kañelu mukwawu wasulukileña kufuma mwiwulu, wadiña nawuswa wasweja chikupu nawa kulema kwindi kwatoñekeleli hamaseki. 2 Dichi wabidikili nezu datiyakana nindi: “Babiloni Muneni nahumuki, nahumuki! Nawa nekali iluña mwakushakama andemoni nawa mwakushakama aspiritu* atama ejima niyuma yejima yatama niatuda ahelawu kudi antu. 3 Muloña wavinyu yakojejaña kutiya mpwila yawuvumbi windi, yinakojeji akwanyuza yejima kusheta nawa anyanta ahamaseki elili nindi wuvumbi, akwakulanda nakulandulula endaña ahamaseki ekalili namaheta muloña wayuma yindi yayivulu yalema yabulaña kutiyilayi nsonyi.”

4 Nawa natiyili cheñi izu dikwawu dafumini mwiwulu nadu: “Antu jami, fumenu mudi yena neyi himunakukeña kudibomba munshidi jindiku nawa neyi himunakukeña kumona yipupu yimu yakamonayi yenaku. 5 Muloña nshidi jindi jinavuli kushika nimwiwulu, nawa Nzambi naanuki yilwilu yindi yaheña.* 6 Mwilenu neyi cheliliyi akwawu, eñañi, hayuma yinakoñiyi, enu mukoñelenu kayedi; yuma yinabombiyi kamu mukaapu,* enu mubombelenu kayedi. 7 Kwesekeja nanochu chadilemesheliyi yomweni nikuluña namaheta amavulu nankashi abulaña kutiyilayi nsonyi, munjila yoyimu dichimwatela kumukabisha nikumukojeja kudishona. Muloña watwalekañahu kuhosha mumuchima windi nindi: ‘Ami nidi mwanta wamumbanda, hinidi mumbanda nfwilaku nawa hinamba kadishonaku.’ 8 Diwu muloña waweni mwifuku dimu yipupu yindi yakenza, kufwa, kudishona ninzala yakapwelendendi nawa akamwocha wejima chikupu nakesi, muloña Yehova Nzambi wamusompesheli, himukwañovu.

9 “Nawa anyanta ahamaseki elili nindi wuvumbi* nawa ahandili nindi muyuma yindi yayivulu yalema yabulaña kutiyilayi nsonyi, akamudila nikudineña nankashi chakamonawu wishi wakuha kwindi. 10 Akemena hahalehi muloña wakutiya woma hakumona chinakukabakanayi, nawa akahosha nawu: ‘Chinatami nankashi, chinatami nankashi, eyi musumba weneni, eyi Babiloni musumba wañovu, muloña kusompeshewa kweyi kunenzi muora yimu!’

11 “Akwakulanda nakulandulula endaña ahamaseki, niwena akamudila nikudishona muloña hikwakekala cheñi muntu hela wumu wakalanda yuma yawu yakulandisha yejimaku, 12 yuma yejima yakulandisha yawuru, yasiliva, yamalola alema wuseya, yamperola, yamahina amawahi, yamahina awusombu, yamahina asenena, niyamahina achinana nge-e; niyuma yejima yatuñawu kufuma kunyitondu yevumba dadiwahi; niyuma yejima yatuñawu kufuma kumazewu anzovu nikufuma kunyitondu yasweja kuwaha, yawuneñu, yachikuñu niyamalola awulombu washiyashana; 13 niyasinamoni, niyuma yevumba dadiwahi yakuIndiya, niinsensi, manji evumba dadiwahi, libona, vinyu, manji amuolivi, wuña walembuluka, tidiku, añombi, anyikoku, tuwalu, matemba, anduñu niantu.* 14 Eñañi, nyikabu yayiwahi yiwafwilileña* nankashi yinakutemuki dehi, niyakuda yejima yayiwahi niyuma yasweja kuwaha yinakumani dehi, hiwukayiwana cheñiku.

15 “Akwakulanda nakulandulula endaña alandishileña yumiyi ekalili namaheta muloña wayena, akemena hahalehi muloña wakutiya woma hakumona chinakukabakanayi nawa akadila nikudishona, 16 nakuhosha nawu: ‘Chinatami nankashi, chinatami nankashi, eyi musumba weneni wavwala mahina amawahi, awusombu, achinana nge-e nawa wadikobeka yingelingeli yawuru, yamalola alema wuseya niyamperola, 17 muloña awa maheta amavulu anayikisañani muora yimu!’

