CHIBALU 7
Kusañuka kwaYesu Nakushika niKukukasewa kwaPawulu Mukaleya
Hefuku damuchisatu hanyima yakufwa kwindi, Yesu amusañwili. Hanodu ifuku wamwekeni kudi atumbanji twindi mapampa katanu mukushiyashana kwampinji. Yesu watwalekelihu kumwekana kudi wena hadi mafuku 40. Kulondelahu, henohu atumbanji twindi amakwawu anakumutala, Yesu wakandamini mwiwulu. Chimunahiti mafuku ikumi Nzambi wechilili spiritu yajila hadi atumbanji twaYesu adiña nakutalila muYerusalema.
Chimunahiti mafuku, ayilumbu jaNzambi ayishili apostolu mukaleya, ilaña kañelu wayifumishilimu. Kambanji Setefwanu amwasili malola kudi akwakudimbulula ninochafwiliyi. Ilaña twadizaña ochu Yesu chatondeliyi wumu hakachi kanawa akwakudimbulula kwikala kambuñindi walema, nawa wekalili kapostolu Pawulu. Chimwahitili yaaka yisatu nachikunku hanyima yakufwa kwaYesu, Nzambi watemesheli Petulu kuya nakumushimwina Konelisu niamwitala dindi abulili kwikala aYudeya.
Kwakwihi nayaaka 13 yahitilihu Pawulu watachikili lwendu lwindi lwatachi lwakushimwina. Halwendu lwindi lwamuchiyedi Timotewu wayili naPawulu. Tukudiza ochu Pawulu niakwakwenda nindi chadiñawu nampinji yamuzañalu hakumukalakela Nzambi. Nkumininaku Pawulu amushili mukaleya muRoma. Chimwahitili yaaka yiyedi amufumishili mukaleya, ilaña amushilimu cheñi mukaleya nakumujaha. Yuma yidi MUCHIBALU 7 yamwekeni hampinji yakushika kwakwihi nayaaka 32.