Mukanda Wami Wampanji Jamu Bayibolu
IWU himukanda wampanji jalala. Anajifumishi muBayibolu, mukanda wabadika nyikanda yejima yahanu heseki. Mpanji jeniji jikukuleja nsañu yanyaka yamukaayi kufuma tuhu hatachikiliyi Nzambi kuleña yuma nakushika kumafuku etu alelu. Jinakushimuna cheñi chakanayi Nzambi kwila kumpinji yakumbidi.
Iwu mukanda wukukwinka maana kutalisha hayuma yekala muBayibolu. Mukanda weniwu wunakushimuna hadantu amuBayibolu nihayuma yeliliwu. Wunakutuleja cheñi kuchiñeja kweneni kwahanayi Nzambi kudantu kwawumi wahaya nyaka muparadisa heseki.
Muniwu mukanda mudi jimpanji 116. Anajitanjiki muyibalu yitanu nayisatu. Ifu dakutachika kwachibalu chidi chejima dinakulumbulula mukwihihisha yuma yidi munochu chibalu. Mpanji jeniji jidi mundandanda kwesekeja nampinji yamwekenenimu yumoyu munsañu yanyaka. Ichi chikukwashaku kwiluka mpinji yamwekeni iyi yuma nayuma yikwawu, kwesekeja nansañu yanyaka.
Mpanji jeniji anajishimuni mwidimi dapela. Amavulu hadenu anyiki mukutwesha kujitaña enu aweni. Enu anvwali ninenu mukumona kwila nenu anyanenu achidi anyanya akutiyaña kuwaha neyi mukuyitañilaña mpanji jeniji mpinji yejima. Mukuwana neyi iwu mukanda wukweti yuma yayivulu yakuyitiyisha kuwaha anyiki hamu tuhu niakulumpi.
Nsona jamuBayibolu anajisoneki kunsa yampanji himpanji. Munakoleshewi kutaña iji nsona jamuBayibolu hanashindameni mpanji jeniji. Neyi munamanishi kutaña mpanji, hitulukenu cheñi mumalwihu akudiza ayina mpanji imukuwana hanyima yaMpanji 116 nikweseka kuwana kwakula.