“Nawa atupitawu ejima ajimbopolu niakwakwendela mujimbopolu ejima, akwakukalakala kujimbopolu niantu ejima azatilaña hakaluñalwiji kulonda awani mwakuhandila, emeneni hahalehi 18 nawa akalokeli nyitetu chamweniwu wishi wakuha kwindi nawu: ‘Musumbanyi wunateli kwesekana naniwu musumba weneni?’ 19 Adisukwilili lunkuñu hanyitu yawu nakukaloka nyitetu, kudila nikudishona nawu: ‘Chinatami nankashi, chinatami nankashi, musumba weneni, omu antu ejima adiña najimbopolu hakaluñalwiji mwekalililiwu namaheta muloña wamaheta indi, muloña anamukisañani muora yimu!’

20 “Enu mawulu, ninenu akwakujila, ninenu apostolu, ninenu atuprofwetu, zañalalenu muloña wachuma chinamumwekeni, muloña Nzambi nayisompesheliyi dehi!”

21 Kuhiñahu, kañelu wañovu wanyamwini ilola didi neyi ilola deneni dakuhalilaku nakudinatila mukaluñalwiji, nakuhosha nindi: “Ichi dichakamunatawu hamaseki mukunyakashana Babiloni musumba weneni, nawa hiyamba kamumona cheñiku. 22 Nawa mudi eyi himukatiyakana cheñi izu dawañimbi anakwimbila hamu tudada, akwakwimba yisanji, akwakwimba mapeleli niakwakuvumisha mpuñaku. Nawa mudi eyi himukawanika cheñi mukwawukalawenu wakalakalaña mudimu wudi wejimaku, cheñi nawa mudi eyi himukatiyakana cheñi chivumina chelola dakuhalilaku. 23 Mudi eyi himukatoñekela cheñi chejeji chenoñuku, nawa mudi eyi himukatiyakana cheñi izu dakalemba niizu dakankañaku; muloña antu jeyi akwakulanda nakulandulula endaña adiña antu alema ahamaseki, nawa akwanyuza yejima ayiluwañesheli nayilwilu yeyi yakupanda. 24 Eñañi, mudi yena mwawanikili mashi awatuprofwetu, awakwakujila nimashi awantu ejima ajahawu hamaseki.”

19 Hanyima yachumichi, natiyili chuma chatiyakeneña neyi izu datiyakana dezaza deneni mwiwulu. Ahosheli nawu: “Muhamekenu Ya!* Wamwinu nikulema niñovu jaNzambi yetu, 2 muloña kusompesha kwindi kwalala nawa kwaloña. Muloña yena namusompeshi dehi chivumbi muneni waluwañesheli hamaseki nawuvumbi* windi, nawa naditendi naniwu mumbanda muloña wamashi awanduñu jindi adi mumakasa indi.”* 3 Hohenohu ahosheli kamuchiyedi nawu: “Muhamekenu Ya!* Nawa wishi wafumaña kudi iwu chivumbi wafwindashanaña haya nyaaka nanyaaka.”

4 Nawa owu akulumpi 24 niyileñaleña yayumi yiwana adibukili heseki nakudifukula kudi Nzambi washakama hetanda nakuhosha nawu: “Ameni! Muhamekenu Ya!”*

5 Cheñi nawa, kwitanda kwafumini izu nadu: “Muhamekenuña Nzambi, enu anduñu jindi ejima mwamutiyaña woma, enu alema niabula kulema.”

6 Nawa natiyili chuma chatiyakeneña neyi izu dezaza deneni nawa neyi chivumina champola yamenji amavulu nawa neyi chivumina chakudidima kwasweja chikupu. Ahosheli nawu: “Muhamekenu Ya,* muloña Yehova Nzambi yetu Wañovu Jejima, natachiki kuyuula neyi mwanta! 7 Dichi tuzañalalenu, tutiyenu kuwaha chikupu nikumulemesha, muloña wulu waMwana kaMukoku wunashiki dehi nawa ñodindi nadiloñeshi dehi. 8 Yeniwu mumbanda anamwiteji kuvwala ihina dadiwahi, dakejima nawa dakadi majilu, muloña idi ihina dadiwahi demenañaku yilwilu yaloña yawakwakujila.”

9 Nawa wanlejeli nindi, “Sonekaku neyi: Adi namuzañalu wowu antu anatambikiwu kukuda kwamelela kwaMwana kaMukoku.” Cheñi wanlejeli nindi: “Awa diwu mazu aNzambi alala.” 10 Hohenohu nadibukili heseki kunyendu yindi nakudifukula kudi yena. Ilaña yena wanlejeli nindi: “Lekaku! Bayi wila ochuku! Ami nidi hohu mukwenu nduñu nawa wahadi anakweyi akweti mudimu wakushimuna wunsahu wansañu yaYesu. Difukuli kudi Nzambi! Muloña kushimuna wunsahu wansañu yaYesu dichuma chaletesha kwiikali wuprofwetu.”

11 Namweni mwiwulu munenzunuki, nawa chinelili nami nitali, namweni kawalu katooka. Owu washakaminihu amutenaña nawu Washinshika nawa Walala, wasompeshaña nikulwa njita mukuloña. 12 Mesu indi adiña neyi mulañi wakesi nawa hamutu windi hadiña yibañula yayivulu. Wadiña nejina dasonekawu dakadi kwiluka kudi muntu hela wumu chiña yomweni hohu, 13 wavwalili chakuvwala chahewulu chadiña* namashi, nawa amutenaña ijina dakwila nawu, Izu daNzambi. 14 Cheñi nawa, mazaza awakwanjita amwiwulu amulondeleleña hatuwalu tutooka, nawa avwalili mahina amawahi, atooka nawa akadi majilu. 15 Mukanwa kindi mwedikili mpoku yakabali yayilehi yatwa* yakutapa nachu akwanyuza, nawa wakayibiñaña nambwechi yachikuñu. Kubombelahu, wadatolaña muwukamwinu wavinyu wandulu yakuzuwa kwaNzambi Wañovu Jejima. 16 Hewulu dachakuvwala chindi, ­hekata dindi, hadiña ijina dasonekawu nawu, Mwanta wawanyanta nawa Nkaaka yawankaaka.

17 Namweni nawa kañelu nemani hetena,* dichi wabidikili nezu datiyakana kudi atuda ejima atuukaña muluzwizu* nindi: “Inzenu kunu, dipompeshenu hamu kukuda kwamelela kweneni kwaNzambi, 18 kulonda mudi nyijimba yawanyanta niyawakulumpi jamashidika niyawantu akweti ñovu niyatuwalu niyanowu endelañahu niyawantu ejima, yawantu asubuka niyawanduñu, yawantu alema niabula kulema.”

19 Nawa namweni yenowu kanyama wamwisaña chisumi nianyanta ahamaseki nimashidika awu anadipompeshi hamu kulonda alwi njita nanowu washakamini hakawalu niamashidika indi. 20 Dichi owu kanyama wamwisaña chisumi amukwatili hamu nanowu kaprofwetu wakutwamba wakoñeleña yinjikijilu kumesu indi yaluwañesheliyi nachu antu etejeli kuyisha chinjikijilu chakanyama wamwisaña chisumi ninowu adifukwileña kudi chifwikija chindi. Henohu achidi amomi, wejima wawu ayuumbilili mwijiya dakesi kabutukaña namulañi wakesi kamalola abutukaña kesi. 21 Ilaña ejima ashalilihu ayijahili nampoku yakabali yayilehi oyu yedikili kufuma mukanwa kanowu washakamini hakawalu. Nawa atuda ejima ekutili nanyijimba yawu.

20 Nawa namweni kañelu nakufuma mwiwulu iku nakwati nsapi* yakwikela niileñi deneni* muchikasa chindi. 2 Dichi wakwatili owu chanzañombi, yowu kapela wakushankulu, diyi Diyabolu nawa Satana, nakumukasa hadi yaaka 1,000. 3 Nawa wamuumbilili mwikela, wamwenzeleliku nikulamikaku chilamiku hewulu kulonda yabuli kutwesha kuluwañesha cheñi akwanyuza kushika nimpinji yakakuma yaaka 1,000. Hanyima yachumochu, atela kumukasununaku hakapinji kantesha.

4 Namweni matanda, nawa owu ashakaminihu ayinkeli wuswa wakusompesha. Namweni mawumi* anowu ajahiliwu* kukoola wunsahu washimwiniwu hansañu yaYesu nikukoola kuhosha hansañu yaNzambi, ninowu abulili kudifukula kudi kanyama wamwisaña chisumi hela kudi chifwikija chindi nawa abulili kwiteja kuyisha chinjikijilu hamahama awu nihamakasa awu. Wenowu ekalili amomi cheñi nawa ayuulili neyi anyanta hamu naKristu hadi yaaka 1,000. 5 (Afu ejima ashalilihu hiyekalili amomi cheñiku, sampu nichamanini yaaka 1,000.) Iku diku kusañuka kwatachi. 6 Wudi namuzañalu nikujila yowu muntu wakekala muchibalu chakusañuka kwatachi; kufwa kwamuchiyedi hikudi nawuswa hadi wenawaku, ilaña akekala atupristu aNzambi niaKristu, nawa akayuula neyi anyanta hamu nayena hadi yaaka 1,000.

7 Chakamana hohu yaaka 1,000, Satana akamukasununa kufuma mukaleya, 8 nawa wakaya nakuluwañesha akwanyuza adi kumawombu awana eseki, atenañawu nawu Gogi niMagogi, nakuyipompesha hamu kunjita. Kuvula kwawu kudi neyi kuvula kwawusekulula wakukaluñalwiji. 9 Nawa apalañeneni kwejima kwakumina iseki nikukuchika chilombu chawakwakujila nimusumba wakeñewa. Ilaña kesi kafumini mwiwulu nakuyijilumuna. 10 Nawa Diyabolu wayiluwañesheleña, amuumbilili mwijiya dakesi nimumulañi wakesi kamalola abutukaña kesi, omu mwadiña kanyama wamwisaña chisumi nikaprofwetu wakutwamba; nawa akayikabishaña* mwaana niwufuku haya nyaaka nanyaaka.

11 Namweni itanda deneni ditooka niNowu washakaminihu. Iseki niiwulu jatemukili kumesu indi nawa hijawanikilihu cheñiku. 12 Namweni afu alema niabula kulema anemani kwitanda, nawa kwadiña nyivuñilu yakuvuñulula dehi. Ilaña muvuñilu wukwawu awuvuñulwili; wenowu wadiña muvuñilu wawumi. Dichi afu ayisompesheli kushindamena hayuma yasonekeliwu munyivuñilu kwesekeja nanyidimu yawu. 13 Kaluñalwiji kalubwili afu adiñamu, kufwa niIjamu* nijena jalubwili afu adiñamu, nawa ayisompesheli hamuntu-hamuntu kwesekeja nanyidimu yawu. 14 Kufwa niIjamu* ajuumbilili mwijiya dakesi. Idi ijiya dakesi demenañaku kufwa kwamuchiyedi. 15 Kubombelahu, muntu wejima wabulili kusonekawu mumukanda wawumi, amuumbilili mwijiya dakesi.

21 Nawa namweni iwulu dadiha niiseki dadiha; muloña iwulu dadikulu niiseki dadikulu jinahiti dehi, nawa kaluñalwiji hikadiku cheñiku. 2 Namweni nawa musumba wajila, Yerusalema Yayiha yinakusuluka kufuma mwiwulu kudi Nzambi iku anayiloñeshi neyi kankaña anavwikiwu kulonda yatambwili nfumwindi. 3 Hohenohu natiyili izu datiyakana dafumini mwitanda nadu: “Tiyaña! Itenti daNzambi didi* hamu nawantu, nawa yena wakashakama nawu, niwena akekala antu jindi. Nawa Nzambi yomweni wakekala nawu. 4 Wakakombola madilu ejima kumesu awu, kufwa hikwakekalaku cheñiku, nawa hikwakekala cheñi kudishona, kudila* hela kukataku. Yuma yakusambila yinahiti dehi.”

5 Nawa Owu washakamini hetanda wahosheli nindi: “Talaña! Inakwilisha yuma yejima yiikali yayiha.” Cheñi wahosheli nindi: “Sonekaku, muloña awa mazu atelela kuyikuhwelela nawa alala.” 6 Nawa wanlejeli nindi: “Yinashikijewi dehi! Ami yami Alefwa nawa yami Omega,* ami yami kutachika nawa yami insa. Muntu wunatiyi mpwila, ami nakamwinka menji awaana* kufuma kukaseloki kamenji awumi. 7 Muntu wejima wunakwimika mushindu wakaswana yumiyi, ami nakekala Nzambi yindi nawa yena wakekala mwanami. 8 Ilaña akwawoma, antu abula chikuhwelelu, antu akoñaña yuma yawuzondu, akwakujaha antu, ayivumbi,* akwakupanda, akwakupesha niakwakutwamba ejima, wejima wawu akayinatila mwijiya dabutukaña kesi nimulañi wakesi kamalola abutukaña kesi. Chumichi chinakwimenaku kufwa kwamuchiyedi.”

9 Kañelu wumu wahadi añe­lu 7 owu adiña nayeña yakunama 7 yenzeli nayipupu yakukumishaku 7, wenjili nakunleja nindi: “Inzaku, nawa nukukuleja kankaña, ñoda Mwana kaMukoku.” 10 Dichi wantwalili kumpidi yeneni nawa yayilehi nañovu yaspiritu, nawa wanlejeli musumba wajila Yerusalema wasulukileña kufuma mwiwulu kudi Nzambi 11 wukweti kulema kwaNzambi. Chejeji chanowu musumba chadiña neyi ilola dasweja kulema wuseya, nawa neyi ilola dajasiperi dinakukejima neyi ilola dakrisitali. 12 Musumba wenowu wadiña nampwembu yeneni nawa yayilehi, wadiña nayiisu 12 niañelu 12 emeneña haniyi yiisu, hayiisu yeniyi asonekelihu majina anyichidi 12 yawanyana kaIsarela. 13 Kukabeta kakumusela kwadiña yiisu yisatu, kukabeta kakuchimunswa kwadiña yiisu yisatu, kukabeta kakuchidiilu kwadiña yiisu yisatu nawa kukabeta kakumujika kwadiña yiisu yisatu. 14 Mpwembu yamusumba yadiña cheñi namalola 12 achikuku, nawa hanowu malola asonekelihu majina 12 awapostolu 12 aMwana kaMukoku.

15 Dichi owu wahosheleña nanami wakwatili chesekelu cheteti dawuru kulonda yapimi musumba niyiisu yawu nimpwembu yawu. 16 Musumba wenowu wadiña nambadi jiwana jesekana, nawa mukuleha kwawu nimuwihi mwadiña mwesekana. Dichi wapimini owu musumba neteti, wadiña mabulu 12,000; mukuleha kwawu nimuwihi nimuchiminu mwejima mwesekeni. 17 Nawa wapimini mpwembu yanowu musumba, yadiña makyubiti 144, kwesekeja namwaya kupima kwawantu, iku kupima dikwapimini nikañelu. 18 Mpwembu yadiña yakutuña najasiperi nawa musumba wadiña wawuru yakutookesha neyi igilasi. 19 Yikuku yampwembu jamusumba, ayiwahishili namalola ashiyashana asweja kulema wuseya: chikuku chatachi chadiña chajasiperi, chamuchiyedi chadiña chasafira, chamuchisatu chadiña chakalisidoni, chamuchiwana chadiña chaemarodi, 20 chamuchitanu chadiña chasadonikisi, chamu 6 chadiña chasaridini, chamu 7 chadiña chakisoliti, chamu 8 chadiña chaberili, chamu 9 chadiña chatopaza, chamu 10 chadiña chakirisoparasi, chamu 11 chadiña chayakinita, chamu 12 chadiña chaametisiti. 21 Nawa yiisu 12 yadiña yamperola 12; chiisu-hichiisu achituñili namperola yimu. Nawa mukwakwa weneni wamusumba wadiña wawuru yakutookesha neyi igilasi dahanuka nzwa-a nikwishinadi.

22 Munowu musumba hinamwenimu tembeliku, muloña Yehova Nzambi Wañovu Jejima niMwana kaMukoku diwu ekala tembeli yawu. 23 Nawa musumba wenowu hiwakeñekaña itena* hela kakweji kutoñekelamuku, muloña kulema kwaNzambi dikwatoñekelañamu, nawa inoñu dawu hiMwana kaMukoku. 24 Akwanyuza akendaña muchejeji chanowu musumba, nawa anyanta ahamaseki akaletelamu kulema kwawu. 25 Yiisu yawu hiyakayenzela hela chanti namwaanaku, muloña mwenomu himwakekala wufukuku. 26 Nawa akaletelamu kulema nikalemesha kawakwanyuza. 27 Munowu musumba himwakeñila chuma chajilolawu hela muntu wakoñaña yuma yawuzondu nawa wadimbanañaku; ilaña mwakeñila hohu antu asonekawu mumuvuñilu wawumi waMwana kaMukoku.

22 Nawa kañelu wanlejeli kaloña kamenji awumi, akejima neyi ilola dakrisitali kafumini mwitanda daNzambi nidaMwana kaMukoku 2 nakuhita hakachi kamukwakwa weneni wamusumba. Kwishinadi niishinadi dakaloña kwadiña nyitondu yawumi yasoñeleña nyikabu 12, yasoñeleña nyikabu yayu hakakweji-hakakweji. Nawa mafu anoyu nyitondu adiña akuuka nachu akwanyuza.

3 Nawa muniwu musumba himwamba kekala cheñi ishiñu hela dimuku. Ilaña itanda daNzambi nidaMwana kaMukoku dakekalaña muniwu mumusumba, nawa anduñu jaNzambi akamukalakelaña mudimu wajila; 4 akamonaña kumesu indi, nawa ijina dindi dakekala hamahama awu. 5 Cheñi nawa, wufuku hiwakekalamu cheñiku, hiyakakeñaña nawa cheñi chejeji chenoñu hela kutoñeka kwetenaku,* muloña Yehova Nzambi wakayitoñekelaña chejeji, nawa akayuula neyi anyanta haya nyaaka nanyaaka.

6 Wanlejeli nindi: “Awa mazu atelela kuyikuhwelela nawa alala; eñañi, Yehova Nzambi woneneni atuprofwetu, natemeshi kañelu kindi kulonda yaleji anduñu jindi yuma yikukeña kumwekana katataka. 7 Tiyaña! Inakwinza swayi-swayi. Wukweti muzañalu yowu muntu wunakuhemba mazu awuprofwetu amuniwu muvuñilu.”

8 Ami Yowanu, yami natiyileña nikumona yumiyi. Chinatiyili nikuyimona, nadibukili heseki kunyendu yanowu kañelu wanlejeli yumiyi kulonda nidifukuli kudi yena. 9 Ilaña yena wanlejeli nindi: “Lekaku! Bayi wila ochuku! Ami nidi hohu mukwenu nduñu nawa wahadi anakweyi atuprofwetu niwahadi owu anakuhemba mazu amuniwu muvuñilu. Difukuli kudi Nzambi.”

10 Wanlejeli cheñi nindi: “Bayi wulamika chilamiku hanawa mazu awuprofwetu amuniwu muvuñiluku, muloña mpinji yatoñolawu yidi kwakwihi. 11 Muntu wabula kuloña, yatwalekihu nakubula kuloña kwindi, nawa muntu wakoñaña yuma yawuzondu, yatwalekihu nakukoña yuma yawuzondu; ilaña muntu waloña, yatwalekihu nakuloña kwindi, nawa mukwakujila, yatwalekihu nakujila kwindi.

12 “‘Tiyaña! Inakwinza swayi-swayi, nawa wufwetu wunahanaña nidi nawu, kulonda nifweti muntu-himuntu kwesekeja namudimu windi. 13 Ami yami Alefwa nawa yami Omega,* ami yami mutachi nawa yami nkuminina, yami kutachika nawa yami insa. 14 Adi namuzañalu wowu antu akosaña nyinkukumba yawu kulonda atweshi kwikala nawuswa wakuda nyikabu yakunyitondu yawumi, nawa kulonda atweshi kwiñila mumusumba kuhitila muyiisu yindi. 15 Hanji yamusumba hadi atuwa,* akwakupanda, ayivumbi,* akwakujaha antu, akwakupesha niantu ejima akeña kutwamba nawa atwambaña.’

16 “‘Ami Yesu, natemeshi kañelu kami yashimuni wunsahu wayumiyi kudi enu kulonda yipompelu yihetelimu. Ami yami muji wamudi anyana kaDavidi nawa yami ntanda wakumacha watoñeka.’”

17 Nawa spiritu nikankaña ahoshaña nawu, “Inzaku!” nawa muntu wejima wunakutiya yahoshi nindi “Inzaku!” nawa muntu wejima wunatiyi mpwila yenzi; muntu wejima wunakeñi, yatambuli menji awumi awaana.

18 “Inakushimuna wunsahu kudi muntu wejima watiyaña mazu awuprofwetu amuniwu muvuñilu nami: Neyi muntu yabombelaku kuyumiyi, Nzambi niyena wakamubombelahu yipupu yasonekawu muniwu muvuñilu; 19 nawa neyi muntu yafumishaku kumazu amuniwu muvuñilu wawuprofwetu, Nzambi hakamwiteja kutambula yuma yayiwahi yasonekawu muniwu muvuñiluku, dikwila nawu hakamwiteja kuda nyikabu yakunyitondu yawumi hela kumwiteja kwiñila mumusumba wajilaku.

20 “Owu washimunaña wunsahu wayumiyi nahoshi nindi, ‘Chalala, inakwinza swayi-swayi.’”

“Ameni! Inzaku, Mwanta Yesu.”

21 Luwi lwasweja lwaMwanta Yesu lwiikali nawakwakujila.